Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 9 , 2015

Ukwet Wuntu Mudi wa Kristu?

Ukwet Wuntu Mudi wa Kristu?

‘Wanyish . . . wuntu mu chilik chiwanyidina mudi cha Kristu.’EFES 4:13.

MIMINY: 11, 42

1, 2. Rutong ik rikwetingay mwin Kristu mwawonsu? Let chilakej.

CHOM ik chikimbiningay maku wa chikumbu pakatay kutond mabuj mu sok? Chimeken anch, chidiap kujimb ap kukep kwa usey wa mabuj kumusangareshina. Pakwez ukat kukimbang mabuj mawamp mafanyidina kudia. Ukat kukimbang mabuj maswila.

2 Kupwa kwa muntu kwilej piur pa Yehova ni kukwat mupak wa kutambul dibatish, urund wend ni Nzamb ukudandamen kukul. Rutong rend ridi ra kwikal mwin Kristu uswila. Kuswa kwinoku kurumburikinap kwikal ni mivu yivud. Kurumburikin kuswa muspiritu, kwawiy kulond anch kwikal mu urund uwamp nend Yehova. Kambuy Paul wasota anch in Kristu a ku Efes ikala aswila. Wayikasikesha chakwel ikala mu umwing mu ritiy ni kudandamen kwilej piur pa Yesu chakwel ‘akula, awanyisha wuntu mu chilik chiwanyidina mudi cha Kristu.’Efes 4:13.

3. Mutapu ik tukutwisha kufanikesh chikumangen cha Efes nau antu a Yehova nlel unou?

3 Chikumangen cha Efes chading chawanyish kal mivu kanang chisu chayifundinau mukand kudi Paul. Antu avud ading in Kristu aswila. Pakwez kwading antu amwing ading akweta  kuswir kwa kukasikesh urund wau nend Yehova. Chilik chimwing nlel, akadivar nau anambaz avud amusadina Yehova mivu yivud ni adi in Kristu aswila. Pakwez antu amwing mu yikumangen kandikal ashikena pa chilik chinech. Chilakej, yitot ya antu akat kutambul dibatish muvu ni muvu, chawiy lel, amwing akwet kuswir kwa kukul muspiritu. Chidi nchik ku mutambu wey?Kolosay 2:6, 7.

MUTAPU IK UKUTWISHAY MWIN KRISTU KUKUL?

4, 5. In Kristu aswila ashalijadin ku chom ik, pakwez chom ik chikwetau awonsu? (Tal chipich cha kwinsambishil.)

4 Piutadina mabuj maswila mu sok, ukuman anch mabuj mawonsu madiap mutapu umwing. Pakwez, mabuj maswila makwet yom yimwing yifanikena. Chidi mutapu umwing piur pa in Kristu aswila. Kadiap kamu awonsu mutapu umwing. Adiokil mu jingand ni ndond kushalijan. Akwet mivu kushalijan ni akwet yom yikatiningau ni yikisiningau. Pakwez, in Kristu awonsu aswila akwet mikadil yimwing yimekeshina anch aswil. Mikadil ik ya chilik chimwing yikwetau?

5 Mwin Kristu uswila ukat kumwimburij Yesu ni kulondul “mu rizau rend.” (1 Pita 2:21, TMK) Yesu walonda anch chidi cha usey nakash kudi muntu kumukat Yehova nich muchim wend wawonsu, mupim, ni manangu ni kumukat mukwen mudi mwikatinay amwinend. (Mateu 22:37-39) Mwin Kristu uswila ukat kusal usu wa kuziyil chijil chinech. Mutapu ushichay mu mwom umekeshin anch urund wend nend Yehova ni rukat rend rikurikina mulong wa antu akwau yidi ya usey kudi ndiy.

In Kristu amapal akutwish kwimburij kwikepish kwa Yesu pa kuyikwash akadivar ansand atakedila chikumangen (Tal paragraf 6)

6, 7. (a) Mikadil ik yimwing yikutwisha kumumekesh mwin Kristu uswila? (b) Chom ik chifanyidinay muntu ni muntu kwiyipul?

