Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  2017-01

 MUTU WA MULONG WA PA CHIBUR | MUTAPU WA KUTANINAMU NAKASH MU KUTANG KWA BIBIL

Yom ik Yikusala Anch Usangera Kutang kwa Bibil?

Yom ik Yikusala Anch Usangera Kutang kwa Bibil?

Usweral? Anch musangar? Kutang kwa Bibil kukwikal nchik kudi ey? Yivud yidi kulondwish piur pa yom utangina. El tushinshikin piur pa yom ukutwisha kusal chakwel wipana nakash ni kusanger.

Tond Bibil muwamp, ukarumwinau mu mazu ma katat. Anch watang yom yikasikena ap yikweta mazu makur miwakad ey kwijik, chimekeshin anch ukutwishap kusanger kutang. Komb kimb Bibil usadidina mazu maswapela kutesh makutwisha kupukun ku muchim wey. Chisu chawiy chimwing, ufanyidin kwikal ni Bibil uwanyidina kamu nawamp ni ukarumwinau nawamp. *

Sadin tekinoloji wa katat. Nlel Bibil udiaku kadiap ching buku wabudishau kal, pakwez udi kand buku udia mu mashin. Antu amwing akutwish kutangin Bibil pa kapend ap kumubudish mulong wa kumutangin pa ordinater, pa tablet, ap kand mu telefon. Ma Bibil mamwing makarumwinau makwet yom yikutwisha kukukwash ukimba swa ma verse makwau ma mu Bibil malondina yom yawiy yimwing utangina ap kand kwisikej ni ma Bibil mavud makarumwinau kal. Anch uswirikedin kumutesh pa ndond pa kumutang, Bibil udiaku mu mazu mamwing mamukwatau kal. Antu avud asangaredining kumutesh pasadiningau weny ni motikar, patutiningau masun, ap kand pasadiningau midimu yikwau yikutwisha kuyikwash chakwel atesha. Mulong wak ukutwishap kupakish kusadin mutapu ukuswapedina?

Sadin yom ya kwilej nich Bibil. Yom yakwilej nich Bibil yikutwish kukukwash kutaninamu  ni kusanger kutang kwey kwa Bibil. Kudi ma kart malejena jingand jafundinau Bibil, makutwisha kukukwash kwijik jindond jisambidinau piutangina ni kwijik mutapu wasadika yom. Mitu ya milong yidia mu ma gazet ap pa kapend ka jw.org, yikutwish kukukwash kwijik kurumburik kwa yikunku yivud ya Bibil.

Sadin mitapu kushalijan. Anch chikukasikedin kutang Bibil mwawonsu, mulong wak ukutwishap kusanger mu kusambish ni chikunku umena anch chikusangareshin nakash? Anch ukimbin kwijik piur pa antu a ntumb isambidinau mu Bibil, ukutwish kusal usu wa kwijik mikadil ya antu inay piutangina. Mutapu uwamp wa kusadin udi mu mushet ulondina anch: “Kimb mu Bibil Chakwel Ushikena Kwijik Antu Adiamu.” Ap pamwing ap ukukat kutang Bibil kusutin mitu ya milong ap kusutin mutapu wasadika yom. Mulong wak ukutwishap kupakish kusadin umwing wa mitapu yiney?

^ par. 4 Antu avud amen anch Les Saintes Écritures. Traduction du monde nouveau udi muwamp, uwanyidina, ni uswapela kutesh nawamp. Bibil winou, wabudishau kudi Atuman a Yehova, udiaku mu mazu 130. Ukutwish kubudish kopi pa kapend ka jw.org ap kubudish pa JW app Library. Ap, anch ukatin, Atuman a Yehova akutwish kukuletin kwol kwey kopi umwing wabudishau kal.