Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 9 , 2015

“Imanany Dang mu Ritiy”

“Imanany Dang mu Ritiy”

“Imanany dang mu ritiy, . . . ikalany akash.”1 KORINT 16:13.

MIMINY: 23, 34

1. (a) Chom ik chamushikena Pita chisu cha rikind mukash pa dijiy dia Galaliya? (Tal chipich cha kwinsambishil.) (b) Mulong wak Pita wasambisha kujiy mu mem?

DICHUKU dimwing uchuku, kambuy Pita ni in kwilej akwau asala usu nakash mulong wa kwauk pa karung wa Galaliya patutay rikind mukash. Kapamp kamwing amumana Yesu ukat kwendil pa mem. Pita wamutazuka Yesu ni wamwita anch niyend endila pa mem chakwel aya kudi ndiy. Pamulejau kudi Yesu anch ez, Pita washirika mu waat ni wasambisha kuya kudi ndiy. Kupwa, Pita wasambisha kwandam mu mem. Mulong wak? Mulong watala rikind ni mambek ni wova wom. Pita wita ukwash ni Yesu wamukwata swa ni wamwel anch: “Ey ukwet ritiy rikemp! Ov, mulong wak widjidjekina?”Mateu 14:24-32.

2. Chom ik tukushinshikina katat?

2 Tushinshikinany yom yisatu tukutwisha kwilej piur pa ritiy kusutil yamushikena Pita: (1) mutapu wachingejay Pita kwisambishil anch Yehova ukumukwash, (2) mulong wak Pita wasambisha kushadish ritiy, ni (3) chom ik chamukwasha Pita kwikal kand ni ritiy. Kushinshikin yom yiney kukutukwash kuman mutapu  tukutwisha ‘kwiman dang mu ritiy.’1 Korint 16:13.

KUTEK RITIY MUDIAY NZAMB KUKUTUKWASH

3. Mulong wak Pita wadiokala mu waat, ni mutapu ik twasala mudi ndiy?

3 Pita wading ukwet ritiy rikash. Mulong wak? Mulong pamutazukau kudi Yesu, Pita wadiokala mu waat ni wendina pa men. Wading ni kashinsh anch usu wa Nzamb wafanyina kumukwash kusal mudi mwasalay Yesu. Chilik chimwing, patutazukay Yesu kumulondul, twipana kudi Yehova ni twatambula dibatish. Mulong wak? Mulong wa ritiy retu mudiay Yehova nend Yesu ni mulong twikala ni kashinsh anch akutukwash.Yohan 14:1; tang 1 Pita 2:21.

4, 5. Mulong wak ritiy udi uswan wa usey nakash?

4 Ritiy chidi chom cha usey nakash. Ritiy ra Pita ramwinkisha usu wa kwendin pa mem, chom chimwing chading chikasikena kudi antu. Ritiy rikutwish kand kutukwash niyetu kusal yom yimekena anch yikasikena kudi antu. (Mateu 21:21, 22) Antu amwing pakach petu aswimpa nakash mwikadil ni mashakamin mau ni antu ading ayija kurutu katwishap kand kuyijik. Tuswimpin mwamu mulong tumukatin Yehova ni mulong ukat kutukwash kusal mwamu. (Tang Kolosay 3:5-10.) Ritiy rikat kutubachik kwipan kudiay Yehova, ni kwikal arund nend, yom yiney yikutwishap kusadik pakad ukwash wend.Efes 2:8.

5 Ritiy retu rikat kutukasikesh. Chilakej, rikat kutukwash kurish njit nend Djabul, mukankuny wetu mukash. (Efes 6:16) Chikwau kand, mulong tumuchingejidin Yehova, tufanyidinap kwov wom chisu tukweta milong. Yehova washilamu anch ukutwinkish yom tukweta nich kuswir anch tutekin ritiy mudi ndiy ni Want wend pa ndond ya kusambish. (Mateu 6:30-34) Chikwau kand, mulong wa ritiy retu, Yehova ukutwinkish mwom wa chikupu.Yohan 3:16.

ANCH TWASHADISH RUCHINGEJ TUKUTWISH KUSHADISH RITIY RETU

6, 7. (a) Chom ik tukutwisha kufanikesh nich rinkind ni mambek yamwovisha Pita wom? (b) Mulong wak tufanyidin kwijik anch chiswapel kushadish ritiy retu?