6 Rukat udi mwikadil umwing pakach pa mikadil yikatay kumekesh mwin Kristu uswila. (Galatia 5:22, 23) Ukat kumekesh kand kwitudish, kwilam, ni kushimpish muchim. Mikadil yiney yikutwish kumukwash kujijamen yakamish yikash pakad kuziy ni kurish nich milong yiziyishena pakad kushadish ruchingej. Mu dilejan diend dia panrend, mwin Kristu uswila ukat kukimbijol yany ya Bibil yikumukwasha kwijik kwauril yom yiwamp ni yom yiyimp. Chawiy lel, anch wasadin kom kend kafundishinau kudi Bibil, ukez kukwat mipak ya manangu. Mwin Kristu uswila udi muntu wikepishina, witiyijina anch umutakel ni yany ya Yehova yiwapin nakash kusutamu yendendiy. * (Tal mazu ma kwinshin.) Ukat kulejan rusangu ruwamp nich mushiku ni ukat kusal yom yawonsu yitwishikena mulong wa kulam uumwing wa chikumangen.

7 Ap anch twamusadidina kal Yehova mivu yivud, muntu ni muntu ufanyidin kwiyipul anch: ‘Kudi yom nifanyidina kuswimp mulong wa kumwimburij Yesu nawamp kamu? Kudi yom nikutwisha kuwapish nakash?’

“YAKUDIA YIKASH YIDI YA ANTU AKUDILA KAL”

8. Yesu wading wij ni kutesh Mifund mu chilik ik?

8 Yesu Kristu wading wij ni wading kutesh nawamp Mifund. Ap padingay ni mivu 12, wasadilang Mifund pambambangay nau alej mu tempel. “Antu awonsu amutesha ashimwoka nakash, mulong wakulanga kwa manangu.” (Luka 2:46, 47) Kupwa, palejanangay, wasadinanga nawamp Dizu dia Nzamb mulong wa kuyininetish akankuny end.Mateu 22:41-46.

9. (a) Program ik wa kwilej ufanyidinay mwin Kristu uswila kwikal nich? (b) Mulong wak tukat kwilej Bibil?

 9 Muntu ukimbina kwikal mwin Kristu uswila ukat kwimburij chilakej cha Yesu ni ufanyidin kwijik Bibil nawamp. Ukat kukimbijol mu Mifund uyakin ukurukina, mulong wij anch “yakudia yikash yidi ya antu akudila kal.” (Hebereu 5:14, TMK) Mwin Kristu uswila ufanyidin kwikal ni ‘ronganyin rakin’ ra Bibil. (Efes 4:13) Chawiy lel, ufanyidin kwiyipul anch: ‘Nikat kutangang kamu Bibil pichuku pichuku? Nikweting program wa dilejan dia muntu panrend? Nikat kusal difukwil dia dijuku rubing rawonsu?’ Piwilejina Bibil, kimb yany yikutwisha kukukwash kwijik yitongijok ni yovil ya Yehova. Kupwa, sadin yany yiney piukwatina mipak. Kusal mwamu kukukwash kumusejin Yehova.

10. Mutapu ik ukatay mwin Kristu uswila kwiyov piur pa yijil ni yany ya Nzamb?

10 Mwin Kristu uswila ufanyidin kusal yom yivud kusutamu ching kwijik yilondinay Bibil. Ufanyidin kukat yijil ni yany ya Nzamb. Mwamu, ukumekesh rukat rend pa kusal rusot ra Yehova pa ndond pa kusal rusot rend. Ukat kuswimp kand mutapu wend wa mashakamin, wa kutong ni wa yisalijok yend. Chilakej, ukat kumwimburij Yesu ni kukudish wuntu usu ‘watangau kukwatijan ni rusot ra Nzamb mu kutentam ni mu kushinshaman kwakin.’ (Tang Efes 4:22-24.) Chidi cha usey kuvurik anch Nzamb wasadila mwiku wend utumbila mulong wa kuyitakel antu afunda Bibil. Chawiy lel, pilejinay mwin Kristu Bibil, mwiku wa Nzamb ukat kumukwash kukul mu ronganyin, mu rukat ni mu urund wend nend Yehova.

