“Kristu amwinend wamana mar mulong wa kukwambatany en. Ndiy wakushilanya chilikej chakwel ulondulany yom yasalay.”​—1 PITA 2:21.

1, 2. (a) Chom ik chikata kushiken anch amikoku kayilaminap nawamp? (b) Mulong wak antu avud pa chirung cha Yesu ading mudi amikoku akad kafung?

AMIKOKU akat kuvulijan anch kafung wawanyish nawamp yisakin ya chisak chend. Kukwatijan ni buku umwing wisambidina piur pa kulam amikoku, “muntu uyipitina amikoku mulong wa kuyidish kusu pakad kuyibangin ap kuyitongin kapamp kamwing ukez kwikal ni amikoku avud ayedina ni akad usey mu mivu yikemp.” Pakwez, anch amikoku ayilamin nawamp akez kwikal ni ukash wa mujimbu.

2 Mutapu uyilaminau ni kuyibangin amikoku a Nzamb kudi atufung usadin anch amikoku muntu ni muntu ayichingejina atulam ni yiney yikwikal ni usu pa ukash wa muspiritu wa chikumangen chawonsu. Ukutwish kuvurik anch Yesu wayovila yisak ya antu riy mulong “awiy ading aziyil ni kujilijil mudi amikoku akad kafung.” (Mat. 9:36) Ov, mulong wak ading mu mwikadil winou uyimp? Mulong antu adinga ni chisend cha kuyilej antu Chijil cha Nzamb ading akad riy, in kuyitekin yijil yikash, ni in rubabek. Pa ndond pa kukwash ni kudish yid ya chisak chau cha amikoku, antakel amuspiritu a in Isarel ayitwika “yisend yilimina” pa makij.​—Mat. 23:4.

3. Chom ik chifanyidinau amakurump kwijik pakatau kuwanyish mudimu wau wa atufung a muspiritu?

3 Lel unou atulam in Kristu​—atondau kwikal amakurump—​akwet chisend chimwing cha pakampwil. Amikoku adia mu chisak adi mu chikas cha Yehova ni cha Yesu, wimekesha amwinend kwikal “kafung muwamp.” (Yoh. 10:11) Amikoku inay ‘ayilanda nich usey ukash’ wafutay Yesu nich “mash [mend] . . . makweta usey ukash.” (1 Kor. 6:20; 1 Pita 1:18, 19) Wakata amikoku nakash chawiy chamushikija ku kupan mwom wend kwa kwisotil mulong wau. Amakurump afanyidin kuvurikang chisu  chawonsu anch adi atufung ankwash, atakedilau kudi Yesu Kristu, mwan a Nzamb ukweta rukat, “kafung mujim wa amikoku.”​—Heb. 13:20.

4. Chom ik chikwisambinau mu mutu wa mulong winou?

4 Mutapu ik, ufanyidinau komb atufung in Kristu kushakam ni amikoku? Ayikasikeshin yidi ya chikumangen anch ‘aziyila ni kwikepish kudi in kutakel au’. Chikwau kand, amakurump in Kristu ayitin anch kafanyidinap ‘kwikal mudi ant piur pau.’ (Heb. 13:17; tang 1 Pita 5:2, 3, TMK.) Mutapu ik ukutwishau amakurump atekau kutakel kwikal mudi ant piur pa chisak cha amikoku? Mu mazu makwau, mutapu ik ukutwishau amakurump kuwanyish maswir ma amikoku pakad kapandikesh ulabu wayinkishau kudi Nzamb mulong wa kutakel?

“UKEZ KASEND AN A AMIKOKU MWI NKOND YEND”

5. Chom ik chilejenau mu mazu ma muchifanikesh madia mu Isay 40:11 piur pa Yehova?

5 Piur pa Yehova, muprofet Isay walonda anch: “Ndiy ukulam yivam yend mudi kafung. Ukez kasend an a amikoku mwi nkond yend. Ukez kayendish pakemp amaku akweta an akata kwamu.” (Isay 40:11) Mazu minam ma muchifanikesh mamekeshin chitongijok chakwel anch Yehova ubangidining maswir ma antu aziyina ni akad diking a mu chikumangen. Mudi mukata kafung kubangin nakash maswir ma pakampwil ma mukoku ni mukoku udia mu chisak chend ni udia tayad kuyikwash, Yehova ubangidining maswir ma antu adia mu chikumangen ni ukweting musangar wa kuyilam. Mudi mukatay kafung kulam mwan a mukoku uvadikina mu mavav ma chidjal chend anch chitwishikin, Yehova​—“Tatuku wa riy”—​ukutulam mu yisu yikash. Ukez kutukasikesh pitudia mu yoziu yikash ap pitudia ni kuswir kukash.​—2 Kor. 1:3, 4

