“Akadivar, . . . kangal uswakalany kunyikek ku michim yen.”​—2 TES. 2:1, 2, TMK.

1, 2. Mulong wak makasu mapalangen mwamu nlel, ni makutwish kusend mulad ik? (Tal chipich cha kwinsambishil.)

KUDIMBAN, kwiyin, ni wij yiney yawonsu yidi yom yijikena kwawonsu mu ditenchik dined dia yom. Chinech chifanyidinap kutukashimwish. Bibil watakela kulond anch Satan Djabul udi mwin kudimban, ni udi mwant wa mangand minam. (1 Tim. 2:14; 1 Yoh. 5:19) Mutapu utushejina kwinsudiel kwa ditenchik dined diyimp, ujim wa Satan upandaken mulong wij anch “chisu chend chashal kal chikemp.” (Kuj. 12:12) Chawiy lel tukutwish kuchingedin kuvulijan kwa rubabek kudi antu abachikinau kudi Djabul, nakash pantaliken ni antu akasikeshina difukwil diakin.

2 Mazu ma makasu ni makasu ma patok piur pa atushalapol a Yehova ni piur pa yitiyij yau amapalengeshining yisu yimwing mu majurnal ap ku maradio. Mitu ya milong ya jurnal, ma film ni Internet ayisadidin mulong wa kupalangesh yom ya makasu. Mudi chibudikin, akat kuyirumbangesh antu amwing, ni pakad kwijik akat kwitiyij makasu mudi minam.

3. Chom ik chikutwisha kutukwash kukangesh makasu?

3 Mulong wa kukangesh mitapu ya kudimban yiney yiziyishena ya mukankuny netu, tukwet musangar wa kwikal ni Dizu dia Nzamb, diawiy ‘diwanyidina . . . kuyilej nich antu mu kutentam.’ (2 Tim. 3:16) Chidi cha usey kwilejin ku yafunday kambuy Paul anch in Kristu amwing a mu chitot chakusambish cha mivu a mu Tesalonik adimbau, itiya yom ya makasu. Wayikasikesha anch “kangal uswakalany kunyikek ku michim yen.” (2 Tes. 2:1, 2 TMK) Ov, dilejan ik tufanyidina kwilejin ku dibabesh dined dia rukat dia Paul, ni mutapu ik tufanyidina kudisadin kwambatan ni mwikadil wetu?

 YIBABESH PA CHISU CHIWANYIDINA

4. Mutapu ik wayibabeshau in Kristu a mu Tesalonik piur pa kwez kwa ‘dichuku dia Yehova,’ ni mutapu ik utubabeshinau niyetu?

4 Mu mukand wend wa kusambish watumay ku chikumangen cha Tesalonik, Paul wapwitina manangu mau piur pa kwez kwa ‘dichuku dia Yehova.’ Kakimbap anch akadivar nend ikala mu mididim ap akad kwirijek. Pakwez, wayikasikesha mudi ‘an a kutok’ chakwel ‘acha ku mes ni ababala.’ (Tang 1 Tesalonik 5:1-6.) Nlel, tuchingedin kusheshik kwa Babilon Mujim, want wa pa mangand mawonsu wa relijon wa makasu. Chinech chikwikal chijingidij cha disambishil dia dichuku dijim dia Yehova. Chamusangar, mulong twakudishin ronganyin retu piur pa kuwanyin kwa rutong ra Yehova. Chikwau kand, kusutil ku chikumangen, tutambwil yisu yawonsu yivurish pa chisu chiwanyidina yitukwashina kushal ababela. Kufund yivurish yiney yichirikidinau chisu ni chisu kukutwish kukasikesh mupak wetu wa kumusadil Nzamb ‘mudimu utumbila nich chitongijok chiwamp.’​—Rom 12:1.

Mikand yayifandinay Paul in Kristu yaleta yibabesh pa chisu chiwanyidina (Tal paragraf wa 4, 5)

5, 6. (a) Chom ik chayifundinau in Tesalonik kudi Paul mu mukand wend wakaad? (b) Chom ik chikezay Nzamb kusal piswimp ap kusutil kudiay Yesu, ni chom ik tufanyidina kwiyipul?

