Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 11 , 2014

“Katat En Udiany Antu a Nzamb”

“Katat En Udiany Antu a Nzamb”

“Pakur en wadiany antu amwamu, pakwez katat en udiany antu a Nzamb.”1 PITA 2:10.

1, 2. Ov, kuswimp ik kwasadika pa Pentekot 33 C.C., ni anany ikala muchidi usu wa Nzamb? (Tal chipich cha kwinsambishil.)

PA PENTEKOT wa 33 C.C. chom chikash chasadika mu rusangu ra antu a Yehova a pa divu. Kuswimp kukash kwasadika. Pa chisu chinicha, ku ukwash wa mwiku wend, Yehova wasala muchidi usu—Isarel wa muspiritu, “in Isarel a Nzamb.” (Gal. 6:16, TMK) Mulong wa kapamp ka kusambish kudiokal pa chirungu cha Aburaham, antu a Nzamb ading kandikal ayijingunina kusutil ku kuyitwal amakundj ku mukand. Chinyim ni chinech, Paul wafunda piur pa muntu mwawonsu wa mu muchid usu wa Nzamb anch: “mukand wend udi wa mu muchim usadinau kudi Mwiku Utumbila.”Rom 2:29.

2 Antu a kusambish a mu muchid usu ading atwimbuy ni in kwilej a Kristu chitot ni kusut ading akumangena pamwing mu kapalakany ka piur mu Yerusalem. (Mid. 1:12-15) Antu inay awiy azizilau many nich mwiku utumbila, wayikadisha an a Nzamb a muspiritu. (Rom 8:15, 16; 2 Kor. 1:21) Chinech chayinkisha kashinsh anch manswik masu masambish kal kusal, anch Kristu ndiy mwin kusankesh ni anch masambisha kusal kusutil mash mend. (Luka 22:20; tang Hebreu 9:15.) In kwilej inay ikal antu a mu muchid usu wa Yehova, antu end asu. Mwiku utumbila  wayinkisha mutapu wa kulejan mu mazu kushalijan kudi in Yuda ni akamichid eza mu Yerusalem kudokal ku Rom mulong wa kusal Musambu wa in Yuda wa Mbing, ap Pentekot. Antu inay ova ni atesha mwi jindim ja kwol kwau “midimu yijim yasalay Nzamb” yafundishau kudi in Kristu an a Nzamb a muspiritu.Mid. 2:1-11.

MUCHID USU WA NZAMB

3-5. (a) Ov, chom ik chayilejay Pita in Yuda dichuku dia Pentekot? (b) Ov, chom ik chasala anch muchid usu ujimba pa chisu chiwading uchid kwinsambishil?

3 Yehova wamusadila kambuy Pita mulong wa kuyifungwil in Yuda ni akamichid njil chakwel ikal in mu muchid usu wavadika, chikumangen cha win Kristu. Pa dichuku dia Pentekot, Pita nich mushiku wayileja in Yuda anch ading afanyidin kumwitiyij Yesu, ‘wapampinau pa mutond’ mulong ‘Nzamb wamuteka kwikal Nsalejetu ni Kristu.’ Pamwipulau kudi antu anch chom ik chafanyinau kusal, Pita wakula anch: “Chifanyidin muntu ni muntu akarumuk kudiokal ku yitil yend, ni kutambul dibatish mu dijin dia Yesu Kristu chakwel akukulikishinany yitil yen. chad ukez kutambulany Mwiku Utumbila, ndiy kamu upanyinay Nzamb kwa riy.” (Mid. 2:22, 23, 36-38) Dichuku dinidia, antu 3 000 iwejaku ku muchid usu wa in Isarel a muspiritu. (Mid. 2:41) Kupwa, kulejan ni mushiku kwa atwimbuy kwasala anch antu avud ikala in kwilej. (Mid. 6:7) Muchidi usu wajimba.

4 Kupwa, in kwilej a Yesu ashika ni ku Samaria, ni antu avud itiyija. Antu avud atambula dibatish kusutil kudiay Filip, pakwez katambulap kapamp kamwing mwiku utumbila bwat. Chisak chitakedila cha mu Yerusalem chamutuma kambuy Pita ni Yohan kudiau in Samaria, ni “ayanzwoka makas, chad Mwiku utumbila wayishirikina.” (Mid. 8:5, 6, 14-17) Chawiy lel, in Samaria inay ikala kand antu azizidilau many a mu Isarel wa Nzamb.

