Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 11 , 2014

Tufanyidin Kwikal Atumbila mu Yaku Yetu Yawonsu

Tufanyidin Kwikal Atumbila mu Yaku Yetu Yawonsu

“Ikalany atumbila mu yaku yen yawonsu.”1 PITA 1:15.

1, 2. (a) Ov, chom ik chitinau Nzamb kudi antu end piur pa yaku yau? (b) Ov, mutu wa mulong winou ukwakul ku yipul ik?

YEHOVA wamupepila kambuy Pita chakwel afunda piur pa kwikal atumbila mudi mufundinau mu In Levi chakwel in Kristu ikala atumbila mu yaku yau yawonsu. (Tang 1 Pita 1:14-16.) Yehova, “Utumbila,” uyitin azizidilau many ni “amikoku akwau” anch asala usu wau wawonsu chakwel ikala atumbila mu yaku yau yawonsu—kulik ching mu yaku yau kanang.Yoh. 10:16.

2 Tushinshikinany yom ya muspiritu yifundinau mu mukand wa In Levi yikweta usey nakash, ni tumanany mutapu ukutwisha yom yiney kutukwash chakwel twikala atumbila mu yaku yetu yawonsu. Tukushinshikin yipul mudi: Ov, mutapu ik tufanyidina kuman yom yiyimp? Ov, chilakej chidia mu mukand wa In Levi chitufundishin ik piur pa kwipan mulong wa ukaleng wa Yehova? Ov, chom ik tukutwisha kwilejin ku kupan milambu?

KWILAM KU YOM YIYIMP

3, 4. (a) Ov, mulong wak in Kristu afanyidin kwipuk kujip yijil ni yany ya mu Bibil? (b) Ov, mulong wak tufanyidinap kwifundakeshin ni kulam ujim?

3 Anch tumusangareshin Yehova, tufanyidin kulam nakash yijil yany ni yend, kulik kusal yom yijondila, kulik kwikal ni mikadil yiyimp yilikishinau. Lel tudiap mwishin mwa Yijil ya Moses,  pakwez yikat kutwinkish manangu ma kwijik yikatinay Nzamb ni yakaday kukat. Chilakej, in Isarel ading akwet chijil chidia anch: “Kangal wez wafundakesh ap kuyilamin akwen rukuny mu muchim wey. Ukumukat mukwen mudi ey amwiney. Am nidi [Yehova].”Lev. 19:18.

4 Yehova kakatiningap anch twifundakeshina, ni ukatining anch twipuka kulam rukuny. (Rom 12:19) Chisu tukata kuvuramen yijil ni yany yitumbila ya Nzamb, Djabul ukat kusangar, ni tukutwish kusadish dijin dia Nzamb masaal. Ap anch muntu watunenganesh, kangal amboku twov ujim ukutwisha kutushikij ku uyimp. Nzamb watwinkisha chisend cha kwikal “manung ma kam” makweta usey mulong wa mudimu wa kulejan rusangu ruwamp. (2 Kor. 4:1, 7) Tufanyidinap kulam yom yiyimp mu muchim yidia mudi ulemb, ap ujim mu jimpas jinej!

5. Ov, chom ik tukutwisha kwilejin ku chilakej cha Aron ni rufu ra anend? (Tal chipich cha kwinsambishil.)

5 Mu In Levi 10:1-11, alejenamu piur pa yom yiyimp yashikena ku dijuku dia Aron. Yehova wamujipa Nadab nenday Abihu an a Aron ku ditand patumay kasu kudiokal mwiur. Chita ritiy mudi ik kudiay Aron ni in mu dijuku diend pa kulik kuyidil anamakwau afa! Ov, ukata kumekesh anch udi utumbila pa kulik kwovijan ni anamakwey adiokala mu difukwil diakin?Tang 1 Korint 5:11.

6, 7. (a) Chisu tukwatina mupak piur pa kuya ku musambu wa uruw usadidinau mu egliz, ov, yom ik tufanyidina kusend ni usey nakash? (Tal mazu ma kwinshin.) (b) Ov, mutapu ik tukutwisha kwambamb ni mwanamakwetu wakad kwikal Kaman pa yitadina kuya mu egliz mulong wa musambu wa uruw?