5 Machuku makemp kupwa kwa kutum mukand wakusambish ku chikumangen cha in Kristu cha Tesalonik, Paul wayitumina kand mukand wakaad. Mu mukand winou wapwitina manangu mau piur pa kwez kwa mar makash pa chisu chikutakelay Mwant Yesu dirumburish dia Nzamb kudi in “kulik kuziyil ku Rusangu Ruwamp.” (2 Tes. 1:6-8) Chawiy lel shapitre wa 2 wa mukand winou ulejen anch antu amwing a mu chikumangen chinicha asambisha “kwakam” piur pa dichuku dia Yehova ni kwitiyij anch diading piswimp. (Tang 2 Tesalonik 2:1, 2.) In Kristu inay a kusambish ading kusu ni ronganyin rikemp piur pa kuwanyin kwa rutong ra Yehova, ap anch Paul washikena ku kuvurik piur pa uprofet winou anch: “Etu twijikidin mu yikunku kusu ni tukat kulejan mu yikunku; pakwez yiwanyidina anch yez, yidia mu yikunku ey yikez kupwa kwau.” (1 Kor. 13:9, 10, TMK) Pakwez mazu mapepidilau mafundau kudiay Paul, kambuy Pita, ni kudi akadivar akwau ashinshamena azizidilau many a pa chirung chinicha mafanyina kukasikesh ritiy rau.

6 Mulong wa kutenchik yom, ku usu wa mwiku utumbila Paul warumburila anch kubwambwil kukash ni “Muyimp” yafanyina kumekan kurutu kwa kwez kwa dichuku  dia Yehova. * Kupwa, pa chisu chinech chiwanyidina, Mwant Yesu ukez ‘kuyishesh shutit’ antu awonsu adimbau. Kambuy walejana mulong wak afanyidina kuyirumburish; mulong ‘alika kwau kukat uyakin.’ (2 Tes. 2:3, 8-10) Chiwapidil kwiyipul anch: ‘Mu chilik ik nikatina uyakin? Ov, Nikwet ronganyin ra katat piur pa yom yifundinau mu ma gazet ni mu mikand yikwau yimedina pa Bibil yipaninau mu chikumangen cha antu a Nzamb pa mangand mawonsu?’

TONDANY ARUND NI MANANGU

7, 8. (a) Ov, Ubaj ik wafanyinau in Kristu a kusambish kurish nich? (b) Ov, Ubaj ik wa pakampwil udiaku nlel unou kudi in Kristu akin?

7 Chakin kamu, in Kristu akez kuman kand ubaj ukwau kupandakanamu ni udiokila kudi in kubwambwil ni ku malejan mau. Paul wamufundina Timote anch “rukat ra nfalang wawiy muj wa mitapu yawonsu yiyimp.” Kambuy wisambina piur pa “antu avud asota kwikal ampich akat kurumbuk mwi njil ya ritiy, abuzikin kal michim yau nich maushon mavud.” (1 Tim. 6:10, TMK) Ni “Yisalijok ya wuntu” yikwikal kand ya ubaj ukash.​—Gal. 5:19-21.

8 Pakwez, ukutwish kusanger mulong wak Paul wayibabesha nakash in Tesalonik piur pa ubaj ukash wa antu inay ni wa akwau atazukau anch “atwimbuy a makasu.” Pakach pau kwading antu ading kulond “yom ya makasu, mulong wa kuyirumburil in kwitiyij chakwel ayikakil ku mutambu wau.” (2 Kor. 11:4, 13; Mid. 20:30) Kupwa Yesu wajikitisha chikumangen cha Efes mulong chalika “kuyilam antu ayimp.” In Efes inay ‘ayipaka’ antu ading adimbina anch adi atwimbuy, ading a makasu. (Kuj. 2:2) Payifundilay in Tesalonik mukand wakaad, Paul wayibabesha anch: “Anamakwetu in Kristu, twakushindilany en mu dijin dia Nsalejetu Yesu Kristu anch, aurikany nau anamakwetu in Kristu awonsu akweta mwom wa usweral.” Kupwa wisambina pakampwil piur pa in Kristu ‘alikina kusal mudimu.’ (2 Tes. 3:6, 10) Pakwez anch antu inay ading mu kanvundangesh, chikwikal nchik piur pa antu ipana mu kubwambuk! Mwaning, urund wa piswimp ni antu inay ayimp wading pakampwil wa ubaj ni afanyina kuwipuk​—ni chidi kand chakin nlel unou.​—Jnsw. 13:20.

9. Mulong wak tufanyidin kwikal ababela anch muntu wasambish kutwandik mu kutadikijan ni kulond nayimp piur pa uyakin?

9 Tudi piswimp ni mar makash ni disudiel dia ditenchik dined dia yom, chawiy lel mazu minam mapepilau mu chitot chakusambish cha mivu makwet kurumburik kujim. Pakwez tusotinap ‘kushadish rutong’ ra ranaken ra Yehova ni kushadish kushilamu kwa mwom wa chikupu, chikala mwiur ap pa divu. (2 Kor. 6:1) Ap anch muntu ukata kukumangan netu wasambish kutwandjik mu kutadikijan piur pa yom yitonginay amwinend ap kulond nayimp piur pa uyakin, tufanyidin kwikal ababela.​—2 Tes. 3:13-15.

