“Ayuk kwau antu amukweta [Yehova] kwikal Nzamb wau!”KUS. 144:15.

1. Ov, chom ik chikatau antu amwing kutong piur pa antu a Nzamb a pa mangand?

ANTU avud lel akat kutong anch marelijon mawonsu ma pa mangand, ma Kristendom ni makwau makat kusal yom yikemp kwau mulong wa kutaninamu kwa antu. Antu amwing alondining anch marelijon mamwing makat kumusadish Nzamb masaal kusutil ku mafundish ni yisal yau, chawiy lel kakutwishap kutambul dilau dia Nzamb. Pakwez, itiyijin anch kudi antu awamp adia mu marelijon mawonsu ni anch Nzamb ukat kuyiman ni uyitiyijin mudi antu akata kumwifukwil pa mangand. Kamenap kuswir kudiaku piur pa kubudik swa mu marelijon ma makasu mulong wa kumwifukwil Nzamb mu mutapu uwanyidina. Pakwez, ov, winou wawiy mutapu utonginay Nzamb? Tutambulany amboku chakul pa kushinshikin chilondinay Bibil piur pa in kumwifukwil Yehova akin.

ANTU A MANSWIK

2. Ov, pasak anany ikala antu a Yehova, ni chom ik chamekesha kushalijan pakach pau ni antu akwau? (Tal chipich cha kwinsambishil.)

2 Kwisambishil kwa chitot cha mivu cha 20 K.C.C., Yehova wading  ukwet antwend pa divu. Aburaham utazukinau anch “ngakiril wa in kwitiyij awonsu,” ndiy watakela dijuku dijim dia yitot ya atushalapol. (Rom 4:11; Dis. 14:14) Ant a in Kanan ading kumusend mudi ‘chilol mujim’ ni amusenda nich kalimish. (Dis. 21:22; 23:6) Yehova wasuka manswik nenday Aburaham ni anend. (Dis. 17:1, 2, 19) Nzamb wamuleja Aburaham anch: “Manswik mam mawiy am miukeza kulamany, pakach pamam ni yenen, ni a majuku mey makweza kurutu: ikundj mwawonsu wa mukach mwen uwapidil kez kaya ku mukand. . . . Chinech chikez kwikal chijingidij cha manswik cha pakach pamam ni yenen.” (Dis. 17:10, 11) Aburaham ni an amakundj awonsu a mu dijuku diend ayitwala ku mukand. (Dis. 17:24-27) Kuya ku mukand chading chijingidij cha ku mujimb mulong wa kumekesh kushalijan pakach pa an a Aburaham mudi muchid umwing wading mu manswik ma urund ni Yehova.

3. Ov, mutapu ik washikenau an a Aburaham kwikal muchid?

3 Jakobu, ap Isarel mwijikur a Aburaham, wavala ni an 12. (Dis. 35:10, 22b-26) Kupwa, an a shankur Jakobu asala michid 12 ya Isarel. (Mid. 7:8) Mulong wa nzal, Jakobu ni anend aya kushakam mu Idjibit, mwadingay Josef mwan umwing wa Jakobu, wikala mwin kutakel milong ya yom yakudia watekau kud Farao. (Dis. 41:39-41; 42:6) An a Jakobu avulijana nakash, ikala “chisak chijim cha antu.”Dis. 48:4; tang Midimu 7:17.

ANTU AKOLAU

4. Chakusambish, ov, urund ik wadinga pakach pa in Idjibit ni an a Jakobu?

4 An a Jakobu ashakama mu Idjibit piswimp ni yitot yaad ya mivu, mwi ndond yading yitazukinau anch Gosen. (Dis. 45:9, 10) Chimeken patok anch mu chisu kanang ashakama nawamp ni mu chisambu ni in Idjibit, ading ashich mu musumb ni ading kuya kuyidish amikoku au ni kuyilam nawamp. Ayaka nawamp kudi Farao wading umwija, ni umulimishina Josef. (Dis. 47:1-6) In Idjibit ading kuyipipesh nakash antu ading atufung a amikoku. (Dis. 46:31-34) Pakwez, itiya kushakam pamwing ni in Isarel.

5, 6. (a) Ov, mutapu ik waswimpa mashakamin ma antu a Nzamb mu Idjibit? (b) Ov, mutapu ik wapandishau mwom wa Moses, ni chom ik chasalay Yehova mulong wa antwend awonsu?