6 Pendinay Pita pa dijiy dia Galaliya, wova wom. Mulong wak? Mulong wa rinkind ni mambek. Yom yiney tukutwish kuyifanikesh ni yakamish ni yoziu yirishinau nich in Kristu nlel. Ap anch milong yiney yidi yikash, tukutwish kwikal akash ku ukwash wa Yehova. Pakwez vurik bil yamushikena Pita. Kajiyap mulong wa rikind ni mambek yamubula. Pakwez Bibil ulondin anch: “Pamanay rinkind ukat kutut nich usu, Pita wova wom.” (Mateu 14:30) Pita walika kutal kudiay Yesu ni washinshikina pa usu wadinga nich rikind. Pinipa, ritiy rend rasambisha kuziy. Chilik chimwing, anch twashinshikin pa milong yetu, tukutwish kuman anch Yehova kakutukwashap.

7 Tufanyidin kwijik anch chiswapel kushadish ritiy retu. Mulong wak? Mulong Bibil ulondin anch kushadish ritiy chidi ‘chitil chikata kamu kutupwakesh.’ (Hebereu 12:1) Mudi Pita, anch twashinshikin pa yom yiyimp, ritiy retu rikuziy swa. Chad mutapu ik tukutwisha kwijik anch ritiy retu ridi mu ubaj? Chipul ech chikutukwash kwishinshikin ayinetu.

8. Mutapu ik ukutwisha kushilamu kwa Nzamb kumekan kudi etu anch kukwetap usey mudi mutwading kuman kwinsambishil?

8 Kushilamu kwa Nzamb kudi kwakin ku mes mam nlel mudi mukwading kwinsambishil? Chilakej, Nzamb washilamu anch ukujiyish mangand ma Satan. Pakwez, tukat kwikal nich kampuw mulong wa mitapu ya kwipuwangesh yiletinau kudi mangand minam? Anch chidi mwamu, tukutwish kusambish kuman anch disudiel didiap kwau piswimp ap. (Abakuk 2:3) Tongin kand piur pa chilakej chikwau. Yehova wapana difut, ni washilamu kutulikishin  yitil yetu. Pakwez anch twadandamen kushinshikin pa yom yiyimp twasal pasak, tukutwish kusambish kuman anch Yehova katulikishidinap. (Midimu 3:19) Kupwa, tukutwish kushadish musangar wetu wa kumusadin Nzamb ni kulik kuya kulejan.

9. Chom ik chikutwisha kushiken anch twashinshikin ching pa yom ya kumujimbu mu mwom?

9 Nikat kumwinkish kamu Yehova yom yam ya usey? Anch tumusadidin Yehova nakash, chinech chikutukwash kushinshikin pa ruchingej retu ra machuku ma kurutu. Pakwez, chikwikal nchik anch twasambish kushinshikin nakash pa yom yetu ya kumujimbu? Chilakej, tukutwish kwitiy kusal mudimu ufutinau nawamp pakwez utukangeshina kumusadin Yehova. Chinech chikutwish kuziyish ritiy retu, ni tukutwish ‘kwikal ni usweral,’ ni kumusadin Yehova pakemp nakash kusutamu mutukutwisha kumusadin.Hebereu 6:10-12.

10. Mutapu ik tukata kumekesh ritiy mudiay Yehova pitukata kuyilikishin antu?

10 Chinkasikedining kumulikishin muntu? Anch antu aturumbukin ap anch atusadin yom yiyimp, tukat kuyijimenang ap kulik kuyilondish? Anch chidi mwamu, tufanyidin kushinshikin nakash yovil yetu. Tukat kumekesh ritiy retu kudiay Yehova pitukata kuyilikishin antu akwau. Mutapu ik? Anch muntu waturumbukin, ukwet chikal ni yetwetu. Pitukata kumurumbukin Yehova, tukat kwikal ni chikal kudi ndiy. (Luka 11:4) Chawiy lel, anch twayilikishin antu, tuchingejin anch Yehova ukutulikishin niyetu. Tuchingejin anch Yehova ayukish mwikadil wetu, ni chiyukish chend chikwet usey nakash kusutamu yawonsu yikutwishay muntu kufut mulong wa yom yatusadinay. In kwilej a Yesu ileja anch chifanyidin kwikal ni ritiy mulong wa kuyilikishin antu. Payilejay Yesu anch chifanyidin kuyilikishin ni antu ayirumbukina tupamp tuvud, in kwilejend amuleja anch: “Tuwejinaku ritiy.”Luka 17:1-5.

