Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 9 , 2015

Mutapu ik Tukutwisha Kumekesh Anch Tumukatin Yehova?

Mutapu ik Tukutwisha Kumekesh Anch Tumukatin Yehova?

“Etu tukwet rukat mulong Nzamb watukata [wa] kusambish.”1 YOHAN 4:19.

MIMINY: 6, 138

1, 2. Mutapu ik watufundishay Yehova kumukat?

MUTAPU uwamp ukutwishay tatuku kuyifundish anend udi kusutil chilakej chend. Pamekeshinay rukat kudi anend, uyifundishin niyawiy kwikal nich rukat. Kwikil muntu wamekeshap kal rukat kudi etu kumusutamu Tatukwetu Yehova. chawiy lel, tukwet rukat “mulong Nzamb watukata [wa] kusambish.”1 Yohan 4:19.

2 Mutapu ik wamekeshay Yehova anch “watukata [wa] kusambish”? Bibil ulondin anch: “Pitwading etu akayitil Kristu watufila.” (Rom 5:8) Tatukwetu mwin rukat, Yehova, wapana Mwanend mudi difut mulong wa kutukol ku chitil ni rufu. Chipan chinech chiwamp chatwinka mutapu wa kwikal piswimp ni Yehova ni kumekesh anch tumukatin. Kusutil chipan chinech chijim, Yehova washa chilakej. Watufundisha anch tukutwish kukat anch twalik choy ni twikal in kupan.1 Yohan 4:10.

3, 4. Mutapu ik tumekeshina anch tumukatin Nzamb?

3 Rukat udi mwikadil wa pakampwil wa Yehova. Mwamu, tukutwish kwijik mulong wak Yesu walonda anch chijil chipandikena kujimb chawiy ech: ‘Ufanyidin kumukat Yehova Nzamb wey nich muchim wey wawonsu, nich mupim wey wawonsu, nich manangu mey mawonsu, nich usu wey wawonsu.’  (Marko 12:30) Yehova ukatin anch tumukata nich ‘muchim wetu wawonsu.’ Chikutwisha kumunenganesh anch twamukat muntu ap chom kanang kumusutamu. Pakwez rukat retu kudi Yehova rifanyidinap kwikal rakad dishin. Yehova kand uchingejin anch tumukata nich ‘manangu metu mawonsu’ ni ‘usu wetu wawonsu.’ Chinech chirumburikin anch tufanyidin kumukat Yehova mu manangu ni mu yisal.Tang Mike 6:8.

4 Chawiy tufanyidin kumukat Yehova nich yawonsu tukweta ni mutapu tudia. Anch twamutek Yehova pa ndond ya kusambish mu mwom wetu, tumekeshin anch tumukatin chakin. Mu mutu wa mulong wasutina ou, twambambin mitapu yinying yikatay Yehova kumekesh rukat rijim kudi anend. Tushinshikinany katat mutapu tukutwisha kukasikesh rukat retu mulong wa Yehova ni kumekesh anch tumukatin.

MEKESH KUJIKITISH KWEY KUDIAY YEHOVA

5. Chisu tutongina piur pa yawonsu yatusadinay Yehova, chom ik tufanyidina kusal?

5 Anch muntu wakwinkish chipan, mekesh anch uchisangaredin. Mulong uchikwatin nich usey, ufanyidin kuchisadin. Jakobu wafunda anch: “Yom yawonsu yiwamp ni yiwanyidina yikat kudiokal mwiur, yikat kudiokal kudi Tatuku wa kutok wakad kukarumuk, ap urel wakad kushemunikang.” (Jakobu 1:17, TMK) Tukwet musangar ujim mulong Yehova watwinkisha yom yivud mulong wa kwikal ni mwom ni kusanger mwom. Tumen mutapu utukatinay, ni tufanyidin kumekesh anch tumukatin niyetu. Chawiy chitongijok chey?

