Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 9 , 2015

Kom Key Kakat Kukutakel Nawamp?

Kom Key Kakat Kukutakel Nawamp?

“Chom chitukata kusot chawiy rukat ra mu muchim utok, ni kom kawamp.”1 TIMOTE 1:5, TMK.

MIMINY: 22, 48

1, 2. Nany watwinkisha kom, ni mulong wak tufanyidin kujikitish mulong tukakwet?

YEHOVA NZAMB wayitanga antu nich maswir ma want ipau, wa kutond yom yifanyidinau kusal. Mulong wa kutukwash kutond kusal yom yiwamp, Yehova utwinkin mwin kututakel. Mwin kututakel winou kawiy kom, mwikadil wa kwauril yom yiwamp ni yiyimp. Anch twasadin kom ketu mu mutapu uwamp, kakutwish kutukwash kusal yom yiwamp ni kwipuk kusal yom yiyimp. Kom ketu kad uman umekeshina anch Yehova utukatin ni usotin anch tutwisha.

2 Antu amwing nlel akat kusal yom yiwamp ni kukis yom yiyimp ap anch kijap kwau yany ya Bibil. (Tang Rom 2:14, 15.) Mulong wak mwamu? Mulong wa kom kau. Kakat kuyikangesh antu avud kusal yom yiyimp. Tong bil mutapu welang mangand kuyip anch antu kadiap ni kom! Twela kutesh jinsangu jivud jiyimp nakash. Tufanyidin kumujikitish kamu Yehova mulong watwinkisha kom.

3. Mutapu ik ukutwisha kom ketu kutukwash mu chikumangen?

3 Antu avud kakatap kutong piur pa kufumb kom kau. Pakwez, antu a Yehova asotin anch kom kau kasala  nawamp mulong kakutwish kuyikwash kukasikesh uumwing wa chikumangen. Tusotin anch kom ketu kutuvurisha yany ya Bibil piur pa uwamp ni uyimp. Chawiy lel, mulong wa kufumb ni kusadin kom ketu, tufanyidin kusal yom yivud kulik ching kwilej yilondinay Bibil. Tufanyidin kukat yany ya Nzamb ni kwitiy anch yidi ya ukwash kudi etu. Paul wafunda anch: “chom chitukata kusot chawiy rukat ra mu muchim utok, ni kom kawamp, ni ritiy rakad kubabek.” (1 Timote 1:5, TMK) Anch twafumb kom ketu ni kulik kututakela, rukat ni ritiy retu mudiay Yehova yikukul. Mutapu tusadidina kom ketu umekeshin mutapu udia urund wetu nend Yehova ni umekeshin mutapu tusotina kumusangaresh. Kom ketu kameshin kand wuntu wetu wakin.

4. Mutapu ik tukutwisha kufumb kom ketu?

4 Mutapu ik lel tukutwisha kufumb kom ketu? Tufanyidin kwilej Bibil pichuku pichuku, kutongijokin yom yitutangina, ni kumwit Yehova chakwel atukwash kusadin yitwilejina. Chinech chirumburikin anch tufanyidinap ching kwilej mbil ni yany ya mu Bibil. Pitwilejina Bibil, rutong retu rifanyidin kwikal ra kumwijik Yehova nawamp. Tukushiken ku kwijik wuntu wend ni kwijik yikatinay ni yikisinay. Anch twilej nakash piur pa Yehova, kom ketu kakushiken swa kwijik yom yidia yiwamp ni yiyimp. Anch twafumb kom ketu nawamp, tukushiken kwikal ni yitongijok mudi ya Yehova.

5. Chom ik tukwisambina mu mutu wa mulong winou?

5 Pakwez, tufanyidin kwiyipul anch: Mutapu ik ukutwisha kom kafumbinau nawamp kutukwash pitukweta kuswir kwa kukwat mipak? Mutapu ik tukutwisha kulimish kom ka anamakwetu in Kristu? Ni mutapu ik ukutwisha kom ketu kutubachik kusal yom yiwamp? Tushinshikinany amboku yom yisatu tukweta nich kuswir mulong wa kwikal ni kom kafumbinau nawamp: (1) kwiyokish, (2) kwipuwangej, ni (3) mudimu wetu wa kulejan.

