Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 8 , 2015

Tongijokin Piur pa Rukat Rikurikina ra Yehova

Tongijokin Piur pa Rukat Rikurikina ra Yehova

Nikutongijokin pa midimu yey yawonsu.’KUSENG 77:12.

MIMINY: 18, 29

1, 2. (a) Mulong wak ukwet kashinsh anch Yehova uyikatining antwend? (b) Antu ayitanga nich maswir ik?

MULONG wak tukwet kashinsh anch Yehova uyikatin antwend? Kurutu kwa kwakul ku chipul chinech, tushinshikinany bil yilakej ey: Mu mivu yivud, akadivar nau anambaz kushalijan amuyula nambaz Taylene. Amuleja anch kangal watong kusal yom yiwakad kutwish kusal. Taylene ulondin anch: “Anch Yehova kadingap winkatin, ing kafanyinap kudandamen kwinyul.” Brigitte, walila anend aad amwinend kupwa kufa kwa nfumwend, ulondin anch: “Kulil an mu ditenchik dined dia Satan chidi chom chimwing chikasikena nakash, pakampwil anch uyilidin amwiney. Pakwez nikwet kashinsh mu rukat ra Yehova mulong wantakela mu mar ni kalikap anch nirisha nich mar minam amwinam.” (1 Korint 10:13) Sandra wading ukwet mayej makasikena kwok. Ku chitentam chimwing cha rejon, nambaz umwing wamubangina Sandra. Nfumwend a Sandra ulondin anch: “Ap anch twadingap tumwij nambaz winou nawamp, mutapu watukwashay watusangaresha nakash. Yom yawonsu yatusadinau akadivar ni anambaz yamekesha mutapu utukatinay Yehova.”

 2 Yehova watutanga nich maswir ma kukat ni kwiyov akatinau. Pakwez, muntu ukutwish kuziy mulong wa mayej, milong ya nfalang ap anch tutaninap yibudikin yiwamp mu mudimu wetu wa kulejan. Anch twasambish kutong anch Yehova katukatilap kand, tufanyidin kuvurik anch tukwet usey kudi ndiy niyend utukwatin nich usey, utukwatin ku chikas cha katatuku ni utukwashin. Kakutuvuramenap anch twikal ashinshamena kudi ndiy.Isay 41:13; 49:15.

3. Chom ik chikutwisha kukasikesh kashinsh ketu piur pa rukat rikurikina ra Yehova padi etu?

3 Yom yilejenau kwinsambishil oku yipanin kashinsh anch Nzamb wading nau mu yisu ya mar. Tukutwish ni yetu kwikal nich kashinsh anch Yehova udi netu. (Kuseng 118:6, 7) Mu mutu wa mulong winou, tukwisambin yom yinying yimekeshina anch Yehova utukatin. Yom yiney yawiy ey (1) yitang yend, (2) Bibil, (3) malembil, ni (4) difut. Kutongijokin pa yom yiwamp yasalay Yehova kukutukwash kwikal nich muchim wa kujikitish mulong wa rukat rend rikurikina.Tang Kuseng 77:11, 12.

TONGIJOKIN PA YITANG YA YEHOVA

4. Chom ik tukutwisha kwilej piur pa yom yatangay Yehova?

4 Pitukata kushinshikin piur pa yom yatangay Yehova, twilejin mutapu utukatinay. (Rom 1:20) Chilakej, Yehova watanga divu chakwel tutwisha kushakamap. Watwinkisha yom yiwamp tukweta nich kuswir mulong wa kusanger mwom. Tuswiridin kudia, chawiy lel, Yehova watwinkisha yakudia kushalijan yitusangareshina! (Mulej 9:7) Catherine ukat kusangarang anch watal yitang, nakash kamu kusambishil mwi ngond wa kasatu kushik ni ngond wa sambwad mu Canada. Nambaz winou ulondin anch: “Chishimokishin kuman mutapu watangau yom—mutapu ukata kubudik yisalamb ni kuchirik kwa atujil kudiokal mu weny, kuwejinaku ni atujil adia mudi a kansaj akata kuchirik djat ni kwol kwam pa didish dia mpish. Yehova utukatin kamu patwinkishinay yom yiney yisangareshina.” Tatukwetu ukatin yitang yend ni usotin niyetu tuyisanger.Midimu 14:16, 17.

