“Nimuchingejin Nzamb.”​—MIKE 7:7.

1. Ov, mulong wak tukutwish kuburen kushimpish muchim?

PASAMBISHA Want wa Mesia kuyikel mu 1914, machuku ma nsudiel ma ditenchik dia Satan masambisha. Mudi chibudikin cha njit jasadika mwiur, Yesu wamudjibula Satan ni Ayilembil end pa mangand. (Tang kujingunik 12:7-9.) Satan wij kamu amwinend anch “chisu chend chashal kal chikemp.” (Kuj. 12:12) Pakwez, “chisu” chinech chashika pasutin kal makum ma mivu, ni antu amwing akutwish kuman anch machuku mansudiel malabin nakash. Pitukata kumuchingel Yehova chakwel asala, ov, twaburedin ayinetu kushimpish muchim?

2. Ov, mutu wa mulong winou ukez kushinshik pa chom ik?

2 Kuburen kushimpish muchim kukutwish kwikal kwa ubaj, mulong kukutwish kutwovish kuyip. Ov, mutapu ik tukutwisha kulam mwikadil wa kuchingel? Mutu wa mulong winou ukutukwash kusal mwamu mu kwakul ku yipul yilondwilaku ey. (1) Chom ik tukutwisha kwilej piur pa kushimpish muchim kusutil ku chilakej chatushilay muprofet Mike? (2) Ov, yinship ik yikeza kumekesh chijingidij cha nsudiel cha chisu chetu cha kuchingel? (3) Mutapu ik tukutwisha kumekesh anch tusangaredin kushimpish muchim kwa Yehova?

OV, CHOM IK TUKUTWISHA KWILEJIN KU CHILAKEJ CHA MIKE?

3. Pa chirung cha Mike, ov, in Isarel ading mu mikadil ik?

3 Tang Mike 7:2-6. Mike muprofet wa Yehova wamana mutapu mwikadil wa muspiritu wasambisha kuyip mu Isarel kushik ni pa chisu wayipa nakash mu umutakel wa Mwant Akaz. Mike wayifanikesha in Isarel akad kushinshaman nich “yinfananfan ya miy.” Mudi mukatau yinfananfan ya miy kumupamp muntu uyidjatila, in Isarel inay  akad kushinshaman ayisala nayimp antu ashakama nau. Uyimp wapandakana mu chilik cha kushiken ku kwauril majuku. Mulong wading wij anch kakutwishap kuswimp yom amwinend, Mike wamuchingejina Yehova. Chawiy lel, wachingela nich kushimpish muchim chakwel Nzamb asala. Mike wading nich kashinsh anch Yehova ukez kusal pa chisu Chend.

4. Ov, yikokujol ik yiturishina nich?

4 Mudi Mike, tudi pakach pa antu akweta choy. Avud adi “akad kujikitishang, akad kulimish yom yitumbila. [Akweta] michim yichinchikina.” (2 Tim. 3:2, 3) Chidi chom chitwovishina kuyimp nakash anch ambay netu a mudimu, ambay a shikol, ni amutej netu amekeshin mwikadil wa choy. Pakwez, antu amwing pakach pa atushalapol a Nzamb, akwet niyawiy yikokujol yimwing yikash. Yesu walonda anch in kumulondul end akez kayipompat kudi in majuku mau, ni wasadila mazu ma chilik chimwing ni mafundau mu Mike 7:6 mulong wa kwisambin piur pa usu ukwikala nich uruu wend. Yesu walonda anch “Am neza ni kuyisarumun an amakundj chakwel ayipompat atatukwau, ni an amband ayipompat amakwau, ni amband a an amakundj ayipompat amakwau a anfumwau. Akankuny ayimp a muntu akez kwikal ching antu a mu dijiku diend.” (Mat. 10:35, 36) Chidi chom chikash mudi kujijamen kutusip ni kutupompat kudi yid ya dijuku yakad kwikal ni akaritiy! Anch yoziy yiney yatushiken, tufanyidinap kuziy mulong wa rupompat ra dijuku. Chawiy lel, tudandamenany kushinshaman ni kumuchingel Yehova nich kushimpish muchim chakwel apwisha milong amwinend. Anch twadandamen kumwit chakwel atukwasha, ndiy ukez kutwinkish usu ni manangu tuswirikedina chakwel tujijamana.

5, 6. Ov, mutapu ik wamuyukishau Mika kudiay Yehova, pakwez yom ik yalikay Mika kupan uman?

