Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 8 , 2015

Itenchika Kudiokal Nlel Mulong wa Kushakam mwi Ngand Yisu

Itenchika Kudiokal Nlel Mulong wa Kushakam mwi Ngand Yisu

“Yileja asala yom yiwamp, . . . mwamu akez kutambul mwom udia wakin.”—1 TIMOTE 6:18, 19.

MIMINY: 43, 40

1, 2. (a) Chom ik uchingedina kusal mu Paradis? (Tal chipich cha kwinsambishil.) (b) Chom ik chikutwinkisha musangar upandakena mwi ngand yisu?

TUCHINGEDIN chakin kamu “mwom wa chikupu.” Kambuy Paul walonda piur pa mwom winou anch udi “mwom udia wakin.” (Tang 1 Timote 6:12, 19.) Kudi antu avud, chinech chirumburikin kushakam chikupu mu Paradis pa divu. Chikasiken kutong mutapu ukwikala chisu ukusambisha kulank nich ukash wa mujimbu uwamp, ni musangar pamanch pawonsu. (Isay 35:5, 6) Tong bil mutapu chikwikal chiwamp kusutish chisu ni dijuku diey ni arund ney, pamwing kand ni antu akuvumbulay. (Yohan 5:28, 29; Midimu 24:15) Ukwikal ni chisu cha kwilej midimu yisu ni kusanger nakash yom ukatina. Chilakej, ukutwish kwilej yom yivud piur pa siyans. Ap ukwilej mutapu wa kusengan mizik ap mutapu wa kufatul chikumbu chey.

2 Ap anch tuchingedin yom yiwamp yiney, kumwifukwil Yehova kwawiy kukutuletin musangar upandakena. Tong bil mutapu ukwikala mwom chisu chikumanau antu awonsu dijin dia Yehova kwikal ditumbila ni kumwitiy Yehova mudi Ntakel wau. (Mateu 6:9, 10) Tukwikal ni musangar wa kuman mutapu ukwizula mangand  ni antu awanyidina, mudi mwading rutong ra Nzamb kwinsambishil. Tong kand mutapu ukuswapala kukasikesh urund wetu nend Yehova chisu tukusambisha pakemp pakemp kwikal antu awanyidina!Kuseng 73:28; Jakobu 4:8.

3. Mutapu ik tufanyidina kwitenchik kudiokal nlel?

3 Tukwet kashinsh anch Yehova ukuwanyish yom yiney yiwamp yawonsu, mulong ‘kudi Nzamb yom yawonsu yikasikenap.’ (Mateu 19:25, 26) Anch tukatin kushakam chikupu mwi ngand yisu, chinech chawiy chisu cha “kutambul” mwom wa chikupu. Twij anch disudiel didi kamu piswimp ap, chawiy lel tufanyidin kushakam mu mutapu umekeshina anch tuchingedin chisu chikeza kwez disudiel. Tufanyidin kusal yawonsu yitwishikena kudiokal nlel mulong wa kwitenchik chakwel tutwisha kushakam mwi ngand yisu. Tushinshikinany bil amboku pa mulong winou.

MUTAPU WA KWITENCHIK

4. Mutapu ik tukutwisha kwitenchik kudiokal nlel mulong wa kushakam mwi ngand yisu? Pan chilakej.

4 Mutapu ik tukutwisha kwitenchik kudiokal nlel mulong wa kushakam mwi ngand yisu? Anch twitenchikin mulong wa kuya kushakam mwi ngand ya wingendj, tufanyidin kusal usu wa kwitenchik mu yom kanang mulong wa kushakam mwi ngand yiniya. Chilakej, tukutwish kusambish kwilej rudim ni yaku ya antu a mwi ngand yiniya. Tukutwish kwilej mutapu wa kudia yakudia yau. Chilik chimwing, tukutwish kwitenchik kudiokal nlel mulong wa kushakam mwi ngand yisu anch twasal yawonsu yitwishikena mulong wa kushakam mudi twashikinamu kal. Tushinshikinany amboku mutapu tukutwisha kusal mwamu.

5, 6. Mutapu ik ukeza kuziyil ku umutakel wa dirijek dia Yehova kutukwash kwitenchik mulong wa kushakam mwi ngand yisu?