6. Mudi kafung mwin Kristu, ov, mutapu ik ukutwishay mukurump kulondul chilakej cha Yehova?

6 Malejan mawamp mudi ik ma pakampwil mafanyidinau atufung in Kristu kwilejin kusutil kudi Tatukwetu wa mwiur! Mudi Yehova, afanyidin kushinshikin nawamp pa maswir ma amikoku. Anch wij yikokujol yirishinau nich ni kuswir kwa pakampwil kusotinau kutambul swaa, mukurump ukukwat mupak wa kuyinkish dikasikesh diwanyidina ni kuyikwash. (Jinsw. 27:23) Chakin kamu, mukurump ufanyidin kwambamb nawamp ni ambay nend akaritiy. Palimishinau mbil yau ya kwikal ni yom ya ujindj, ndiy ukat kushinshikin pa yom yimenay ni yiteshinay mu chikumangen ni, nich rukat ukat kwitekin chisu cha “kuyikwash aburedina.”​—Mid. 20:35; 1 Tes. 4:11.

7. (a) Mutapu ik wadingau kuyilam amikoku a Nzamb pa chirung cha Ezekiel nenday Jeremiy? (b) Ov, chom ik twilejidina piur pa mutapu wayifishay nish Yehova atufung a muspiritu akad kushinshaman?

7 Shinshikin mwikadil wa atufung afishau nich kudi Nzamb. Pa chirung cha Ezekiel nenday Jeremiy, Yehova wayimekesha patok antu afanyidina kulam amikoku end pakwez kayilamap nawamp. Anch kwadingap muntu wa kuyilam amikoku, chisak cha amikoku ela kuchishesh ni kuchipalangesh. Pa ndond pa kuyidish amikoku, atufung inay ading akat kuyimesh mar ni ‘kuwanyish kuswir kwau ayinau.’ (Ezek. 34:7-10; Jer. 23:1) Kufish nich kwa Nzamb kudi atufung inay kuyiwanyidin kand antakel a Kristendom. Pakwez, chinech chimekeshin kand mutapu chidia cha usey kudi amakurump in Kristu kuyibangin nawamp ni kwa rukat amikoku a Yehova.

“AM NAKWINKISHANY KAL CHILIK”

8. Mutapu ik washay Yesu chilakej chiwamp patenchikay mikadil yiyimp ya atushalapol end?

8 Mulong wa kuburen kuwanyin kwa antu, amikoku amwing a Nzamb akutwish kwikal ni chikak pa kutesh chiyitinau kudi  Yehova. Akutwish kukangany kusal yom yikwatijadina ni chiyul chidia mu Mukand wa Nzamb, ap akutwish kusal mu chilik chimekeshina anch kandikal apama muspiritu. Mutapu ik ufanyidinau amakurump kwakul? Afanyidin kwimburij kushimpish muchim kwa Yesu ni kwa in Kwilejend, padingau akwatiken nich chipul cha kwel anch nany pakach pau wafanyina kwikal mujim mu Want. Pa ndond pa kushadish kushimpish muchim pantaliken ni awiy, Yesu wadadamena kuyifundish in kwilejend ni kuyinkish chiyul cha rukat piur pa kumekesh kwikepish. (Luka 9:46-48; 22:24-27) Payowishay ku mend yau, Yesu wapana chilakej cha kwikepish, mwikadil ufanyidinau amakurump in Kristu kumekesh.​—Tang Yohan 13:12-15; 1 Pita 2:21.

9. Yesu wayiyula in kwilejend chakwel ikala ni mwikadil ik?

9 Mutapu wamanay Yesu mudimu wa muspiritu wa kafung, ushalijadin ni yamekeshay Yakobu nenday Yohan. Atwimbuy inay aad asota kwikal pa ndond ya katumb mu Want. Pakwez Yesu wayiyula piur pa mwikadil wau, palonday anch: “En wijany kal in kutakel au antu a michid yikwau akat kwizambwish, chad antau ajim akat kuyiyikel ku ulabu. Pakwez kichifanyidinap kwikal mwamu pakach pen. Anch muntu umwing wa pakach pen usotil kwikal muntu mujim kukupandakananyamu en awonsu, chifanyidin ndiy kwikal kashalapol wen.” (Mat. 20:25, 26) Atwimbuy afanyidina kwipuk kwikal ni chitongijok cha kusot “kwizambwish” kurutu kwa ambay nau akaritiy ap kurutu kwa ‘antu akwau ayombinamu.’