5. Mutapu ik umekena rukat ra Yehova mu mutapu watutangay?

5 Yehova watutanga nich ukaliweny wa kusal midimu yiwamp ni kuyisanger. (Mulej 2:24) Wayinkisha antu chisend cha kwizwish divu, kudidim, ni kulam ansh, atujil ni yitang yikwau yidiap. (Disambishil 1:26-28) Watutanga kand ni mikadil yiwamp chakwel tutwisha kumwimburij!Efes 5:1.

DIZU DIA NZAMB DIKWET USEY

6. Mulong wak tufanyidin kusanger nakash Dizu dia Nzamb?

6 Yehova watwinkisha Bibil mulong wa kumekesh rukat rend rijim kudi etu. Bibil utulejin yom tuswirikedina piur pend ni mutapu wiyovilay piur pa antu. Chilakej, Bibil utulejin mutapu wiyovay Yehova chisu chamubwambwilangau kudi in Isarel. Kuseng 78:38 ulondin anch: “Ndiy udi mwin riy, kayijiyishap shat, tupamp tuvud kayiswejinap nakash, kayovilap ujim nakash.” Kutongijokin pa verse winou kukutwish kukukwash kuman kamu anch Yehova ukukatin ni ukat kukubangin. Tufanyidin kwikal ni kashinsh anch Yehova ukat kutubangin nakash kamu.Tang 1 Pita 5:6, 7.

7. Mulong wak Bibil ukwet usey nakash kudi etu?

7 Bibil ufanyidin kwikal ni usey nakash kudi etu. Mulong wak? Mulong Yehova ukat kwambambang netu kusutil ku Dizu diend. Anch nvaj ukat kwambamb ni mwanend nawamp, rukat rau ni kashinsh kakwetau umwing ni mukwau yikupandakan.  Yehova udi Tatukwetu wa rukat. Ap anch kandikal tumumanangap ap kutesh dizu diend, ukat kwambamb netu kusutil Bibil. Tufanyidin kumutesh! (Isay 30:20, 21) Pitukata kutang Dizu dia Nzamb, tukushiken ku kumwijik ni kumuchingejin Yehova, ukata kututakel ni kutulam.Tang Kuseng 19:7-11; Jinswir 1:33.

Ap anch Jehu wamuyula Josafat, Yehova wamana ‘yom yiwamp’ yasalay mwant (Tal paragraf 8, 9)

8, 9. Chom ik chisotilay Yehova anch twijika? Pan chilakej cha mu Bibil.

8 Yehova usotin twijika anch ndiy utukatin ni kakatap kushinshikin ching pa kuburen kuwanyin kwetu. Ukat kushinshikin pa yom yiwamp tusadina. (2 Jinsangu 16:9) Tushinshikinany amboku mutapu wamanay Yehova yom yiwamp yasalay Josafat Mwant wa in Yuda. Josafat wakwata mupak uyimp wa kumulondul Akab Mwant wa in Isarel kurish nau in Siria ku Ramot wa ku Galad. Ap anch aprofet a makasu 400 amuleja Akab mwant muyimp anch ukuwin njit, Mika muprofet wakin wa Yehova wamuleja Josafat ni Akab anch ang arish njit akuyiwin. Mwawiy kamu muchasadika. Akab wafa kwi njit ni Josafat wapanda. Kupwa kwa njit, Yehova wamusadila Jehu kumuyul Josafat mulong wa chom chiyimp chasalay. Pakwez, Jehu wamuleja kand anch: ‘Kudi yom yiwamp wasadina.’2 Jinsangu 18:4, 5, 18-22, 33, 34; 19:1-3.

