Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 8 , 2015

Babelany Arund Nen mu Machuku Minam Mansudiel

Babelany Arund Nen mu Machuku Minam Mansudiel

“Arund ayimp akat kuyipish yaku yiwamp.”1 KORINT 15:33.

MIMINY: 25, 20

1. Tudi mu machuku ma mutapu ik?

TUDI mu ‘machuku ma mar nakash.’ Kudiosh mu muvu wa 1914, chisu chasambisha “machuku ma kwisudiel,” mikadil ya mu mangand yikadil kal yiyimp nakash. (2 Timote 3:1-5) Tufanyidin kwijik anch mangand makudandamen kamu kuyip, mulong Bibil watakela kulond anch “Antu ayimp ni in makasu akukudil mu kuyip ni mu kuyip nakash, akez kadimbijan ni kudimbijan.”2 Timote 3:13TMK.

2. Mutapu ik wa kwipuwangej usangaredinau antu avud? (Tal chipich cha kwinsambishil.)

2 Mulong wa kwipuwangej, antu avud nlel akat kutal ni kusal yom yiyimp, ya masandj ap yikweta ulaj ni nkau. Chilakej, Internet, televizion, mafilim, ma buku ni magazet yikat kukasikesh chisum ni masandj mudi yom yiwamp. Yom yisadidinau mulong wa kuyovish antu nayimp ayitiyin nlel ni mu jingand jikwau ayitiyin kal kudi mburmatad. Pakwez chirumburikinap anch Yehova witiyin mikadil ya mutapu winou.Tang Rom 1:28-32.

3. Yom ik yikatau antu avud kutong piur pa antu alimishina yany ya Nzamb?

3 Mu mivu chitot ya kusambish, antu atala kand yom yiyimp ya  chisum ni ya masandj mulong wa kwipuwangesh. Pakwez in kwilej a Yesu kasalap mwamu mulong ading alimishin yany ya Nzamb. Chom chinech ‘chayishimwosha’ antu adingau nau. Kwikala yibudikin ik? Antu ayisipa ni ayizengola. (1 Pita 4:4) Nlel kand, antu avud akat kutong anch antu alimishina yany ya Nzamb adi ayisup. Pakwez, Bibil utubabeshin anch antu akata kulondul chilakej cha Yesu Kristu “akez kuyizengol.”2 Timote 3:12.

“ARUND AYIMP AKAT KUYIPISH YAKU YIWAMP”

4. Mulong wak tufanyidinap kukat mangand minam?

4 Anch tusotin kusal rusot ra Nzamb, tukutwishap kukat “mangand ap yom yau yidiamu.” (Tang 1 Yohan 2:15, 16.) Satan, ‘nzamb wa mangand minam,’ ndiy uyikedila mangand. Ukat kusadin ma relijon, ma guvernema, yirijek ya angend a mushing, ni in kupan jinsangu mulong wa kuyidimb antu. (2 Korint 4:4; 1 Yohan 5:19) Tufanyidinap kwitiy yibachikin ya mangand, chawiy lel tufanyidin kwipuk arund ayimp. Bibil utubabeshin patok anch: “Kangal akudimbany. Arund ayimp akat kuyipish yaku yiwamp.”1 Korint 15:33.

5, 6. Anany tufanyidinap kuta nau urund, ni mulong wak?

5 Mulong wa kulam urund wetu uwamp ni Yehova, tufanyidinap kuta urund nau antu akata kusal yom yiyimp. Pakach pa antu inay padi akata kulond anch amwifukwidil Yehova pakwez akat kusal yom yiyimp. Anch muntu wasal chitil chijim ni kakarumukinap, tufanyidin kujip urund nen.Rom 16:17, 18.

6 Antu akatining yisu yivud kuyisangaresh arund nau chakwel ayikata. Chawiy lel, anch tudi mu urund nau antu akad kumuziyil Nzamb, tukutwish kusal yom yisadinau. Chilakej, anch twikal mu urund nau in kusal masandj, tukutwish niyetu kwikal mudi awiy. Chawiy chayishikena akadivar nau anambaz netu amwing. Ni antu alika kukarumuk ayopata. (1 Korint 5:11-13) Ching anch akarumuk, chamwamu mashakamin mau makutwish kwikal mudi malonday Pita.Tang 2 Pita 2:20-22.