10. Mutapu ik usotinay Yesu anch amakurump ashakama ni chisak cha amikoku, chilakej ik chashay Paul pa mulong winou?

10 Yesu uchingejin anch amakurump in Kristu ayilama amikoku chilik chimwing ni mutapu wayilamay ndiy. Afanyidin kwikal nich kuswir kwa kusal mudi atushalapol a ambay nau, ni kwipuk kwikal mud ant piur pau. Kambuy Paul wadinga ni mwikadil wa kwikwepish, mulong wayileja amakurump a mu chikumangen cha Efes anch: “En wijany mutapu unashakama ni yenen chisu chawonsu, kudiokal dichuku dia kusambish dinashika mwi ngand ya Aziy. Am, kashalapol wa Nsalejetu, nasala mudimu nich kwitudish.” Kambuy wasota anch amakurump inay ayikwasha antu akwau ni kwitudish. Walonda anch: “Nakulejanya mitapu yawonsu chifanyidin kusal midimu yikash mudi munasala am, mulong wa kuyikwash aburedina.” (Mid. 20:18, 19, 35) Paul wayileja in Korint anch kasotap kuyikel piur pa ritiy rau. Pakwez, wading mbay nau wa mudimu witudishina mulong wa musangar wau. (2 Kor. 1:24) Paul wayishila amakurump a nlel chilakej chimwing chiwamp nakash cha kwikepish ni cha kusal mudimu ukash.

‘KULAMAT DANG KU RUSANGU RAKIN’

11, 12. Mutapu ik ukutwishay mukurump kumukwash mbay nend mukaritiy kukwat mupak?

11 Mukurump wa chikumangen ufanyidin “kulamat dang ku rusangu rakin mudi mwamulejau.” (Titus 1:9) Pakwez ukusal mwamu ni “muchim wa kwitudish.” (Gal. 6:1) Pa ndond pa kuyishindil ambay nend adia mu chikumangen chakwel asala chom kanang, kafung muwamp wa muspiritu ufanyidin kuyilej mu mutapu uyishikina ku michim yau. Mukurump ukutwish kukasikesh piur pa yany ya Bibil yifanyidinay mukadivar kushinshikin pafanyidinay kukwat mupak wa usey. Ndiy ukutwish kushinshikin nend pa yom yafundau pa mulong winou. Ukutwish kand kuyikasikesh antu chakwel ashinshikina yaku kushalijan yikutwisha kwikal ni usu pa urund wend ni Yehova. Amakurump akutwish kukasikesh usey wa kukimb umutakel wa Nzamb mu malembil kurutu kwa kukwat mupak. (Jinsw. 3:5, 6) Kupwa kwa kwisambin pa mulong winou pamwing ni ambay akaritiy, mukurump ukutwish kumusha chakwel akwata mupak wend amwinend.​—Rom 14:1-4.

12 Ulabu umwing kusu ukwetau atulam  in Kristu udiokil mu Bibil. Chikwau kand, chidi cha usey kusadil Bibil nich ukaliweny ni kwitiyij yilondinay. Kusal mwamu kukez kuyikwash amakurump chakwel ipuka kusadil nayimp ulabu wau. Pakwez, adi kwau atufung ankwash, ni yid yawonsu yidia mu chikumangen yikez kwakul muntu ni muntu kudi Yehova ni kudi Yesu mulong wa mupak ukwatinau.​—Gal. 6:5, 7, 8.

“CHILIK CHIWAMP KUDI AMIKOKU”

Amakurump akwashining majuku mau kutenchik mudimu wa kulejan (Tal paragraf wa 13)

13, 14. Mu mikadil ik mufanyidinay mukurump kwikal chilakej kudi chisak cha amikoku?

13 Kupwa kwa kuyilej amakurump adinga mu chikumangen anch ‘kangal wikalany mudi ant piur pau,’ kambuy Pita wayibabesha anch ‘mekeshany chilik chiwamp kudi amikoku.’ (1 Pita 5:3.) Mutapu ik ukutwishay mukurump kwikal chilakej chiwamp kudi amikoku? Shinshikinay yom yaad pakach pa mikadil yifanyidinay kuwanyish muntu “usotila kwikal mukurump wa kutakel Chikumbu cha Nzamb.” Ufanyidin kwikal “mwin kwilam” ni ufanyidin kwikal kand “mwin kuyul chikumbu chend amwinend nawamp.” Anch mukurump ukwet dijuku, ndiy ufanyidin kuditakel nawamp, mulong “anch muntu katwishilap kulam dijuku diend amwinend, ing, ukutwish nchik kuyilam in Chikumbu cha Nzamb?” (1 Tim. 3:1, 2, 4, 5) Chakwel awanyisha yitiyinau mulong wa kwikal mukurump, ikundj ufanyidin kwikal mwin kwilam pateshinay patok yany ya Nzamb ni pakatay kwijik mutapu wa kuyisadil mu mwom wend. Ndiy udi wisikena ni wakad kufishan swaa. Kuman mikadil yiney kudi amakurump kukat kusal anch ayichingejina kudi yid ya chikumangen.

