Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 9 , 2015

Mitapu ik Yimekeshinay Yehova Rukat Kudi Etu?

Mitapu ik Yimekeshinay Yehova Rukat Kudi Etu?

“Talany mutapu wa rukat rujim ratukatay Tatuku!”1 YOHAN 3:1.

MIMINY: 51, 13

1. Kambuy Yohan utukasikeshin piur pa chom ik, ni mulong wak?

KAMBUY Yohan utukasikeshin kutongin nakash piur pa rukat rujim ra Yehova kudi etu. Mu 1 Yohan 3:1 afundin anch: “Talany mutapu wa rukat rujim ratukatay Tatuku!” Anch twatongijokin mutapu utukatinay Yehova nakash ni mutapu umekeshinay rukat kudi etu, tukusej piswimp nend ni tukumukat nakash.

2. Mulong wak chikasiken kudi antu amwing kwitiyij anch Nzamb uyikatin?

2 Cha ushon, antu amwing kijingap mutapu uyimekeshidinay Nzamb rukat. Akat kutong anch kakatap kuyibangin antu. Akat kwitiyij anch Nzamb ukat kutek yijil mulong wa kuyipup awonsu alikina kumuziyil. Mulong wa malejan ma makasu, amwing akat kutong anch Nzamb udi mwin chisum ni chikasiken kumukat. Akwau akat kutong niyau anch Nzamb uyikatin antu awonsu chikalap nchik yom yisadinau. Pakwez, dilejan diey dia Bibil diakukwasha kushiken ku kwijik uyakin piur pa Yehova. Katat wij anch rukat udi mwikadil wend ujim ni wamutuma Mwanend mudi difut mulong weyey. (Yohan 3:16;  1 Yohan 4:8) Chikwau kand, mulong wa yom wimedina kal mu mwom, chikutwish kukukasiken kutesh nawamp mutapu ukukatinay Yehova nakash.

3. Chom ik chikutukwasha kwijik anch Yehova utukatin?

3 Mulong wa kutukwash kwijik anch Yehova utukatin, chakusambish tufanyidin kwijik anch Yehova ndiy watutanga. Ndiy watwinkisha mwom. (Tang Kuseng 100:3-5.) Chawiy chimutazukinay Bibil muntu wa kusambish anch “mwan a Nzamb.” (Luka 3:38) Yesu watufundisha kumutazuk Yehova anch “Tatukwetu udia mwiur.” (Mateu 6:9) Chawiy lel, Yehova udi Tatukwetu, ni utukatin mudi mukatiningay tatuku muwamp anend.

4. (a) Yehova udi Tatuku wa mutapu ik? (b) Yom ik tukwisambina mu mutu wa mulong winou ni ulondwilaku?

4 Chiyikasikedining antu amwing kutong anch tatuku ukutwish kwikal mutu wa rukat. Akutwish kwikal ni yitongijok yiyimp ya ku wanikanch wau mulong anvajau ayimesha mar. Yehova kakutwishap kuyisal anend mwamu. Udi Tatuku muwamp nakash tukweta. (Kuseng 27:10) Utukatin nakash ni ukat kutubangin mu mitapu yivud. Anch twamukat Yehova nakash, niyend ukutukat. (Jakobu 4:8) Mu mutu wa mulong winou, tukwisambin mitapu yinying yitumekeshidinay Yehova rukat. Chad mu mutu wa mulong ulondwilaku ou, tukwisambin mitapu yinying tukutwisha niyetu kumumekeshin rukat.

