Don ni Margaret  * asangara mulong anau amband ni majuku mau eza kuyital. Padingau pakimbinau kudia yakudia pamwing, Margaret, wileja pakur shikol ya kwisuk wading wadioshau kal pa mudimu winou, wisuka makaroni ni supu ulimina, yakudia yading yikatinau nakash kudi ijukurend amakundj aad.

Pashakamau antu awonsu, Margaret weza ni chibakud ni wachiteka pakach ni pakach pa tebur. Waburila mufunyik ni waziya pamanay anch mu chibakud mwading kwau ching sos wa supu muswan ulimina. Margaret wavuramena kutekamu makaroni, yom ya kuwapish nich sos winou! *

Chikalap nchik uvud wa mivu ap ronganyin tukweta, etu awonsu tukat kurumbuk. Kurumbuk kwinoku kukutwish kwikal mazu makad kutongin ap chom chiwamp twasalang pa chisu chiyimp, ap pamwing ap twading ni kampuw ka chom kanang ap twachivuramenang mu manangu metu. Mulong wak kurumbuk kukat kushikenang? Mutapu ik tukutwisha kurish nich kurumbuk? Ov, tukutwish kwipuk kurumbuk? Kwikal ni chitongijok chiwamp piur pa kurumbuk kukutukwash kwakul ku yipul yiney.

CHITONGIJOK CHETU NI CHA NZAMB PIUR PA KURUMBUK

Anch twasal yom yiwamp, tukat kwitiy kutubaz ni musangar ni kujikitish tumena anch kutuwanyididin. Anch twarumbuk, ap anch twasadinangamwap ap anch antu akwau kamanangap, ov, tukutwish kwitiyin anch twasalang yom yiyimp? Kusal mwamu kwitin kwikepish.

Anch twitongin ayinetu nakash, tukutwish kusal usu wa kupipej kurumbuk kwetu, ni kulik kwitiyin ap kutadik anch twasalangap mwamu. Kusal mwamu kukat kulet yisu yivud yibudikin yiyimp. Milong yikutwish kushal yakad kupwish, ni akutwish kuyipupinamu antu akwau pakad mulong. Ap anch twalik kwitiyin kurumbuk kwetu katat, pakwez tufanyidin kulam mu manangu anch mu kusut kwa machuku, “muntu ni muntu ukez kwirumburilap amwinend kudi Nzamb mulong wa yom yawonsu yasalay.”—Rom 14:12.

Nzamb ukwet chitongijok chiwamp piur pa kurumbuk. Amulejen Nzamb mu mukand wa Kuseng anch “udi mwin riy ni ranaken”; ndiy “kakutwishap kutupup chikupu ap kujiman machuku mawonsu.” Wij anch antu adi akad kuwanyin ni wij mutapu tuvadikining akad kuwanyin, “ndiy ukat kuvurik anch, etu tudi kwetu rufunfut.”—Kuseng 103:8, 9, 14.

Chikwau kand, mudi Tatuku wa riy, Nzamb ukatin anch, etu anend, tumana kurumbuk mudi mutapu mumeningay ndiy. (Kuseng 130:3) Dizu diend ditwinkishin kwa rukat yiyul yivud ni ya ukwash mulong wa kwijik mutapu wa kusal anch twarumbuk ni anch antu akwau arumbuk.

MITAPU YA KURISH NICH KURUMBUK

Anch kwikal kurumbuk, yisu yivud antu akat kusutish chisu chijim ni usu wau mulong wa kuyifish  nich antu akwau ap kutadik piur pa yom yalondangau ap yasalangau. Pakwez, anch mazu mey ulondina mamusal muntu mukwau nayimp, ufanyidin kwit dilikishin, kurijek yom, ni kulam urund wey. Ov, wasadin chom chiyimp ni chom chinech chakusadin ey amwiney nau antu akwau nayimp? Pa ndond pa kwifish nich amwiney ap kuyifish nich antu akwau, mulong wak ulikina kusal usu wa kurijek yom yiney? Kudandamen kulond anch muntu kampand ndiy ufila nich, yom yiney yikusal anch mulong winou udandamena kuya kurutu ni ukujimb. Pakwez, ilejina ku yom yiney, wapish yom yiney, ni sal yom yifanyidina kusal.

Anch muntu mukwau warumbuk, chiswapeling nakash kudi etu kumusadin mu mutapu uyimp. Chiwapin nakash kulondul chiyul cha Yesu Kristu palonday anch: “Sal yom kudi antu akwau mudi muukatila ing niyau akusadilang ey.” (Mateu 7:12) Anch warumbuk, ap anch kurumbuk kwinoku kudi kukemp, ukakat kamu anch antu akwau akusadin nich ranaken ap avuramen kamu kurumbuk kwey kwinoku. Chawiy, mulong wak niyey ukutwishap kusal usu wa kumekesh ranaken mudi riner kudi antu akwau?—Efes 4:32.