IKAL MUNTU WISIKENA

6. Mipak ik tukwatina piur pa kwiyokish?

6 Bibil utulejin anch twipuka yom yiyimp yikutwisha kutusal nayimp ni kwikal isikena mu yisalijok yetu, mudi mu yakudia ni ya kuna. (Jinswir 23:20; 2 Korint 7:1) Anch twaziyil ku chiyul cha Bibil, chikutwish kutukwash kulam nawamp mujimbu wetu. Pakwez tukushiken ching ku kuyel ni kunanap. Mipak ik yitufanyidina kukwat? Mu jingand jimwing, kwiyokish nich mon wa ayindel ap wa antu ajal akwitiyin kwau. Mabiro ma mitiy makat kutambul mikand yidiokila kudi akadivar nau anambaz akata kwipul piur pa mitapu ya kwiyokish. Avud ipula anch: “Kashalapol wa Yehova ukutwish kwitiy mutapu winou wa kwiyokish?”

7. Mutapu ik tukutwisha kukwat mipak piur pa mash?

7 Biro wa mutiy ap amakurump a kwol kwen kakwetap usu wa kumukwatin mwin Kristu mupak piur pa kwiyokish, ap anch wayipul chifanyidina kusal. (Galatia 6:5) Pakwez, amakurump akutwish kukasikesh chitongijok cha Yehova mulong wa kumukwash mwin Kristu kukwat mupak wa manangu. Chilakej, Nzamb utulejin anch tulika kusadin mash mu mutapu uyimp. (Midimu 15:29) Chiyul chinech chikat kuyikwash in Kristu kwijik mitapu ya kwiyokish yifanyidinau kwipuk yikatau kusadin mash ap yikunku yijim yinying ya mash. Chiyul chinech chikutwish kwikal ni yibudikin yikash pa kom ka mwin Kristu anch wakwat mupak wa kwitiy yikunku yikemp ya mash yidiokila ku yikunku yijim yinying ya mash. * (Tal mazu ma kwinshin.) Yiyul ik yikwau ya Bibil yikutwisha kutukwash  kukwat mipak ya manangu piur pa kwiyokish?

8. Mutapu ik ukutwishay Filip 4:5 kutukwash kukwat mipak ya manangu piur pa kwiyokish?

8 Jinswir 14:15 ulondin anch: “Muntu wamwamu ukat kwitiyij mazu mawonsu, pakwez muntu ubabela ukat kushinshik kuyilay.” Nlel unou, kwikil mwon mulong wa mayej kampand. Chawiy lel, tufanyidin kubabel mitapu ya kwiyokish yibazinau antu, pakwez yipwishinap kwau mayej. Paul wafunda anch: ‘Mwikadil wen wisikena wijikana kudi antu awonsu.’ (Filip 4:5) Mwikadil wisikena ukutukwash kushinshikin pa difukwil dia Yehova pa ndond pa kushinshikin mwom wetu ching pa milong ya kwiyokish. Anch milong ya kwiyokish yikal ya usey nakash mu mwom wetu, tukutwish kumekesh anch twikatin ayinetu kupandakan. (Filip 2:4) Twij anch tukutwishap kamu kwikal ni ukash wa mujimbu uwanyidina mu ditenchik dined. Chad, tufanyidin kwikal nich kashinsh anch kumusadin Yehova chawiy chom cha usey nakash mu mwom wetu.Tang Filip 1:10.

Ukat kuyibachikang antu akwau chakwel itiya chitongijok chey? (Tal paragraf 9)

9. Usu ik ukwetay Rom 14:13, 19 pa mipak tukwatina piur pa kwiyokish, ni mutapu ik tukutwisha kuvundangesh uumwing wa chikumangen chetu?

9 Mwin Kristu wisikena kafanyidinap kuyibachik akwau kusal yimenay anch yiwapin. Mwi ngand yimwing, antu atijadina ayikasikesha akwau kudia yakudia yimwing ni kulik kudia yakudia yikwau. Ayishindila akadivar amwing kusal mwamu pakwez akwau alika kwau. Chisu chakanganya yakudia yimwing ni kulik yakudia yikwau kulet yibudikin yiwamp, akadivar nau anambaz avud ova nayimp. Antu atijadina inay afanyina ayinau kudia yakudia yikatinau ni kulik yikwau. Pakwez, chidiap cha manangu kuvundangesh uumwing wa chikumangen mulong wa milong ya kwiyokish. Mu Rom wa pasak, in Kristu amwing ading ni yitongijok kushalijan piur pa yakudia ni misambu. Paul wayinkisha chiyul ik? Wayileja anch: “Antu amwing atongil anch, machuku mamwing makwet usey kupandakanamu makwau, chad antu akwau atongil anch, machuku mawonsu madi kwau mutapu umwing. Chifanyidin muntu ni muntu kutenchik yitongijok mu muchim wend amwinend.” Tubabalany amboku mulong wa kwipuk kuyipwakesh antu akwau.—Tang Rom 14:5, 13, 15, 19, 20.