9 Kurutu kwa yom yiney, Josafat wayileja ayilol, in Levi nau in kupesh kuya mu misumb yawonsu ya Yuda mulong wa kuyifundish antu Yijil ya Yehova. Awanyisha  mudimu wau mulong antu a michid yikwau ashikena ku kumwijik Yehova. (2 Jinsangu 17:3-10) Chawiy lel, ap anch Josafat wakwata mupak uyimp, Yehova kavuramenap yom yiwamp yasalay kwinsambishil mu mwom wend. Chilakej chinech chitukasikeshin mulong yisu yimwing tukata kusal yom yiyimp. Pakwez, anch twasal usu wa kusal rusot ra Yehova, ukudandamen kutukat ni kakuvuramenap yom yiwamp yitwamusadila.

SANGER CHISEND CHA KULEMBIL

10, 11. (a) Mulong wak malembil madi chipan cha pakampwil chitwinkishinay Yehova? (b) Mutapu ik ukatay Nzamb kwakul ku malembil metu? (Tal chipich cha kwinsambishil.)

10 Tatuku muwamp ukweting chisu cha kuyitesh anend pasotinau kwambamb nend. Usotining kwijik mutapu wiyovilau mulong uyibangidining chakin kamu. Yehova, Tatukwetu wa rukat, ukat kusal niyend mwamu. Ukat kututesh pitukata kumulembil. Kwambamb ni Tatukwetu chidi chisend cha usey nakash mud ik!

11 Tukutwish kumulembil Yehova chisu chin chawonsu. Udi Murund netu ni udi tayad kutesh malembil metu. Taylene, utwajimbulang kwiur oku ulondin anch: “Ukutwish kumulej yom kanang ap yom yawonsu.” Anch twamulej Yehova yitongijok yetu ya pakampwil, ukutwish kutwakul kusutil ku Bibil, mu mutu wa mulong kanang udia mu mikand yetu ap dikasikesh kanang didiokila kudi akadivar nau anambaz. Yehova uteshining malembil metu ma kashinsh, ni ututeshining ap anch antu katuteshinap. Kwakul kwend ku malembil metu kumekeshin rukat rend rikurikina kudi etu.

12. Mulong wak tufanyidin kwilej malembil madia mu Bibil? Let chilakej.

12 Tukutwish kwilejin yom yivud ku malembil madia mu Bibil. Chisu chinech, chidi cha usey kwilej piur pa malembil mamwing chisu cha difukwil dia dijuku. Malembil metu makuwap anch twatongijokin piur pa malembil ma kashinsh ma atushalapol a Nzamb a pasak. Chilakej, kwilej malembil ma kwikepish masalay Yona padingay mwivum mwa insh mujim. (Yona 1:17–2:10) Kushinshikin pa malembil ma kashinsh masalay Salomon kudiay Yehova chisu chapwishau kutung tempel. (1 Ant 8:22-53) Kutongijokin kand pa malembil ma chilakej ma Yesu. (Mateu 6:9-13) Cha usey nakash, yisu yawonsu “mwijikishany Nzamb yom yawonsu umwitilanya.” Mudi chibudikin, “chisambu cha Nzamb chisutila ronganyin ra antu chikulam michim yen ni yitongijok yen.” Mwamu, kujikitish kwetu mulong wa rukat rikurikina ra Yehova kukudandamen kukul.Filip 4:6, 7.

MEKESH KUJIKITISH MULONG WA DIFUT

13. Chom ik tutanidinamu mulong wa difut?

13 Yehova watwinkisha chipan cha difut chakwel “tutambul mwom wa chikupu.” (1 Yohan 4:9) Piur pa mutapu wamekeshay Nzamb rukat, kambuy Paul wafunda anch: “Kristu watufila pa chisu chiwanyidina chatenchikay Nzamb. Ching kamu pa chipatu chad waman lel muntu wamufil muntu mukwau utentamina. Chakin, ap muntu umwing ukutwish kwitiy kumufil muntu muwamp. Pakwez Nzamb wamekesha mutapu utukatilay etu, pitwading etu akayitil Kristu watufila!” (Rom 5:6-8) Difut chidi chom chijim chimekeshina rukat ra Nzamb, ni chiyikwashin antu kwikal mu urund uwamp nend.