7. Anany tufanyidina kuta nau urund?

7 Ap anch tufanyidin kwikal nawamp nau antu awonsu, tufanyidinap kuta urund ni antu alikina kumuziyil Nzamb. Chikwikal chiyimp anch Kaman wa Yehova watond kuta urund ni muntu wakad kwikal kashalapol ushinshamena wa Yehova wabatishau kal. Chilik chimwing, chikwikal chom chiyimp kuta urund ni muntu wakad kumusadil Yehova. Chidi cha usey nakash kwikal ni dilau dia Nzamb kulik kwikal ukatinau kudi antu akad kumukat Nzamb. Tufanyidin kuta urund ching nau antu akata kusal rusot ra Nzamb. Yesu walonda anch: “Muntu mwawonsu ukata kusal yom yisotilay Nzamb, ndiy mwinou makwam, ap nambaz wam, ap mwanamakwam.”Marko 3:35.

8. Mutapu ik wayipishau muchid wa Isarel kudi arund ayimp?

8 Arund ayimp akat kuletishang yibudikin yiyimp. Chilakej, tal chayishikena in Isarel. Kurutu kwa kushik mwi Ngand ya Kushilamu, Yehova wayibabesha piur pa ading ayinyingumukina. Wayileja anch: “Kangal wakayizengamin akish au kurutu, ap kangal wakayifukwil. Ap kangal wakilikej yisalijok yey ni ya awiy, pakwez ukez kuyipuchol akish au ni kuumbwol manguj mau yipuchipuch. En ukez kumwifukwilany [Yehova, NWT] Nzamb wen.” (Kubudik 23:24, 25) Pakwez in Isarel avud kaziyilap ku yany ya Nzamb ni ikal akad kushinshaman kudi ndiy. (Kuseng 106:35-39) Kwikala yibudikin ik? Yehova walika muchid wa Isarel ni watonda chikumangen cha in Kristu mudi antwend.Mateu 23:38; Midimu 2:1-4.

 BABELANY YOM UTANGINANYA NI UMENANYA

9. Mulong wak yom ya kupalangesh nich nsangu ya mangand yikutwish kwikal ya ubaj?

9 Yom yivud ya kupalangesh nich nsangu pa mangand, mudi televizion, internet, ni mabuku, yikutwish kushesh urund wetu nend Yehova. Yom ya mutapu winou yikutwishap kuyikwash in Kristu kwikal ni ritiy mudiay Yehova ni mu kushilamu kwend. Pakwez, yikat kuyibachik antu kuchingejin mangand mayimp ma Satan. Chawiy lel, tufanyidin kubabal nakash chakwel kangal twatond yom ya kutal, ya kutang, ni ya kutesh yikutwisha kutubachik kwikal nich “maku mayimp ma yom ya mangand.”Titus 2:12.

10. Chom ik chikushikena yom ya mangand ya kupalangesh nich nsangu?

10 Piswimp ap, mangand ma Satan ni yom yiyimp ya kupalangesh nich nsangu akuyijiyish. Bibil ulondin anch: “Mangand mayil ni kujiy pamwing ni yom yawonsu yikwetau nich antu ris, pakwez muntu mwawonsu ukata kusal rusot ra Nzamb ukez kupand chikupu.” (1 Yohan 2:17) Chilik chimwing, nfund a kuseng wawanga anch: “In kusal nayimp akez kayikatul gwa.” Wawejinaku kand anch: “Pakwez itudishila akez kaswan ngand, akez kusangar mu kuvul kwa chisambu.” Mu machuku minch? “Mwin kutentam mwawonsu ukez kaswan ngand, ukez kashakamamu chikupu.”Kuseng 37:9, 11, 29.