 KASIKESH UUMWING

11. Yom ik yimenay Yesu pa mangand?

11 Yesu wading muntu uwanyidina. Pakwez, padingay pa mangand, washakama nau antu akad kuwanyin. Anvajend ni anamakwend amakundj nau amband ading awonsu akad kuwanyin. Ap in kwilej a Yesu amekeshang niyawiy mikadil mudi chibud ni choy. Chilakej, uchuku umwing kurutu kwa rufu rend, in kwilejend apwitijana ‘mulong wa kwijik nany wa pakach pau ukwikala upandakenamu kujimb.’ (Luka 22:24) Ap anch ading ni yitongijok yiyimp, Yesu wading wij anch in kwilejend akwikal in Kristu aswila ni akukasikesh uumwing wa chikumangen. Uchuku winiwa, Yesu walembila chakwel ikala mu umwing. Wamwita Tatukwend wa mwiur chakwel ikala awonsu mu umwing palonday anch: “Tatuku, . . . mudi muudia ey mu umwing ni yamam, niyam mu umwing ni yeyey.” Ni wawejinaku anch: ‘chakwel awiy ikala mu umwing mudi mutudia etu mu umwing.’Yohan 17:21, 22.

12, 13. (a) Mulong tudi in Kristu, rutong ik tukweta? (b) Mukadivar Uwe wileja mutapu ik kukasikesh uumwing?

12 Mwin Kristu uswila ukat kukasikesh uumwing wa chikumangen. (Tang Efes 4:1-6, 15, 16.) Mulong tudi in Kristu, rutong retu rifanyidin kwikal ra “kwikas pamwing,” kwawiy kulond anch, kusal mudimu pamwing mu umwing. Mulong wa kwikal ni umwing winou, mwin Kristu ufanyidin kwikal wikepishina. Ap anch amurumbukin kudi antu akwau, mwin Kristu ukat kusal usu wa kulam ni kukasikesh uumwing wa chikumangen. Chawiy lel, iyipula anch: ‘Mutapu ik nikata kusal anch mukadivar ap nambaz wanrumbukin? Nikat kwiyov nchik anch muntu wansal nayimp? Nikat kumujimen ni kulik kumulondish? Ap nikat kusal usu wa kurijek urund wetu?’ Mwin Kristu uswila ufanyidina kurish nich milong kurutu yiyipa.

13 Tushinshikinany chilakej cha Uwe. Pakur, wading kujiman mulong wa kuburen kuwanyin kwa akadivar nau anambaz. Kupwa wakwata mupak wa kusadil Bibil ni Étude perspicace des Écritures mulong wa kwilej piur pa mwom wa David. Mulong wak kwilej mwom wa David? Mulong wading ni milong yivud nau atushalapol amwing a Nzamb. Chilakej, Mwant Saul wakimba kumujip David, antu amwing asota kumwas mayal, ni mukajend wamusipa kamu. (1 Samwel 19:9-11; 30:1-6; 2 Samwel 6:14-22) Pakwez, chikalap nchik yom yamusadilau, David wamukata Yehova ni wamuchingejina. David wading ukwet riy. Uwe wamana anch wading ufanyidin niyend kusal mwamu. Kusutin dilejan diend dia Bibil, wileja anch wading uswiridin kuswimp mutapu wend wa kwiyov piur pa kuburen kuwanyin kwa akadivar nend. Wading ukwet kuswir kwa kulik kuvurik uyimp wau ni kukasikesh uumwing wa chikumangen. Niyey, ukwet rutong ra kusal mwamu?