6 Tukutwishap kusal yom mudi yasalay Aron ni in mu dijuku diend. Pakwez, ov, chom ik tukutwisha kusal anch atutazuk chakwel twandama ni tusala twifukwila pamwing mu egliz chisu cha musambu wa uruw wa mwanamakwetu wakad kwikal Kaman? Kwikil chijil cha mu Bibil chilejena patok anch tufanyidinap kukumangan nau pamwing, pakwez kudi yany ya mu Bibil yilondina pa mulong winou tukutwisha kushinshikin mulong wa kukwat mupak? *

7 Mupak wetu wa kumekesh anch tudi atumbila ku mes ma Yehova pa mulong winou ukumusangareshap mwanamakwetu wakad kwikal Kaman. (1 Pita 4:3, 4) Pakwez, tukat kusal usu wa kulik kuyinenganesh, chad chidi cha manangu kwambamb nau ni kwikepish, pakad rubabek. Pamwing ap chikutwish kwikal chiwamp anch wasal mwamu kurutu kwa chisu. Tukutwish kuyijikitish ni kuyilej anch tukwet musangar mulong wa kututazuk chakwel tweza ku uruw usadikina mu egliz. Chad tukutwish pamwing ap kuyilej anch piur pa yom yikusadika mu relijon wen, tukutwishap kuyisal, pakwez nisotil anch dichuku diau uruw dia dikala diwamp nakash mulong wawawiy ni mulong wa antu akwau akweza. Winou udi mutapu umwing tukutwisha kusal mulong wa kwipuk kujip yitiyij ni ritiy retu.

IPANA MULONG WA UKALENG WA YEHOVA

8. Ov, mutapu ik ulondina mukand wa In Levi piur pa ukaleng wa Yehova?

8 Mukand wa In Levi ulondin nakash piur pa ukaleng wa Yehova. Tutanginamu tupamp 30 ni kusut anch, yijil yidia mu mukand wa In Levi yadiokala kudi Yehova. Moses wading wija chom chinech ni wading kusal ching yadingay Yehova kumulej. (Lev. 8:4, 5) Chilik chimwing, tufanyidin kusal ching yikatay Mwant wetu Yehova kukat anch tusala. Anch twasal mwamu, tumekeshin anch twipanin ku dirijek dia Nzamb. Pakwez kupak kwa ritiy retu kukutwish kwez chisu chitudia ayinetu, ching mudi muyamushikena Yesu padingay mwi mpay. (Luka 4:1-13) Anch tuchingejidin nakash mu ukaleng wa Nzamb, kwikil muntu  ukutwisha kutubachik kusal yom yiyimp ni tukwikalap ni wom.Jinsw. 29:25.

9. Ov, mulong wak ayikisin antu a Nzamb pa mangand mawonsu?

9 Mulong tudi in kwilej a Kristu ni Atuman a Yehova, akat kutupompat pa mangand mawonsu. Chifanyidin kwikal mwamu, mulong Yesu wayileja in kwilejend anch: ‘Akez kukukwatany ni kukupanany mulong wa kukumeshany mar, ni kukujipany. Antu awonsu akez kukukisany mulong wamam.’ (Mat. 24:9) Ap anch atukisin, pakwez tudandamedin kusal mudimu wetu wa kulejan rusangu Want ni kumekesh anch tudi atumbila kurutu kwa Yehova. Ap anch tudi antu atentamina, akweta mashakamin mawamp, ni antu akat kulimish yijil ya ngand, ov, mulong wak atukisin mwamu? (Rom 13:1-7) Mulong tukat kumuziyil Yehova mudi Mukaleng wa pa mangand mawonsu! Tukat kumusadin ching “ndiy kusu” mudimu ni tukatap kujip yijil ni yany yend yitentamina.Mat. 4:10.