11. Chom ik chikutwisha kutukangesh kutesh chiyul?

11 Nikat kujimanang anch angikish chiyul? Shinshikin pa chiyul chikwinkinau kulik kushinshikin pa uyimp ap kuziy kwa muntu ukwinkina chiyul chinech. (Jinswir 19:20) Tufanyidin kusal usu wa kwilej kutong mudi mutonginingay Yehova.

12. Chom ik chikutwisha kushiken anch muntu ukat kupwitijan nau antu atakedila?

12 Nifanyidin kwinan piur pa antu atakedila chikumangen? Pashinshikinau in Isarel pa rapor muyimp wa in kutentish dikum, asambisha kumwinaniny Moses nend Aron. Kupwa Yehova wamwipula Moses anch: “chisu ik chikez kwingitiyijau am?” (Kuchind Michid 14:2-4, 11) Mwaning, Yehova wijika anch in Isarel kadingap kumuchingejin ndiy mulong anungana piur pa Moses nend Aron, antu atonday. Chilik chimwing kand, anch tukat kwinan ap kupwitijan nau antu akatay Yehova kusadin nlel, chinech chikutwish kumekesh anch ritiy retu mudiay Nzamb raziy kal.

13. Mulong wak tufanyidinap kwov nayimp anch twaman anch ritiy retu raziy kal?

13 Kupwa kwa kushinshikin yipul yiney, kangal wov nayimp ang waman anch ritiy rey raziyin kal. Vurik anch Kambuy Pita niyend wova wom ni wasambisha kutadik. Ni yisu yimwing Yesu wayiyula atwimbuy awonsu mulong ading akwet “ritiy rikemp.” (Mateu 16:8) Pakwez, tukutwish kwilej dilejan dia usey kusutil yom yamushikena Pita. Shinshikin pa yom yasalay Pita kupwa kwa kusambish kwov wom ni kujiy mu mem.

MUSHINSHIKINA YESU CHAKWEL UKASIKESHA RITIY REY

14, 15. (a) Chom ik chasalay Pita pasambishay kujiy mu mem? (b) Mutapu ik tukutwisha “kumutal” Yesu?

14 Chom ik chasalay Pita pasambishay kujiy mu men? Pita wading wij kwisay nakash, ni wela kukwat mupak wa kwisay ni kuchirik mu waat. (Yohan 21:7) Pakwez mulong  wak kasalap mwamu? Mulong kichingejinap amwinend. Wamuchingejina Yesu ni witiya ukwash wend. Anch twajingunin anch ritiy retu raziy kal, tufanyidin kumwimburij Pita. Mutapu ik tukutwisha kusal mwamu?

15 Ching mudi mwachingejay Pita anch Yesu amukwasha, niyetu tufanyidin “kumutal” Yesu. (Tang Hebereu 12:2, 3.) Pakwez tukutwishap kumuman ni mes metu mudi mwamumanay Pita. Chad mutapu ik tukutwisha “kumutal” Yesu? Tukutwish kwilej yom yafundishay ni yasalay ni kumwimburij kamu. Anch twasal mwamu, tukutambul ukwash tukweta nich kuswir mulong wa kukasikesh ritiy retu. Tushinshikinany amboku mitapu yimwing tukutwisha kusal mulong wa kumwimburij Yesu.

16. Mutapu ik ukutwishay Bibil kutukwash kukasikesh ritiy retu?

16 Kasikesh ruchingej rey mu Bibil. Yesu wading ukwet kashinsh anch Bibil didi Dizu dia Nzamb ni chinech chitwinkin umutakel uwamp. (Yohan 17:17) Mulong wa kumwimburij Yesu, tufanyidin kutang Bibil pichuku pichuku, kumwilej, ni kutongijokin pa yom twilejina. Tufanyidin kand kukimb yakul ku yipul tukata kwiyipul. Chilakej, chikukasikedin kwitiy anch tudi mu machuku mansudiel? Kasikesh ritiy rey mu machuku minam mansudiel pa kwilej uprofet wa Bibil umekeshina anch tudi mu machuku mansudiel. Usotin kukasikesh ritiy rey mu kushilamu kwa Nzamb piur pa machuku ma kurutu? Chawiy lel, ileja uprofet wa Bibil wawanyina kal. Witiyijin chakin anch Bibil ulondin yom yakin kushik ni nlel? Ukutwish kutang yom piur pa akadivar nau anambaz aswimpa mashakamin mau ku ukwash wa Bibil. * (Mazu ma kwinshin.)1 Tesalonik 2:13.

