Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  2017-01

Ov, Kudi Kwau Kutesh Kuyimp Kukemp?

Ov, Kudi Kwau Kutesh Kuyimp Kukemp?

Kachangadim kamwing kamana mish yikat kubudik mu izin ni mish yiney yasala didj. Wijika anch izin winou udiaku mulong wa kusal madj. Kutesh kuyimp kukemp mudi kwa kachangadim kinak kukutwish kwalet maswimbu. Pakwez, kutesh kuyimp kupandakena kukutwish kwikal ni yibudikin yiyimp mu mwom wetu. Chilakej, kulik kutesh nawamp dipaper difundinau mulong wa mutapu wa kusadin mwon kukutwish kutuletin yibudikin yiyimp nakash.

Kutesh kuyimp piur pa milong ya mu spiritu kukutwish kwikal kuyimp nakash. Chilakej, antu amwing kateshap kwau nawamp mafundish ma Yesu. (Yohan 6:48-68) Pa ndond pa kwilej yom yivud, alikakwau yom yawonsu yafundishay Yesu. Yom yiwamp mudi ik yashadishau!

Ov, utangining Bibil mulong wa kukutakel? Chawiy chom chitwitinau. Ov kudi ubaj anch watesh nayimp yom yiutangina? Chinech chiyishikedining antu avud. Shinshikin mitapu yisatu ya kutesh kuyimp yijikena nakash.

  • Antu amwing ateshining nayimp mbil ya mu Bibil yilondina anch: “Mwova Nzamb wakin wom.” Ateshining anch chifanyidin kumwov Nzamb wom mudi chom chiyimp chikwatishena wom. (Mulej 12:13, NWT.) Pakwez Nzamb kakatiningap anch antu akata kumwifukwil iyova mutapu winou piur pendendiy. Ulondin anch: “Kangal wovany wom, mulong nidi nen. Kangal wazalany, mulong nidi Nzamb wen. Nikukukasikeshany, ni kukukwashany kand. Nikukuchidijany ni kukupandishany.” (Isay 41:10) Kumwov Nzamb wom kurumburikin kwau kwov musangar ni kumumekeshin kalimish kakurikina.

  • Ov divu akez kadiosh ni kasu?

    Antu akwau kateshiningap nawamp mazu manam mapepilau: “Kudi chirung cha yom yawonsu, . . . kudi chisu chimwing cha kuvadik, kudi chisu chikwau cha kufa.” Akat kulond anch Nzamb wakwatin kal mupak wa chisu chikufay muntu mwawonsu. (Mulej 3:1, 2) Pakwez, ma verse minam malondidin piur pa mashakamin ni anch muntu mwawonsu ukutwish kufa. Dizu dia Nzamb ditufundishin kand anch mipak yetu yikutwish kwikal ni yibudikin mu mwom wetu. Chilakej, tutangin mu Bibil anch: “Kumwov [Yehova] wom kukat kuvudish machuku.” (Jinswir 10:27; Kuseng 90:10; Isay 55:3) Mutapu ik chidia mwamu? Chilakej, kulimish Dizu dia Nzamb kukutubachik kwipuk yom yikutwisha yayipish mujimbu wetu mudi kuleu maar ni yom yikwau yiyimp.—1 Korint 6:9, 10.

  • Antu akwau kand, anch atang palondinay Bibil anch maur ni divu ‘ayilamin chakwel yez yisheshik ku kasu,’ni alondin anch Nzamb ukushesh divu dined. (2 Pita 3:7) Pakez Nzamb washilamu anch kakez kalikap anch divu ditushicha disheshik. Nzamb “warijeka ngand kudiok mutambu djat ni mutambu ukwau, chakwel kiyikushemunikap chikupu.” (Kuseng 104:5; Isay 45:18) Alondin piur pa yom yiyimp ni antu ayimp adia mu mangand minam, kadiap divu tushicha dikusheshau chikupu kusutin kasu. Mudi palondinay mulong wa maur, chirumburikinap mwiur, mwiur mudia atutumbu, ap ndond yishichingay Nzamb. Mulong jindond jinej kakujijiyishap.

MULONG WAK YISU YIMWING BIBIL UKASIKENING KUMUTESH?

Mudi mutapu ukutwisha kuman kusutin yilakej yiney, antu avud akat kutesh nayimp ma verse matanginingau mu Bibil. Pakwez mulong wak Nzamb ulikin yom yiney yishiken? Amwing atongin anch: ‘Anch Nzamb udi wa manangu mawonsu ni wij yom yawonsu, wafanyina kulet buku ufundinau mu mutapu wovikena nawamp chakwel antu awonsu amutesh nawamp. Mulong wak kasalap mwamu?’ Shinshikin mayingishin masatu masadina anch Bibil alik kumutesh nawamp yisu yivud.