5 Pakwez mashakamin ma antu a Nzamb maswimpa kapamp kamwing. “Katat kwaswana mwant musu watakela ngand ya Idjibit, wading wakad kumwijik Josef. Ndiy wayileja antwend anch: ‘Talany, in Isarel avul kal nakash kupandakan nich dikand.’ Chawiy awiy ayisadisha in Isarel mudimu ukash. Asansesha mom yau ni midimu yikash, kusamp mavu, ni kubul matafad, ni mitapu yawonsu ya mudimu wa mu yir. Mu midimu yau yawonsu awiy ayinkisha midimu yikash.”Kub. 1:8, 9, 13, 14.

6 Farao walonda anch ajipa mwan ikundj mwawonsu wela kuval in Hebreu. (Kub. 1:15, 16) Chawiy chisu chavadikay Moses. Pawanyishay angond asatu, amujindjika kudi makwend pakach pa matit ku chikum cha wit wa Nil, kwawiy kwamutanau kudi mwan mband wa Farao. Ndiy wamusenda kwikal mwanend. Cha musangar chidi anch, ku wan wend, amulila kudi Jokebed makwend wading muntu ushinshamena, ni Moses wikala kashalapol wakin wa Yehova. (Kub. 2:1-10; Heb. 11:23-25) Yehova ‘watala’ mar ma antu end ni wakwata mupak wa kuyikol ku uswik, ku umutakel wa Moses. (Kub. 2:24, 25; 3:9, 10) Ikwikal muchidi ‘wakolau’ kudi Yehova.Kub. 15:13; tang Kuvurik Yijil 15:15.

ANTU A NZAMB IKALA MUCHID

7, 8. Ov, mutapu ik washikenau antu a Yehova ku kwikal muchid utumbila?

7 Ap anch Yehova wading kandikal  atenchika in Isarel mudi muchid, wading uyisendin mudi antwend. Chawiy lel, amuleja Moses ni Aron anch aya akamuleja Farao anch: “Mwamu mwalonday [Yehova] Nzamb wa in Isarel anch: ‘Yilikaku antwam aya chakwel akansadila musambu mwi mpay.’”Kub. 5:1.

8 Pakwez Farao kitiyap kuyilik in Isarel, chawiy lel, mulong wa kuyikol antu end ku uswik, Yehova wayitumina in Idjibit yipupu ni wamujiyisha Farao ni amasalay end mu mem ma Karung Musuz. (Kub. 15:1-4) Kurutu kwa angond asatu kuwanyin, Yehova wasuka manswik ni in Isarel ku mukandu wa Sinai ni wayinkisha kushilamu kukash kwinoku: “anch en wez waziyilany dizu diam ni kulam manswik mam, en ukez kwikalany amam pakach pa antu awonsu, . . . muchid utumbila kudi am.”Kub. 19:5, 6.

9, 10. (a) Kukwatijan ni Kuvurik Yijil 4:5-8, ov, mutapu ik wayaurilau in Isarel ni antu akwau kudi Chijil? (b) Ov, chom ik chafanyinau in Isarel kusal mulong wa kumekesh anch adi “antu atumbila a [Yehova]”?

9 Padingau mu Idjibit, kurutu kwa kwikalau aswik, in Hebreu ading itenchikin mudi muchid, ading kuyitakel kudi mitu ya majuku, ap a nshankur. Mitu ya majuku yiney, mudi atushalapol a Yehova ading kurutu kwau, asalanga mudi antakel, anzuj, ni in kupesh mulong wa anamakwau. (Dis. 8:20; 18:19; Job 1:4, 5) Pakwez, Yehova wayinkisha in Isarel yijil kusutil kudiay Moses, yijil yading yifanyidina kumekesh kushalijan pakach pau ni antu akwau. (Tang Kuvurik Yijil 4:5-8; Kus. 147:19, 20.) Chijil chinech chateka kwaurik pakach pa in kupesh, ni dirumburish adisalanga kudi “amakurump,” adingau kulimish mulong wa ronganyin ni manangu mau. (Kuv. 25:7, 8) Chijil chayirumburila mutapu ufanyidinau kusal difukwil ni mutapu wa kusadin mwom wau dichuku diawonsu.