10. Ov, chom ik chamushikena mukadivar amwing wiyandjika mu milong ya mangand?

10 Chikwau kand, tudiap “mu umwing nau in mangand.” Chawiy lel, tukatap kwiyandjik mu milong ya njit ja pa mangand ni ya chipolitik. (Tang Yohan 15:18-21; Isay 2:4.) Antu amwing ipana kudi Nzamb akanganya kulik kwiyandjik mu kupwitijan. Avud pakach pa antu inay akarumuka ni achirikina kand urund wau ni Tatukwetu wa riy udia mwiur. (Kus. 51:17) Akemp awiy alika kukarumuk. Chilakej, chisu cha Njit ja II ja pa Mangand mawonsu, antakel a amasalay ayikumangeja anamakwetu 160 a mivu 45 akad kwikal ni mulong, ading mu rukan ra mu Hongrie ni kuyitek mu musumb umwing. Ayinkisha mbil anch andama mu usalay. Akadivar ashinshamena alika, pakwez antu chidivu a pakach pau itiya usalay ni adjala maswin ma amasalay. Kwinyim kwa mivu yaad, amwinkisha muntu umwing wa ku antu apumbuka chisend cha kuyijip atuman ashinshamena. Mwanamakwend umwing wa kumujimbu wading pakach pau! Yom yaswimpa, ni kayijipap.

MWINKA YEHOVA YOM YEY YA USEY

11, 12. Ov, usey ik ukweta yakupesh yitangay Yehova kudi in Isarel wa pasak lel unou kudi in Kristu?

11 Yijil ya Moses yamekeshin patok milambu yafanyinau in Isarel kupan. (Lev. 9:1-4, 15-21) Milambu yafanyina kwikal yitentamina mulong yading chifanikesh cha mulambu uwanyidina wa Yesu. Chikwau kand, in Isarel ading afanyina kulondul yayilejau kusal mulong wa yakupesh kushalijan. Chilakej, shinshikin chadingau kumwit makwend a mwan uvadikina. In Levi 12:6 ulondin ang: “Anch machuku ma kwishitwish kwend mawanyin mulong wavadil mwan ikundj ap mwan mband, ndiy ukez kutwal mwan a mukoku wa muvu umwing kudi mwin kupesh ku chis cha mwinkand wa kukumangen kwikal yakupesh ya kwosh. Ndiy apana iund a kankudimb, ap iyemb kwikal yakupesh ya yitil.” Chijil cha Nzamb chading choviken nawamp, pakwez chading chimekeshin rukat ni kwitek pa ndond ya antu. Anch maku kadingap ni mutapu wa kupan mukoku, wading ufanyidin kupan amaund a twinkudimb aad ap amayemb aad. (Lev. 12:8) Ap anch udi kazwendj, Yehova wading kukat ni kusanger ching mutapu ni wadingay kusal mulong wa antu ading kupan milambu yijim. Ov, chom ik tukutwisha kwilejin pa chinech?

12 Kambuy Paul wayikasikesha akaritiy nend chakwel apana “yakupesh ya kushiman” kudi Nzamb. (Heb. 13:15) Tupanin yakupesh ya kushiman chisu tuyilejina antu akwau piur pa dijin ditumbila dia Yehova. Akadivar ni anambaz atujik a matu ni atumam akat kusadil dizu dia yijingidij mulong wa kumushiman Nzamb. In Kristu akad kutwish kubudik pol akat kumushiman Nzamb pa kufundilijan mikand, kupan uman ku telefon, ni kuyifundish  antu ayilamin ni ezina kuyital. Yakupesh yetu ya kushiman—kumushiman Yehova pa kwijikish dijin diend ni kulejan rusangu ruwamp—tuyisadin kukwatijan ni ukash wa ku mujimbu ni ukaliweny wetu tukweta. Yom yawonsu tupanina yifanyidin ching kwikal yikweta usey nakash kudi etu.Rom 12:1; 2 Tim. 2:15.