5 Mu mangand minam, Satan usotin antu atonga anch afanyidin kwau kusal yikatinau. Antu avud akat kuman anch chidi cha usey kwikal nich want ipau ni anch chidiap kwau cha usey kumuziyil Nzamb. Yibudikin ik yikalaku? Mar mavud ni minan. (Jeremiy 10:23) Pakwez Yehova udi Ntakel wa rukat. Mwom ukuwap mud ik mwi ngand yisu chisu chikumuziyilau Nzamb kudi antu awonsu!

6 Mwi ngand yisu, tukusanger kulondul umutakel wa dirijek dia Yehova mulong wa kutukwash chakwel tukarumuna divu kwikal paradis ni kuyifundish antu akuvumbulau. Yehova ukusal mudimu ujim mulong wetwetu. Pakwez chikwikal nchik anch antu atutakedila  atwit kusal chom kanang chitwakad etu kukat? Tufanyidin kuziyil? Tufanyidin kusal usu wa kwitiy ni kusanger chisend chetu? Chakwel twitenchika mulong wa kwikal ni mwom wa chikupu mwi ngand yisu, tufanyidin kuziyil kudiokal nlel ku umutakel wa dirijek dia Yehova.

7, 8. (a) Mulong wak tufanyidin kuyiziyil antu atutakedila? (b) Kuswimp ik kwayishikena in Kristu amwing mu mashakamin mau? (c) Chom ik chikutwisha kutwinkish kashinsh piur pa ngand yisu?

7 Anch tusotin kwitenchik kushakam mwi ngand yisu, tufanyidin kwilej mutapu wa kusanger kusal pamwing ni dirijek dia Yehova nau antu akwau. Chilakej, anch atwinkish chisend chisu, tufanyidin kwitiy kwa kwisotin ni kusal usu wa kusanger chisend chinech. Anch twilej kudiokal nlel mutapu wa kusal pamwing nau antu atutakedila, tukutwish kand kusal chilik chimwing mwi ngand yisu. (Tang Hebereu 13:17.) Pandamau in Isarel mwi Ngand ya Kushilamu, ayangena ndond yafanyinau kashakam. (Kuchind Michid 26:52-56; Joshua 14:1, 2) Twijap kamu nawamp kwisu kukushakamay muntu ni muntu mwi ngand yisu. Pakwez anch twileja mutapu wa kuziyil, tukwikal ni musangar wa kusal rusot ra Yehova kwawonsu tukushakama.

8 Chikwikal musangar mud ik pa kumusadin Nzamb mwi ngand yisu ku wintakel wa Want! Chawiy lel, tukwet musangar wa kusal pamwing kudiokal nlel ni dirijek dia Yehova ni kusal kwawonsu kukutulejau kuya. Pakwez, yisu yimwing, yisend yetu yikutwish kuswimp. Chilakej, antu amwing ading asadina ku Betel wa mu États-Unis ayituma mu teritwar. Mulong wa chimbu cha mivu ap mulong wa yom yikwau, amwing ayituma mudi ayibol a pakampwil. Akwet musangar wa yisend yau yisu, ni Yehova ukat kuyiyukish. Anch twalembil chakwel Yehova atukwasha, tukutwish kusal yawonsu mulong wa kumusadin, ni kusanger chisend chawonsu chikutwinkishau, tukwikal nich musangar ni Yehova ukutuyukish. (Tang Jinswir 10:22.) Chikwikal nchik anch mwi ngand yisu tukatin kushakam mwi ngand kanang pakwez dirijek dia Yehova ditwitin kushakam mwi ngand yikwau? Chisu chinicha, chikwikalap cha usey kwijik kwisu tukushakama ni mudimu ik tukusala. Cha usey chikwikal kwijik anch tushich mwi ngand yisu.Nehemiy 8:10.

9, 10. (a) Mulong wak tufanyidin kushimpish muchim mwi ngand yisu? (b) Mutapu ik tukutwisha kumekesh kudiokal nlel anch tushimpishin muchim?

