Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 8 , 2015

Dandamen Kuchingel!

Dandamen Kuchingel!

“Ap anch chisu chalabap nchik, ey chingel!”ABAKUK 2:3.

MIMINY: 43, 45

1, 2. Chitongijok ik chifanyidinau kwikal nich atushalapol a Yehova?

ATUSHALAPOL a Yehova achingedin kal nich kushimpish muchim kuwanyin kwa uprofet. Chilakej, Jeremiy wachingela kuman mutapu wafanyinau in Babilon kujiyish Yuda, kwashikena mu muvu wa 607 K.C.C. (Jeremiy 25:8-11) Isay watakela kulond anch Yehova wafanyina kuyikol in Yuda mu uswik ni kuyichirish mu Yuda, kupwa walonda anch: “Ayuk kwau awonsu amukungamedina [Yehova, NWT].” (Isay 30:18) Mika niyend wachingela kuwanyin kwa kushilamu kwa Yehova ni walonda anch: “Nimuchingejin Nzamb wam.” (Mika 7:7) Mu yitot ya mivu, atushalapol a Nzamb achingela nich kashinsh kwez kwa Mesia ap Kristu.Luka 3:15; 1 Pita 1:10-12. * (Tal mazu ma kwinshin.)

2 Nlel unou, niyetu tuchingedin kuwanyin kwa uprofet ulondina piur pa Want wa Yehova. Mudi Mwant wa Want winou, piswimp ap Yesu ukuyikwol atushalapol a Nzamb mu mangand minam mayimp. Ukuyijiyish antu ayimp ni kupwish mar. (1 Yohan 5:19) Chawiy lel, tufanyidina kudandamen kuchingel kwez kwa dichuku dia Yehova ni kusal yawonsu yitwishikena mulong wa kulik kwikal nich kampuw.

3. Anch twachingedin kal nakash kwez kwa disudiel, chom ik tukutwisha kusambish kwiyipul?

 3 Tuchingedin nakash dichuku dikeza kusadik rusot ra Nzamb pa divu. (Mateu 6:10) Pakwez anch twachingedin kal mivu yivud mulong wa kwez kwa disudiel, tukutwish kusambish kwiyipul anch: ‘Mulong wak tufanyidin kudandamen kuchingel disudiel diezina piswimp ap?’

MULONG WAK TUFANYIDIN KUDANDAMEN KUCHINGEL DISUDIEL DIEZINA PISWIMP AP?

4. Mulong wak tufanyidin ‘kudandamen kubabal’?

4 Yesu wayileja in kwilejend anch “babalany” ni “chishany ku mes.” Chawiy lel, tufanyidin kudandamen kuchingel disudiel diezina piswimp ap. (Mateu 24:42; Luka 21:34-36) Chikwau kand, dirijek dia Yehova didandamedin kutubabesh anch ‘tuchingela ni kulam mu manangu kwez kwa dichuku dia Yehova’ ni kushinshikin nakash pa kushilamu kwa Yehova piur pa ngand yisu.Tang 2 Pita 3:11-13.

5. Diyingish ik dikwau tukweta piur pa kudandamen kuchingel dichuku dia Yehova?

5 Anch in kwilej a Yesu a mu mivu chitot ya kusambish achingela dichuku dia Yehova, komb chidi kand cha usey kudi etu kusal mwamu nlel. Mulong wak? Mulong chijingidij chimekeshin anch Yesu wikala Mwant wa Want wa Nzamb kudiosh mu muvu wa 1914 ni chimekeshin kand anch tudi mu machuku ma kwinsudiel, ap “disudiel dia mangand.” Chilakej, ching mudi mwatakelay Yesu kulond, mashakamin ma pa mangand mayipin kal nakash ni rusangu ruwamp ra Want arulejen pa mangand mawonsu. (Mateu 24:3, 7-14) Yesu kalondap piur pa uvud wa machuku ma nsudiel, chawiy lel, tufanyidin kwirijek mulong wa disudiel chikalap nchik chisu dikweza.

