Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 11 , 2014

Mulong Wak Tufanyidin Kwikal Atumbila

Mulong Wak Tufanyidin Kwikal Atumbila

‘Ufanyidinany kwikalany atumbila.’—LEV. 11:45.

1. Ov, mutapu ik ukutukwasha mukand wa In Levi?

MU MUKAND wa In Levi, kwikal atumbila akulejen nakash kupandakanamu mikand yin yawonsu ya mu Bibil. Chawiy lel, mwikadil winou chidi chom chitinau kudi in kumwifukwil Yehova ashinshamena awonsu, kutesh ni kusanger mukand winou kukutwish kutukwash kwikal atumbila.

2. Ov, yom ik yidia mu mukand wa In Levi?

2 Mukand wa In Levi, wafundau kudi muprofet Moses, udi chikunku cha ku “mazu mawonsu ma mukand wa Nzamb” mawanyidina kulejan nich. (2 Tim. 3:16, TMK) Dijin dia Yehova adijimbwil tupamp mudi dikum mu shapitre mwawonsu wa mukand winou. Kutesh nawamp kurumburik kwa mukand wa In Levi kukutukasikesh chakwel twipuka kusal yom yikutwisha kusaadish dijin dia Nzamb masaal. (Lev. 22:32) Mu mukand winou, kujimbul kwa mazu “yam [Yehova]” tupamp tuvud kukutwish kutuvurish anch tufanyidin kumuziyil Nzamb. Mu mutu wa mulong winou ni ulondwilaku ou, tukusanger kushinshikin yom yimwing yidia mu mukand wa In Levi, chipan cha Nzamb chikutwisha kutukwash kwikal atumbila mu mutapu wetu wa kumwifukwil Nzamb.

 CHIFANYIDIN KWIKAL ISHITWILA

3, 4. Ov, chom ik chading chimekeshina kuyowish an amakundj a Aron? (Tal chipich cha kwinsambishil.)

3 Tang In Levi 8:5, 6. Yehova wamutonda Aron chakwel asala mudi mwin kupesh mujim wa in Isarel, ni anend asala niyawiy mudi in kupesh mulong wa muchid. Aron amufanikeshin ni Yesu Kristu, ni anend ayifanikeshin ni in Kristu azizidilau many. Chad, ov, kumwowish Aron mem kurumburikin kumutokish Yesu? Bwat, mulong Yesu wading wakad chitil ni wading “yakupesh yiwanyidina,” chawiy lel kadingap ukwet kuswir kwa kumutokish. (Heb. 7:26; 9:14) Pakwez, kupwa kwa kumwowish Aron mem, wading ufaniken ni Yesu, udinga utokina ni utentamina. Chad, chom ik lel chading chimekeshina kuyowish an amakundj a Aron mem?

4 Kuyowish an a Aron mem kwading kumekeshin kuyitokish kwa antu atondau kwikal in kupesh a mwiur. Ov, kutambul dibatish kwa azizidilau many kukwatijadin ni kuyitokish kwa an a Aron? Bwat, mulong kutambul dibatish kukatap kudiosh yitil; pakwez, kumekeshin anch muntu wipan kal kudi Yehova Nzamb. Kuyowish azizidilau many mem kukat kusadik kukwatijan ni “dizu diend,” ni chinech chiyitin anch asadina ni muchim wau wawonsu malejan ma Kristu mu mwom wau. (Efes 5:25-27) Mwamu akushal ishitwila ni atokina. Pakwez chidi nchik piur pa “amikoku akwau”?Yoh. 10:16.

