Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 8 , 2015

 MUTU WA MULONG WA PA CHIBUR | KUPWA KWA KUFA—CHITWISHIKIN KWIKAL KAND NI MWOM?

Kuding Ruchingej Piur pa Afu?

Kuding Ruchingej Piur pa Afu?

Afu akutwish kand kwikal ni mwom?

CHAKUL CHA BIBIL: “Chisu chikat kwez chikez kuteshau afu awonsu adia mwi nzay [ya chivurikish] dizu dined, chad akez kuvumbuk kwikal kand aom.”Yohan 5:28, 29.

Yesu walejana piur pa machuku ma kurutu anch ku umutakel wa Want wend, antu adia mwi nzay akez kavumbuk. Fernando ulejenau mu muntu wa mulong wasuta kal ou ulondin anch: “Nashimwoka nakash pinatanga kapamp ka kusambish Yohan 5:28, 29. Nikala ni ruchingej rakin, ni nasambisha kutong piur pa machuku ma kurutu mu mutapu uwamp.”

Pasak, Job muntu ushinshamena wijika anch kupwa kwa rufu rend Nzamb wafanyina kwez kumuchirish ku mwom. Job wipula anch: “Anch muntu wafa [. . .], ukutwish kwikal kand mwom?” Kupwa wakula ni kashinsh anch: “Machuku mawonsu ma mudimu wam nikez kachingej [mwi Nzay], djat ni pinikeza kapizurik. Ukez katazuk, niyam nikez kakwakul.”Job 14:14, 15.

Kuvumbuk kwa Lazar kutwinkishin ruchingej piur pa machuku ma kurutu

Kadingap kapamp ka kusambish kudi Mart mwanamakwend a Lazar kutesh dizu Kuvumbuk. Kupwa kwa rufu ra Lazar, Yesu wamuleja Mart anch: “Mwanamakwey ukuvumbuk.” Mart wakula anch: “Am nij anch, ndiy ukez kuvumbuk pakuvumbukau antu awonsu kwikal kand aom pa dichuku dia kwisudiel kwa mangand.” Yesu wamwela kand anch: ‘Yam disanguk ni mwom. Muntu mwawonsu ukwingitiyija, ap anch wafap nchik, pakwez ukez kwikal mwom.’ (Yohan 11:23-25) Kupwa Yesu wamuvumbula Lazar kwikal kand mwom! Jinsangu jinej jikasikeshina jitwinkin chitongijok chiwamp piur pa yom yijim nakash yikusadika machuku ma kurutu am. Tong bil mutapu ukusadika divumbuk pa mangand mawonsu!

Kudi antu amwing akuvumbuka mulong wa kuya mwiur?

CHAKUL CHA BIBIL: Dizu dia Nzamb dilejen anch kuvumbuk kwa Yesu kushalijadin ni kuvumbuk kukwau chinan kulejenau mu Bibil. Antu inay chinan ikala kand aom pa divu. Pakwez piur pa kuvumbuk kwa Yesu, Bibil ulondin anch: “Yesu Kristu . . . waya mwiur, [ni] ushich ku chikas cha katatuku cha Nzamb.” (1 Pita 3:21, 22) Yesu ndiy amwinend wafanyina kuvumbuk mulong wa kuya mwiur? Yesu wayileja atwimbuy end anch: “Anch naya kukutenchikinany ndond, nikez kuchirik mulong wa kukwezilany twayany pamwing ni yamam, chakwel ukushakamany kunishicha am.”Yohan 14:3.

 Kristu waya mwiur mulong wa kutenchik ndond ya kuyakin in kwilejend amwing. Kuvumbuk kwinoku mulong wa kuya mwiur kwitin antu 144 000. (Kujingunik 14:1, 3) Pakwez, chom ik chikuyau kusal in kwilej a Yesu inay?

Akwikal ni mudimu ujim nakash! Bibil ulondin anch: “Ayuk kwau ni kutumb awiy adia nau mu kuvumbuk kwa kapamp ka kusambish. Rufu ra kapamp ka kaad kirukwetap ukash wa kuyikwat awiy. Akwikal in kupesh a Nzamb ni a Kristu, chad akez kuyikel pamwing nend Kristu mivu kanan.” (Kujingunik 20:6) Antu inay akuvumbulau mulong wa kuya mwiur akez kuyikel mudi ant ni in kupesh pamwing ni Kristu pa mangand.

Anany akuvumbulau kupwa kwa kuyivumbul antu akeza kuya mwiur?

CHAKUL CHA BIBIL: Bibil ulejen mazu minam mafunday kambuy Paul: “Am nikat kuchingej anch, antu awamp ni antu ayimp akez kavumbuk kwikal kand aom.”Midimu 24:15.

Dizu dia Nzamb ditwinkishin kashinsh anch ma miliyon ma antu afa kal akwikal kand aom

Anany akwikala pakach pa “antu awamp” alejenay Paul? Shinshikin chilakej chinech. Daniel, kashalapol ushinshamena amuleja kurutu kwa rufu rend anch: “ukez kufa, pakwez ukez kuvumbuk mulong wa kutambul difut diey kwisudiel kwa chisu.” (Daniel 12:13) Kwisu kukezay Daniel kulankin pa tul twa rufu? “Mwin kutentam mwawonsu ukez kaswan ngand, ukez kashakamamu chikupu.” (Kuseng 37:29) Chikwau kand Yesu walonda anch: “Ayuk kwau itudishila, mulong awiy akez kuswan ngand.” (Mateu 5:5TMK) Daniel ni antu akwau ashinshamena akez kavumbuk mulong wa kushakam pa divu chikupu.

Anany akwikala pakach pa atazukay Paul anch “antu ayimp”? Kudi ma miliyon ni ma miliyon ma antu afa, ni kamanap chisu cha kutesh ni kusadin uyakin wa Bibil. Kupwa kwa kuyivumbul, akutwish kushiken ku kumwijik ni kumukat Yehova * ni Yesu. (Yohan 17:3) Awonsu akutonda kumusadin Nzamb akwikal ni ruchingej ra kushakam chikupu ching mudi Yehova—chikupu kamu.

Awonsu akutonda kumusadin Nzamb akwikal ni ruchingej ra kushakam chikupu ni ukash wa mujimbu ni musangar uwanyidina

Mashakamin ik makwikalau nich antu pa mangand?

CHAKUL CHA BIBIL: Nzamb “ukez kuyikusol mansoj mawonsu ku mes mau. Kukez kwikalap kand rufu, ap madil, ap kwishikokin, ap kusansan.” (Kujingunik 21:4) “Akez katung yikumbu ni kushakamamu ayinau. Akez kadim yir ya mitond ya nviny ni kudia mabuj mau.”Isay 65:21.

Tong bil mudi ushich mu mashakamin minam ni akatish ney akuvumbulau! Pakwez chipul chikwau chidi anch, mutapu ik twija anch divumbuk dikwikalaku?

^ par. 15 Yehova diawiy dijin dia Nzamb dilejenau mu Bibil.