6. Mutapu ik twija anch mwikadil wa mangand ukupandakan kuyip kurutu disudiel dieza?

6 “Disudiel dia mangand” dikutwish kurumburik chisu chikeza mangand kupandakan kuyip mudi nlel? Bibil ulondin anch antu akuyip nakash kamu mu “machuku ma kwisudiel.” (2 Timote 3:1, 13; Mateu 24:21; Kujingunik 12:12) Chawiy lel, anch yom yiyipin nakash nlel, twij kand anch yikez kupandakan kuyip.

7. Chom ik chitufundishinay Mateu 24:37-39 piur pa mwikadil wa mangand mu machuku ma nsudiel?

7 Antu amwing akutwish kutong anch kurutu ‘mar makash’ meza, kukez kwikal njit mu jingand jawonsu ni antu avud akez kwikal ni mayej ap akufa nzal. (Kujingunik 7:14) Pakwez anch yashiken mwamu, antu awonsu akwijik anch uprofet wa Bibil wawanyin kal. Chikumekan patok ap kudi antu akad kwipan ku yom yilondinay Bibil. Vurik, Yesu walonda anch machuku mansudiel, antu avud kakezap ‘kwijik.’ Akudandamen kwikal mu mashakamin mau ma pichuku pichuku ni akukashimuk pakweza dichuku dia Yehova. (Tang Mateu 24:37-39.) Chakin, tufanyidinap kuchingel anch mwikadil wa mangand uyipa nakash kurutu kwa ‘mar makash’, pakwez antu akushiken ku kwijik kamu anch disudiel didi piswimp.Luka 17:20; 2 Pita 3:3, 4.

8. Mulong wak atubabeshin kal ku chijingidij cha Yesu, kashinsh ik tukweta piur pa chom chinech?

8 Yesu waleta chijingidij kudi in kwilejend chakwel ajingunina chirung chidiau. In kwilej a Yesu ading ayibabeshin kal. (Mateu 24:27, 42) Kudiosh mu muvu wa 1914, yikunku yimwing ya chijingidij chalonday Yesu yasambisha kuwanyin. Tukwet kashinsh anch tudi mu machuku mansudiel, ‘kwinsudiel kwa ditenchik dia yom.’ Yehova watenchikin kal dichuku dikezay kujiyish mangand mayimp ma Satan.

9. Mulong wak tufanyidin kudandamen kuchingel disudiel diezina piswimp ap?

9 Mulong wak tufanyidin kudandamen kuchingel disudiel diezina piswimp ap? Mulong tumuziyidil Yesu. Chikwau kand,  tumen patok kuwanyin kwa chijingidij chapanay Yesu piur pa disudiel diezina. Tukwet kashinsh anch disudiel didi piswimp, kulik mulong wa yom tuteshina, pakwez mulong wa kashinsh tukweta piur pa kuwanyin kwa uprofet wa Bibil. Tufanyidin kwiman dang ni kwikal ababela mulong wa disudiel diezina.

TUFANYIDIN KUCHINGEL MU MIVU YINCH?

10, 11. (a) Mulong wak Yesu wayileja in kwilejend anch “chishany ku mes”? (b) Chom ik chayilejay Yesu in kwilejend kusal anch disudiel diezinap swaa mudi mutonginau? (Tal chipich cha kwinsambishil.)

10 Antu avud pakach petu amusadidin kal Yehova nich kushinshaman ni achingedin kal nakash kwez kwa dichuku dined. Ap anch twachingedin kal dichuku dined mivu yivud, tufanyidin kudandamen kuchingel dichuku dined diezina piswimp ap. Tufanyidin kwikal itenchikina mulong wa dichuku dikwezay Yesu kujiyish mangand ma Satan. Vurik chayilejay Yesu in kwilejend kusal: “Babalany, chishany ku mes, mulong kiwijanyap chisu chikushika yom yiney. Chidi mudi muntu waya mu weny ulemp, wayishila atushalapol end, muntu ni muntu ni mudimu wend, chad wamulej kalam wa ku chis chakwel achisha ku mes. Chawiy niyen, chishany ku mes, mulong kiwijanyap chisu chikuchirikay mwin chikumbu. Ap ukushik chisu cha urel, ap mukach mwa uchuku, ap pa nkunku pa kucha, ap pa muten wa musas. Anch washik, wakukashimwishany, kichifanyidinap akutanany en ulelany. Yom yinikulejinanya en niyilejen kand kudi antu awonsu anch: ‘Chishany ku mes!’”Marko 13:33-37.