13. Ov, mulong wak tufanyidin kupan rapor wetu wa mudimu wa kulejan?

13 Yakupesh yetu ya kushiman yidi yom yitumwinkina Nzamb mulong tumukatin. (Mat. 22:37, 38) Pakwez atwitin mulong wa kupan rapor wetu wa mudimu wa kulejan. Ov, utongining nchik piur pa ditenchik dined? Rapor wetu tukata kupan ngond mwawonsu ukwatijadin ni kwipan twipanina kudi Nzamb. (2 Pita 1:7) Pakwez, chifanyidinap kutong anch, tufanyidin kusutish a saa avud mu mudimu wa kulejan ching mulong wa kupan kau rapor ukweta a saa avud. Anch muntu katwishinap kusal a saa avud mulong uyedin, ukutwish kupan ata minit 15 yikulamau djat ni pakeza kuwanyin saa wakabuj. Yehova ukat kusanger minit yiney ya usey yipaninay mwi kulejan Want winou ni chinech chimekeshin mutapu umukatilay ni mutapu usangaredinay chisend cha kwikal umwing wa ku Atuman End. Ching mudi mwadingau in Isarel ading akad kwikal ni mutapu wa kupan milambu yijim kukwatijan ni mashakamin mau, atushalapol a akad kwikal ni mutapu wa kusal yom yivud akutwish niyawiy kupan rapor wau. Ni rapor wetu ukat kwiwejaku ku marapor mapaninau pa mangand mawonsu, makata kukwash chakwel dirijek dimana mutapu wa kutakel mudimu wa kulejan Want. Diawiy diyingish tukweta disadina anch tupana rapor wetu wa mudimu wa kulejan.

CHAKU CHETU CHA KWILEJ NI YAKUPESH YA KUSHIMAN

14. Rumburil mulong wak tufanyidin kushinshikin pa yaku yetu ya kwilej.

14 Kupwa kwa kwilej malejan ma usey madia mu mukand wa In Levi, ukutwish pamwing ap kwitiy anch, ‘Natesh kal mulong wak mukand winou udi pakach pa mikand yapepilau kudi Nzamb.’ (2 Tim. 3:16) Ukutwish chad kusal usu wawonsu mulong wa kwikal utumbila, kulik anch mulong Yehova ukatil anch wikala utumbila, pakwez mulong usadin usu wey wawonsu chakwel umusangaresha. Pamwing ap yom twileja kal piur pa mukand wa In Levi mu mitu ya milong yaad yiney kukukasikesh rusot rey ra kwilej nakash Bibil mwawonsu. (Tang Jinswir 2:1-5.) Shinshikin piur pa yaku yey ya kulembil chisu cha kwilej. Ufanyidin kusal usu chakwel yakupesh yey ya kushiman yikala yitiyijinau kudi Yehova. Ov, umen anch ma program ma televizion, masengan ma video, kutal ndundu, ap kwiswedish, kukat kukwinkish usweral ni kukukangesh kuya kurutu muspiritu? Anch chid mwamu, chikutwish kwikal chiwamp nakash kutongijokin pa mazu mafunday kambuy Paul mu mukand wa Hebreu.

Ov, asendining kwilej Bibil ni Difukwil dia mu Dijuku nich usey mu mwom wey? (Tal paragraf 14)

15, 16. Ov, mulong wak Paul walonda yom yawonsu patok chisu chayifundinay in Kristu in Hebreu?

15 Paul wading ukwet kashinsh chisu chayifundinay akaritiy in Kristu in Hebreu. (Tang Hebreu 5:7, 11-14.) Kambuy walonda mazu makash mudi ik! Wayileja anch “ujikinany  matu nakash”. Ov, mulong wak Paul walonda mazu makash mwamu? Wamekesha rukat ra Yehova piur pa in Kristu inay ading ni mwom wa mulong wa mayel ma muspiritu. Kwijik mafundish ma pa dishin ma win Kristu kudi kwa usey nakash. Pakwez, “yakudia ya amakurump” yidi ya usey mulong wa kukul kwa muspiritu ni kwikal mwin Kristu uswila.

16 Piur pa kukul ni kushik ku kuyifundish antu akwau, in Hebreu ading akwet kuswir muntu ufanyidina kuyifundish awiy. Ov, mulong wak? Mulong ading kwipuk “yakudia ya amakurump.” Iyipula bil anch: ‘Ov, mutapu ik nikata kuman yakudia ya amakurump ya muspiritu? Ov, nikat kuyitiy? Anch nikweting usweral wa kulembil kurutu kwa kusambish kwilej Bibil? Anch chidi mwamu, ov, mulong ik ukweta yaku yam piur pa kwilej?’ Tufanyidinap kwimen pa ching kuyifundish antu pakwez, tufanyidin kuyikadish in kwilej.Mat. 28:19, 20.