YEHOVA UDI RUKAT NI UKWET MUCHIM WA KUPAN

5. Chom ik chiyinkinau antu awonsu kudi Nzamb?

5 Padingay Kambuy Paul mu Aten, mwi ngand ya Grek, wamana anch antu avud ading kwifukwil akish ni ading kwitiyij anch anzamb au awiy ayinkisha mwom. Wayileja piur pa “Nzamb watanga ngand ni yom yawonsu yidiamu.” Walonda anch Nzamb ndiy “ukata kupan kudi antu awonsu mwom, ni mwiku, ni yom yikwau yawonsu” ni anch “ku ukash wend tukwet mwom, tukat kwend, tudiaku.” (Midimu 17:24, 25, 28) Yehova utwinkishin yawonsu tuswirikedina mulong wa kusanger mwom. Tongin piur pa yom yimwing yatwinkishay Nzamb mulong wa rukat rend.

6. Ndond ya mutapu ik yatwinkishau kudi Yehova? (Tal chipich cha kwinsambishil.)

6 Chilakej, Yehova warijeka ndond yiwamp yetwetu kushakam. (Kuseng 115:15, 16) Ap anch watanga maplanet mavud, divu dipandakenamu kuwap. In siyans akimbijola ni ajingunina anch kudi maplanet mavud, pakwez kamenap planet ukutwishau antu kushakam ni kwikal ni mwom. Yehova katwinkap ching yom tuswiridina mulong wa kwikal ni mwom, pakwez watanga kand divu diwamp ni mu mutapu uwamp, ni ndond tukutwisha kushakam nawamp. (Isay 45:18) Anch twatongin piur pa ndond yatwinkay Tatukwetu Yehova, tukuman kamu mutapu utukatinay nakash.Tang Job 38:4, 7; Kuseng 8:3-5.

7. Mutapu ik watutangay Yehova umekeshina anch utukatin kamu?

7 Mutapu ukwau watumekeshinay Yehova rukat rend udi mutapu watutangay ni ukaliweny wa kumwimburij. (Disambishil 1:27) Chirumburikin anch tukutwish kuman mutukatinay niyetu tukutwish kumukat. Nzamb wij anch mutapu winou wawiy ukusala anch twikala ni musangar. Kupwa, an akweting musangar ang aman anch anvajau ayikatin. Vurik anch, Yesu watufundisha anch tukwikal ni musangar anch tudi mu urund uwamp ni Tatukwetu Yehova. (Mateu 5:3) Utwinkishin ‘yom yawonsu ya kutusangaresh.’ Chakin, ukwet  kamu muchim wa kupan ni utukatin nakash.1 Timote 6:17; Kuseng 145:16.

YEHOVA UTUFUNDISHIN UYAKIN

8. Mulong wak tukatin anch Yehova atufundisha?

8 Anvaj ayikatining anau ni kakatiningap antu ayidimba. Pakwez anvaj avud nlel kijap yany ya Bibil piur pa uyimp ni uwamp. Chawiy lel, katwishinap kuyitakel anau nawamp, mudi yibudikin kakwetap musangar ni adi mu kanvundangesh. (Jinswir 14:12) Pakwez, Yehova ukat kuyinkish anend umutakel uwamp mulong udi “Nzamb wa uyakin.” (Kuseng 31:5) Ukwet musangar wa kutufundish uyakin piur pend. Utufundishin kand mutapu wa kumwifukwil ni ukat kutulej kand mutapu uwamp wa mashakamin. (Tang Kuseng 43:3.) Chawiy lel, yom ik yatufundishay Yehova yimekeshina anch utukatin?

A tatuku in Kristu amwimburijin Yehova pa kuyifundish anau uyakin ni kuyikwash chakwel ikala mu urund ni Tatukwau wa mwiur (Tal paragraf 8-10)

9, 10. (a) Mulong wak Yehova wiyijikisha kudi etu? (b) Chom ik chatufundishay piur pa rutong rend?

9 Chakusambish, Yehova wiyijikisha kudi etu. Ukatin anch tumwijika. (Jakobu 4:8) Chawiy chatulejinay kurumburik kwa dijin diend. Bibil ujimbwil dijin diend kusutamu majin makwau. Yehova utulejin kand Wuntu wend. Anch twatal yom yatangay, tukujingunin anch ukwet ukash ni manangu. (Rom 1:20) Chikwau kand, anch twatang Bibil, tukujingunin anch udi muntu muwamp ni utukatin nakash. Anch twamwijik Yehova nawamp, tukumusejin piswimp.