Pita wamufundisha Korney ni antu a mu chikumbu chend (Tal paragraf 5)

5 Mu muvu wa 36 C.C., Pita amusadila kand mulong wa kuyikasikesh antu andama mu muchid usu wa in Isarel a muspiritu. Chinech chasadika chisu chamufundishau Korney mwant wa amasalay ni in mu dijuku diend ni arund nend. (Mid. 10:22, 24, 34, 35) Bibil ulondin anch: “Pachadingay Pita ni kulond . . . , Mwiku Utumbila wayishirikin antu awonsu ading ni kutesh mazu mend. In Yuda, awiy kamu in kwitiyij eza nend Pita kudiokal ku Yopa, ashimwoka nakash mulong Nzamb wapana chariy chend, ndiy kamu Mwiku Utumbila, kudi antu a michid yikwau.” (Mid. 10:44, 45) Kusambish chisu chinech, akamichid ap antu akad kuya ku mukand ikala ni yau in Isarel a muspiritu.

‘ANTU MULONG WA DIJIN DIEND’

6, 7. Ov, mu mutapu ik mwamekeshau antu a mu muchid usu anch ‘adi antu akweta dijin dia Yehova,’ ni mu chilik ik mwadipalangeshau?

6 Mu chikumangan cha in mu chisak chitakedila cha mu chitot chakusambish cha mivu chasadika mu muvu wa 49 C.C., mwin kwilej Jakobu walonda anch: “Simon waturumburilang mutapu wayivurikau antu a michid yikwau  kudi Nzamb kapamp ka kusambish. Ndiy watondap antu amwing a pakach pau kwikal aend.” (Mid. 15:14) Antu asu adinga atazukinau ku dijin dia Yehova ading afanyina kwikal in Yuda ni akad kwikal in Yuda itiyija. (Rom 11:25, 26a) Kupwa, Pita wafunda anch: “Pakur en wadiany antu amwamu, pakwez katat en udiany antu a Nzamb.” Pita wamekesha mudimu wadingau nich pa kulonda anch: “En udiany muchid watonday Nzamb, udiany chisak cha in kupesh a Mwant Nzamb, udiany muchid utumbila, udiany kand antu a Nzamb a pa kampwil. Ndiy wakutondanya en chakwel ukutwishany kurumburil yisalijok yikwamushena ya Nzamb, ndiy kamu wakutazukanya en kudiokal mu mididim, wandamany mu chimunyik chend chikwamushena.” (1 Pita 2:9, 10) Afanyina kumushiman Mwin dijin diadingau akwet ni kumekesh kujimb kwa dijin dined. Ayikasikesha mulong wa kupan uman piur pa Yehova, Sakatang wa pa mangand mawonsu.

7 Mud muchadinga mulong wa in Isarel a kumujimbu, in Isarel a muspiritu awiy antu atazukay Yehova anch ‘antu anafundisha amwinam chakwel eza anshimana.’ (Isay 43:21) Ading kulond nich mushiku kudi antu awonsu anch Yehova ndiy Nzamb wakin, chad anzamb awonsu adingau antu kwifukwil ading a makasu. (1 Tes. 1:9) Apalangesha uman piur pa Yehova ni Yesu “mu Yerusalem, ni mu Yudeya mwawonsu, ni mu Samaria, djat ni kusudiedila mangand.”Mid. 1:8; Kol. 1:23.

8. Ov, yom ik yayilejay kambuy Paul antu a Nzamb a mu chitot chakusambish cha mivu?

8 Umwing wa ku ‘antu ading atazukinau ku dijin dia Yehova’ wading ukweta mushiku mu chitot chakusambish cha mivu wading Paul. Kurutu kwa in manangu apagan, nich mushiku walonda piur pa ukaleng wa Yehova anch: “Nzamb watanga ngand ni yom yawonsu yidiamu, ndiy Mwant wa diur ni divu.” (Mid. 17:18, 23-25) Piswimp ni kupwish weny wend wa umishoner wa nsudiel, Paul wayileja antu ading atazukinau ku dijin dia Nzamb anch: “Nij anch pinikudiokalaku, antu adia mudi atwingol aswejina akez kwandama mukach mwen, awiy kakez kuyovilap amikoku a Nzamb riy, bwat. Mukach mwa chisak chen mukez kwikal antu amwing akeza kulond yom ya makasu, mulong wa kuyirumbul in kwitiyij chakwel ayikakil ku mutambu wau.” (Mid. 20:29, 30) Wimbwambol watakelau kulond wamekana patok kwinsudiel kwa chitot chakusambish cha mivu.1 Yoh. 2:18, 19.

