Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 11 , 2014

 MUTU WA PA CHIBUR | OV, SATAN UDIAKU CHAKIN?

Ov, Tufanyidin Kumov Satan Wom?

Ov, Tufanyidin Kumov Satan Wom?

Chikasiken nakash kumujingunin. Mulong kakwet ulombu ni kakatap kovikan ku didjimb, ukutwish kuyikwat antu pakad awiy kwijik. Pamwingap chikunku cha antu chafila kal mulong wa ulemb udia pa mangand mawonsu afa mulong wa ulemb utazukinau anch: monoxyde de carbone. Pakwez chinech chifanyidinap kutwovish wom. Kudi mutapu ufanyidin kuwijik ni kwilam. Antu avud akat kutek in kuyilam ni yom yikutwisha kuyijikish yom kurutu kwa saa.

Mudi monoxyde de carbone, Satan udi muntu wakad kumekana, chiyikasikedin antu nakash kumujingunin, ni ndiy udi ubaj upandikena. Pakwez Nzamb ukat kutukwash. Ufanyidinap kwey kumov Satan wom anch wasend ni usey yipan ya Nzamb yilondwilaku ey:

Kwikwatin mipak. Jakobu 4:7 utulejin anch: “Rishany nend Sakudimban, chad ndiy ukukuchinany kulemp.” Ap anch Satan ukwet usu, kakutwishap kukubachik chakwel usala yom yiwakad ey kukat. Ukwet usu wa kwitondin yom ya kusal. Mukand wa kusambish wa Pita 5:9 ulondin anch: “Imanany dang mu ritiy, rishany nend [Satan].” Vurik anch, Satan wamusha Yesu kupwa kwendendiy kujijaman ku yoziu yisatu yamwozay nich. (Mateu 4:11) Ukutwish niyey kutond kumujijamen Satan.

Yehova ukat kupan yakudia ya muspiritu mulong wa kukulam ey

Urund ni Nzamb. Jakobu 4:8 utukasikeshin anch ‘Sejany piswimp ni Nzamb.’ Yehova amwinend ukwitin anch uta urund wa piswimp nend. Ov, mutapu ik ukutwisha kusal mwamu? Chom cha usey nakash cheyey kusal chidi kwilej piur pendendiy kusutil ku kwilej Bibil. (Yohan 17:3) Yom yiwilejina piur pa Yehova yikukubachik kumukat, kupwa rikat riner rikukubachik kusal rusot rend. (1 Yohan 5:3) Anch washej piswimp ni Tatukwey wa mwiur, ov, chom ik chikusalay? Jakobu uwejinaku kand anch, ‘Nzamb ukusej piswimp ney.’

Ushidilamu anch ukukulam. Jinswir 18:10 ulondin anch: “Dijin dia [Yehova] didi dipat dikash, ni mwin kutentam ukat kuchinyinamu ni kushakam wakad kwakam.” Chinech chirumburikinap anch dijin dia Nzamb didi mudi mon ukata kumulam muntu. Pakwez, chirumburikin anch antu akata kusadin mu uyakin dijin dia Nzamb akutwish kutazuk mu dijin dined mulong wa kwikal mu diking chisu chawonsu.

 Chilakej chiwamp. Midimu 19:19 utulejin chom chimwing chovikena nawamp piur pa antu ikala in Kristu mu Efes anch: “Antu avud a pakach pau in ulaj akumangeja mikand yau, chad ayosh patok kurutu kwa antu. Awiy achinda usey wa mikand yiney, wading wa nfalang tunan makum matan ja utad wa argent.” * In Kristu inay ajiyisha yom yawonsu yading mu kovijan ni aspiritu ayimp, ap anch yading ya usey nakash. Chilakej chinech chikutwish kutusangaresh lel nakash. Mangand minam mizwil nich ulaj yom ya aspiritu ayimp. Yom ya aspiritu ayimp ni yisal yau yimekena mudi yakad kwikal nich ubaj yikutwish kusal anch muntu ikala mwishin mwa usu wa ayilembil. Chidi cha usey kudjibul yom yiney yawonsu kulemp ni mwom wey, ap anch chikasikena kusal mwamu.Kuvurik Yijil 18:10-12.

Rogelio, ujimbwilau mu mutu wa mulong wa kusambish wa gazet winou, kitiyijap Djabul mu mivu 50 yend ya kwinsambishil. Pakwez washinshikina mutapu wend wa kuman yom. Ov, mulong wak? Rogelio ulondin anch “Kapamp ka kusambish mu mwom wam, natambula Bibil. Ronganyin natambula mu Bibil ranginkisha kashinsh anch Djabul udiaku. Ronganyin riner rikat kwinkwash katat chakwel nilika kwiman anch nidi mwishin mwa yibachikin ya Djabul.”

“Ronganyin natambula mu Bibil ranginkisha kashinsh anch Djabul udiaku. Ronganyin riner rikat kwinkwash katat chakwel nilika kwiman anch nidi mwishin mwa yibachikin ya Djabul”

Ov, usotin kuman dichuku dikezay Satan kulik kwikalaku? Mwaning. Bibil watakela kulond piur pa machuku ma kurutu ma Djabul, muntu wayidimba antu avud, anch akez ‘kamudjibul mu dijiy dia kasu kakata kulabukang nich mayal mapidilau anch soufre.’ (Kujingunik 20:10) Chidi chakin anch, kasu ni soufre yimekena yikutwishap kumumesh muntu wa muspiritu mar. Pakwez, dijiy dia kasu difanyidin kumekesh kujiy kwa chikupu. Satan kakwikalakup kand. Chikwikal chisu cha musangar mudi ik kudi antu amukatina Nzamb!

Katat, dandamen kwilej yawonsu ukutwisha kwilej piur pa Yehova ni jinjil jend. * Tongijokin piur pa mashakamin makwikalaku, chisu tukeza kulond mu uyakin anch: “Satan kadiakupu kand!”

^ par. 8 Anch nfalang jinej jading ja in Rom, muntu wading ufanydin kusal machuku 50 000 ma mudimu wa dichuku diawonsu pa chisu chinicha mulong wa kuman nfalang jinej—machuku mavud nakash!

^ par. 11 Mulong wa jinsangu jivud piur pa Satan ni kwambamb ni ayilembil, tal shapitre wa 10 wa buku Chom ik Chakin Kamu Chifundishinay Bibil? Mutazuka Kaman wa Yehova mwin mwawonsu chakwel akwinkisha buku winou.