9 Mwi ngand yisu, tufanyidin kushimpish muchim yisu yimwing. Chilakej, tukutwish twatesh anch antu amwing akwet musangar mulong anamakwau ni arund nau ayivumbul  kal. Pakwez, tufanyidin kuchingel djat ni pakuyivumbulau anamakwetu akatish. Anch chashiken mwamu, tukutwish kusangar nau antu akwau nich kushimpish muchim? (Rom 12:15) Anch twilej kudiokal nlel mutapu wa kuchingel nich kushimpish muchim kuwanyin kwa kushilamu, chikutukwash kand kushimpish chisu chinicha.Mulej 7:8.

10 Tukutwish kand kwitenchik mulong wa kushakam mwi ngand yisu pa kushimpish muchim chisu tukata kutambul kutesh kwa katat kwa uyakin wa Bibil. Tukat kwilej yom yiney yisu ni kushimpish muchim anch tuyiteshinap nawamp? Anch chidi mwamu, mwi ngand yisu, chikuswapal kushimpish muchim chisu chawonsu chikutwinkishay Yehova yany yisu.Jinswir 4:18; Yohan 16:12.

11. Mulong wak tufanyidin kwilej kulikishijadin umwing ni mukwau kudiokal nlel, ni mutapu ik ukutukwasha chom chinech mwi ngand yisu?

11 Mutapu ukwau tukutwisha kwitenchik mulong wa kushakam mwi ngand yisu udi kwilej kulikishijadin. Mu Mivu Kanan ya Kuyikel kwa Kristu, chikwit chisu kanang chakwel antu ikala awanyidina. (Midimu 24:15) Tukwikal ni rukat ni kulikishijadin umwing ni mukwau? Anch twilej kudiokal nlel kulikishijadin ni kwikal nau antu mu urund uwamp, chikutuswapel kusal mwamu mwi ngand yisu.Tang Kolosay 3:12-14.

12. Mulong wak tufanyidin kwitenchik kudiokal nlel mulong wa kushakam mwi ngand yisu?

12 Mwi ngand yisu, tukutwishap kutambul chisu chawonsu yom tusotila, pakwez tukutwish kuyichingel. Tufanyidin kujikitish ni kusanger yom tukweta chikalap nchik mashakamin tudia. Pakwez, tufanyidin kwikal ni mikadil ya chilik chimwing nich yitufundishinay Yehova kumekesh kudiokal nlel. Chawiy lel, anch twilej kumekesh mikadil yiney kudiokal nlel, tumekeshin anch ngand yisu yidi yakin kudi etu ni anch twitenchikin mulong wa mwom wa chikupu. (Hebereu 2:5; 11:1) Chikwau kand, tukumekesh anch tusotin chakin kamu kushakam mwi ngand yisu mukutwishay muntu mwawonsu kumuziyil Yehova.

SHINSHIKIN PA KUMUSADIN YEHOVA

Lejan rusangu ruwamp nich mushiku

13. Chom ik tukuteka pa ndond ya kusambish mu mwom wetu mwi ngand yisu?

13 Mwi ngand yisu, tukwikal ni yom yawonsu tukweta nich kuswir mulong wa kusanger mwom. Pakwez musangar wetu ujim ukudiokala ku urund wetu uwamp nend Yehova. (Mateu 5:3) Tukukwatikan nakash ni mudimu wa Yehova, ni tukwikal ni musangar wa kumusadin ndiy. (Kuseng 37:4) Kudiokal nlel, anch twamutek Yehova pa ndond ya kusambish mu mwom wetu, twitenchikin mulong wa kushakam mwi ngand yisu.Tang Mateu 6:19-21.

14. Jintong ik jikutwishau ansand kwitekin mu mudimu wa Yehova?

14 Mutapu ik tukutwisha kusanger nakash kumusadin Yehova? Mutapu umwing wa kusal mwamu udi kwitekin jintong. Anch udi nsand, tongin piur pa mutapu ukutwisha kusadin mwom wey mu mudimu wa Yehova. Sal usu wa kukimbijol mu mikand yetu mitapu kushalijan ya mudimu wa chisu chawonsu. Ukutwish kutondap mutapu umwing ni kwitekin rutong. * (Tal mazu ma kwinshin.) Isamba nau antu amusadina kal Yehova mudimu wa chisu chawonsu mivu yivud. Anch wasadin mwom wey mu mudimu wa Yehova, ukwilej yom yivud nakash. Uman winou ukukukwash kumusadin Yehova mwi ngand yisu.