MBIL JIKUTWISHA KUKWASH KUKEPISH KURUMBOK

Ndinguril umwing urumburil anch kurumbuk kukat kudiokal ku “kurumburish kuyimp, kulik kwijik yom nawamp, ap ku kadiu.” Tufanyidin kwitiyin anch mu yisu kushalijan, muntu ni muntu ukat kumekesh chom chimwing ap yom yivud pakach pa yom yiney. Pakwez, tukukepish kurumbuk anch twasadin mbil ja pa dishin jidia mu Bibil.

Mbil yimwing pa mbil yiney yidi mu Jinswir 18:13, tutangin anch: “Anch muntu wakul wakad kal kutesh, udi usup wend ni usany.” Chawiy, kwitekin chisu cha kutesh yom yawonsu ni kutongin pa chakul chey kukukwash kulik kulond mazu mayimp ap kusal yom yiyimp. Ronganyin rezining ku kutesh yom nawamp, riding ra usey mulong wa kwipuk kurumburish kuyimp—ni kwipuk kurumbuk.

Mbil yikwau ya Bibil yilondin anch: “Anch chikasikenip ching kudi en, ikalany ni chisambu nau antu awonsu.” (Rom 12:18, TMK) Sal usu wey wawonsu mulong wa kuletish chisambu ni kwikal mwin kwovijan nau antu akwau. Pausadina nau antu akwau, ikal mwin kuyitongin, ni ikal nich kalimish ni sal usu wa kuyijikitish ni kuyikasikesh. Mu kusal mwamu, chikutwish kwikal chiswapela kulikishin ap kuvuramen mazu ni yisal yakad kutongin, ni tukutwish kand kupwish milong yikash ni kuyivuramen mu mutapu uwamp.

Tal anch ukutwish kwilej yom yiwamp kusutin kurumbuk kwinoku. Pa ndond pa kwiyingish nich mulong wa yom wasalang ap walondang, ijik anch winou udi mutapu weyey amwiney wa kukudish mikadil yiwamp. Ov, pamwing ap ukwet kuswir kwa kushimpish muchim nakash, kwa kwikal muntu muwamp, ap kwa kwikal ni mwikadil wa kwilam? Chad chidi nchik piur pa kwitudish, chisambu ni rukat? (Galatia 5:22, 23) Kupwa chad, ukutwish kwijik yom ukulika kusal chisu chikwau. Pa ndond pa kwipuk yom wasalang, sal usu wa kulik kutongin nakash piur pa mutapu ukusadina yom yiney. Kusal maswimbu kukutwish kukwash kukepish yitongijok.

TUKUTWISH KUTANINAMU MU KWIKAL NI CHITONGIJOK CHIWAMP

Kwikal ni chitongijok chiwamp piur pa kurumbuk kukutwish kutukwash kurish mu mutapu uwamp anch kurumbuk kwashiken. Tukwikal mu chisambu nakash etu ayinetu ni tukwikal kand mu chisambu nau antu akwau. Anch twasal usu wa kwilejin ku kurumbuk kwetu, tukwikal ni manangu ni tukwikal kand antu akatishena. Tukwikalap ni ushon nakash ni tukwitonginap nayimp. Kwijik anch antu akwau niyau arishin ni kurumbuk kwau, kukusal anch twikala nau piswimp. Cha usey nakash chidi anch tukutaninamu mu kwilej kwimburij rukat ra Nzamb ni mutapu ukatay kulikishin kwa kwikatin.—Kolosay 3:13.

Ov, kurumbuk kwasalay Margaret, twambambinang kwisambishil oku, kwayipisha dichuku dia kumanijan mu dijuku? Bwat. Chom chinech chayisipisha antu awonsu, pakampwil Margaret, ni asangera yakudia—pakad makaroni! Mu kusut kwa mivu, ijukurend aad arumburila rusangu riner rasadika ra yakudia yakad kuvuramen mu dijuku diau kudi anau ni avurika yom yiwamp piur pa angakau. Ap mwamu, kwading kwau kurumbuk!

^ par. 2 Majim mamwing amaswimpin kal.

^ par. 3 Makaroni ni sos wa supu ulimina muswan yiding yakudia yisukiningau pamwing, akat kusambel bil kwisuk makaroni makad kukatwol panrau, kupwa asal sos chad ayibomb.