Mwawiy mwiyovay changadim ukweta mivu 13 pamwinkishau chipan cha kabu muwamp. Mband umwing watwisha mudimu wend wa kwisak walonda anch ordinater wamwinkishau kudi tatukwend chisu chadingay ku shikol ya piur chading chipan chaswimpa mwom wend. Ni ikundj umwing uchidia musu mu uruw wamana anch kart wasalay mukajend ku makas kapamp ka kusambish kavurukau musambu wau wa uruu chading chipan cha usey nakash chatambulay.

Muvu ni muvu, antu avud akat kusutish chisu ni usu wau mulong wa kukimb yipan ya “usey nakash” mulong wa kuyinkish arund nau ni anamakwau mu yisu ya pakampwil. Ni antu avud akukat kuyilej yom mudi yatwafundang kwinsambishin oku. Chidi nchik piur peyey? Ov, ukukat kupan ap kutambul yipan yisangareshina kamu nakash?

Yom yiney yikutwish kusangaresh nakash, kadiap kwau ching mulong wa usu ukweta chipan chinech kudi muntu uchitambwila, pakwez chidi mulong kand wa mutapu ukutwishay kwov muntu uchipanina. Pa yiney yawonsu, Bibil ulondin anch: “Chiyukish cha mwin kupan chipandakenamu cha mwin kutambul.” (Midimu 20:35) Chakin kamu, musangar udiokiling ku kupan chipan ukutwish kupandakan anch muntu utambwila chipan chinech wachikwat nich usey wa piur nakash.

Chad, mutapu ik ukutwisha kusal anch chipan chiupanina chikala musul wa musangar wakin kudi ey ni kudi muntu uchitambwila? Ap anch kupan chipan cha “usey nakash” chidiap chiswapela kudi ey, mutapu ik ukutwisha kusal anch chipan achisanger kamu nakash?