10. Mulong wak tufanyidin kulimish mipak yikwatinau antu akwau? (Tal chipich cha kwinsambishil.)

10 Yisu yimwing, tukutwishap kutesh nawamp mulong wak antu amwing mu chikumangen akat kukwat mipak kanang mu mwom wau. Chom ik tufanyidina kusal? Tufanyidinap kuswakal kuyilond nayimp ap kuyibachik kuswimp chitongijok chau. Pamwing ap ukwet kuswir kwa kufumb kom kend nawamp, ap mulong kom kend kaswakeling kusal. (1 Korint 8:11, 12) Ap pamwing ap kom ketu kawiy kakad kufumb nawamp. Anch tukwet milong ya kwiyokish ap milong yikwau, muntu ni  muntu pakach petu ufanyidin kwikwatin mipak yend amwinend ni kwitiy yawonsu yikushikena.

SANGER KWIPUWANGEJ

11, 12. Mutapu ik ukutwishay Bibil kutukwash kutond mitapu ya kwipuwangej?

11 Yehova watutanga mu mutapu ufanyidina kusanger kwipuwangej ni kutaninamu. Salomon wafunda anch kudi ‘chisu cha kusip’ ni ‘chisu cha kuja maj.’ (Mulej 3:4) Pakwez, kwipuwangej kwawonsu kudiap kuwamp ap kusangareshina. Tufanyidin kand kwipuk kusutish chisu chivud mu kwipuwangej. Mutapu ik lel ukutwisha kom ketu kutukwash kusanger ni kutaninamu mu kwipuwangej kukatinay Yehova?

12 Bibil utubabeshin piur pa “yisalijok ya wuntu.” Pakach pa yisalijok yiney padi “usund, ni kwimik dis, ni upwepu ni kwifukwil akish, ni ulaj, ni rukuny, ni matend, ni mukau, ni ujim, ni ris, ni kwaurok, ni kupompatijan, ni kukisan, ni kukwachik maruvu, ni kwipep, ni yom yikwau yiyimp mudi yiney.” Paul wafunda anch “muntu mwawonsu ukata kusal yom yiney kakez kuswanap Want wa Nzamb.” (Galatia 5:19-21) Chawiy lel, tufanyidin kwiyipul anch: ‘Kom kam kakat kwinkwash kwipuk masengan ma chisum, kubambel, ma wanangand ap ma ubaj? Kom kam kakat kwimbabesh anch nidi mu yoziu ya kutal mafilim ma pornografi ap makasikeshina yom ya masandj, kukwachik maruvu, ulaj ap kwikal mu umwing nau ayilembil?’

13. Mutapu ik ukutwisha yiyul yidia mu 1 Timote 4:8 ni mu Jinswir 13:20 kutukwash piur pa kwipuwangej?

13 Yany ya Bibil yikutwish kutukwash kufumb kom kwetu piur pa kwipuwangej. Chilakej, Bibil ulondin anch ‘masengan ma mujimbu makwet usey mu yom yimwing.’ (1 Timote 4:8) Antu avud alondining anch masengan ma mujimbu mawapining ni mading ma usey mulong wa ukash wa mujimbu. Chad, chikwikal nchik anch tusotin kusengan ni chisak kampand? Chidi cha usey kwijik nany ukusengana nend? Jinswir 13:20 ulondin anch: “Muntu ukata kwend ni in manangu niyend ukez kwikal mwin manangu, pakwez ukata kwend nau ayisup ukez kaman mar.” Chimeken patok anch, chidi cha usey kusadin kom ketu kafumbinau kudi Bibil patutondina mitapu ya kwipuwangej.