11 Chisu chajinguninau in kwilej a Yesu anch ndiy wasambishin kal kuyikel muvu wa 1914, ijika anch disudiel dikutwish kushik chisu chin chawonsu. Chawiy lel, itenchika mulong wa dichuku dined pa kwipan nakash mu mudimu wa kulejan. Yesu walonda anch ukutwish kwez pamwing ap kwinyim, ap “pa nkunku pa kucha, ap pa muten wa musas.” Anch chashiken mwamu, chom ik chifanyidinau in kwilejend kusal? Yesu walonda anch: “Chishany ku mes.” Chawiy lel, ang tutongin anch twachingedin kal mivu yivud, chirumburikinap anch disudiel didi kulemp nakash ap dikwezap pa chirung chetu.

12. Abakuk wamwipula Yehova chom ik, ni Nzamb wamwakula nchik?

12 Muprofet Abakuk wachingela nich kushimpish muchim padingay kulejan piur pa kusheshik kwa Yerusalem. Aprofet akwau a kurutu kwend alejana kand rusangu riner mu mivu yivud. Abakuk wamana anch uyimp ni kuburen kutentam yapandakan kal. Wamwita Yehova ukwash ni wamwipula anch: ‘A Yehova, kushik ni chisu ik nikukutazuka mulong wa kwinkwash?’ Ap anch Yehova kamulejap chisu chafanyina kwez disudiel, wamukana Abakuk anch: “Kichikulabap, bwat!” Yehova wamuleja  kand Abakuk anch: ‘dandamen kuchingel.’Tang Abakuk 1:1-4; 2:3.

13. Chom ik chafanyinay Abakuk kutong, ni mulong wak chitongijok chinech chading chiyimp?

13 Tong bil anch Abakuk waziya mulong wa kuchingel disudiel ni kulond anch: ‘Nachingel kal nakash kusheshik kwa Yerusalem mivu yivud. Chikwikal chisu chilemp nakash kurutu disudiel dieza. Nifanyidinap kand kudandamen kulejan mulong wa kusheshik kwinoku. Antu akwau akutwish kusal mudimu winou.’ Chom ik chafanyina kushiken anch wikala ni chitongijok mudi chinech? Wafanyina kushadish dilau dia Yehova. Chikwau kand, anch kitenchikap mulong wa disudiel diading diezina, wela kufa.

14. Mulong wak tukwet musangar pa kwijik anch Yehova watubabesha chakwel tuchingela disudiel?

14 Tong bil mudi udi mwi ngand yisu. Yom yawonsu yakanau piur pa machuku ma nsudiel yawanyina mudi mwalonday Yehova. Umuchingejidin Yehova nakash, ni ukwet kashinsh nakash anch ukuwanyish yawonsu yashilayimu. (Tang Joshua 23:14.) Ukwet musangar nakash mulong Yehova wateka dichuku dia kulet disudiel ni wayibabesha antu chakwel adichingela.Midimu 1:7; 1 Pita 4:7.

TUDANDAMENANY KULEJAN PITUCHINGEDINA

Ukat kulejan rusangu ruwamp nich mushiku? (Tal paragraf 15)

15, 16. Mulong wak tufanyidin kusal yawonsu yitwishikena mu mudimu wa kulejan pa chisu chinech cha disudiel?

