Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  2017-01

 MUTU WA MULONG WA PA CHIBUR | MUTAPU WA KUTANINAMU NAKASH MU KUTANG KWA BIBIL

Mutapu ik Ukutwishay Bibil Kuwapish Mwom Wam?

Mutapu ik Ukutwishay Bibil Kuwapish Mwom Wam?

Bibil kadiap buku wa chamwamu. Ukwet yiyul yidiokila kudi Sakatang. (2 Timote 3:16) Uruu wend ukwet usu nakash padi etu. Chawiy chilondinay Bibil anch: “Dizu dia Nzamb didi [mwom] ni usu.” (Hebereu 4:12, TMK.) Dikwet usu wa kuwapish mwom yetu mu mitapu yaad—ditukwashin mu mashakamin metu ma dichuku diawonsu katat ni dikwashin kumwijik Nzamb ni kushilamu kwend.—1 Timote 4:8; Jakobu 4:8.

Wapish mwom wey katat. Bibil ukukukwash kupwish milong yey. Upanin yiyul ya kusadin ya manangu piur pa yom yilondwilaku ey.

  •   Urund pamwing nau antu a mu dijuku, nau antu akwau. —Efes 4:31, 32; 5:22, 25, 28, 33.

  • Ukash wa mu manangu ni wa mujimbu. —Kuseng 37:8; Jinswir 17:22.

  • Yisal yiwamp.—1 Korint 6:9, 10.

  • Kuwanyish maswir metu ma ku mujimbu. —Jinswir 10:4; 28:19; Efes 4:28. *

Ambay amwing a uruw atijadina katat adia mu Asie asangaredin nakash usey wa yiyul ya Bibil. Ambay a uruw avud atijadina katat akat kurish mulong wa kurijek mikadil ya umwing ni mukwau, ni mutapu wa kulond yom patok. Pakwez asambishin kusadin yom yitanginau mu Bibil. Kwading yibudikin ik? Ngatan umwing utazukinau anch Vicent ulondin anch: “Yom nitangina mu Bibil yikat kwinkwash kurish nich milong mu uruw mu mutapu wa rukat. Kushakam kukwatijan ni yom yilondinay Bibil kutukwashin kwikal ni mashakamin ma musangar.” Mukajend Annalou ulondin anch: “Kutang yilakej yidia mu Bibil kwatukwashin. Katat nikwet musangar ni tukwet musangar mu uruw wetu ni tutongin kusal yom kanang mu mwom wetu.”

Kushiken ku kumwijik Nzamb. Kupwa kwa yom yasambelangay kulond piur pa uruw, Vicent ulondin kand anch: “Kusutin kutang Bibil, niyovil kwikal piswimp ni Yehova kusutamu pakur.” Kuman kwa Vicent kushinshikidin pa chom chimwing chikweta usey—Bibil ukutwish kukukwash kumwijik Nzamb nawamp. Mu kusal mwamu, ukutaninamwap ching mu yiyul yend, pakwez ukumwijik kand nawamp mudi murund. Ni ukuman anch ulejen yom yivud piur pa machuku mawamp ma kurutu, chisu ukusangera “mwom udia wakin”—chisu ukushakama chikupu. (1 Timote 6:19) Kwikil buku mukwau ukutwisha kutwinkish chom mudi chinech.

Anch witekin chisu cha kutang Bibil ni kusadin yom yilondinay, niyey ukutaninamu—ukuwapish mwom wey katat ni ukumwijik Nzamb. Chawiy piutangina Bibil, ukutwish pamwing ap kutong piur pa yipul yivud. Ni anch wasal mwamu, vurik chilakej cha ntung mwin Etiopi wadingaku kwasutin kal mivu 2 000. Wading ni yipul yivud piur pa Bibil. Chisu chamwipulau anch wading uteshin yom yading yitanginay, wakula anch: “Ov, nikutwish nchik kwov anch kwikil muntu mwin kwinrumburil?” * Witiya nich musangar chakwel amukwasha kudi Filip mwin kwilej wa pakur wa Yesu, muntu wading wija kufundish Bibil nawamp. (Midimu 8:30, 31, 34) Mutapu wawiy umwing, anch ukatin kwijik yom yivud piur pa Bibil, tukwitin utulej yom ukimbina pa kapend kwetu ka www.jw.org, ap fund ma adres madia piswimp niyey madia mu gazet winou. Ukutwish kand kuyitazuk Atuman a Yehova adia piswimp niyey ap kuya ku Chot cha Want chidia piswimp ney. Mulong wak ukutwishap kwilej Bibil nlel, ni kwitiy anch Bibil akutakel mu mwom wey?

Anch wiyipwiling mutapu ukutwisha kuchingejin nakash Bibil, tal amboku video ulondina anch: Comment être sûrs que la Bible vient de Dieu ? Ukumutan mu kufund kode ap mu kwandam pa jw.org, shat pa buton wa kukimb nich, ni fund mutu wa mulong

^ par. 8 Mulong wa yilakej yivud piur pa yiyul ya kusadin yidia mu Bibil, tal kapend kwetu ka web, jw.org. Tal pafundinau anch LA BIBLE ET VOUS > QUESTIONS BIBLIQUES.

^ par. 11 Tal kand mu nimero winou mutu wa mulong ulondina anch: “Ov, Kudi Kwau Kutesh Kuyimp Kukemp?”