Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  2017-01

 BIBIL USWIMPIN MWOM YA ANTU

Nakatap Kufa!

Nakatap Kufa!
  • MUVU WAVADIKAY: 1964

  • NGAND YA CHIVADIK: ANGLETERRE

  • RUSANGU: MAKU CHANGADIM UKWETA YISAL YIYIMP

CHINADINGA PASAK

Navadikina mu Paddington, ndond yidia antu nakash mu Londres, mu Angleterre. Nading nishich ni maku nau a yayam asatu amband. Yisu yimwing twashakamang ni tatuku, yisu yikwau watushangang mulong wa milong yend ya kuna maar.

Pinading mwanikanch, maku wanfundishang kulembil uchuku wawonsu. Nading ni ka Bibil kakemp mwading ching mukand wa Kuseng, ni nasalang usu chakwel nitwisha kuwang yom yidiamu. Nivurikin pinatanga mazu mamwing mu buku wam ni mashala mu manangu mam: “Dichuku dimwing kukwikalap damashik.” Mazu minam mansalang nikanganya kulal uchuku win wawonsu mulong wa kutong piur pa machuku ma kurutu. Natongang anch: ‘Chakin kudi yom yivud ya kusal mu mwom. Mulong wak nidiaku?’ Nakatap kufa!

Nakata kwijik yom ya aspiritu ayimp. Napakishang kwambamb nau afu, kuya mu jinzay nau arund nam a ku shikol, ni twatalang ma filim malondina yom ya ulaj. Twatongang anch mading mawapin ni pa chisu chawiy chimwing mading makwatishena wom.

Nasambisha kwikal ni yisal yiyimp pinawanyisha mivu dikum. Nasambisha kuna ruwand, ni pakad kulab nipanamu nakash. Kupwa, nasambisha kuna marijuana nakash. Pinawanyisha mivu 11, nasambisha kuna maar nakash. Ap anch nadingap nikatina kupim mutapu madia, pakwez nasambisha kumanang nakash. Nakatang kand mizik ni kuja maj. Nayangang ku misambu ni ku ma bar chisu chawonsu nikatina. Nayangang uchuku ku ujindj ni nachirikang kand ku ujindj kurutu kucha. Naziyang nakash anch kwacha, nachinang yisu yivud ku shikol. Chisu nading mu shikol, yisu yivud nanangang maar chisu cha malejan.

Nakwata ma point makemp kwinsudien kwa muvu. Pajinguninay maku yisal yam yiyimp, waziya ni wajimana nakash. Twatenda, ni nachina ku chikumbu. Pa chisu chinicha, nashakama pamwing ni murund nam ikundj Tony, wading Rasta. Wading mwij ni mwin kulandish drogues ni wading ni chisum nakash. Kwasuta machuku makemp, nikala ni madikaj panading kwam ni mivu 16, ni twavala mwanetu.

 MUTAPU WASWIMPAY BIBIL MWOM WAM

Natanijana nau Atuman a Yehova kapamp ka kusambish pinading ku chikumbu kwalaminangau a maku akad kwikal ku uruw ni anau a bebe. Niyam anginkisha kapalikany kudi antakel a mu ul. Amband Atuman aad ezang chisu chawonsu kuyital a maku ayangadim akwau. Dichuku dimwing niyam nibomba nau mu mambamb. Nakimba kumekesh uyimp wa Atuman. Pakwez akula yipul yam yawonsu mu mutapu wa kalimish ni patok kusutin Bibil. Ading awamp nakash ni itudishina, nayimana kwikal antu asangareshina nakash. Chawiy nakata kwilej nau Bibil.

Nileja chom kanang mu Bibil chaswimpa mwom wam. Kudiosh ku wanikanch wam, novang wom wa kufa. Pakwez katat najingunin kal mafundish ma Yesu piur pa divumbuk! (Yohan 5:28, 29) Nileja kand anch Nzamb ukat kwintongin pakampwil. (1 Pita 5:7) Nasangera pakampwil mazu madia mu Jeremiy 29:11, malondina anch: “Am amwinam nij inatenchika kal mulong wenen. Kutenchik kwam kudi kwa kukuletilany [chisambu], pakwez mar, bwat. Kudi kand kwa kukuletilany ruchingej ra kurutu.” Nasambisha kwitiyij anch nikutwish kwikal ni ruchingej ra kushakam panap pansh chikupu mu Paradis.—Kuseng 37:29.