10 Kurutu kwa in Isarel kwandam mwi Ngand ya Kushilamu, Yehova wachirikina kand yijil yend mulong wawiy, ni Moses wayileja anch: “[Yehova] niyend washilamu kal ilel unou kudi en anch, en udiany antwend a pa kampwil mudi mwakushilanyayimu kal, chad anch en wez walamany yijil yend yawonsu, Ndiy ukez kukuzambulany. Ukukutekany piur pa michid yawonsu yatangay, mu uyaj, ni mu katumb, ni mu kulim, chakwel wez wikalany antu atumbila a [Yehova].”Kuv. 26:18, 19.

KWIFUKWIL PAMWING NI ANGENDJ

11-13. (a) Ov, anany ibomba pamwing nau antu atonday Nzamb? (b) Ov, chom ik chafanyinay ngendj wipana mu difukwil dia Yehova kusal?

11 Ap anch Yehova watonda muchid pa divu, kalikap anch angendj ashakama pamwing ni in Isarel. Witiya anch “yisak ya mitapu ni mitapu” ya antu akad kwikal in Isarel, kuwejaku ni in Idjibit, yiya pamwing ni in Isarel chisu chayikolay mu Idjibit. (Kub. 12:38) Kusambishil pa chipupu cha sambwad, antu “amwing apakach pa atushalapol a Farao” ova wom mulong wa dizu dia Yehova ni chidi chakin anch antu a mitapu kushalijan ibomba nau in Isarel.Kub. 9:20.

12 Kurutu kwa in Isarel kwauk mem ma Yordan mulong wa kuswan ngand ya Kanan, Moses wayileja anch afanyidin ‘kuyikat angendj’ ading mukach mwau. (Kuv. 10:17-19) Antu atonday Nzamb ayitiyija angendj awonsu ading mukach mwau ni ading kulimish yijil ya pa dishin yapanay Moses. (Lev. 24:22) Angendj amwing ikala in kumwifukwil Yehova, chilakej Rut wa ku Mowab wamuleja Naomi mwin Isarel anch: “Anamakwey akwikal anamakwam, ni Nzamb wey ukwikal Nzamb wam.” (Rut 1:16) Angendj inay ayitazuka anch akamichid, ni amakundj  ayitwala ku mukand. (Kub. 12:48, 49) Yehova wayitiya mudi antu a mu muchid wend watonday.Kuch. 15:14, 15.

In Isarel ading ayikatin angendj ashakama nau (Tal paragraf wa 11-13)

13 Chisu chasalay Solomon malembil kupwa kwa kutung tempel, wayilembidila kand ni angendj ading kumwifukwil Yehova, ni palonday anch: “Palemp mweny umwing wakad wa antwey in Isarel, ukudiokala ngand yilemp, wez mulong wa kujimb kwa dijin diey, ni mulong wa chikas chey cha dikand, ni mulong kand wa chikas chey chonikina. Anch wez ni kulembil mu chikumbu chinech, ey ushicha mwiur, mutesha. Musadila mudi mudia kwilemb kwend chakwel antu awonsu a pa mangand ijik dijin diey, ni kukwov wom mudi mukat kukwovau antwey in Isarel. Mwamu ijik lel kand anch, komb mu chikumbu chinatungila kal chinech akujimbwilamu dijin diey.” (2 Jnsg. 6:32, 33) Padingay Yesu pa divu, muntu mwawonsu wadinga kumwifukwil Yehova wafanyina kwez kwibomb pamwing ni antwend.Yoh. 12:20; Mid. 8:27.

MUCHID WA ATUMAN

14-16. (a) Ov, mu mutapu ik wikalau in Isarel muchid wa atuman a Yehova? (b) Ov, chisend ik chikwetau antu a Yehova a lel chifanyidinau kusal?

14 In Isarel ading kumwifukwil Yehova, Nzamb wau, chisu chadingau padingau antu akwau kuyifukwil anzamb au. Mu machuku ma muprofet Isay, Yehova wafanikesha milong ya pa mangand ni mutapu ukatau kukatul milong ku dirumburish. Ndiy wayishindila anzamb a michid yikwau chakwel anch asala yom yikutwisha kupan uman umekeshina winzamb wau, wayileja anch: “Yikumangeja michid yawonsu yeza ku dirumburish. Ov, nany wa pakach pa akish [anzamb au] ukutwisha kubwak yom ya kurutu? Ov, nany wa pakach pau wabwaka kal yom yimekena katat? Chifanyidin akish inay amekesh atuman, chakwel ashinshik anch, yom yilondilau yidi yakin!’”Isay 43:9.