6. Chom ik chafanyinau in Isarel kusal anch asota Yehova adandamena kuyiyukish?

6 Yehova wayinkisha in Isarel yom yiwamp yivud. Mu yitot ya mivu, wayitakela kusutil yijil yend ni wayinkisha yom yawonsu yaswirikenau mulong wa kwikal ni mwom. (Kuvurik Yijil 4:7, 8) In Isarel afanyina kumekesh kujikitish kwau pa kuziyil ku yijil ya Yehova. Chilakej, chisu chapanangau milambu kudi Yehova, amwinkishanga “mabuj ma kusambish mapandikena kuwap” ma mwingand. (Kubudik 23:19) In Isarel ading ij anch Yehova ukudandamen kuyiyukish anch amuziyil ni amwinkish yom yau yipandikena kuwap.Tang Kuvurik Yijil 8:7-11.

7. Mutapu ik tukutwish kusadil ‘yom yetu ya usey’ mulong wa kumekesh anch tumukatin Yehova?

7 Niyetu tukutwish kumekesh anch tumukatin Yehova pa kumwinkish ‘yom yetu ya usey.’ (Jinswir 3:9) Tusadin mwamu mu kusadil yom tukweta mulong wa kumushiman. Chilakej, tukutwish kupan yipan mulong wa kukwash mudimu wa Want mu chikumangen chetu ni pa mangand mawonsu. Ap anch tukwet yom yivud ap yikemp, muntu ni muntu ukutwish kusadil yom yikwetay mulong wa kumekesh rukat rend kudi Yehova. (2 Korint 8:12) Pakwez kudi kand mitapu yikwau tukutwish kumekesh rukat retu kudi Yehova.

8, 9. Mutapu ik ukwau tumekeshina anch tumukatin Yehova? Chom ik chasalay Mike ni dijuku diend?

8 Yesu watufundisha kutek Want pa ndond ya kusambish ni kulik kwiyakamish piur pa yakudia ni ya kudjal. Tatukwetu washilamu kutwinkish yom tuswirikedina. (Mateu 6:31-33) Tumuchingejidin Yehova ni twij anch ukez kuwanyish yom yashilayimu. Mu win yakin, anch umukatin chakin muntu kanang, ukumuchingejin kamu. Chilik chimwing, anch twamuchingejin Yehova nakash, tumumekeshidin anch tumukatin. (Kuseng 143:8) Chawiy lel, tufanyidin kwiyipul anch: ‘Jintong jam ni mutapu nisadidina chisu ni usu wam yimekeshin  anch nimukatin chakin kamu Yehova? Dichuku diawonsu, nimuchingejidin Yehova anch ukubangin maswir mam?’

9 Mike ni dijuku diend amuchingejina Yehova. Mike padingau nsand, wading ukatin kulejan mu jingand jikwau. Ap kupwa kwa kwatan ni kuval an aad, wading ching ni rusot riner. Mike ni dijuku diend patangau piur pa akadivar nau anambaz asadidina mu jindond mudia kuswir kwa in kulejan, akwata mupak wa kuswapej mwom wau. Alandisha chikumbu chau ni ashemunika mu chikumbu chikemp. Mike wakepisha kand uvud wa midimu yend ya kwisak ni wasadina Internet mulong wa kwijik ngand ya kuya. Mudi yibudikin, Mike ni dijuku diend atwisha kubuk ni kuya mwi ngand yikwau, ni asangera nakash mudimu wau wa kulejan. Mike ulondin anch: “Twajingunina uyakin wa mazu ma Yesu madia mu Mateu 6:33.”

TONGIJOKIN PA YOM YIKUFUNDISHINAY YEHOVA

10. Mudi Mwant David, mulong wak chidi cha usey kutongijokin pa yom twilejina piur pa Yehova?

10 Mwant David wafunda anch: “Diur dikat kulejan uyaj wa Nzamb, ni maur makat kumekesh midimu ya makas mend.” Walonda kand anch: ‘Yijil ya Yehova yiwanyidin, yikat kupizurish mupim. Malejan ma Yehova madi makin, makat kulet ronganyin kudi muntu uburedina.’ Mudi mwatongijokinay David pa yijil ya manang ni yitang ya Yehova, waseja piswimp ni Yehova ni wasota kumekesh anch umukatin. David walonda anch: ‘Mazu ma mukan mwam ni manangu minitongijokina mu muchim wam amaka ku mes kwey, A Yehova, diyal diam, mukamunin wam.’Kuseng 19:1, 7, 14.

11. Mutapu ik tukutwisha kusadin ronganyin ratwinkishay Yehova mulong wa kumekesh anch tumukatin? (Tal chipich cha kwinsambishil.)