5. Ov, chom ik tukutwisha kulond piur pa kuyitokish amikoku akwau kusutil ku Dizu dia Nzamb?

5 An amakundj a Aron kadingap chifanikesh cha “chisak chipandiken kujimb” cha amikoku akwau a Yesu. (Kuj. 7:9, TMK) Chad, ov, amikoku akwau inay akat niyawiy kwikal atumbila ni atokishinau kusutil ku Dizu dia Nzamb? Mwaning! Pakatau antu akweta ruchingej ra kushakam pa divu kutang chilondinay Bibil piur pa usey ni usu ukweta mash michilay Yesu, akat kutek ritiy rau mu mazu minam ni “kumusadil ndiy muten ni uchuku.” (Kuj. 7:13-15) Yibudikin ya kudandamen kwikal atokishinau kwa azizidilau many ni kwa amikoku akwau kukat kumekan anch ‘ikala nich yaku yiwamp.’ (1 Pita 2:12) Musangar mudi ik ukwetay Yehova pakatay kutal kwishitul ni uumwing wa azizidilau many ni amikoku akwau, akata kutesh ni kumulondul ni kushinshaman Kafung, Yesu!

6. Ov, mulong wak tufanyidin kwishinshikinang chisu chawonsu?

6 Ayita in kupesh in Isarel chakwel ikala inangina ku mujimbu ni mwawiy muyitinau kand antu a Yehova lel. Antu twilejina nau Bibil akat yisu yivud kushinshikinang piur pa ndond yetu ya difukwil mutapu uyinangina ni mutapu twitenchikina ni twinangina pa yitadina kudjal. Pakwez, kwishitul kwa in kupesh kutukwashin kwijik anch muntu mwawonsu ukandamina ku mukandu ulepina wa Yehova mulong wa kumwifukwil ufanyidin kwikal ni “muchim wa zwang.” (Tang Kuseng 24:3, 4; Isay 2:2, 3.) Mudimu wetu utumbila tumusadidina Nzamb tufanyidin kuusal nich manangu ni muchim utok ching mudi mutukata kowish mijimbu. Kusal mwamu kwitin kwishinshikin chisu chawonsu, kupwa tukutwish kuman anch tukwet kuswir kwa kuswimp yom kanang chakwel twikal atumbila. (2 Kor. 13:5) Chilakej, muntu watambwila kal dibatish ukata kutal pornografi ufanyidin kwiyipul anch, ‘Ov, Nimekeshin anch nidi utumbila?’ Ufanyidin kutambul ukwash chakwel alika chisal chijondila chinech.Jak. 5:14.

MEKESH MU UDIA UTUMBILA PA KWIKAL MWIN KUZIYIL

7. Kukwatijan ni mukand wa In Levi 8:22-24, ov, chilakej ik chashay Yesu?

7 Patekangau muntu pa win kupesh, atekanga mash ku ris ra ditu dia katatuku, ku muny ujim wa chikas, ni ku muny ujim wa ku mwend wa Mwin Kupesh Aron ni anend amakundj. (Tang In Levi 8:22-24.) Mutapu winou wa  kusadil mash wading urumburikin anch mwin kupesh wafanyina kusal ni kuziyil mudimu wend nawamp nakash. Chilik chimwing, Yesu Mwin Kupesh Mujim washa chilakej chiwamp kudi azizidilau many ni kudi amikoku akwau. Witiya umutakel wa Nzamb. Yesu wasalanga rusot ra Yehova, ni walondula njil yitumbila ya mu mwom.Yoh. 4:31-34.

8. Ov, chom ik chifanyidinau kusal in kumwifukwil Yehova awonsu?

8 In Kristu azizidilau many ni amikoku akwau a Yesu afanyidin kulondul chilakej chiwamp chashay Mwin Kupesh Mujim. In kumwifukwil Yehova awonsu afanyidin kuziyil nakash ku umutakel udia mu Dizu dia Nzamb ni kwipuk kumunenganesh mwiku wend. (Efes 4:30) Afanyidin ‘kwendil mu jinjil jitentamina.’Heb. 12:13.

9. Ov, chom ik chalondau kudi akadivar asatu asal pamwing ni Chisak Chitakedil, ni mutapu ik ukutwisha mazu mau minam kukukwash kwikal ching utumbila?