11. Mutapu ik ukatay Nzamb kutukwash kushal ashinshamena kudi ndiy?

11 Chinyim ni mangand ma Satan, dirijek dia Yehova ditukwashin kwikal nich mashakamin makutukwasha kwikal ni mwom wa chikupu. Yesu wamulembila Yehova anch: ‘Antu akwikal nich mwom wa chikupu anch ashiken ku kukwijik ey Nzamb wakin, ni kumwijik Yesu Kristu watuma ey.’ (Yohan 17:3) Yehova ukat kusadil dirijek diend mulong wa kutwinkish yom yawonsu tuswirikedina chakwel tushikena ku kumwijik. Chilakej, tukwet ma gazet mavud, ma broshir, ma video, ni kapend ka Web mulong wa kutukwash chakwel tudandamena kumusadil Nzamb. Dirijek diend dikat kutenchik pa mangand mawonsu yikumangan rubing ni rubing mu yikumangen 110 000 ni kusut. Yom ya mu Bibil yitukata kwilej ku yikumangan ni ku yitentam yiney yikat kukasikesh ritiy retu mudiay Yehova ni mu kushilamu kwend.Hebereu 10:24, 25.

ATIJANANY “CHING MU MWANT”

12. Rumburil chijil cha Bibil cha kwatijan “ching mu Mwant.”

12 In Kristu asotina kwatan ap kwachik afanyidin kubabal nakash piur pa kutond muntu wa kwatijan nend. Dizu dia Nzamb ditubabeshin anch: “Kangal wabombakanany nau antu akad ritiy. Ov, uyakin ukutwish nchik kwovijan nich kuyip? Ap, ov, chimunyik chikubombakan nchik nich mididim?” (2 Korint 6:14) Bibil uyilejin atushalapol anch atijanany “ching mu Mwant,” kwawiy kulond anch kwatijan ni muntu wipana kal, wabatishinau kal ni ulimishina yany ya Yehova. (1 Korint 7:39) Anch watijan ni muntu wa mutapu winou, umukatina Yehova, muntu winou ukukukwash kushal ushinshamena kudi Nzamb.

13. Chiyul ik chapanay Nzamb kudi in Isarel piur pa kwatijan?

13 Yehova wij yom yidia yiwamp kudi etu, ni chiyul cha kwatijan “ching mu Mwant” chidiap chisu. Chilakej, shinshikin yayilejau in Isarel kudi Yehova piur pa antu akad kumusadin ndiy. Moses wayileja anch: “Kangal wez watijanany nau, kangal wez watishany anen amband kudi anau amakundj, ap anen amakundj kangal ez ayat anau amband. Chamwamu awiy akez kuyipumbul anen amakundj kulik kwinlondul am chakwel asadil akish au. Chad [Yehova] ukez kukwovilany en ujim, wakusheshany kamu swa.Kuvurik Yijil 7:3, 4.

14, 15. Chom ik chamushikena Salomon pavuramenay chiyul cha Yehova?

 14 Kupwa kwa Salomon kwikal mwant wa Isarel, wamwita manangu, ni Yehova wakula malembil mend. Chawiy lel, Salomon wijikana nakash mudi ntakel wa manangu wa muchid wa Isarel. Mwant mband wa ku Seba washimwoka mulong wa manangu ma Salomon ni wamuleja anch: “Manangu mey ni dipit diey yipandaken katumb kinatesha kal.” (1 Ant 10:7) Pakwez chilakej cha Salomon chitufundishin kand yom yikutwisha kushiken anch muntu walik chiyul cha Nzamb ni watan ap wachik ni muntu wakad kumusadin Yehova.Mulej 4:13.

15 Ap anch Yehova wamuyukisha, Salomon wabwambwila ku chiyul cha Nzamb. Salomon “wakata nakash amband a michid yindj” akad kumusadin Yehova, amband a mu chipang 700 ni a kuns 300. Yisu yading yibudikin? Pikalay Salomon ipal, akajend “amukarumuna muchim kutal ku akish. . . . ni Salomon wasala yom yiyimp kurutu kwa [Yehova, NWT].” (1 Ant 11:1-6) Arund ayimp ikala ni usu padi ndiy, ni kashalap ushinshamena kudi Yehova. Anch chom chinech chamushikena, chikutwish kand kumushiken muntu mwawonsu. Chawiy lel, tufanyidinap kutong ap pakemp kwatan ap kwachik ni muntu wakad kumukat Yehova!