5 Yehova wamuyukisha Mike mulong wa kushimpish muchim kwend. Mike walejana piur pa disudiel dia Mwant Akaz ni winyikel wend uyimp. Ndiy wamumana mwanend a Akaz, Mwant muwamp Ezekias, paswanay want ni kuchirish difukwil diakin. Uruu wa dirumburish wa Yehova wapanay kusutil kudi Mike pantaliken ni Samaria wawanyina pakwatau kudi in Asiria want wa kurul wa in Isarel.​—Mike 1:6.

6 Pakwez, Mike kapanap uman wa kuwanyin kwa yom yawonsu yamulejau kudiay Yehova anch abwaka. Chilakej, Mike wafunda anch: “Mu machuku makeza kez, mukandu padia Chikumbu cha [Yehova] ukez kalep kupandakan mikandu ni yinanginang yawonsu. Chawiy michid yivud yikez kayang kwinikwa. Antu avud akez kaya kwinikwa, akez kalond anch: ‘Ezany tukandamany pa mukandu wa [Yehova].’” (Mike 4:1, 2) Mike wafa kurutu kwa kuwanyin kwa uprofet winou. Ap mwamu, ndiy wadandamena kwikal ushinshamena kudiay Yehova djat ni ku rufu rend, chikalap nchik yadingau ni kusal antu a pa chirung chend. Pa chinech, Mike wafunda anch: “Antu a michid yawonsu akat kuziyil ni kwifukwil akish au ayinau. Pakwez etu tukez kamuziyil ni kumwifukwil [Yehova] Nzamb wetu chikupu ni chikupu.” (Mike 4:5) Mike watwisha kuchingel nich kushimpish muchim mu chirung cha mar mulong wading ni ruchingej rikash anch Yehova ukez kuwanyish kushilamu Kwend kwawonsu. Muprofet ushinshamena wamuchingejina Yehova.

7, 8. (a) Ov, mulong wak tufanyidin kwikal ni ruchingej? (b) Ov, chom ik chikeza kusal anch chisu chisuta swaa?

7 Ov, tukwet ruchingej ra chilik chimwing mudiay Yehova? Tukwet diyingish diwamp dia kwikal ni ruchingej riner. Tumen ni mes metu kuwanyin kwa uprofet wa Mike. Mu ‘machuku mansudiel,’ mamiliyon ma antu a michid, ni jindim jawonsu eza pa “mukandu padia Chikumbu cha [Yehova].” Ap anch adiokala ku michid yipwitijadina, in kwifukwil inay ashikena ku kuchil “mirumbu yau jimpak yikal jimpak ja kukatul nich yakwangul,” ni alikin ‘kwilej kand kurish njit.’ (Mike 4:3) Chidi chisend mud ik tukweta cha kwikal pakach pa antu a chisambu a Yehova!

 8 Chimeken anch, tusotin anch Yehova aleta disudiel ku ditenchik dined diyimp dia yom. Anch tufanyidin kuchingel nich kushimpish muchim, pakwez, tufanyidin kuman yom mudi muyimenay Yehova. Ndiy watekin chisu chikezay kuyirumburish antu “ku chikas cha muntu watonday kal” Yesu Kristu. (Mid. 17:31) Kurutu kwa kusal mwamu, Nzamb wayinkishin antu awonsu chisu cha “kwijik uyakin,” kusal yom kukwatijan nich ronganyin riner, chakwel apanda. Mwom wa antu udi mu chak. (Tang 1 Timote 2:3, 4.) Anch twipan nakash mu kuyikwash antu akwau chakwel ijika uyakin piur pa Nzamb, chisu chishadina kurutu kwa kwez kwa dirumburish dia Yehova chikez kusut swaa. Piswimp ap​—ap kapamp kamwing​—chisu chikez kusut swaa. Pakeza kushik dirumburish dined, tukez kusangar nakash mud ik mulong twipana nakash mu mudimu wa kulejan wa Want!

OV, YOM IK YIMEKESHINA DISUDIEL DIA KUCHINGEL KWETU?

9-11. Ov, yafundau mu 1 Tesalonik 5:3 yawanyina? Rumburil.

9 Tang 1 Tesalonik 5:1-3. Piswimp ap mu machuku ma kurutu, michid yikez kulond anch “Tukwet chisambu ni kwikang” Anch tusotinap atukashimwisha kudi mazu minam, tufanyidin “kuchish ku mes ni kubabal.” (1 Tes. 5:6) Chakwel twikala achila ku mes muspirutu, tushinshikinany mu wiswimp yinship yikeza kuyitwal antu ku kulond mwamu.