TOND ARUND PAKACH PA ANTU ASADINA RUSOT RA NZAMB

14. Mutapu ik watonday Yesu arund nend?

14 Yesu Kristu wading uyikatin antu. Amakundj nau amband, ansand ni amakurump, ap an akemp, iyovang nawamp kwikal pamwing ni Yesu. Pakwez, watonda arund nend a piswimp nich manangu. Wayileja atwimbuy end anch: “En udiany arund nam anch ukat kusalany mudi nikulejinany.” (Yohan 15:14) Yesu watonda arund nend a piswimp pakach pa antu amulondula nich kushinshaman ni amukata ni amusadilang Yehova. Ukat kutond arund amukatina Yehova ni muchim wawonsu? Mulong wak chidi cha usey kusal mwamu?

15. Mutapu ik ukutwishau ansand kutaninamu mu urund nau in Kristu aswila?

 15 Mitapu yivud ya mabuj yiswiling ni muten. Chilik chimwing, rukat rakin ra akadivar nau anambaz netu rikutwish kukukwash kwikal mwin Kristu uswila. Udi nsand utongina mutapu ukukwata mipak piur pa yom ukusala mu mwom wey? Anch chidi mwamu, chidi cha manangu kutond arund amusadina Yehova nakash ni akasikeshina uumwing wa chikumangen. Arisha ni milong mu mwom wau ni ajijamena yikokujol mu mudimu wa Yehova. Akutwish kukukwash kutond mutapu uwamp wa mashakamin. Anch washakam nau pamwing, akutwish kukukwash kukwat mipak ya manangu ni kwikal mwin Kristu uswila.Tang Hebereu 5:14.

16. Mutapu ik wamukwashau nambaz umwing kudi arund nend amusutinamu mivu a mu chikumangen padingay nsand?

16 Helga uvurikin anch mu muvu wend wa nsudiel wa shikol, ansand nend a shikol ambambang piur pa yom yikusalau machuku ma kurutu. Avud pakach pau akimba kuya ku shikol ya piur mulong wa kwikal nich mudimu uwamp mu mwom. Pakwez, Helga wambamba nau arund nend aswila a mu chikumangen chau. Nambaz winou walonda anch: “Avud pakach pau ading amakurump kwinsutamu, ni ankwasha nakash. Ankasikesha kusal mudimu wa chisu chawonsu. Kupwa, nasala mivu yitan mu mudimu wa uchibol. Katat, kwinyim kwa mivu, nikwet musangara mulong wa yom yawonsu nasala mu mudimu wa Yehova ku usand wam. Nikwetap diyingish ap dimwing dia kwinan mulong wa kusal mwamu.”

17, 18. Mutapu ik tukutwish kumusadil Yehova nawamp?

17 Anch twamwimburij Yesu, tukukul ni kwikal in Kristu aswila. Tukumusejin Yehova, ni rusot retu ra kumusadil rikudandamen kukul. Muntu ukat kumusadil Yehova nawamp anch waswa. Yesu wayikasikesha in kwilejend anch: “Chawiy lel munyikany kutok kwen kurutu kwa antu, chakwel amana midimu yen yiwamp, amutumbish kand Tatukwen udia mwiur.”Mateu 5:16, TMK.

18 Twilej kal mutapu ukutwishay mwin Kristu aswila kupan ukwash ku chikumangen. Mwin Kristu umekeshin kand kuswa kwend mu mutapu usadidilay kom kend. Mutapu ik ukutwisha kom ketu kutukwash kukwat mipak ya manangu? Ni mutapu ik tukutwisha kulimish kom ka antu akwau? Tukwisambin piur pa yipul yiney mu mutu wa mulong ulondwilaku ou.

^ par. 6 Chilakej, amapal ni akadivar akweta ukaliweny akutwish kwit mudimu wa kusal ni kuyikwash akadivar ansand akweta yisend.