11 Nlel unou, Yehova utufundishin yom yivud piur pend, rutong rend, yitang yend, ni Dizu diend. Mangand mayikasikeshin antu kwilej, pakwez malejan ma piur makat kukepish rukat rau mudiay Nzamb. Chad Yehova usotin anch twikala ni ronganyin ni ukat kutukwash kwikal in manangu. Ukatin anch tusadina yitwilejina mulong wa uwamp wetu ni mulong wa kuyikwash antu akwau. (Jinswir 4:5-7) Chilakej, ukatin anch tulejana “ronganyin rakin ra uyakin” kudi antu akwau ni kuyikwash chakwel apanda. (1 Timote 2:4) Tumekeshin rukat retu kudi Yehova ni kudi antu kusutil ku kulejan nakash piur pa Want wa Nzamb ni yiukusala Want winou kudi antu.Tang Kuseng 66:16, 17.

12. Chom ik chalonday nambaz changadim piur pa chipan chatambulay kudi Yehova?

12 Ansand niyawiy akutwish kutongijokin pa yom yawonsu yayinkau ni yayifundishau kudi Yehova. Shannon uvurikin mutapu  wiyovay ku chitentam padingay ni mivu 11 ni mwanchend mband wa mivu 10. Ku chitentam chinicha, chisu cha diskur diading ni mutu wa mulong udia anch: “L’attachement à Dieu”, ansand awonsu pamwing ni Shannon ni mwanchend mband, ita chakwel ashakama pa ndond yiwamp. Chakusambish, wading unenganen. Pakwez washimwoka payinkishau ansand awonsu buku Les jeunes s’interrogent. Réponses pratiques. Mutapu ik wiyovay mulong wa chipan chinech chiwamp piur pa Yehova? Walonda anch: “Chinech chawiy chanshikija ku kwitiy anch Yehova udiaku ni winkatin am nakash, nakash kamu. Musangar mud ik tukweta mulong Yehova, Nzamb wetu mujim watwinkish kal chom chiwamp chinech, chipan chiwanyidina!”

ITIY DIPUP DIDIOKILA KUDI YEHOVA

13, 14. Mutapu ik tufanyidina kwakul ku dipup dia Yehova, ni mulong wak?

13 Bibil utuvurishin anch: “[Yehova] ukat kumubabesh mwawosu ukatilay, mudi tatuku umukatila mwanend.” (Jinswir 3:12) Anch twitiy dipup dia Yehova ni kulik chakwel atufumba, tulejin kusal yom yitentamina ni tukwet chisambu. Pakwez, “pakat kutukandau chikat kumekan anch chidi chisu cha runeng, kichidiap chisu cha musangar.” (Hebereu 12:11) Ap anch chidi mwamu, mutapu ik tukata kwakul chisu chikatay Yehova kutupup? Tufanyidinap kudiul chiyul cha Yehova ap kudandamen kujiman anch tusadinap mutapu uchifanyidina. Tumukatin Yehova, chawiy tukat kumutesh ni kusal usu wa kuswimp.

14 Chirungu cha Malakiy, in Yuda avud kamuteshap Yehova. Avuramena anch milambu yamwinkishagau yadingap kumusangaresh. Chawiy, Yehova wayinkisha yiyul yikash piur pa mulong winou. (Tang Malakiy 1:12, 13.) Chad, Yehova wayinkishanga yiyul yisu yivud, pakwez alika kwau kutesh. Kupwa wayipula anch: “Nikez kakuyindamishany, Nikez kakuyindamishany kand ku yom yawonsu yikata kukukwashany.” (Malakiy 2:1, 2) Chimeken patok anch, ang twadandamen kulik kutesh chiyul cha Yehova ap kuman anch chidiap cha usey, tukujip urund wetu nend.