14, 15. Chom ik chirumburikina difut (a) kudi in Kristu azizidilau many? (b) kudi in Kristu akweta ruchingej ra kushakam pa divu?

14 Chisak chikemp cha in Kristu chimen rukat rikurikina ra Yehova mu mutapu wa pakampwil. (Yohan 1:12, 13; 3:5-7) Nzamb  wayizizila ni mwiku utumbila, ni mulong wa chom chinech adi katat anend. (Rom 8:15, 16) Mulong azizidilau many amwing achid kal ni mwom pa divu, mulong wak lel Paul walonda anch adi ‘mu uumwing nend Kristu Yesu mwiur’? (Efes 2:6) Chidi mulong Yehova wayinkisha ruchingej ra kwikal ni mwom wa chikupu mwiur.Efes 1:13, 14; Kolosay 1:5.

15 Antu awonsu akad kwikal azizidilau many akutwish kwikal arund nend a Nzamb anch atek ritiy mu difut. Akwet mutapu wa kwikal itiyijinau mudi an a Nzamb ni kwikal ni mwom wa chikupu mu paradis pa divu. Difut chidi chom chimekeshina rukat ra Yehova kudi antu awonsu. (Yohan 3:16) Musangar mud ik wa kwijik anch, ang twamusadil Nzamb nich kushinshaman, ukutwinkish mutapu wa kushakam mwi ngand yisu! Komb, tumekeshany amboku anch tukwatin difut nich usey, mutapu uwamp umekeshinay Nzamb rukat rikurikina kudi etu.

MUMEKESHINA YEHOVA RUKAT REY

16. Yom ik tukusala anch twatongijokin pa rukat ra Nzamb?

16 Chikasiken kuchind mitapu yawonsu yikatay kutumekeshin Yehova rukat. Mwant David wawanga anch: ‘yitongijok yey yidi yikash nakash kudi am. Tal muyidia kuvul! Anch nachind yitongijok yey, yikuvul kupandakan usukuril.’ (Kuseng 139:17, 18) Kutongijokin pa mitapu yitumekeshidinay Yehova rukat kukutukwash kumukat ni kwipan nakash mulong wendendiy.

17, 18. Mitapu ik kanang tukutwish kumumekeshin Nzamb rukat retu?

17 Kudi mitapu yivud ya kumekesh anch tumukatin Yehova. Chilakej, tukutwish kumekesh rukat retu kudi Yehova pa kwipan ni mushiku mu mudimu wa kulejan rusangu ruwamp. (Mateu 24:14; 28:19, 20) Tukutwish kand kumekesh rukat kudi Nzamb pa kujijaman nich kushinshaman yisu ya mar. (Tang Kuseng 84:11; Jakobu 1:2-5.) Ap anch tumen mar nakash, tukutwish kwikal nich kashinsh anch Yehova umen mar metu ni ukutukwash mulong tukwet usey ku mes mend.Kuseng 56:8.

18 Rukat retu kudiay Yehova ritubachikin kutongijokin pa yom yawonsu yiwamp yatangay. Tumekeshin kudi Yehova anch tumukatin ndiy ni Dizu diend pa kwikal in kwilej Bibil a mushiku. Tukat kumulembil Yehova yisu yawonsu mulong tumukatin ni tusotin kukasikesh urund wetu nend. Chikwau kand, chisu tutongijokidina pa chipan cha usey cha difut, rukat retu rikat kukul nakash. (1 Yohan 2:1, 2) Yiney yawiy mitapu tumumekeshidina Yehova anch rukat rend rikurikina kudi etu ridi ra usey.