14 Kwitek kurutu mu mudimu wa chingand udi mutapu ukwau afanyinau atulam kupan chilakej chiwamp kudi ambay nau in Kristu. Pa chinech, Yesu wayishila atulam chilakej. Kulejan rusangu ruwamp ra Want chading chom chimwing cha usey mu mujikit wa Yesu pa divu. Ndiy wayileja in kwilej end mutapu wafanyinau kusadik mudimu winou. (Mar. 1:38; Luka 8:1) Mu chirung chetu, chidi chom chikasikeshina mud ik kudi in kulejan kusal pamwing ni amakurump mudimu wa kulejan, mulong wa kuman mushiku wau wa kusal mudimu winou uyipandishina antu, ni kwilejin ku mitapu yau ya kulejan! Mushiku upandakena wa atulam mulong wa kupan chisu chau ni kwikasikesh kulejan rusangu ruwamp chikalap nchik midimu yau yivud, ukasikeshin chikumangen chawonsu kumekesh mushiku wa chilik chimwing. Amakurump akutwish kand kupan chilakej chiwamp kudi akadivar nau kusutil ku kurijek ni kusal mijikit ya chikumangen, ni mijikit yikwau, mudi kukomb ni kurijek Chot cha Want.​—Efes 5:15, 16; tang Hebereu 13:7.

Atulam apanin chilakej mu mudimu wa chingand (Tal paragraf wa 14)

“YIKWASHANY AZIYILA”

15. Ov, mayingish ik mamwing mayibachikina amakurump kwiyendin kwa ukafung amikoku kwol kwau?

15 Kafung muwamp uswapeling kupan ukwash anch mukoku wabukuk ap wayel. Chilik chimwing, amakurump afanyidin kushinshikin  nakash pa muntu mwawonsu umena mar ni uswiridina ukwash wa muspiritu mu chikumangen. Amapal ni ayej aswirikedining kuyikwash kukwatijan ni maswir mau ma kumujimbu, pakwez aswirikedining kand pakampwil ukwash ni dikashikesh dia muspiritu. (1 Tes. 5:14) Ansand a muchikumangen akutwish kuman yikokujol, parishinau nich “maku ma usand.” (2 Tim. 2:22, TMK) Kulam amikoku kwitin kand kwendil yid ya chikumangen chisu ni chisu mulong wa kwijik nawamp mikadil yau ni kuyikasikesh nich chiyul chiwanyidina chidiokila mu Mukand wa Nzamb. Pakatau kuyilej amakurump milong yau pa chisu chiwanyidina, milong yivud akutwish kuyipwish kurutu yikala yikash.

16. Anch chid cha mu chikumangen chiswiridin ukwash wa muspiritu, ov, ukwash ik ukutwishau amakurump kumwinkish?

16 Ov, chidi nchik anch milong yapandakan ni kusal anch ukash wa muspiritu wa chid cha chikumangen wikala mu ubaj? Jakobu, wadinga pakach pa antu afunda Bibil wipula anch “Ov, pakach pen padi muntu uyedila? Chifanyidin muntu mwinou ayitazuka amakurump a Chikumbu cha Nzamb, amulembidil ni kumupan many mu dijin dia [Yehova]. Kulembil kwinoku anch kwikal kwa ritiy, ukumwok muyej. [Yehova] ukez kumulangwish, chad anch wasala yitil, akez kumulikishin.” (Jak. 5:14, 15) Ap anch muntu uyedina muspiritu ‘kayitazukinap amakurump,’ afanyidin kuya swaa mulong wa kumukwash pamenay mwikadil wend. Pakatau kulembil pamwing ap mulong wa akadivar nau ni kuyikwash pa chisu cha mar, amakurump afanyidin kwikal ayinau apanina usu ni akasikeshina muspiritu kudi antu alaminau.​—Tang Isay 32:1, 2.

17. Anch amakurump amwimburij “kafung mujim,” ov, kukwikal yibudikin ik?

17 Mu yawonsu yisadinau mu dirijek dia Yehova, atufung in Kristu akat kusal usu wau wawonsu chakwel amwimburija “kafung mujim,” Yesu Kristu. Nich ukwash wa muspirutu wa amakundj inay akweta chisend, chisak cha amikoku chikat kutaninamu nakash ni kudandamen kuya kurutu. Mulong wa yiney yawonsu, tujikitishin nakash ni twiyovin abachikinau kumushiman Kafung wetu wakad kwisikesh, Yehova.