9. Piur pa ‘antu atazukinau ku dijin dia Yehova,’ ov, chom ik chasadika kwinyim kwa rufu ra atwimbuy?

9 Kwinyim kwa rufu ra atwimbuy, wimbwambol wapandakana ni waleta ma egliz ma Kristendom. Mulong wa kuyiziyish ‘antu ading akweta dijin dia Yehova,’ in Kristu in kupumbok inay adiosha dijin dia Nzamb mu makarumun mau ma Bibil. Itiyija yishankur ya apagan ni alika kumulimish Nzamb kusutil mafundish mau, mwi ‘njit jau jitumbila’ ni mu yisal yau yijondila. Ap mwamu, mu yitot ya mivu, Yehova wading ukweta ching in kumwifukwil pa divu pakwez kadingap ni ditenchik mudi ‘antu akweta dijin diend.’

KWIKALIRILAKU KWA ANTU A NZAMB

10, 11. (a) Ov, chom ik chatakelay Yesu kulond mu chishimu chend cha tidiku ni yinfananfan? (b) Ov, mutapu ik wawanyina chishimu cha Yesu kwinyim kwa muvu wa 1914, ni yibudikin ik yikalaku?

10 Mu chishimu chend piur pa tidiku ni yinfananfan, Yesu watakela kulond piur mididim ya muspiritu yafanyina kwikalaku mulong wa in kupumbok. Walonda anch “Padingau antu alel,” Sakudimban wakusa yinfananfan mu chir chakusay Mwan a muntu mbut. Yawonsu yafanyina kukudin pamwing djat ni ‘kwinsudiel kwa ditenchik dia yom’.  Yesu warumburila anch “mbut jiwamp” awiy ‘an a Want wa Nzamb’ ni anch “yinfananfan” awiy “antu a Sakudimban.” Mu chisu cha kwinsudiel, Mwan a muntu ukuyitum in ‘kwangul’ end, angel, chakwel aurila tidiku ni yinfananfan ya mu chifanikesh. An a Want afanyina kuyikumangej. (Mat. 13:24-30, 36-43) Ov, mutapu ik wasadika chom chinech, ni mu chilik ik mwelay Yehova kwikal ni antu pa divu?

11 ‘Nsudiel ya ditenchik dia yom’ yasambisha mu muvu wa 1914. Chisu chinicha cha njit, tunan twa in Kristu azizidilau many, ‘an a Want wa Nzamb,’ ading mu uswik wa Babilon Mujim. Mu muvu wa 1919, Yehova wayikwola ku uswik, ni kwikala kushalijan pakach pau ni “yinfananfan,” ap in Kristu a makasu. Yehova wayikumangeja ‘an a Want wa Nzamb’ mu dirijek dia antu ditenchikina, mulong wa kuwanyish uprofet wa Isay udia anch: “Ov, nany wamanap kal ap kutesh rusangu ra chom chinech? Ov, muchid wavadikap kal mu dichuku dimwing? Sion kakez kamanap kand mar chisu chilemp wakad kuval muchid.” (Isay 66:8) Sion, diawiy dirijek dia Yehova dia muspiritu didiaku, diavala in Kristu azizidilau many ni dirijek mudiau antu inay.

12. Ov, mutapu ik lel wamekeshau in Kristu azizidilau many anch adi ‘antu atazukinau ku dijin dia Yehova’?

12 Ching mudi in Kristu a kwinsambishil, ‘an a Want wa Nzamb’ azizidilau many ikala atuman a Yehova. (Tang Isay 43:1, 10, 11.) Chawiy lel, afanyina kumekesh kushalijan kwau mu mikadil ya win Kristu ni ku mudimu wau wa kulejan “Rusangu Ruwamp ra Want wa Nzamb . . . [rikala] uman kudi antu a michid yawonsu.” (Mat. 24:14; Fil. 2:15) Pa chinech, akwasha ma miliyon ma antu, chakwel akasikesha urund wau ni Yehova.Tang Daniel 12:3.

“TUSOTIN KUBOMBAKAN NI YEYEY”

13, 14. Mulong wa kumwifukwil Yehova mu mutapu uwanyidina, ov, chom ik chifanyidinau kusal antu akad kwikal in Isarel a muspiritu, ni chom ik chatakelau kulond mu uprofet wa mu Bibil?

13 Twamen mu mutu wa mulong wasutina  ou piur pa in Isarel anch, angendj afanyina niyau kumwifukwil Yehova, pakwez awonsu afanyina kulimish manswik masalay Yehova ni in Isarel. (1 Ant 8:41-43) Chilik chimwing kand ni lel, antu awonsu akad kwikal in Isarel a muspiritu afanyidin kwibomb nau antu a Yehova, ‘an a Want wa Nzamb’—Atuman a Yehova azizidilau many.