10 Mu yom yashikena kupwa kwa jinjit jawonsu jaad ja mangand mawonsu, michid yalonda anch yikwet chisambu. Kupwa kwa njit ja kusambish ja mangand mawonsu, asala Société des Nations nich ruchingej ra kutek chisambu. Kupwa kwa njit ja kaad ja mangand mawonsu, Nations unies wikala ruchingej ra antu avud mulong wa kulet chisambu pa divu. Antakel a winyikel ni a relijon achingejina pa yirijek yiney mulong wa kulet mikadil ya chisambu pa mangand. Chilakej, mu 1986, Nations unies walonda piur pa muvu winou anch udi muvu wa chisambu pa mangand mawonsu (Année internationale de la paix). Muvu winiwa, antakel a michid ni a marelijon avud aya kudi mukurump wa Egliz Katolik udia mu Italie, mu ul wa Assise, chakwel alembila mulong wa chisambu.

 11 Pakwez, chidiap kulond piur pa chisambu ni diking ap mazu makwau ma chilik chimwing mawanyisha uprofet wafundau mu 1 Tesalonik 5:3. Mulong wak chadingap mwamu? Mulong “kusheshik [kwa] kuyikashimwish” kwatakelau kulejan kwashikenap.

12. Ov, chom ik twija piur pa kulond anch “Tukwet chisambu ni kwikang”?

12 Ov, nany ukeza kulond mazu minam ma usey mu machuku ma kurutu anch “Tukwet chisambu ni kwikang”? Ov, mudimu ik ukezau kusal antakel a Kristendom ni a marelijon makwau? Mutapu ik ukezau antakel a winyikel kushalijan kulond niyawiy mazu minam? Bibil katulejinap chom. Chitwija chidi anch chikalap nchik mazu minam ap mutapu makeza kwovikan, makwikal kwau ma kukan kusu. Ditenchik dined dikur dikez kwikal ching kusu mu umutakel wa Satan. Divundin mukach ni dikez kushal kwau mwamu. Chikwikal cha ushon mud ik anch muntu ni muntu pakach petu witiyij ku makasu ma satan ni walik kulondul chijil cha win Kristu cha kulik kwiyandjik mu milong ya mangand!

13. Ov, mulong wak angel akez kulikishaku rinkind wa disheshik?

13 Tang Kujingunik 7:1-4. Pituchingejina kuwanyin kwa 1 Tesalonik 5:3, angel a usu nakash akat kukangesh rinkind muyimp wa mar makash. Ov, chom ik chichingedinau? Chinship chimwing cha usey achilejen kudi kambuy Yohan​—kutek chijingidij kwa nsudiel pa jimpal ja “atushalapol [azizidilau many] a Nzamb wetu.” * Kupwa kwa kuyitek awonsu chijingidij, angel akez kulikishaku rinkind wa disheshik. Chom ik chikeza kashiken chad?

14. Ov, chom ik chimekeshina anch kujiy kwa Babilon Mujim kudi piswimp ap?

14 Babilon Mujim, want wa pa mangand mawonsu wa relijon wa makasu, ukez kushiken kwinsudiel. ‘Antu, ni yisak, ni michid, ni jindim’ akezap kutwish kumukwash chakwel apanda. Twamen kal yom yimekeshina anch kujiy kwend kudi piswimp. (Kuj. 16:12; 17:15-18; 18:7, 8, 21) Chawiy lel, kuburen ukwash winou kumeken nlel unou mu jinsangu, mulondinau nayimp piur pa relijon ni antakel au. Ap mwamu, antakel a Babilon Mujim amen anch kadiap kwau mu ubaj wakin kamu. Kwinoku kudi kwidimb nakash mudi ik! Kupwa kwa kulond anch “Tukwet chisambu ni kwikang” yirijek ya chipolitik ya ditenchik dia Satan yikez kumukarumukin relijon wa makasu kapamp kamwing ni kumujiyish. Babilong Mujim kakezap kumekan kand ku mes! Chidi chom chiwamp chakin kamu kuchingel nich kushimpish muchim yinship yiney yikeza kushiken mu chisu chikemp.​—Kuj. 18:8, 10.

MUTAPU IK TUKUTWISHA KUSANGER MULONG WA KUSHIMPISH MUCHIM KWA NZAMB?

15. Ov, mulong wak Yehova kasalap yom swaa?

15 Chikalap nchik masaal matekau antu pa dijin diend, Yehova wachingela nich kushimpish muchim chisu chiwamp cha kusal. Yehova kasotinap anch antu awonsu a kashinsh asheshika. (2 Pita 3:9, 10) Ov, umen yom mudi muyimenay ndiy? Kurutu kwa kushik kwa dichuku dia Yehova, tukutwish kumekesh kusanger kwetu mu kushimpish kwend kwa muchim mu mitapu yilondwilaku ey.

16, 17. (a) Ov, mulong wak tufanyidin kuyikwash antu ikadina kal akad kusal? (b) Ov, mulong wak chidi cha usey kudi antu akad kusal amuchirikina Yehova?

