Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 8 , 2015

 MUTU WA MULONG WA PA CHIBUR | KUPWA KWA KUFA—CHITWISHIKIN KWIKAL KAND NI MWOM?

Ruchingej Piur pa Afu—Mutapu ik Ukutwisha Kwikal nich Kashinsh?

Ruchingej Piur pa Afu—Mutapu ik Ukutwisha Kwikal nich Kashinsh?

Chidiap cha usey kutong anch afu akwikal kand ni mwom? Kambuy Paul katongap mwamu. Wafunda ku usu wa mwiku utumbila anch: “Anch tumuchingejin Kristu ching kusu mulong wa mwom winou, chifanyidin antu atwovil etu riy kupandakan antu awonsu. Pakwez, chakin kamu, Kristu wavumbuka ku rufu wikal kand mwom, chinech chidi chijingidij cha kushilamu anch, in Kristu afila kal niyau akez kuvumbuk mu rufu kwikal kand aom.” (1 Korint 15:19, 20) Paul wading wij anch divumbuk chidi chom chakin. Pakwez kuvumbuk chikala chom chakin kusutil kuvumbuk kwa Yesu. * (Midimu 17:31) Chawiy lel Paul wamutazuka Yesu anch: “chijingidij”—ndiy wading muntu wakusambish kuvumbuk mulong wa kwikal ni mwom wa chikupu. Anch Yesu wading wakusambish, chidi chakin anch kufanyidin kwikal antu akwau.

Job wamuleja Nzamb anch: “Ukez kaswir kwinman kand, yam kamu mudimu wa makas mey.”Job 14:14, 15

Dined didi diyingish dikwau dikutwisha kukukwash kwikal ni kashinsh piur pa ruchingej ra kuvumbuk. Yehova udi Nzamb wa win yakin. Udi “Nzamb wakad kutwish kudimban.” (Titus 1:2TMK) Yehova kandikal kwend adimbanangap, ni kakezap kusal mwamu dichuku ap dimwing. Wapanap kal ruchingej piur pa kuvumbuk ni kumekesh anch ukutwish kuriwanyish, kupwa wakangany kusal kukwatijan ni kushilamu kwend? Bwat!

Mulong wak Yehova witenchikin kal mulong wa kuyivumbul antu? Mulong uyikatin. Job wipula anch: “Anch muntu wafa kal, ukutwish kwikal kand mwom? Ukez katazuk, niyam nikez kakwakul. Ukez kaswir kwinman kand, yam kamu mudimu wa makas mey.” (Job 14:14, 15) Job wading ni kashinsh anch Tatukwend mukatish wa mwiur wafanyina kwikal ni kuswir kwa kumuvumbul. Nzamb waswimpin kal chitongijok? “Am, yam [Yehova, NWT]. Kinikarumukinap.” (Malakiy 3:6) Nzamb uchingedin nakash kuyiman afu achirik lel ku mwom, ni ukash ni  musangar. Tukutwish kwisikej chinech ni mutapu wiyovilingay nvaj anch wafish mwan. Pakwez kushalijan kudi anch Nzamb ukwet usu wa kusal yikatinay.Kuseng 135:6.

Rufu udi mulong umwing ukash, pakwez Nzamb wij mutapu uwamp wa kuripwish

Yehova ukumwinkish Mwanend usu wa kuyisangaresh anenganena mulong wa rufu ra akatish nau. Mutapu ik wiyovilay Yesu piur pa kuyivumbul antu? Kurutu kwa kumuvumbul Lazar, Yesu wayitala bil anamakwend ni arund nend a Lazar, ni ‘wadila.’ (Yohan 11:35) Chisu chikwau, Yesu wasankanijana ni mwadiamufu wa mu ul wa Nayin wafisha mwanend. Yesu “wamwovila riy, chad wamwela anch: ‘Lik kudil.’” Kapamp kamwing wamulankusha mwan nsand. (Luka 7:13) Yesu ukat kwovang nayimp nakash piur pa runeng ni rufu. Musangar mud ik ukwikalaku pakukarumunay runeng kwikal musangar pa mangand mawonsu!

Runeng ap mar yakushikenap kal? Ukutwish kutong anch rufu udi mulong ukash kuupwish. Pakwez chitwishiken kuupwish—chifanyidin kwijik anch, Nzamb ukuyivumbul afu kusutil Mwanend. Vurik anch Nzamb usotin anch niyey umana yom yiney. Nzamb ukatin anch ey wikalaku dichuku dinidia mulong wa kuyak akatish ney akuvumbuka. Tong bil mutapu ukushakama nau chikupu, pakad kutesh kand anch muntu wafakal!

Lionel, ujimbwilau kwinsambishil walonda anch: “Kupwa, nileja piur pa divumbuk. Chakusambish, chankasikena kwitiy, ni nayitiyangap antu ading kwilej piur pa mulong winou. Pakwez nakimbijola mu Bibil ni yinatana yading yom yakin. Nichingedin nakash kumuman kand ngakam mband.”

Usotin kwijik jinsangu jivud? Atuman a Yehova akwikal ni musangar nakash wa kukulej mu Bibil wey mulong wak akwet kashinsh piur pa kuyivumbul antu. *

^ par. 3 Mulong wa kwikal ni kashinsh anch yesu wavumbuka, tal buku La Bible : Parole de Dieu ou des hommes ? pa paj wa 78-86, wapalangeshau kudi Atuman a Yehova.

^ par. 9 Tal amboku shapitre 7 wa buku Chom ik Chakin Kamu Chifundishinay Bibil? wapalangeshau kudi Atuman a Yehova.