14 Kubombakan kwa antu avud kusadikina mu difukwil dia Yehova lel mu machuku ma kwisudiel, atakela kulejan kudi aprofet aad a pasak. Isay wabwaka anch: “Antu avud akez kaya kwinikwa, akez kalond anch: “Ezany tukandamany pa mukandu wa [Yehova] ku Chikumbu cha [Yehova], ndiy kamu Nzamb wa in Isarel. Ndiy ukutulej rusot rend, chad etu tukez kendil mu jinjil jatonday ndiy. Ku Sion kwawiy kukeza kudiokal malejan. Ku Yerusalem kukez kadiokal dizu dia [Yehova].” (Isay 2:2, 3) Muprofet Zakariy watakela kulonda anch: “Antu avud ni michid yikweta usu akez kez ku Yerusalem mulong wa kumwifukwil [Yehova] Mwin Dikand, ni kumwit chiyukish chen.” Uyimekeshin mudi “antu dikum a michid yikwau,” akwatina ku diswin dia mwin Yuda, amulejina anch: “Tusotil kubombakan ni yeyey, mulong tuteshil anch, Nzamb udi ni yeyey.”Zak. 8:20-23.

15. Ov, mu mudimu ik ‘mukatau kuya’ “Amikoku akwau” pamwing ni in Isarel a muspiritu?

15 “Amikoku akwau” ‘akat kuya ni’ in Isarel a muspiritu mu mudimu wa kulejan rusangu ruwamp ra Want wa Nzamb. (Mar. 13:10) Mu mutapu winou akat kwikal antu a Yehova, mu “chisak chimwing” ni azizidilau many, mu umutakel wa “kafung wau umwing,” Yesu Kristu.Tang Yohan 10:14-16.

IKAL MU DIKING PAMWING NI ANTU A NZAMB

16. Ov, chom ik chikezay Yehova kusal pa chikunku cha nsudiel cha ‘mar makash’?

16 Kupwa kwa kushesh Babilon Mujim, akez kuyirish antu a Yehova, ni chisu chinicha tukez kwikal ni kuswir kwa diking dikupanay Yehova mulong wa atushalapol end. Pa chikunku cha nsudiel cha ‘mar makash’ cha kurish kwinoku, Yehova amwinend ukez kutond chisu cha kwimik mar minam. (Mat. 24:21; Ezek. 38:2-4) Chisu chinicha, Gog ukez kayirish ‘akumangejau kudiokal ku michid yikwau,’ antu a Yehova. (Ezek. 38:10-12) Kurish kwinoku kwawiy kukeza kwikal chom chimekeshina anch chisu cha kumushesh Gog ni yisak yend chawanyin kal. Yehova ukez kumekesh ukaleng wend ni kutumbish dijin diend, mulong walonda anch: “Mwamu munikeza kwijikish kujimb kwam ni katumb kam ku michid yawonsu. Chad awiy akez kwijik anch am yam [Yehova].”Ezek. 38:18-23.

Pa chisu cha “mar makash,” tukez kwikal ni kuswir kwa kwikal pamwing ni chikumangen cha ndond yitushicha (Tal paragraf 16-18)

17, 18. (a) Chisu chikezay Gog kuyirish antu a Yehova, ov, chiyul ik chikezau kutambul? (b) Anch tusotil kwikal mu diking dia Yehova, ov, chom ik tufanyidina kusal?

17 Chisu chikeza Gog kusambish kurish, Yehova ukez kuyilej atushalapol end anch: “En, antwam, andamany mu yikumbu yen, wipatilanyamu. Jingamanyaku bil pakemp, ching ujim wasut.” (Isay 26:20) Pa chisu chikash chinicha, Yehova ukez kutwink yiyul yiwamp, ni mu “ujindj” ukez kupan yiyul yiney kusutil ku yikumangen ya kwol kwetu.

18 Mwamu, tukwet kuswir kwa kwikal mu diking dia Yehova chisu cha mar makash, tufanyidin kwitiyij anch Yehova ukwet antu end pa divu, adia mu yikumangen. Tufanyidin kudandamen kwikal pamwing nau, ni kwikal mu urund uwamp ni in mu chikumangen mutudia. Nich muchim wetu wawonsu, tukutwish kwibomb ni nfund a kuseng ni kulond anch: “Dipandish didi kudi Nzamb. Chiyukish chey chikala kudi antwey.”Kus. 3:8.