16 Kuyikwash antu akad kusal. Yesu walonda anch kukez kwikal musangar mwiur anch mukoku umwing washadika wamekan. (Mat. 18:14; Luka 15:3-7) Chakin kamu, Yehova uyibangidin nakash antu awonsu amekesha rukat pantaliken ni dijin diend, ap anch kamusadilap ndiy nlel unou. Pitukata kumukwash muntu winou chakwel achirika mu chikumangen, tumusangareshin Yehova ni angel end.

17 Ov, udi pakach pa antu ipanina nakash mu kumusadil Nzamb? Muntu umwing wa mu chikumangen ukutwish wakurumbukin  ni kukushikish ku kukatul urund ni dirijek dia Yehova. Mulong pasutin kal chisu, iyipula amwiney anch: ‘Ov, katat mwom wam udi wa usey nakash, ni nikwet kamu musangar? Ov, Yehova ndiy wanrumbukina bil anch muntu wakad kuwanyin? Ov, Yehova Nzamb ndiy wansala uyimp?’ Chakin kamu, ndiy udandamedining kutusadil uwamp. Ap anch tukat kurumbukang ndiy ukat kutulikidil chakwel tusangera yom yiwamp yiletinay. (Jak. 1:16, 17) Piswimp ap, dichuku dia Yehova diezin. Katat chidi chisu cha kuchirikin mu makas ma tatukwetu wa rukat wa mwiur ni ku chikumangen​—yawiy kusu ndond yimwing ya diking mu machuku minam mansudiel.​—Kuv. 33:27; Heb. 10:24, 25.

Antu a Yehova asadil usu wau wawonsu mulong wa kuyikwash antu akad kusal chakwel amuchirikina Yehova (Tal paragraf wa 16, 17)

18. Ov, mutapu ik tufanyidin kuyikwash antu atakedila?

18 Kuyikwash nich kushinshaman antu atakedila. Mudi Kafung wa rukat, Yehova ututakedil ni kutulam. Ndiy wamuteka Mwanend mudi Mwant wa amikoku. (1 Pita 5:4) Amakurump adia mu yikumangen 100 000 ni kusut akat kuyilam amikoku a Nzamb muntu ni muntu panrend. (Mid. 20:28) Pituyikwashina mu mutapu ushinshamena antu atakedila, tumekeshin kusanger kwetu pantaliken ni Yehova ni Yesu mulong wa yom yawonsu yasalau mulong wetwetu.

19. Mutapu ik tufanyidina kudandamen kwikal mu chisak?

19 Kusej piswimp umwing ni mukwau. Ov, chinech chirumburikin ik? Anch chisak cha amasalay chija nawamp kwas njit asambish kuchipompat kudi mukankuny, amasalay awonsu adia mu chisak chinech akusej umwing ni mukwau piswimp. Mwamu akutwish kwikal mudi dinguj dikasikena nakash. Satan ukat kupandikesh rupompat rend pantaliken ni antu a Nzamb. Katat chidiap chisu cha kudiokal mu chisak chetu. Chidi chisu cha kusej kudi umwing ni mukwau, mulong wa kupandakan kuburen kuwanyin kwa antu akwau, ni kumekesh ruchingej mu umutakel wa Yehova.

Chinech chawiy chisu chitufanyidina kushakam mu chisak mulong wa kurish nenday Satan ni ayilembil end (Tal paragraf wa 19)

20. Ov, chom ik tufanyidina kusal katat?

20 Twikalany amboku achila ku mes etu awonsu ni amekeshina mwikadil wa kuchingel. Tuchingelany amboku ni kushimpish muchim pakezau kulond anch “Tukwet chisambu ni kwikang” ni pakeza kusadik kutek kwa nsudiel kwa chijingidij pa jimpal ja antu atondau. Kupwa, angel anying akez kalikishaku rinkind ra disheshik, ni Babilon Mujim akez kumujiyish. Pituchingedina kushik kwa yinship yiney yikash, twitiyijany amboku umutakel wa antu atakedila dirijek dia Yehova. Twikalany amboku mu chisak mulong wa kurish ni Djabul ni ayilembil end! Chinech chawiy chisu cha kutesh kubabesh kwa nfund-a-kuseng walonda anch: “Kasikeshany, ni michim yen yijijamana, en awonsu uchingejilany kudi [Yehova].”​—Kus. 31:25.

^ par. 13 Mulong wa kwisambin piur pa kushalijan kudia pakach pa kutek chijingidij kwa kusambish ni kwa nsudiel pa jimpal ja yid ya azizidilau many, tal Chinong cha Kalam cha Chiwong 1, 2007, pa paj wa 30-31.