15 Anzamb a michid akanganya kupan uman wa winzamb wau. Ading atupwany  akad kulondang ni ading akwet kuswir kwa kuyilam. (Isay 46:5-7) Ku mutambu ukwau, Yehova wayileja antu end in Isarel anch: “Udiany atuman am, Nakutondanya kwikal atushalapol am, chakwel ukwingijikany ni kwingitiy, chad ukwijikany anch, yam kusu Nzamb. Kwikiling Nzamb mukwau kudiokal pakur, ni katat, ni chikupu. Yam kamu [Yehova]. Kwikil mukwau ukutwisha kukupandishany en. . . . En udiany atuman am.”Isay 43:10-12.

16 Mu mulong winou wa dirumburish, “ov, nany udia Nzamb Mujim pa mangand mawonsu?,” antu atonday Yehova apana uman umekeshina patok anch Yehova ndiy Nzamb wakin. Yehova wayitazuka antu inay anch: ‘antu anafumba amwinam, chakwel anshimana.’ (Isay 43:21) Antu inay ading antu adinga akweta dijin diend. Mulong Yehova wayikolau mu Idjibit, ading akwet chisend cha kupan uman wa wi Nzamb wend kudi antu akwau a pa mangand. Pakwez, mwikadil wau wading mudi yatakelau kulejan piur pa antu a Nzamb a lel kudiay muprofet Mika: “Antu a michid yawonsu akat kuziyil ni kwifukwil akish au ayinau. Pakwez etu tukez kamuziyil ni kumwifukwil [Yehova] Nzamb wetu chikupu ni chikupu.”Mike 4:5.

IN KUBWAMBWIL

17. Ku mes ma Yehova, mutapu ik wikalau in Isarel ‘mutond wa nviny uvundila wakad usey’?

17 Cha ushon, in Isarel kamekeshap kand ritiy kudiay Yehova Nzamb wau. Alondula yibachikin ya michid yikwau ya kwifukwil anzamb a mitond ni a mayal. Mu chitot cha mivu cha chinan K.C.C., muprofet Ozey wafunda anch: “In Isarel adi mudi mutond wa nviny [uyipina] . . . akat kuwejaku kutung yintamb yikwau ya akish . . . Antu akweta michim ya kudimban, chifanyidin katat kuman mar mulong wa yitil yau.” (Ozey 10:1, 2) Kwinyim kwa mivu chitot ni chikunku, Jeremiy niyend walejana mazu ma Yehova minam kudi muchid wakad kushinshaman anch: “Am nakukuna ey mudi mutond wa nviny udiokila kwi ntit jiwamp. Pakwez katat tal muudia! Udi mutond wa nviny uvundila wakad usey. . . . Ov, akish en usongilanya adi kwisu? Anch en wamanany mar, chifanyidin awiy ez akupandishany . . . Antu am anvuramen kal.”Jer. 2:21, 28, 32.

18, 19. (a) Ov, mutapu ik watakelay Yehova kulond anch ukez kusal muchid usu mulong wa dijin diend? (b) Ov, chom ik tukwileja mu mutu wa mulong ulondwilaku ou?

18 Piur pa kusong mabuj mawamp pa kumwifukwil Yehova mu win yakin ni kwikal atuman end ashinshamena, in Isarel asong mabuj mayimp ma kwifukwil akish. Chawiy chasala anch Yesu ayileja antakel a in Yuda a rubabek a pa chirung chend anch: “Want wa Nzamb akez kaudiosh kudi en, akez kaupan kudi muchid ukata kusong mabuj mau.” (Mat. 21:43) Ching antu a mu “manswik masu,” atakelay Yehova kumulej muprofet wend Jeremiy, awiy afanyidina kwikal muchid usu, in Isarel a muspiritu. Piur pa in Isarel a muspiritu afanyidina kwikal mu manswik masu, Yehova watakela kulond anch: “Am nikez kikal Nzamb wau, niyau akez kikal antwam.”Jer. 31:31-33.

19 Kwinyim kwa in Isarel a kumujimbu kumekesh kuburen kushinshaman, Yehova wayitonda in Isarel a muspiritu mu chitot chakusambish cha mivu, mudi mutukata kulond. Pakwez, anany adia antu inay pa divu lel? Ov, mutapu ik ukutwishau antu a muchim uwamp kujingunin difukwil diakin dia Nzamb? Tukwambambin pa yipul yiney mu mutu wa mulong ulondwilaku au.