9 Tushinshikinany amboku yom yilondinau akadivar asatu akweta ruchingej ra kushakam pa divu ni asala mu makum ma mivu pamwing ni yid ya Chisak Chitakedila. Mukadivar umwing ulondin anch: “Ap anch chinech chading chisend cha pakampwil, urund winou wa piswimp wamekeshanga chisu ni chisu anch, chikalap nchik mudiau azizidilau many, akadivar inay adi akad kuwanyin. Pakwez, rutong nikweting kwawonsu oku ridi ra kuyiziyil antu atakedila.” Mukadivar wakaad ulondin anch: “Verse mudi 2 Korint 10:5, ulondina piur pa ‘kumuziyil Kristu,’ wankwasha mulong wa kwikal mwin kuziyil ni kusal pamwing ni antu atakedila. Kuziyil kwinoku kudiokil mu muchim.” Mukadivar wakasatu ulondin anch: “Kukatish yikatiningay Yehova ni kukis yikisiningay, mudi kudandamen kukimb umutakel wend ni kusal yimusangareshina, kurumburikin kuziyil ku dirijek diend ni antu asadidinay mulong wa kutwal kurutu rutong rend piur pa divu.” Mukadivar winou wileja piur pa Nathan Knorr, washikena ku kwikal chid cha Chisak Chitakedila anch, witiya kwa kwisotil yalondau mu mutu wa mulong “Kuvadik kwa Muchid” mu Chinong cha Kalam cha 1925, ap kusutil ku yipul yikwau kand. Kuziyil mudi kwinoku kwayishimokisha akadivar nakash. Kutongijokin pa yom yalondau akadivar asatu inay kukutwish kukukwash kumuziyil Nzamb ni kwikal utumbila.

KWIKAL ATUMBILA PA KUZIYIL KU CHIJIL CHA NZAMB PIUR PA MASH

10. Ov, chom ik tukutaninamu anch twaziyil chijil cha Nzamb piur pa mash?

10 Tang In Levi 17:10. Yehova wayileja in Isarel anch kangal kudia ‘mash ma mitapu yawonsu.’ Ayilikishin in Kristu niyawiy kudia mash—mikalap ma nnam ap ma muntu. (Mid. 15:28, 29) Chidi cha ushon nakash kudi etu kutongijok mulong wa kusal yom yikutwisha kumubachik Nzamb kutulik ni kutwopat mu chikumangen. Tumukatin ni tusotin kumuziyil. Ap anch twarish nich milong ya mayej makash, tukezap kulik kumuziyin anch antu akad kumwijik Yehova ap akad kumubangin atulej anch tulika kumuziyin, tukez ching kudandamen kumuziyil. Mwaning, tufanyidin kuchingej anch akez kutuswingish mulong wa kulik mash, pakwez tutondany amboku kumuziyil Nzamb. (Jud 17, 18) Ov, chom ik piur pa mutu wa mulong winou chikeza kutukasikesh kwikal ‘ababela’ chakwel tulika kudia mash ap kulik kwitiy anch atutekam mu mujimbu?Kuv. 12:23.