14. Mutapu ik wasadina dijuku dimwing Rom 14:2-4?

14 Christian ni Daniela ading akwet an amband ayangadim aad. Christian ulondin anch “Chisu cha urel wetu wa Kwifukwil mu Dijuku, twisambina piur pa kwipuwangej. Twashikena ku kwijik anch kwikal ni katumb ap kwijikan nakash kudi antu kuwapinap. Nany ufanyidina kwikal murund  muwamp? Mwanetu changadim winana piur pa mutapu wadingau ansand amwing Atuman kutong piur pend chisu cha kupim ku shikol yau. Wova nayimp ni wiyova ubachikinau kusal mudi akwau. Twatonga nend anch muntu ni muntu ukwet kom ni ufanyidin kwitiy kamutakela kutond chom ik chikusalay ni nany ukusalay nend.”Tang Rom 14:2-4.

Kom ketu kafumbinau kudi Bibil kakutwish kutukwash kwipuk kusal yom yiyimp (Tal paragraf 14)

15. Mutapu ik ukutwishay Mateu 6:33 kutukwash kutond mitapu ya kwipuwangej?

15 Chisu ik ufanyidina kusutish mu kwipuwangej? Ukat kutek pa ndond ya kusambish mu mwom wey yikumangan, mudimu wa kulejan, dilejan dia Bibil, anch yom ya kwipuwangej? Chom ik chidia cha usey kudi ey? Yesu walonda anch: “Pa ndond pa yom yiney, en kimbany bil Want wa Nzamb ni yom yisotilay, chad ndiy ukukuwejinanyaku yom yiney yawonsu.” (Mateu 6:33) Piutondina kusadin chisu chey, kom key kakat kukuvurish chiyul cha Yesu?

TUFANYIDIN KULEJAN

16. Mutapu ik ukata kom ketu kutukasikesh kulejan?

16 Kom kafumbinau nawamp kakatap ching kutubabesh chisu cha kusal yom yiyimp, pakwez kakat kutukasikesh kand kusal yom yiwamp. Pakach pa yom yiwamp yiney padi kulejan ku chikumbu ni chikumbu ni kupan uman kudi antu tutanijadina nau. Mwawiy mwasalangay Paul. Wafunda anch: “Chakin, chifanyidin am kusal mwamu mulong wa dizu dia Nsalejam. Nikuyindam anch nalik kurumburil Rusangu Ruwamp!” (1 Korint 9:16) Anch twamwimburij Paul, tukwikal ni kom kawamp, ni tukwijik anch tusadin yom yiwamp. Pituyilejina antu akwau rusangu ruwamp, tuyikwashin kusadish kom kau. Paul walonda anch: “Tukat kulejan uyakin patok, mwamu mukat kutuyingishau kurutu kwa Nzamb kudi kom ka antu awonsu.”2 Korint 4:2.

17. Mutapu ik walondulay nambaz changadim umutakel wa kom kend kafumbinau kudi Bibil?

17 Padingay Jacqueline ni mivu 16, wileja dilejan dia bioloji ku shikol. Pakwez, an a shikol ileja piur pa dilejan dia dikarumuk. “Kom kam kambachikap kwiyandjik mu mambamb minam mu kalas. Nalondap mulong wa kukasikesh dilejan dia dikarumuk. Waseja kudi mulej ni wamurumburila chitongijok chend. Cha kushimok, mulej wasangara ni wanshila chisu cha kulejan chitongijok cham mu kalas ka kabuj piur pa yitangil.” Jacqueline wasangara pa kwijik anch watesha ni walondula umutakel wa kom kend kafumbinau kudi Bibil. Kom key kakat kukubachikang kusal yom yiwamp?

18. Mulong wak tufanyidin kwikal nich kom kawamp?

18 Rutong retu ridi ra kushakam kukwatijan ni yany ni mbil ya Yehova. Kom ketu kakutwish kutukwash kulondul rutong riner. Anch twilej pichuku pichuku ni twatongijokin pa Dizu dia Nzamb ni kusadin yom yitwilejina, tukufumb kom ketu. Kupwa chipan chinech chiwamp chikwikal umutakel wakin mu mwom wetu wa win Kristu!

^ par. 7 Tal “Yipul ya in Kutang” mu Chinong cha Kalam cha 15 ngond wa 6, 2004, pa paj wa 29-31, mu Français.