16. Chiyul ik chipaninay Bibil kudi antu atijadina nau antu akad kwikal akaritiy?

16 Chikwikal nchik anch mbay umwing wa uruw wikal kashalapol wa Yehova pakwez mukwau kadiap mukaritiy? Bibil ulondin anch: “niyen amband, yiziyilany anfumwen, ap anch amwing a pakach pau kitiyinap nchik dizu dia Nzamb, ukutwishany  kuyipwitany ku ritiy pakumanau yisalijok yen yiwamp.” (1 Pita 3:1) Pakwez, chiyul chinech chiyitadin kand amakundj akweta akajau akad kumwifukwil Yehova. Dizu dia Nzamb dilondin patok anch: Ikal ikundj ap mband muwamp, ni sadil yany ya Nzamb piur pa uruw. Kupwa, anch mbay ney wa uruw waman anch waswimp kal, ukutwish kusot niyend kumusadin Yehova. Yom yiney yayishikena ambay a uruw avud.

TANG URUND NAU ANTU AMUKATINA YEHOVA

17, 18. Chom ik chamukwasha Nowa kupand ku Mabeb, ni chom ik chayikwasha in Kristu a mu mivu chitot ya kusambish kupand ku disheshik dia musumb wa Yerusalem?

17 Arund ayimp akutwish kukubachik kumubwambwil Yehova, pakwez arund awamp akutwish kukukwash wikala ushinshamena kudi ndiy. Nowa udi chilakej chiwamp kudi etu. Washakama pa chisu chavulijana “kuyip kwa antu . . . pansh” ni chisu chinicha “Yitongijok yawonsu ya michim ya antu yadandamena kamu ching mu kuyip.” (Disambishil 6:5) Antu ayipa kamu ni Yehova wakwata mupak wa kujiyish mangand mayimp. Pakwez Nowa wading muntu utentamina. Bibil umutazukin anch “muntu uwanyidina, . . . wenda pamwing ni Nzamb.”Disambishil 6:7-9.

18 Nowa katap urund nau antu akad kumukat Yehova. Ndiy ni dijuku diend ipana mu kusal waat, ni wading kand “mwin kurumburil yom yitentamina.” (2 Pita 2:5) Nowa, mukajend, anend amakundj asatu ni akajau, adinga arund awamp. Ipana mu kusal yom yading yimusangareshina Nzamb ni apanda ku Mabeb. Etwawonsu nlel tudi anend a Nowa, chawiy lel tufanyidin kumujikitish ndiy ni dijuku diend mulong amuziyila Yehova ni ipuka arund ayimp. Chilik chimwing kand, in Kristu a mu mivu chitot ya kusambish katap urund ni antu akat kumukat Yehova. Amuziyila ni apanda chisu chasheshau musumb wa Yerusalem mu muvu wa 70 C.C.Luka 21:20-22.

Kuta urund ni antu amukatina Yehova kukutukwash kutongin pa mwom tukwikala nich mwi ngand yisu (Tal paragraf 19)

19. Chom ik chikutukwasha kushal ashinshamena kudiay Yehova?

19 Mudi Nowa ni dijuku diend nau in Kristu a mu mivu chitot ya kusambish, niyetu tufanyidinap kuta urund ni antu akad kumukat Yehova. Kudi ma miliyon ni miliyon ma akadivar ni anambaz ashinshamena atufanyidina kutond kwikal arund netu. Akutukwash ‘kwiman dang mu ritiy’ mu chirung chinech chikash. (1 Korint 16:13; Jinswir 13:20) Tong bil mutapu chikusangaresha pitukupanda ku disudiel dia mangand minam mayimp ni kushakam chikupu mwi ngand yisu ya Yehova! Chidi cha usey mud ik kwipuk arund ayimp kudiokal nlel!