10 Yehova ukat kutufundish kand kurumburik kwa rutong rend. Utulejin anch tudi chikunku cha dijuku diend. Uturumburidin kand yitwitinay chakwel tutwisha kusal mu umwing ni chisambu pamwing nau antu awonsu a mu dijuku  diend. Bibil ulejen patok anch Nzamb katutangap ni ukaliweny wa kwitakel ayinetu. (Jeremiy 10:23) Yehova wij yom yidia yiwamp mulong wetwetu. Anch twitiy umutakel wend ni kumuziyil tukutwish kwikal ni chisambu ni mwom umusangareshina. Yehova watufundisha uyakin winou wa usey mulong utukatin.

11. Chom ik chitulejinay Tatukwetu wa rukat piur pa machuku ma kurutu?

11 Tatuku wa rukat utongining nakash piur pa machuku ma kurutu ma anend. Ukatining anch ikala ni mwom usangareshina. Cha ushon, antu avud nlel akat kwinan mulong wa machuku ma kurutu, ni akwau akat kushesh mwom yau pa kukimb yom yakad kulab. (Kuseng 90:10) Kujikitish mudi ik tukweta mulong Tatukwetu Yehova ukat kutufundish mutapu wa kwikal ni mwom usangareshina kudiosh nlel ni utukanin kutwinkish machuku mawamp ma kurutu!

YEHOVA UKAT KUYITAKEL NI KUYIPUP ANEND

12. Mutapu ik wasalay Yehova usu wa kumukwash Kain ni Baruk?

12 Pamanay Yehova anch Kain wading mu ubaj wa kusal chom chiyimp, wasala usu wa kumukwash ni wamwipula anch: “Mulong wak wovila ujim mwamu, ni mulong wak mpal yey yakarumukang kal?” (Disambishil 4:6, 7) Kain walika kumutesh Yehova ni kwikala yibudikin yiyimp. (Disambishil 4:11-13) Chisu chikwau, Yehova wajingunina yitongijok yiyimp yading mu muchim wa Baruk ni wamuyula. Chawiy lel Yehova wamuleja Baruk anch yitongijok yend yading yiyimp ni wafanyina kuswimp. Baruk watesha chiyul cha Yehova ni wapanda.Jeremiy 45:2-5.

13. Yom ik yilejau atushalapol a Yehova kusutil mar mayishikena?

13 Yehova ukat kuyitakel ni kuyipup antu end mulong uyikatin. Kakatap ching kutupup, pakwez ukat kand kutufumb. (Hebereu 12:6) Mu Bibil, mudi jinsangu ja atushalapol ashinshamena afumbay Yehova chakwel ikala antu awamp. Chilakej, Josef, Moses, nend David arisha nich yakamish yikash. Yisu yamanangau mar, Yehova wading nau. Yom yilejau chisu cha mar, yayikwasha payinkishau yisend yijim kudiay Yehova. Pitukata kutang mu Bibil mutapu wayikwashay ni wayifumbay antu end, tukuman kamu anch Yehova utukatin.Tang Jinswir 3:11, 12.

14. Anch twasal chom chimwing chiyimp, mutapu ik ukatay Yehova kutumekeshin rukat?

14 Ap chisu tusadina chom kanang chiyimp, Yehova ukat kudandamen kutumekeshin rukat. Anch twakul nawamp ku dipup diend ni anch twakarumuk, ukutulikishin “swa.” (Isay 55:7) Chirumburikin ik? Mazu ma David piur pa kulikishin kwa Yehova matulejin mutapu tukweta Tatuku wa riy: “Ndiy ukata kwinlikishin yitil yam yawonsu, ndiy ukata kwok misong yam yawonsu. Ndiy ukata kuchidij mwom wam chakwel kangal nafa, ndiy ukata kwinyukishang nich rukat rend rudimukina ni riy rend kand.” (Kuseng 103:3, 4, 12) Dipup dia Yehova dikat kututakel mu mitapu kushalijan. Usadining usu wa kuswimp swa? Chisu ni chisu vurikang anch Yehova ukat kutupup mulong utukatin.Kuseng 30:5.

