Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 11 , 2014

 MUTU WA PA CHIBUR | OV, SATAN UDIAKU CHAKIN?

Ov, Satan Udi Kwend Chifanikesh cha Uyimp?

Ov, Satan Udi Kwend Chifanikesh cha Uyimp?

Chiswapel kulond anch Satan ututangina mu Bibil udi kwend chifanikesh cha yom yawonsu yiyimp. Pakwez, ov, chawiy chakin kamu chifundishinay Bibil? Anch chidi mwamu, mulong wak Bibil ulondin piur pa Satan pambambinay ni Yesu Kristu ni Nzamb wa Dikand Diawonsu amwinend? Shinshikin yilakej yaad yidia mu mambamb minam.

PAMBAMBAY SATAN NI YESU

Pasambishay Yesu mudimu wend wa kulejan, Djabul wapakisha kumwoz ni yoziu yisatu. Chakusambish, Satan wasala usu wa kumushindil Yesu chakwel asadina usu wend wamwinkau kudi Nzamb kwa choy mulong wa kupwish nzal yend. Kupwa, Djabul wamubachika Yesu chakwel ateka mwom wend mu ubaj ya usup chakwel antu amubaza. Kupwa kand, Satan wamwinkisha Yesu winyikel wa mant mawonsu ma pa mangand ni kumwit anch asala kwend kachisal kakemp ka kumwifukwil. Tupamp tusatu, Yesu watwisha kulik kuwil mu ubaj ukash winou, kapamp kawonsu wajimbulanga Mifund.Mateu 4:1-11; Luka 4:1-13.

Ov, Yesu wading kwambamb ni nany? Ov, ni uyimp wadinga mu muchim wend? Kukwatijan ni Mifund, Yesu “Mwin Kupesh wetu mujim amwoza mitapu yawonsu mudi mukat kutwozau etu,  pakwez ndiy kasalap kwend chitil.” (Hebereu 4:15) Bibil ulondin kand anch: “Ndiy kasalap chitil, mu kan mwend kadimbanap.” (1 Pita 2:22) Yesu washala uwanyidina, ni ushinshamena. Kalikidinap kapamp ap kamwing anch uyimp upama mu muchim wend. Chimeken patok anch, Yesu kadingap kwambamb ni uyimp wadinga mu muchim wend; wading kwambamb ni muntu wakin.

Mambamb makwau mamekeshin nawamp anch Satan udi muntu wakin.

  • Vurik anch Djabul wamuleja Yesu mant mawonsu ma pa mangand ni kumulej anch amwifukwila. (Mateu 4:8, 9) Chom chinech chela kwikal chakad usey anch Satan kadingap muntu wakin. Chikwau kand, Yesu kelap kumutadik Satan piur pa want ushimokishina wamulejau.

  • Kupwa kwa Yesu kulik kuwil mu yoziu, Djabul “wamusha, waya kuchingel chisu chikwau.” (Luka 4:13) Ov, Satan amumekeshin pinap mudi uyimp udia mu muchim wa muntu bil anch, mukankuny ukasikena nakash?

  • Ijik anch angel eza kumukwash Yesu. (Mateu 4:11) Ov, angel inay amukasikesha Yesu ni kumukwash, ading antu a mu spiritu? Mwaning. Kupwa, ov, mulong wak tufanyidin kwikal ni kashinsh anch Satan wading chisu chimwing niyend chitang chiwamp cha mu spiritu?

PAMBAMBAY SATAN NI NZAMB

Chilakej chetu chakaad chimekeshin rusangu ra Job, ikundj mwin kumuchin Nzamb. Rusangu riner rimekeshin mambamb maad pakach pa Djabul ni Nzamb. Mu mambamb mawonsu maad, Nzamb wamubaza Job mulong wa kushinshaman kwend. Satan walonda anch Job ukat kumusadin Nzamb mulong kutaninamu kwend, ni anch Nzamb walanda kal kushinshaman kwa Job. Pakwez, Djabul walonda anch umwij Job nawamp nakash kumupandakanamu Nzamb. Yehova wamulikidila Satan chakwel amubuwa Job mapit mend, anend, ni ukash wend wa mujimb kand. * Chisu chinicha, chamekana anch Yehova walonda uyakin piur pa Job, ni anch Satan wading mwin makasu. Nzamb wamuyukisha Job mulong wa kushinshaman kwend.Job 1:6-12; 2:1-7.