11. Ov, mulong wak tukutwish kulond anch Dichuku dia Kuchakwish dia pa muvu chadingap chisal chakad usey?

11 Kusadil kwa mash ma nnam mu Isarel wa pasak kudi mwin kupesh mujim pa Dichuku dia Kuchakwish dia pa muvu ditukwashin kwijik mutapu ukatay Nzamb kuman mash. Mash ading kumasadil mu mutapu wa pakampwil. Ading kumasadin mulong wa dilikishin dia yitil antu ading kukimb anch Yehova ayilikishina. Mash ma ngomb ni ma mpemb ading kumakus ku mutambu wa kurutu wa chibwik cha mushet wa manswik. (Lev. 16:14, 15, 19) Kusal  mwamu, kwasalanga anch Yehova ayilikishina in Isarel yitil yau. Chikwau kand, Yehova walonda ang anch muntu wazomb ni wajip nnam mulong wa kumudia, wading ufanyidin kwichil mash ma nnam winou ni kumabwik nich rufunfut, “mulong mupim wa mujimbu [win wawonsu] udi mash.” (Lev. 17:11-14) Ov, kusal mwamu chiding chisal chakad kwikal ni usey? Bwat. Kusadin mash pa Dichuku dia Kuchakwish, chading mudi chijil mulong wa kwichil mash pansh, chikwatijadina ni chijil cha Yehova cha kwinsambishil chamwinkau Nowa ni anend piur pa mash. (Dis. 9:3-6) Yehova Nzamb walikisha kudia mash mulong wa kulam mwom. Ov, chinech chirumburikin ik kudi in Kristu?

12. Ov, mutapu ik ulondinay Paul mu mukand wend kudi in Kristu in Hebereu piur pa mash ni dilikishin?

12 Pafunday kambuy Paul kudi in Kristu in Hebereu piur pa usu ukweta mash mulong wa kutokish, warumburila anch: “Ku Yijil ya Moses akutwish kushitwish piswimp yom yawonsu nich mash, chawiy wakad kupesh mash kwikil dilikishin dia yitil kudi Nzamb.” (Heb. 9:22) Paul walonda kand anch chakupesh cha nnam, ap anch chikwet usey kanang, chading kwau mulong wa kuyivurish in Isarel anch ading akayitil ni anch ading akwet kuswir kwa chom kanang chikutwisha kudiosh yitil rawonsu. Mwaning, Yijil ya Moses yading kusu “chijingidij cha yom yiwamp yikeza kwez, kiyadingap kwau yom yin yakin . . . , bwat.” (Heb. 10:1-4) Ov, chasadika mutapu ik anch dilikishin dia yitil chikala chom chakin?

13. Ov, mutapu ik wiyovila pa kwijik anch Yesu wapana usey wa mash mend kudi Yehova?

13 Tang Efes 1:7. Rufu ra kwipan ra Yesu Kristu, wipana kwa kwisotil ‘amwinend mulong wetwetu,’ rikwet kurumburik kukash kudi antu awonsu amukatina ndiy ni Tatukwend. (Gal. 2:20) Pakwez, chasadika anch Yesu watukola kudiokal ku yitil yetu kwinyim kwa rufu rend ni kuvumbuk kwend. Yesu wawanyisha yatakelau kulond mu Yijil ya Moses pa Dichuku dia Kushitwish. Pa dichuku dinidia, mwin kupesh mujim wasendanga mash makemp ma annam a kupesh mulong wa kuya nich mwin ndond Yipandikena Katumb ya mu dizang, ni  kupwa waya nich mu tempel wa Salomon, ni wamatek kurutu kwa Nzamb. (Lev. 16:11-15) Chilik chimwing, Yesu wandama mwiur nich usey wa mash mend ma ukauntu ni wapana usey winou kudi Yehova. (Heb. 9:6, 7, 11-14, 24-28) Tukwet musangar mudi ik pa kwijik anch tukwet dilikishin dia yitil yetu ni atokisha kal kom ketu mulong tutekin ritiy retu mu mash ma Yesu!

14, 15. Ov, mulong wak chidi cha usey kutesh ni kuziyil ku chijil cha Yehova chilondina piur pa mash?

14 Ov, uteshin katat nawamp mulong wak Yehova utulikishin kudia ‘mash mu mitapu yin yawonsu’? (Lev. 17:10) Ov, uteshin kurumburik mulong wak Nzamb umening mash anch madi chom chitumbila? Ukat kumanang mash mu chilik chimwing ni mwom. (Dis. 9:4) Ov, witiyijin anch tufanyidin kwitiy mutapu umeningay Nzamb mash ni kuziyil ku chijil chend cha kulik kumadia? Mutapu umwing kusu ukutwishay muntu mwawonsu wa pakach petu kwikal mu chisambu ni Nzamb udi kutek ritiy mu chakupesh cha Yesu ni kwijik anch mash makwet usey nakash ku mes ma Sakatang wetu.Kol. 1:19, 20.