15 Dirijek dia Yehova didandamedin kutuvurish chakwel twipana mu mudimu wa Yehova. Yivurish yiney yikat kutukwash chakwel twikala akwatikena mu mudimu wa Nzamb ni kwijik anch uruu wetu udi wa kuswakej. Tukwet kashinsh anch chijingidij chapanay Yesu chiwanyidin nlel ni anch disudiel diezin piswimp ap. Chawiy lel, tumutekany amboku Yehova pa ndond ya kusambish mu mwom wetu ni tudandamenany kulejan rusangu ruwamp piur pa Want.Mateu 6:33; Marko 13:10.

16 Chisu tulejena rusangu ruwamp kudi antu akwau, tukat kuyikwash chakwel apanda ku disheshik dia mangand ma Satan dikushikena piswimp ap. Mar mamwing mayimp nakash mashikena pa karung muvu wa 1945 chisu chajiya waat ujim utazukinau anch Wilhelm Gustloff. Tunan twa antu afa. Nambaz umwing ni nfumwend apanda pajiya waat winou. Uvurikin anch chisu chajiya  waat, mband umwing watoya anch: “Sakosh wam! Sakosh wam! Usang wam! Usang wam wawonsu udi mukach mwa waat. Nashadish kal yom yawonsu!” Pakwez antu akwau ijika chom chading chikweta usey ni asala usu wa kuyipandish antu. Nlel, mwom ya antu yidi mu ubaj. Niyetu tufanyidin kwikal mudi antu asala usu wa kuyipandish antu ading mu waat mu kwipan nakash mu mudimu wa kulejan. Tufanyidin kusal yawonsu yitwishikena mulong wa kuyipandish ku disudiel dia ditenchik dined.

Kwat mipak ya manangu ni ipana nakash mu mudimu wa kulejan (Tal paragraf 17)

17. Mulong wak tufanyidin kwikal ni kashinsh anch disudiel dikutwish kwez chisu chin chawonsu?

17 Tukutwish kuman patok kuwanyin kwa uprofet wa Bibil ni kuman anch disudiel dia ditenchik dined diyimp didi piswimp kamu. Tuchingedin chisu chikeza “misengu dikum” ni “nnam wa chidiany” kumurishikish Babilon Mujim ap relijon wa makasu. (Kujingunik 17:16) Tufanyidinap kutong anch kuchid kal chisu chilemp kurutu kwa yom yiney kushik. Kangal twavuramen anch Nzamb ‘wateka kal mu michim yau’ chitongijok cha kumurishikish relijon wa makasu ni chinech chikusadik swa ni chikushiken chisu chin chawonsu! (Kujingunik 17:17) Disudiel dia mangand mayimp ma Satan didi piswimp ap. Chawiy lel tufanyidin kuziyil ku dibabesh dia Yesu didia anch: “Babalany, kangal michim yen yachinchik mulong wa kwifund kudia, ap kukwachik maar, ap mulong wa yakamish ya mwom wa ngand yiney, chamwamu, dichuku dinidia dikez kukukashimwishany mudi mupit.” (Luka 21:34, 35; Kujingunik 16:15) Tubabalany amboku ni twipanany nakash mu mudimu wa Yehova, ni kwikal nich kashinsh anch Nzamb ‘ukuyikwash antu adandamedina kumuchingel.’Isay 64:4.

18. Chipul ik tukwambambina mu mutu wa mulong ulondwilaku ou?

18 Pituchingedina disudiel dia mangand minam mayimp, tufanyidin kulondul chiyul cha mwin kwilej Jud: “Akarukat nam, kulany mu ritiy ren ritumbila nakash. Piukulembilany, londulany kuyikel kwa [m]wiku [u]tumbila. Ilamany mu rukat ra Nzamb, piuchingedilany dichuku dikukwinkishanyau mwom wa chikupu kudi Nsalejetu Yesu Kristu ku riy rend.” (Jud 20, 21) Pakwez mutapu ik tukutwisha kumekesh anch tuchingedin kamu ngand yisu ya Nzamb yezina? Tukwambambin mulong winou mu mutu wa mulong ulondwilaku ou.

^ par. 1 Mulong wa uprofet piur pa Mesia ni mutapu uwawanyina, tal paj 200 wa buku Chom ik Chakin Kamu Chifundishinay Bibil?