Mu mambamb minam pakach pa Nzamb ni Satan, ov, Yehova wading kwambamb ni muyimp wadinga mu muchim wend? Bibil ulondin anch: “Njil ya Nzamb yiwanyidin.” (2 Samwel 22:31) Dizu dia Nzamb dilondin kand anch: “Utumbila, utumbila, utumbila udi Nsalejetu Nzamb Mwin Dikand Diawonsu.” (Kujingunik 4:8) Kwikal utumbila kurumburikin kwikal wishitwila, kwikal zwang, wakad kwikal ni chitil. Yehova udi uwanyidina ni wakad uyimp. Kakutwishap kwend kwikal ni kachijingidij ap kamwing ka uyimp.

Pakwez, antu akwau akutwish kuman anch ata Job win kadingap muntu wakin, komb mambamb minam mawonsu mading ma mu chifanikesh. Pakwez ov, yom yiney yidi yakin? Ma verse makwau ma mu Bibil mamekeshin anch Job wading muntu wakin. Chilakej, mu mukand wa Jakobu 5:7-11, tutaninamu anch Job amusadidin mudi chilakej cha kuyibachik in Kristu ku kujijaman mu yisu yikash ni kuyivurish nakash anch Yehova ukat kufutang kujijaman mudi kwinoku. Ov, usu ik wafanyina kwikal nich chilakej chinech anch Job kadingap muntu wakin ni ap anch kumwoz kwamwozau kudi Satan kwading kwau kwa makasu? Chikwau kand, mu Ezekiel 14:14, 20, Job udi niyend pamwing ni Nowa nenday Daniel pa list wa antu ashinshamena asatu. Mudi Nowa ni Daniel, Job wading muntu wakin, ikundj wa ritiy rikash. Anch Job wading muntu wakin, ov, umenap anch musul wa mar mend, yoziu ni mar yamanay yidi yakin?

Bibil umumekeshin patok Satan mudi muntu wakin wa mu spiritu. Ukutwish kwiyipul anch, ‘Ov, udi ubaj kudi am ni dijuku diam mu mangand minam ma lel?’

OV, CHIDI NCHIK PIUR PA MACHUKU METU?

Tong bil anch chisak cha ambwitan in kujipan chandam kal mu musumb wey. Chimeken patok anch, mwom wey ni wa amutej ney udi mu ubaj. Shinshikin katat mulong usadikina ou: Satan ni ayilembil end—a spiritu akin, mudi Satan, amubwambwila Nzamb—adi katat pa divu. Ov, yibudikin ik yifanyidina kwikalaku? Mwaning, tong bil piur pa yiuteshina mu jinsangu ja kwol kwen ap ja mu jingand jindjing:

  •   Ov, umen mutapu uvulijadina usup, yisal ya chisum, chikalap nchik usu usadinau pa mangand mawonsu mulong wa kuyikangesh?

  • Ov, umen mutapu uvulijadina kwipuwangesh kumekeshina yisal ya aspiritu ayimp, chikalap nchik usu usadinau anvaj avud?

  • Ov, umen mutapu uyila mangand ni kusheshik pakemp pakemp, chikalap nchik usu usadinau mulong wa kumalam?

  • Ov, chimeken patok anch kudi chom kanang chiyipishina antu—usu kanang uyibachikina antu ku mar?

Tal amboku yilondinay Bibil piur pa muntu ukata kuletish kanvundangesh kinak: “Iyazangomb mujim amwopata. Ndiy wading nnak mukur wapilau anch, Sakudimban, ndiy kamu mwin kuyipumbol antu a mangand mawonsu. Amudjibula pa mangand pamwing nau aruu end. . . . Pakwez riyind kudi mangand ni karung, mulong Sakudimban washirik kal wezil kudi en! Ujimen nakash, mulong wij anch chisu chend chashal kal chikemp.” (Kujingunik 12:9, 12) Kupwa kwa kushinshikin yom yiney, antu avud ashikena ku kulond anch Satan udi muntu muyimp wa mu spiritu, ndiy kamu uyibachikina antu atuyingumukinamu.

Ukutwish kwiyipul piur pa mutapu ukutwisha kwichidij. Yom yiney yikutadin ey. Mutu wa mulong ukwau ukupan ukwash wa pakampwil.

^ par. 12 Yehova diawiy dijin dia Nzamb dilejenau mu Bibil.