Tongin pa yom yikatinay Yehova pa ndond pa kutongin pa yom yikatinau antu a mangand (Tal paragraf 15)

15. Yitongijok ya mutapu ik tufanyidina kwipuk?

15 Mangand ma Satan mayikasikeshin antu kwikal in chibud ni in choy. Avud kakatiningap kuyikwash ni yiyul ap kuyipul piur pa chom chisadinau. Amwing ateshining yiyul ching chisu chikwetau nich kuswir. Tufanyidinap kwikal mudi awiy. Bibil utulejin anch “Kangal wifanakeshany ayinen nich yaku ya antu a mangand minam.” Pakwez tuswiridin kwijik yitwitinay Yehova ni kusal yom yimusangareshina. (Rom 12:2) Ukat kusadin dirijek  diend mulong wa kutwinkish yiyul pa chisu chiwanyidina. Chilakej, akat kutuvurish piur pa mutapu tufanyidina kushakam nau antu a winzikis ukwau, mutapu wa kutond arund, ni mutapu wa kupim ni kwipuwangej. Anch twitiy kwa kwisotin dipup dia Yehova ni twaswimp mulong wa kumusangaresh, tukumekesh anch tusangaredin umutakel wend ni tumukatin chakin kamu.Yohan 14:31; Rom 6:17.

MUCHINGEJINA YEHOVA CHAKWEL AKUKWASHA NI AKULAMA

16, 17. (a) Mulong wak tufanyidin kwijik chitongijok cha Yehova kurutu kwa kukwat mipak? (b) Chom ik chasalau in Isarel pa ndond pa kumuchingejin Yehova?

16 An akemp akat kuyichingejin anvajau chakwel ayikwasha ni ayilama. Ap antu apamina kal akat kwit ukwash kudi anvajau. Ijing anch ap anch akutwish kukwat mipak yau ayinau, anvajau akutwish kuyinkish yiyul yiwamp. Tatukwetu Yehova ukat kulik anch tukwata mipak ayinetu. Pakwez, mulong tumuchingejidin ni tumukatin, tukat kudandamen kumwit ukwash ni kusal yawonsu yitwishikena mulong wa kwijik yitonginay kurutu kwa kukwat mupak. Anch twamuchingejin Yehova, ukutwinkish mwiku wend utumbila mulong wa kutukwash kusal yom yitentamina.Filip 2:13.

17 Chirungu cha Samwel, in Isarel akanganya njit jarishau nau in Filistin. Pa ndond pa kumwipul Yehova chom chafanyinau kusal, alonda anch: “El tuyany bil ku Silo, tukalet Mushet wa Manswik ma [Yehova] kunoku, chakwel ndiy ukutwish kwikal mukach mwetu ni kutupandish kudiokal ku usu wa akankuny netu.” Chom ik chashikena ku mupak wakwatau? “Ayijipa in Isarel avud, ayijipa amasalay au in kwend ra pansh tunan makum masatu twa in Isarel. Chad akwata Mushet wa Manswik ma Nzamb.” (1 Samwel 4:2-4, 10, 11) In Isarel atonga anch, ang asend Mushet, Yehova wafanyina kuyikwash ni kuyilam. Pakwez kamwitap Yehova ukwash ni kasalap usu wa kukimb chakwel ijika chitongijok chend. Chad, asala yamanau anch yiwapin, ni amana mar nakash.Tang Jinswir 14:12.

18. Chom ik chifundishinay Bibil piur pa kumuchingejin Yehova?

18 Nfund a kuseng wamukata nakash Yehova ni wamuchingejina pafunday anch: ‘Nikumuchingej Nzamb, nikumushiman kand kapamp kakwau. Ndiy udi Nzamb wam, ndiy kand dipandish diam. A Nzamb wam, mupim wam ukwetap kand ruchingej, mulong nikat kukuvurik ey.’ (Kuseng 42:5, 6) Wawiy mutapu ukata kwiyov piur pa Yehova? Ukat kwiyov anch udi piswimp nend ni ukat kumuchingejin? Ukutwish kwilej kumuchingejin nakash. Bibil utulejin anch: “Mukungamena [Yehova] ni muchim wey wawonsu. Kangal wachingej ronganyin rey amwiney. Mu jinjil jey jawonsu itiyij kudi Ndiy, ni Ndiy ukez katenchik jinjil jey.”Jinswir 3:5, 6.

19. Mutapu ik ukumekesha anch umukatin Yehova?

19 Mulong watukata wakusambish, Yehova watufundisha mutapu wa kumukat. Tudandamenany amboku kutongin pa yom yatusadinay ni mutapu utukatinay nakash. Tumekeshany kand anch tumukatin nich muchim wetu wawonsu, manangu, mupim, ni usu wetu wawonsu.Marko 12:30.