Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 9 , 2015

 MUTU WA MULONG WA PA CHIBUR

Atuman a Yehova Adi Anany?

Atuman a Yehova Adi Anany?

“Nading nimwij Mike mu mivu yivud. Udi Kaman wa Yehova. Pakwez relijon wend wading kwingovish nayimp. Yehova udi nany? Mulong wak Atuman alikining kusal misambu yikatau antu awonsu kusal? Mulong wak Mike wiyandjika mu difukwil dined?”—Becky, Californie, États-Unis.

“Pasambishay mutej nam kwilej Bibil nau Atuman a Yehova, niyipula anch: ‘Dijin dined Atuman a Yehova dirumburikin ik? Kandikal kwam niteshangap relijon ukweta dijin mudi dined!’”—Zenon, Ontario, Canada.

“Am ni mukajam twatonga anch Atuman a Yehova eza kutulembidil piur pa yovil ya kwifish nich twadinga nich mulong twadingap kuya mu egliz. Pakwez twamana anch relijon wa angak kakwetap yom twadia tukimbina, chisak chamwamu mudi cha Atuman a Yehova chikutwishap kwikal ni mutapu wa kutukwash.”—Kent, Washington, États-Unis.

“Mu win yakin nadingap niyij Atuman ni yitiyij yau.”—Cecilie, Esbjerg, Danemark.

Pamwing ap wayimenap kal palejenau ku chis ni chis ap pa ndond yidia antu avud, papalangeshinau mikand yimedina pa Bibil, ni payifundishinau antu Bibil pakad kufutish nfalang. Pamwing ap watambwil gazet winou kudi awiy. Kupwa, wiyipwil anch Atuman a Yehova adi anany. Pamwing ap utongin mutapu umwing ni antu ajimbwilau kwiur oku.

Anch ukwet yipul yivud piur pa mulong winou, kwisu ukutwisha kutan yakul? Mutapu ik ukutwisha kwilej piur pa yitiyij ya Atuman a Yehova, kwisu kukatau kutan nfalang mulong wa mudimu wau wa kulejan ni kutung ndond ya difukwil, ni mulong wak akat kwezang kukutal ni kwambamb ney kol kwey ap ndond yidiau antu avud?

Cecilie wajimbulangau kwinsambishil ulondin anch: “Natangang pa Internet yom yivud piur pa Atuman a Yehova. Natesha jinsangu jimwing, ni nova yom yivud yiyimp yilondiningau piur pau. Chawiy lel, nikala ni yitongijok yiyimp piur pau.” Kupwa, wambamba amwinend ni Atuman a Yehova ni watana yakul yisangareshina ku yipul yend.

Usotin kutambul yakul yakin ku yipul yey piur pa Atuman a Yehova? Tukukasikeshin amboku kukimb yakul ndond yiwanyidina—kudi Atuman a Yehova ayinau, in kupalangesh a gazet winou. (Jinswir 14:15) Tuchingejin anch mitu ya milong yilondwilaku ey yikukukwash kwijik anch tudi anany ni kwijik kand yitiyij yetu, mwamu ukwijik mudimu tusadina.