‘LAMANY MALEJAN MITWAKULEJANYA’

10. Ov, in Kristu a ku Tesalonik ayikasikesha kwitiyij ku malejan ik?

10 Paul wayikasikesha akadivar nend ading mu Tesalonik anch ‘imanana dang’ ni alamata ku malejan matambulau. (Tang 2 Tesalonik 2:15.) Ov, “malejan” ik matambulau? Kilejap malejan ma relijon wa makasu ap kumakasikesh anch mading ma usey kupandakanamu yafundau mu Bibil.  Pakwez, Paul wisambina piur pa malejan matambulay ndiy ni antu akwau kudiay Yesu, mudi mutapu wayibachikay Nzamb atwimbuy chakwel alejana yom yivud yikala chikunku cha Mukand wa Nzamb wapepilau. Paul wayijikitisha akadivar nend adinga mu chikumangen cha Korint payifundinau anch “yisu yawonsu en ukat kwinvurikany, ulaminany kand malejan minakulejanya.” (1 Kor. 11:2) Malejan minam amatesha kudi antu akin ni afanyina kumitiyij.

11. Mu mutapu ik ukutwishau antu amwing kuwil mu kuziy?

11 Payifundinau in Hebereu, Paul wapwitina yitongijok yau pa mitapu yaad yikutwisha kusal anch mwin Kristu ashadisha ritiy ni akanganya kwiman dang. (Tang Hebereu 2:1; 3:12.) Ndiy wisambina piur pa ‘kupumbuk.’ Pakata waat kusambish kupumbuk, chikatap kumekanang ku mes. Pasutina chisu, ukukashimuk wapwilankal pakach pa wit. Chikwau kand, chabul waushina waat ukutwish kuya kulemp ni chikum kusutil ku mutapu usadidinay musang wend. Yilakej yiney yaad yilejen nawamp mwikadil wa antu akata kuziy, ni kulikidil anch ruchingej rau mu uyakin riziya.

12. Yom ik yisadinau nlel yikutwisha kuyipish mwikadil wetu wa muspiritu?

12 Chinech chayishikena antu amwing adinga mu Tesalonik. Pakwez, chidi nchik nlel unou? Antu avud akat kusutish chisu chau. Tongin bil piur pa mutapu ukatau kusutish asaa avud mu kutal internet, kutang ni kwakul ku ma mesaj, kutalol masengan, ap kusutish chisu chivud mu masengan. Yom yiney yawonsu yikutwish kulet kampuw kudi mwin Kristu ni kuziyish mushiku wend. Ni chibudikin ik? Yikutwish yatukangesh kulembil, kwilej Dizu dia Nzamb, kukumangan, ni kulejan rusangu ruwamp. Chad, chom ik tufanyidina kusal chakwel twipuka kuswakal kunyikek ku michim yetu?

KWILAM PANTALIKEN NI KUNYIKEK KU MICHIM

13. Mudi mwatakelau kulejan, mwikadil ik ukwetau antu avud, ni chom ik chikutwisha kutukwash kukasikesh ritiy retu?

13 Chom chimwing chitufanyidina kusal chidi kwijik chisu ik chitudia ni yibudikin ya kuta urund ni antu alikina kwitiyij anch tudi mu “machuku ma kwisudiel.” Kambuy Pita wafunda piur pa chisu chinech anch: “kukez kumekan in kukudiwolany en, awiy adi antu atekedilau kudi maku mau mayimp ma mujimbu. Chad akez kwipul anch: ‘Ndiy washilamu kuchirik, ov, kimwawiyap? Ov, katat udi kwisu? Kudiokal pafilau angaketu, yom yawonsu yidi kwau mudi muyading kudiokal patangau mangand!’” (2 Pita 3:3, 4) Kutang ni kwilej kwetu kwa Dizu dia Nzamb pichuku-pichuku kukutukwash kushinshikin pisu tudia mu kusut kwa chisu​—pakad kuvuramen anch tudi mu “machuku ma kwisudiel.” Kupumbok kwatakelau kulejan mu uprofet kwamekana kudiosh pasak ni kudandamedin kwikalaku ni nlel. “Muyimp” udandamedin kwikalaku ni kuyipompat atushalapol a Nzamb. Pachinech tuswiridin kucha kumes pashejina piswimp dichuku dia Yehova.​—Sof. 1:7.