  1. Bibil akumutesh ching kudi antu ikepishina ni ipanina kumwilej. Yesu wamuleja Tatukwend anch: “Nakujikitish ey, A Tatuku, Mwant wa diur ni  divu, piwajindjika yom yiney kudiau [in manangu ni antu ilejina], wayimekesh kudi anikanch.” (Luka 10:21, TMK.) Bibil amufunda mu mutapu wa kutesh uruu wend ching kudi antu akweta chitongijok chiwamp. Antu akweta chibud—mwikadil wijikena nakash wa antu akweta ‘manangu ni antu ilejina’—uyibachikin kutesh Bibil nayimp. Pakwez antu atangina Bibil mudi “anikanch”—ikepishina ni asangaredina kwilej—ayifutining nich kutesh kuwamp kwa uruu wa Nzamb. Manangu mudi ik musadinay Nzamb mulong wa kufund Bibil!

  2. Bibil amufunda mulong wa antu akimbina nich kashinsh ukwash wa Nzamb chakwel amutesha. Yesu wamekesha anch antu ading akwet kuswir kwa ukwash mulong wa kutesh nawamp yom yafundishay. Mutapu ik watambulau ukwash winou? Yesu warumburila anch: “Mwin Kukwash, ndiy kamu [Spiritu] Utumbila ukez kutumay Tatuku mu dijin diam, ukez kukulejany yom yawonsu.” (Yohan 14:26) Chawiy Nzamb upanin spiritu wend utumbila—usu wend wa kusal nich yom—mulong wa kuyikwash antu kutesh yom yitanginau mu Bibil. Chawiy, Nzamb kakupanangap spiritu wend kudi antu alikina kukimb ukwash wend, chawiy Bibil ukat kuyikasiken kumutesh yisu yivud. Spiritu utumbila uyibachikining kand in Kristu akweta ronganyin kuyikwash antu akimbina kutesh Bibil.—Midimu 8:26-35.

  3. Ma verse mamwing ma mu Bibil akutwish kumatesh nawamp kudi antu ching pa chisu chiwanyidina kulondulijan ni rusangu. Chilakej, muprofet Daniel amuleja kufund uruu piur pa machuku ma kurutu. Mwangel wamuleja anch: “Daniel, katat [jindjik mazu], utekap chijingidij djat ni ku disudiel dia mangand.” Mu kusut kwa yitot ya mivu, antu avud atangin kal mukand wa Daniel mu Bibil pakwez kauteshiningap kamu nawamp. Chawiy, ap Daniel amwinend kateshap kurumburik kwa yom yafunday. Walonda nich kwikepish anch: “Natesha mwalonday, pakwez kinovap kurumburik.” Pakemp pakemp, antu akutwish kutesh nawamp uprofet wa Nzamb wafundau kudi Daniel, pakwez ching pa chisu chiwanyidina chatonday Nzamb kukwatijan ni rusangu. Mwangel warumburila anch: “Daniel, ufanyidin kuya katat, mulong mazu minam mawonsu madi ma ujindj djat ni pakwezila disudiel.” Ov, anany akutesha uruu wa Nzamb? ‘Antu ayimp kakez kwovap kurumburik, pakwez ching akweta manangu makutesh, awiy akeza kwov kurumburik.’ (Daniel 12:4, 8-10) Chawiy Nzamb kamekeshinap kurumburik kwa ma verse mamwing ma mu Bibil kushik ni pakuwanyina chisu chatekay kal.

Kuding chisu chakadingau Atuman a Yehova kutesh Bibil nawamp? Mwaning. Pakwez anch chisu chatekay Nzamb chawanyin mulong wa kovikesh yom, Atuman akat kuswimp mutapu wau wa kutesh. Akat kwitiyij anch ayimburijin atwimbuy a Yesu, arijeka nich kwikepish mutapu wau wa kutesh chisu chayiyulangau kudi Yesu.—Midimu 1:6, 7.

Yitongijok ya maswimbu ya kachangadim piur pa ndond yisadiningau madj kukutwish kwikal kwau kutesh kuyimp kukemp. Pakwez yom yifundishinay Bibil yikwet usey nakash kudi ey. Uruu wa Bibil udi kand wa usey kudi muntu win mwawonsu usadina usu mulong wa kuutesh amwinend kusutin kutang kwend kwa Bibil. Chawiy kimb ukwash mulong wa kutesh yom utangina. Kimb antu ilejining Bibil nich kwikepish, antu achingejidina spiritu utumbila wa Nzamb mulong wa kutesh Bibil, antu akweta kashinsh anch tudi mu chirung chiwanyidina chikatinay Nzamb anch tutesh Bibil nawamp kusutamu pakur. Kangal widjidjek kwambamb nau Atuman a Yehova, ap kutang kukimbijol kwau kwa mushiku pa kapend ka jw.org. Bibil ukanin anch: “Tazuk mulong wa kwijik . . . , ni [ukutan] ronganyin ra Nzamb.”—Jinswir 2:3-5.