Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  2017-01

 MUTU WA MULONG WA PA CHIBUR | MUTAPU WA KUTANINAMU NAKASH MU KUTANG KWA BIBIL

Mutapu ik Nikutwisha Kusambish?

Mutapu ik Nikutwisha Kusambish?

Yom ik yikutwisha kukukwash chakwel usangera kutang Bibil ni kumwijik nawamp? Shinshikin yiyul yitan yasadinau antu avud.

Kimb ndond yiwamp. Sal usu wa kukimb ndond yidia yakad masok. Kepish kwipuwangej chakwel ushinshikina yom utangina. Chitokish ni chipepil chiwamp yikutwish ya kukwash kusanger ni kutaninamu mu kutang kwey kwa Bibil.

Ikal ni chitongijok chiwamp. Mulong Bibil udiokil kudi Tatukwetu wa mwiur, ukutaninamu nakash anch wikal ni chitongijok cha mwan ukatina kwilejin kudi anvajend akatish. Anch ukwet chitongijok chiyimp piur pa Bibil, sal usu wa kuchidiosh chakwel Nzamb akufundish.—Kuseng 25:4.

Lembil kurutu kwa kutang. Bibil ukwet yitongijok ya Nzamb, chawiy chidiap cha kushimok anch twit ukwash chakwel tumutesh. Nzamb washilamu kupan “spiritu utumbila kudi awiy akata kumwit.” (Luka 11:13, TMK.) Spiritu winou utumbila ukutwish kukukwash chakwel utesh nawamp yitongijok ya Nzamb. Chisu chinicha, ukuburil manangu mey chakwel utesha nawamp “yom ya Nzamb yikurikina.”—1 Korint 2:10, TMK.

Tang chakwel utesha. Kangal kutang kwau mulong wa kupwish yom yifundinau. Ufanyidin kutong nakash piur pa yom yifundinau. Ufanyidin kwiyipul yipul mudi ey: ‘Mikadil ik yinimena piur pa muntu nitangina? Mutapu ik nikutwisha kuyisadin mu mwom wam?’

Itekina chitongijok cha pakampwil. Chakwel utaninamu mu kutang kwey kwa Bibil, ufanyidin kwilej chom kanang chikukukwasha nakash mu mwom wey. Ukutwish kwitekin yitongijok mudi yiney: ‘Nikatin kwilej yom yivud piur pa Nzamb amwinend.’ ‘Nikatin kwikal muntu muwamp, ikundj ap mband muwamp.’ Kupwa tond yikunku ya Bibil yikutwisha kukukwash kuwanyish yitongijok yiney. *

Yiyul yitan yiney yikukukwash chakwel usambisha. Chad mutapu ik ukutwisha kusal chakwel usangera kutang kwey kwa Bibil? Mutu wa mulong ulondwilaku ou upanin yiyul yimwing ya kusadin.

^ par. 8 Anch umenap yikunku ya Bibil yikutwisha ya kukwash pa mulong winou, Atuman a Yehova akwikal ni musangar wa kukukwash.