17. Mulong wak Yesu watwisha kujijamen yakamish, ni mutapu ik ukutwisha kumwimburij?

17 Shinshikin pa yiyukish yakanay Yehova. Yesu washinshikinang pa yiyukish yend ya machuku ma kurutu, ni kusal mwamu kwamukwasha kujijamen yakamish. (Hebereu 12:2) Kasotap dichuku ap dimwing  kwipuwangej nich yom ya mu mangand. (Mateu 4:8-10) Mutapu ik tukutwisha kwimburij chilakej cha Yesu? Tongijokin pa kushilamu kusangareshina kwasalay Yehova. Tong mudi udi mwi ngand yisu. Ukutwish kufund ap kufatul yiukusala mu Paradis. Ap ukutwish kusal list wa antu akuvumbuka ufanyidina kwambamb nau ni yom ukuyileja. Shinshikin pa kushilamu kwa Nzamb, kulik ching mutapu ukeza kuwanyina kushilamu mulong wa antu awonsu, pakwez mulong weyey.

18. Mutapu ik ukutwisha malembil kukasikesh ritiy retu?

18 Lembil chakwel wikala ni ritiy rikash. Yesu wayifundisha in kwilejend kumulembil Yehova chakwel ayinkisha mwiku utumbila. (Luka 11:9, 13) Mudi muukata kulembil mulong wa kwit mwiku utumbila, lembil kand mulong wa kwikal ni ritiy rikash. Chidi chom chimwing cha ku dibuj dia mwiku utumbila. Ufanyidin kujimbul chom ukimbina mu malembil mey. Chilakej, ang umen anch chikukasikedin kuyilikishin antu akwau, mwita Yehova chakwel akukwasha kulam ritiy rey ni wikal mwin kuyilikishin antu akwau.

19. Mutapu ik tukutwisha kutond arund awamp?

19 Tond arund akweta ritiy rikash. Yesu watondang arund nend nich manangu. Atwimbuy ading arund nend a piswimp, ading antu ashinshamena ni in kumuziyil. (Tang Yohan 15:14, 15.) Mwimburija Yesu ni tond arund ney ni manangu. Afanyidin kwikal antu akweta ritiy rikash ni akata kumuziyil Yesu. Arund akin afanyidin kwikal antu akweta kashinsh umwing ni mukwau, chisu chipaninau ap chitambwilau chiyul.Jinswir 27:9.

20. Chom ik chikutwisha kushiken anch wayikwash antu akwau kukasikesh ritiy rau?

20 Yikwasha antu akwau kukasikesh ritiy rau. Yesu wayikwasha in kwilejend kukasikesh ritiy rau kusutil yalondangay ni yasalangay. (Marko 11:20-24) Tufanyidin kwimburij chilakej cha Yesu. Anch twasal mwamu, tukukasikesh ritiy retu ni ra antu akwau. (Jinswir 11:25) Ukutwisha kuyikwash antu a mu teritwar wey mutapu ik? Chisu uyifundishina Bibil, kasikeshin pa uman umekeshina anch Nzamb udiaku, ukat kutubangin, ni anch Bibil didi Dizu dia Nzamb. Mutapu ik ukutwisha kuyikwash akadivar ni anambaz ney kulam ritiy rau rikasikena? Anch waman anch muntu ulondin nayimp piur pa akadivar atakedila, kangal wamulik kapamp kamwing. Sal usu wa kumukwash chakwel awapisha ritiy rend. (Jud 22, 23) Anch uchid kal ku shikol ni mulej wey ulondin piur pa dikarumuk, ikasikesha ni lond piur pa ritiy ukweta piur pa chitangil. Mulej wey nau ansand ney a ku shikol akutwish pamwing ap kwitiyij mu mutapu wakad kuchingejin.

21. Chom ik chakanay Yehova kudi muntu ni muntu pakach petu?

21 Yehova ni Yesu amukwasha Pita kupandakan kwidjidjek ni wom. Kupwa, Pita mu mwom wend wikala chilakej chiwamp nakash cha ritiy kudi antu akwau. Chilik chimwing, Yehova ukat kutukwash etu awonsu kushal iminya dang mu ritiy. (Tang 1 Pita 5:9, 10.) Chikutwish kwit chisu mulong wa kukasikesh ritiy retu, ni Yehova ukutufut anch twasal mwamu.

^ par. 16 Chilakej, tal mitu ya milong “Bibil Ukarumwin Mwom wa Antu” yidia mu Chinong cha Kalam.