YEHOVA UKAT KUTULAM

15. Mutapu ik ukwau ukatay Yehova kutumekeshin rukat?

15 Tatuku wa rukat ukat kulamang dijuku diend ku yom yiyimp. Chawiy chikatay Tatukwetu Yehova kusal mulong wetwetu. Nfund a kuseng walonda piur pa Yehova anch: “Ndiy ukat kulam mwom ya antwend akashinsh. Ndiy ukat kuyikamuninang ku makas ma antu ayimp.” (Kuseng 97:10) Tongin piur pa chom chinech: Ching mudi  muukata kusal swa mulong wa kuchidij mes mey ku ubaj mulong madi ma usey kudi ey, Yehova niyend ukat kusal swa mulong wa kuyilam antu end mulong adi a usey kudi ndiy.—Tang Zakariy 2:8.

16, 17. Mutapu ik walamay Yehova antu end kudiosh pasak kushik nlel?

16 Mutapu umwing ukatay Yehova kuyilam antu end, kudiosh pasak kushik nlel, udi kusutin angel end. (Kuseng 91:11) Mwangel umwing wajipa amasalay a in Asiria 185 000 mu uchuku umwing ni wayichidija antu a Nzamb. (2 Ant 19:35) Mu mivu chitot ya kusambish, angel amukwasha Pita, Paul ni antu akwau mu rukan. (Midimu 5:18-20; 12:6-11) Machuku ma kwinyim am, kwading njit jimwing jikash mwi ngand yimwing ya mu Afrik. Ngand yiney yikala mu mar mulong wa njit, wij, wimbwitan ni kujipijan. Ap anch chading mwamu, kwikil mukadivar ap umwing wafa, avud ashadisha yom yau yawonsu. Pakwez, awonsu amana rukat ra Yehova ni mutapu wayibanginay. Ap anch amana mar, pakwez ading akwet musangar. Chisu chezay kuyiman muntu watumay biro mujim utakedila mangand mawonsu, wayipula akadivar ni anambaz mutapu wasalau, ni akula anch: “Yawonsu yidi kwau nawamp, tumujikitishin Yehova!”

17 Pakwez, atushalapol amwing a Yehova, mudi Stefan nau akwau mudi ndiy, afa mulong ading ashinshamena. Yehova kakatap chisu chawonsu kuyiyepish antu end ku yishiken. Pakwez ukat kuyilam antu end mu chisak kusutil ku kuyibabesh piur pa mitapu kushalijan ya mipit ya Satan. (Efes 6:10-12) Yibabesh yiney yidi mu Bibil ni mu mikand ya dirijek dia Yehova. Chilakej, tukat kwilej piur pa ubaj wa Internet, rukat ra nfalang, ni mafilim, ma buku, ap masengan ma masandj ni ma chisum. Chakin, Yehova utukatin ni ukatin kutulam.

TUKWET KATUMB

18. Mutapu ik ukata kwiyov piur pa mutapu ukukatinay Yehova?

18 Patongijokinay Moses piur pa mivu yamusadinay Yehova, wikala nich kashinsh anch Yehova umukatin. Moses walonda anch: “Twizwisha pamanch ni pamanch nich rukat rey rudimukina, chakwel tukuzangam ni kusangar machuku metu mawonsu.” (Kuseng 90:14) Tukwet chiyukish cha kutesh ni kujingunin mutapu utukatinay Yehova. Katumb mud ik ka kwikal akatilau kudi Yehova! Tukat kwiyov mudi mwiyovay kambuy Yohan walonda anch: “Talany mutapu wa rukat rujim ratukatay Tatuku!”1 Yohan 3:1.