Itekina jintong mu mudimu wa Yehova

15. Jintong ik jikwau tukutwisha kwitekin mu mudimu wa Yehova?

15 Kudi jintong jivud tukutwisha kwitekin mu mudimu wa Yehova. Chilakej, tukutwish kwitekin rutong ra kwilej kusadin mutapu usu mu mudimu wa kulejan. Ap tukutwish kusal usu wa kutesh nawamp yany ya Bibil ni kwilej mutapu tukutwisha kuyisadin mu mwom wetu. Tufanyidin kand kusal usu wa kuya kurutu mu kutang kwa patok ap mu kusal diskur ap kupan yakul ku yikumangan. Cha usey chidi anch: Ang witekin jintong mu mudimu wa Yehova, yitong jinej jikukukwash  kwikal nich mushiku ni kwitenchik mulong wa kushakam mwi ngand yisu.

MUTAPU UWAMP WA MASHAKAMIN

Ikal mwin kujikitish mulong wa yom yawonsu yikatay Yehova kukwinkish

16. Mulong wak kumusadin Yehova wawiy mutapu uwamp wa mashakamin?

16 Anch twitekin chisu cha kwitenchik mulong wa ngand yisu ya Nzamb, chidi kusutish chisu cha kuwapish mwom wetu mu mangand minam? Bwat kwau! Kumusadin Yehova chawiy chom cha usey mu mwom. Tufanyidinap kumusadin anch mulong muntu kanang utubachikin kusal mwamu ap mulong wa kupand ku mar makash. Anch tudi mu urund uwamp ni Yehova mwom wetu udi uwamp nakash ni tukwet musangar. Wawiy mutapu ukatinay anch tushakama. Kwikal ni rukat ra Nzamb ni kutambul umutakel wend mu mwom wetu chawiy chom cha usey kusutamu yom yawonsu. (Tang Kuseng 63:1-3.) Tukutwish etu awonsu kwikal ni musangar udiokila ku kumwifukwil Yehova nich muchim wetu wawonsu. Antu amwing amusadina kal mivu yivud akutwish kulond kamu anch winou wawiy mutapu uwamp wa kusadin mwom.Kuseng 1:1-3; Isay 58:13, 14.

Kimb umutakel udiokila mu Bibil

17. Mutapu ik ukeza antu kutaninamu mu kwipuwangej mu Paradis?

17 Mu Paradis, tukusanger kusutish yisu yimwing mulong wa uwamp wetu ni kwipuwangej. Kupwa, Yehova ndiy watutanga nich maswir ma kwisangaresh, ni washilamu anch ukez “kuwanyish rusot ra chom chawonsu chikweta mwom.” (Kuseng 145:16; Mulej 2:24) Tukwet kuswir kwa kwipuwangej ni kupim, pakwez tukusanger yom yiney nakash anch twatek urund wetu ni Yehova pa ndond ya kusambish. Chikwikal mwamu mwi ngand yisu. Chawiy lel, chidi cha manangu kudandamen ‘kukimb bil Want wa Nzamb’ ni kushinshikin pa yiyukish tutambwila pitumusadidina Yehova.Mateu 6:33.

18. Mutapu ik tukutwisha kumekesh anch twitenchikin mulong wa kushakam chikupu mu Paradis?

18 Mwi ngand yisu, mwom ukez kwikal uwamp nakash. Tufanyidin kumekesh anch tusotin kamu kushakamamu pa kwitenchik kudiokal nlel mulong wa “mwom udia wakin.” Tukudishany amboku mikadil yitufundishinay Yehova ni twikalany nich mushiku mu mudimu wa kulejan rusangu ruwamp. Twikalany amboku ni musangar udiokila ku kutek difukwil dia Yehova pa ndond ya kusambish mu mwom wetu. Tukwet kashinsh anch mwi ngand yisu, Yehova ukez kusal yom yawonsu yashilayimu. Chawiy lel, tushakamany amboku mudi twashakamin kal mwi ngand yisu!

^ par. 14 Tal buku Les jeunes s’interrogent — Réponses pratiques, Volim 2, pa paj wa 311-318.