Atuman a Yehova anmekeshina rukat rakin. Pinaya kapamp ka kusambish ku yikumangan, angaka ni chirungul ni musangar—antu awonsu ading awamp! (Yohan 13:34, 35) Pading kushalijan kujim nakash piur pa mutapu wansadinangau ku egliz wetu. Atuman angaka ni musangar nakash chikalap nchik mutapu nading. Ezang kwintal ni ankwashang mu mitapu yin yawonsu. Niyova mudi nidi mu dijuku dijim dikweta rukat.

Mu dilejan diam dia Bibil, nijika anch nifanyidin kuswimp mu mwom wam chakwel niwanish mbil ja piur ja Nzamb. Chadingap chiswapela kulik kunang ruwand. Mu chisu chawiy chimwing, nijika anch mizik yimwing yading yikasikeshin maswir mam ma kuna marijuana, chawiy naswimpa mizik nateshang. Mulong wa kulik kuna maar, nalika kuya ku misambu ni mu ma bar mulong kwinikwa kukwimbachik kuna. Ni nakimba arund awamp ankwasha kwikal ni mashakamin mawamp.—Jinswir 13:20.

Mu chisu chinicha, Tony ni ndiy wading wasambishin kal kwilej Bibil nau Atuman a Yehova. Mulong atuman a Yehova akula ku yipul yend kusutin Bibil, ni yend wikala nich kashinsh piur pa uyakin wa yom yading yilejinay. Waswimpa nakash mu mwom wend: wadiokala mu chisak cha arund akweta chisum, walika kwiy, ni kuna marijuana. Mulong wa kumusangaresh Yehova chipandakena, twamana anch tufanyidin kurijek mutapu wetu uyimp wa kushakam ni kukimb ndond yiwamp ya kushakam mulong wa kumulam mwanetu. Twatijana mu muvu wa 1982.

“Katat nikulankangap kand uchuku mulong wa kutong piur pa machuku ma kurutu ap piur pa rufu”

Nivurukin pinakimba mitu ya milong mu Chinong cha Kalam ni mu Réveillez-vous! * mu ma gazet minam mwading jinsangu ja antu atwisha kuswimp mudi munakimba am kusal. Yilakej yau yankasikesha nakash! Nikasikesha kusal usu ni naziyap. Nadandamena kumulembil Yehova chakwel kangal wanlik. Tony ni yamam twatambula dibatish ni twikala Atuman a Yehova mwi ngond wa Sambwad mu muvu wa 1982.

MUTAPU NATANINAMU

Kukudish urund wa piswimp ni Yehova kwapandisha mwom wam. Tony niyamam twamana kand ukwash wa Yehova mu yirung ya maar. Twileja kumuchingejin Yehova mu yirung ya maar, ni twiyovil anch Yehova utukwashining chisu chawonsu ni ulamin dijuku dietu.—Kuseng 55:22.

Nasangera nakash kumukwash mwanam ikundj ni mband chakwel ashiken kumwijik Yehova mudi munasala am. Katat nikwet musangar wawiy umwing pinimena anau akat kuya kurutu ni kwikal ni ronganyin mudiay Nzamb.

Katat nikulankangap kand uchuku mulong wa kutong piur pa machuku ma kurutu ap piur pa rufu. Am ni Tony tukwatiken mulong tuyiling kunyingumok mu yikumangen ya Atuman a Yehova rubing rawonsu mulong wa kuyikasikesh. Tukat kubombakan nau pamwing mulong wa kuyifundish antu akwau ang anch atek ritiy mudiay Yesu, niyau akutwish kusanger mwom wa chikupu.

^ par. 17 Yapalangeshau kand kudi Atuman a Yehova.

CHAKWEL WIJIKA YOM YIVUD

Kwit Dilejan dia Bibil Pakad Kufut Nfalang

Ov, Mulong Wak Kwilej Bibil?

Bibil ukwashining mamiliyon ma antu adia mu mangand kutan yakul ku yipul ya usey nakash ya mwom. Ov, ukusot kwikal umwing wa pakach pau?