Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  2017-01

 MUTU WA MULONG WA PA CHIBUR | MUTAPU WA KUTANINAMU NAKASH MU KUTANG KWA BIBIL

Mulong wak Ufanyidin Kutang Bibil?

Mulong wak Ufanyidin Kutang Bibil?

“Natongang anch Bibil ukasikening kumutesh.”—Jovy

“Niyovang anch chanletinang usweral.”—Queennie

“Pinatala mutapu ujimbinay Bibil, nashadisha musangar wa kumutang.”—Ezekiel

Ov, watonginap kal piur pa kutang Bibil, pakwez wasalap mwamu mau mau mulong wa yitongijok mudi yidia kwiur oku? Kudi antu avud, kutang Bibil kukat kuyovish wom. Pakwez chidi nchik ang wijik anch Bibil ukutwish kukukwash kwikal ni musangar ni mashakamin masangareshina? Ni chidi nchik ang wajingunin anch kudi mitapu kanang ya kusadin mulong wa kumutang yikusala anch usanger kutang kwinoku? Ov, ukutwish kusanger kushinshikin yom utangina mu Bibil?

Shinshikin yom yikemp yilondinau antu amana anch Bibil udi difut chisu chasambishau kumutang.

Ezekiel, ukweta mivu 20, ulondin anch: “Pakur nading mudi muntu wendishina motak pakad kwijik kwi ndond kuyilay. Pakwez kutang Bibil kwankwasha nikal ni chitongijok chiwamp mu mwom. Ukwet yiyul ya kusadin nikutwisha kusadin dichuku diawonsu.”

Frieda, ukweta niyend mivu 20, urumburil anch: “Nasalang yom mau mau pakad kutong. Pakwez, mulong wa kutang kwam kwa Bibil, nijika mutapu wa kwishinshikin. Chinech chasala anch novijana nau antu avud, chawiy nikwet katat arund avud.”

Mband umwing ukweta mivu 50 utazukinau anch Eunice ulondin piur pa Bibil anch: “Winkwashin kwikal muntu muwamp, ni kuswimp yaku yam yiyimp.”

Mudi in kutang inay ni ma miliyon makwau ma in kutang, kutang Bibil kukutwish kukukwash kwikal ni mashakamin masangareshina. (Isay 48:17, 18) Chikwau kand, ukutwish kukukwash (1) kukwat mipak yiwamp, (2) kwikal nau arund awamp, (3) kurish nich yakamish, ni (4) chipandakena kuwap, ukwilej uyakin piur pa Nzamb. Yiyul ya mu Bibil yidiokil kudi Nzamb, chawiy ukusalap nayimp anch wayilondul. Nzamb kakupanangap yiyul yiyimp.

Chidia cha usey chidi kusambish kumutang. Yiyul ik ukusadina chakwel chikuswapela kusambish kumutang ni kumusanger nakash?