15 Muntu mwawonsu pakach petu ukutwish pakad kuchingej kurishikish ni milong yitadina kusadin mash. Anamakwetu ap arund akatish akutwish pakad kuchingej kutushindil chakwel twitiya ap tulika kwitiy kututek mash mu mujimbu. Chisu cha milong yiney, yom yikwau yifanyidina kusadin yidi yikunku ya mash ni mitapu ya kwokan yitina kusadin kwa mash. Pakwez, chidi cha usey nakash kukimbijol ni kwitenchik kurutu kwa chom kanang kukushiken. Pamwing ni malembil, yom yiney yikez kutukwash kwiman dang mu mupak ukash ni kwipuk kuujip chisu chikeza kwez milong. Chakin kamu tusotinap kunenganesh muchim wa Yehova pa kwitiy kusal yom kanang yilikishinay mu Dizu diend! Amingang avud ni in kwimanyin milong ya kutekan mash akat kuyilej antu chakwel apana mash ni chitongijok cha kwel anch apandishin mwom ya antu. Pakwez, antu atumbila a Yehova ij anch Sakatang ndiy ukweta mbil ya kulond piur pa mutapu ufanyidina kusadin mash. Kudiay ndiy, “ap mash ma mutapu ik” madi matumbila. Chawiy lel tufanyidin kudandamen kuziyil ku chijil chend chilondina piur pa mash. Kusutil ku mashakamin metu matumbila, tukat kumekesh kudi ndiy anch tusangeridin nakash usu ukweta mash ma Yesu wa kulet dipandish—mawiy kusu mash makweta usu wa kulet dilikishin dia yitil ni mwom wa chikupu.Yoh. 3:16.

Ov, ukwatim mupak wa kudandamen kuziyil ku chijil cha Yehova chilondina piur pa mash? (Tal paragraf wa 14, 15)

MULONG WAK YEHOVA UCHINGEJIN ANCH TWIKALA ATUMBILA

16. Ov, mulong wak antu a Yehova afanyidin kwikal atumbila?

16 Payipandishay Nzamb in Isarel kudiokal mu uswik wa in Idjibit, wayileja anch: “Am, yam, [Yehova] wakudioshanya en mwi ngand ya Idjibit kwikal Nzamb wen. Mwamu en ukez kwikalany atumbila, mulong Am nitumbil.” (Lev. 11:45) Kwikal atumbila kwading kwa usey kudi in Isarel mulong Yehova udi utumbila. Mulong tudi Atuman a Yehova, tufanyidin niyetu kwikal atumbila. Mukand wa In ulejen yom yiney patok.

17. Ov, mutapu ik wiyova kal katat piur pa mukand wa mu Bibil wa In Levi?

17 Mambamb metu piur pa yom kanang ya mu mukand wa In Levi mading chakin kamu ma usey nakash. Chilik chimwing, dilejan dined diakasikesh kal kusanger kwetu kwa mukand winou wa mu Bibil wapepilau. Kutongijokin pa yom kanang ya usey nakash yidia mu mukand wa In Levi kukat kukudish mutapu wey wa kutesh kurumburik piur pa mulong wak tufanyidin kwikal atumbila. Pakwez, ov, yom ik yikwau tukutwisha kwilej mu mukand wa In Levi? Ov, chom chikwau kand tukutwish kwilejin kusutil mu mukand winou pantaliken ni mudimu utumbila tumusadidina Yehova? Tukushinshikin yom yiney mu mutu wa mulong ulondwilaku ou.