Kwirijek nawamp ni kwipan mu mudimu wa kulejan kukutwish kutukwash kwipuk ‘kuswakal kunyikek ku michim yetu’ (Tal paragraf wa 14, 15)

14. Kwipan nakash mu mudimu wa Nzamb kudi diking mutapu ik kudi etu?

14 Yom yashikena yamekesha anch chom cha kusambish kusal chakwel tucha ku mes ni twipuka kunyikek ku muchim chidi kwipan mu kulejan rusangu ruwamp ra Want pakad kujing. Chawiy lel, Yesu Kristu, Mutu wa chikumangen wayileja in kwilejend anch ayikadisha antu a michid yawonsu in kwilej, ayifundisha chakwel alondula yom yilejau, ni kuyilej anch ukez kuyilam in kumulondul end. (Mat. 28:19, 20) Kulondul umutakel wend kutwitin kwipan ni mushiku mu mudimu wa kulejan. Ov, utongin anch akadivar ney a ku Tesalonika ela kusanger piur pa kulejan ni kufundish mu mutapu uwamp, anch mudimu winou ading ausadin pakad  chirungul? Vurik mazu mayilejau kudi Paul anch: “Kangal wamukangeshany Mwiku Utumbila. Kangal wadiulany mazu malondilau aruu a Nzamb.” (1 Tes. 5:19, 20) Udi uprofet wamushena mudi ik twilejina ni tulejena kudi antu akwau!

15. Ov, yom ik ya usey tukutwisha kwilej mu difukwil dia dijuku?

15 Chimeken anch, tusotin kukwash majuku metu chakwel makudisha ukaliweny wau mu mudimu wa chingand. Akadivar ni anambaz avud amana anch mutapu umwing uwanyidina udi kusal anch chikunku chimwing cha mu difukwil diau dia mu dijuku chimanyina nakash pa mudimu wa kulejan. Ukuman anch chidi cha usey kwisambin piur pa mutapu ukutwisha yidi ya dijuku kulondul kusanger kwa antu atanau. Chom ik chikusadika pakezau kuyichirikin antu ambambau nau? Mitu ik ya milong yikeza kudandandamen kuyisangaresh antu endinau? Chisu ik chiwanyidina kuyendin? Antu akwau kand akat kusadin chisu kanang cha difukwil dia mu dijuku mulong wa kutenchik yikumangan chakwel ijika yom yikwilejau ku yikumangan yiney. Ov, ukutwish kusal usu wa kwirijek mulong wa kwakul? Kwakul kwey kukez kukasikesh ritiy rey ni kukukwash chakwel wipuka kunyikek ku muchim wey. (Kus. 35:18) Mwaning, kwipan mu difukwil dia dijuku kukutukwash kwipuk kutongin pa yom ya chamwamu ni kwidjidjek.

16. Ov, in Kristu azizidilau many akwet dikasikesh ik dia kulam manangu mau?

16 Anch twatongin pa mutapu wayukishay Yehova antwend pasak nich kutesh kuwamp kwa uprofet wa Bibil, tukutwish kusanger difut diamushena dituchingedina mu machuku ma kurutu. Azizidilau many akwet ruchingej ra kumulondul Kristu mwiur. Chinech chiyikasikeshin mudi ik kulam manangu mau! Tukutwish chakin kamu kusadin mazu mayifundinay Paul in Tesalonik piur pau anch: “Tufanyidin kumujikitish Nzamb yisu yawonsu mulong wenen, anamakwetu in Kristu, yen antu akatilau kudi Nsalejetu. Nzamb wakutondanya . . . chakwel akupandishilany ku mwiku utumbila ukata kukwishitwishany, ni ku ritiy ren mu uyakin.”​—2 Tes. 2:13.

17. Ov, dikasikesh ik utanina mu mazu madia mu 2 Tesalonik 3:1-5?

17 Antu achingejina kutambul mwom wa chikupu pa divu afanyidin niyawiy kwikasikesh chakwel ipuka kunyikek swaa mu manangu mau. Antu ukweta ruchingej ra kushakam pa divu, alamin mu manangu mau dikasikesh dia rukat diayifundinay Paul ambany nend azizidilau many a mu Tesalonik. (Tang 2 Tesalonik 3:1-5.) Muntu ni muntu pakach petu ufanyidin kusanger nakash piur pa yovil yiney ya rukat. Mwaning, mikand yayifundinau in Tesalonik yiletin yibabesh ya usey nakash piur pa yitongijok ap yipul ya chamwamu. Mulong tusejin kwinsudiel, yiney yidi yibabesh yisangaredinau nakash in Kristu nlel.

^ par. 6 Anch twatang mukand wa Midimu 20:29, 30, Paul walonda anch mu yikumangen ya win Kristu, “antu amwing akez kulond yom ya makasu, mulong wa kuyirumburil in kwitiyij chakwel ayikakil ku mutambu wau.” Rusangu rau rilejen anch pasuta chisu kwikala kushalijan pakach pa antakel a relijon ni in kwitiyij au. Mu chitot cha kasatu cha mivu pa C.C., “Muyimp” wamekana patok mu chisak cha amakurump a Kristendom.​—Tal Chinong cha Kalam, cha Kasan 1, 1990, paj wa 10-14 (Français).