Mamiliyon ma antu a mu mangand mawonsu akat kwitiyij anch chinshakur cha Nowel udi musambu wa kuvadik kwa Yesu Kristu. Ov, watongidinap kal piur pa in Kristu a mu mivu chitot ya kusambish, ading piswimp ni Yesu anch asalang musambu winou? Ni wij yom yilondinay Bibil piur pa misambu ya machuku ma kuvadik? Kutan yakul ku yipul yiney kukutwish kutukwash kwijik anch Nowel udi musambu wa in Kristu.

Chakusambish, Bibil kalejenap dichuku dia ngond dia musambu wa kuvadik kwa Yesu ap dia muntu mukwau ushinshamena wamwifukwilang Nzamb. Mu Bibil mudi kwau yilakej ya antu aad asala misambu yau ya dichuku dia kuvadik. Kwikil ap umwing pakach pau wading mwin kumwifukwil Yehova, Nzamb wa mu Bibil, ni machuku masalau misambu yau ya dichuku dia kuvadik kwasadika yom yiyimp. (Disambishil 40:20; Marko 6:21) Kukwatijan ni Encyclopédie umwing (Encyclopædia Britannica), in Kristu a kusambish kasalangap kwau “misambu ya apagan ya machuku ma kuvadik.”

Ov, Yesu wavadika dichuku ik?

Bibil kalondinap kamu chakin dichuku diavadikay Yesu. Buku wa Cyclopedia wa McClintock ni Strong ulondin anch: “Dichuku dia kuvadik kwa Kristu diadingap kwau mu Mansuk Masu, ap didiap kand mu mikand yikwau.” Chakin kamu, anch Yesu wakata anch in kwilejend asala musambu wa dichuku diend dia kuvadik, ing wakimba kusal chakin kamu anch in kwilejend ijika dichuku diavadikay.

Cha kaad, Bibil kalondinap anch Yesu ap in kwilejend asala musambu wa Nowel. Kukwatijan buku utazukinau anch La Nouvelle encyclopédie catholique, kusal musambu wa Nowel ading akufundin chakusambish “mu Chronographe wa Philocalus, buku wa in Rom ukweta yom pamwing ap yafundau mu muvu wa 336 [C.C.].” Chakin kamu yom yiney ayifunda papwishau kufund Bibil mwawonsu ni kwading kwasuta kal yitot ya mivu kupwa kwa Yesu kudiokal panap pansh. Chawiy, McClintock ni Strong afunda anch “musambu wa Nowel udiokilap kudi Nzamb, ni udiap kwau mu Mansuk Masu.” *

Yesu wayileja in kwilejend kuvurik kusal musambu ik?

Mudi Mulej Mujim, Yesu walonda patok yom yakatay anch in kwilejend asala, ni yom yiney yidi mu Bibil. Pakwez, kusal musambu wa Nowel udiap pakach pa yom yiney. Mudi mukatiningay mulej wa ku shikol anch in kwilejend asadin yom yiyilejinay, Yesu wakata anch in kwilejend ‘alondula mazu mafundilau pakad kuwejinaku’ mu Mifund Yitumbila.—1 Korint 4:6.

Ku mutambu ukwau, kudi musambu umwing wa usey nakash wading wijau nakash kudi in Kristu a kusambish—Kuvurik ap Chivurikish cha rufu ra Yesu. Yesu amwinend wayileja in kwilejend chisu chifanyidinau kusal musambu winou ni wayileja mutapu wa kuusal. Mbil jinej jayikinshay patok, pamwing ni dichuku diafay, yom yiney yidi mu Bibil.—Luka 22:19; 1 Korint 11:25.

Mudi mutwamana kal, Nowel udi musambu wa dichuku dia kuvadik, ni in Kristu a kusambish kasalangap musambu winou wa yinshakur ya apagan. Chikwau kand, Bibil kalondinap anch Yesu ap muntu mukwau wasala musambu wa Nowel. Mulong ij yom yiney, mamiliyon ma in Kristu a pa mangand mawonsu ij anch Nowel udiap musambu wa awiy.

^ par. 6 Mulong wa kwijik yom yivud piur pa disambishil dia yinshakur ya Nowel, tal mutu wa mulong ulondina anch “Yipul ya in Kutang . . . Ov, Wisu Uyakin Piur pa Nowel?” mu Chinong cha Kalam cha 1 Ngond wa 12, 2014, chidiaku kand pa kapend ka www.jw.org.