17, 18. (a) Ov, mulong wak tufanyidin kudia yakudia ya amakurump ya mu spiritu chisu chawonsu? (b) Pantaliken ni yikumangan ya win Kristu, ov, chom ik tukutwisha kulond piur pa kuna maar?

17 Kwilej Bibil kuyiswapedilap antu avud a pakach petu. Pakwez, Yehova kayimeshinap antu end mar payitinay anch ileja Bibil. Ap anch tudi atushalapol a Nzamb kwasutin kal makum ma mivu ap anch tuchikwet machuku makemp, tufanyidin kudandamen kudia yakudia ya amakurump ya muspiritu. Kusal mwamu kudi kwa usey anch tukatin kudandamen kwikal atumbila.

18 Mulong wa kwikal atumbila, tufanyidin kushinshikin nakash mifund ni kusal yitwitinay Nzamb. Shinshikin chilakej cha Nadab ni Abihu an a Aron, afa mulong ading kulambul “mu mutapu wakad kuyilej,” pamwing ap kwinyim kwa kuna maar. (Lev. 10:1, 2) Shinshikin yamulejau Aron kudi Nzamb. (Tang In Levi 10:8-11.) Ov, mazu minam mamekeshin anch tufanyidinap kuna maar kurutu kwa kuya mu yikumangan ya win Kristu? Tongijokin bil pa yom yiney: Tudiap mwishin mwa Yijil ya Moses. (Rom 10:4) Mwi ngand yimwing, in Kristu netu akat kuna maar makemp chisu chidilau yakudia kurutu kwa kuya mu yikumangan. Asadina jimpas jinying ja maar chisu cha musambu wa kusut kwa Yehova. Chisu chasalay Yesu chivurikish cha rufu rend kapamp ka kusambish, wayileja in kwilejend chakwel ana maar ma nviny madinga chifanikesh cha mash mend. (Mat. 26:27) Bibil ulikishin kukwachik mar ap kuna mar mavud nakash. (1 Kor. 6:10; 1 Tim. 3:8) Ni mulong wa kom kau, in Kristu avud akutwish kulik kuna maar kurutu kwa kusal mudimu wa Yehova. Pakwez, mashakamin ma mwi ngand yimwing ni yikwau mashalijadin, ni chom cha usey chidi anch mwin Kristu atwisha ‘kwauril yom yitumbila ni yom ya mwamu’ chakwel ikal utumbila ni umusangareshina Nzamb.

19. (a) Ov, mutapu ik tufanyidina kumekesh anch tutekin difukwil dia mu dijuku ni dilejan dia muntu panrend mu manangu metu? (b) Ov, chom ik utongina kusal mulong wa kumekesh anch udi muntu utumbila?

19 Tukutwish kwijik yany yivud anch twakimbijol nakash mu Dizu dia Nzamb. Sadil yom ya kukimbijol nich yidiaku chakwel uwapisha difukwil diey dia mu dijuku ni dilejan diey dia Bibil. Kudish ronganyin rey piur pa Yehova ni pa rutong rend. Shej piswimp nend. (Jak. 4:8) Mulembila Nzamb ching mudi mwasalay nfund a kuseng wawanga anch: “Mburila mes mam chakwel nimana yom yiwamp yishimokish yidia mu yijil yey.” (Kus. 119:18) Kangal wajip yijil ni yany ya mu Bibil. Sadin kwa kwisotin chijil cha Yehova, muntu “utumbila,” ni ikal ni mushiku wa kusal “mudimu wa kurumburil Rusangu Ruwamp rudiokila kudi Nzamb.” (1 Pita 1:15; Rom 15:16) Mekesh anch udi muntu utumbila machuku minam mayimp ma kwisudiel. Muntu mwawonsu pakach petu ikala utumbila mu yaku yend kwipan mulong wa ukaleng wa Nzamb wetu utumbila, Yehova.

^ par. 6 Tal “Yipul ya in Kutang” mu Chinong cha Kalam cha Ndol Mem 15, 2002, mu français.