‘Yivurish ya Nzamb yidi yakin, yikat kuyibabesh ayisup.’​—KUS. 19:7.

1. Mitu ik ya kwilej yikatau antu a Nzamb kwisambinang chisu chawonsu, ni mutapu ik tukwisha kutaninamu mu kuyichirikin?

PIURIJEKINA Chinong cha Kalam cha kwilej, wiyipulap kal anch, ‘Ov, twilejap kal kand mutu wa mulong winou?’ Anch wasambishin kal kukumangan mu chikumangen cha win Kristu mu chisu kanang, wamen pamwing ap anch mitu ya milong yimwing akat kuyichirikin chisu ni chisu. Kwilej piur pa Want wa Nzamb, pa difut, pa mudimu wa kuyikadish in kwilej ni pa ngikadil mudi rukat ni ritiy yidi pakach pa yakudia yetu ya muspiritu ya chisu chawonsu. Kuchirikin mitu ya milong yiney kutukwashin kudandamen kwikal akash mu ritiy ni kwikal “in kusadil dizu dia Nzamb. Kangal in kutesh kusu.”​—Jak. 1:22.

2. (a) Yivurish ik ya Nzamb tufanyidina kwisambin yisu yivud? (b) Mutapu ik ushalijadina yivurish ya Nzamb ni ya antu?

2 Dizu dia Hebereu diakarumunau anch ‘yivurish ya Nzamb’ dikat kwisambin yisu yivud piur pa yijil ni yany yipaninay Nzamb kudi antwend. Chinyim ni yijil ya antu, yikatau kutenchik ap kuswimpol, yijil ni yany ya Yehova yiding yakin chisu chawonsu. Yimwing pakach pa yijil yiney ayipanin mulong wa chisu chimwing ap mwikadil kanang, yidingap yiyimp ap yakad kuwanyin. Nfund a kuseng walonda anch: ‘Yivurish yey yitentamin chikupu.”​—Kus. 119:144.

3, 4. (a) Ov, yom ik yidia pakach pa yivurish ya Yehova? (b) Mutapu ik welau in Isarel kutaninamu anch ayitesha?

3 Wamen pamwing ap anch mu malejan ma Yehova mudi kand uruw wa kubabesh. Muchid wa in Isarel watambulanga chisu chawonsu kubabesh kusutil kudi aprofet a Nzamb. Chilakej, chisu chikemp kurutu kwa kwadam kwa an a Isarel mwi Ngand ya Kushilamu, Moses wayibabesha anch: “Babalany, kangal michim yen yidimb chakwel ukarumukany ni kusadil akish ni kuyifukwil. Palemp ap [Yehova] wez wakwovilany ujim.”  (Kuv. 11:16, 17) Bibil ulejen anch Nzamb wayinkisha antwend malejan mavud ma ukwash.

4 Yisu yivud, Yehova wayikasikesha in Isarel chakwel amwova wom, atesha dizu diend, ni atumbisha dijin diend. (Kuv. 4:29-31; 5:28, 29) Anch atesha yivurish yiney, ela kutambul yiyukish yivud nakash.​—Lev. 26:3-6; Kuv. 28:1-4.

MUTAPU WAKULAU IN ISAREL KU YIVURISH YA NZAMB

5. Mulong wak Yehova warisha mulong wa kumukwash Mwant Ezekias?

5 Mu rusangu rawonsu rikash ra in Isarel, Nzamb wawanyisha kushilamu kwend. Chilakej, pakwatay Sanakerib Mwant wa in Asiriy ul wa in Yuda ni kumwakamish Mwant Ezekias anch ukumudiosh pa Want, Yehova wayikwasha in Isarel patumay mwangel. Mu uchuku umwing kusu, mwangel wa Nzamb wayijipa “ayilabu a njit awonsu ni in kutakel” a amasalay a in Asiriy, chawiy lel Sanakerib wachirika kwol kwend ni usany. (2 Jsng. 32:21; 2 Ant 19:35) Mulong wak Nzamb warisha mulong wa kumukwash Mwant Ezekias? Mulong “ndiy [Ezekias] walamata kudi [Yehova], kakarumukap kulik kumulondul, pakwez walama yijil.”​—2 Ant 18:1, 5, 6.

Yivurish ya Yehova yamubachika Yosias ku kupan ukwash ku difukwil diakin (Tal paragraf wa 6)

6. Mwant Yosias wamuchingejina Yehova mutapu ik?

6 Chilakej chikwau cha muntu waziyila yijil ya Yehova udi Mwant Yosias. Kusambish padingay nich mivu chinan, ‘ndiy wasala yom yiwamp ku mes kwa [Yehova] . . . Pakad kukarumwok kutal mutambu wa katatuku ap wa kamaku.’ (2 Jsng. 34:1, 2) Yosias wamekesha ruchingej rend mudi Yehova padioshay akish mwingand ni kuchirish difukwil diakin. Pasalay mwamu, Yosias kiletinap kusu amwinend yiyukish pakwez wayukisha kand muchid wakabuj.​—Tang 2 Jinsangu 34:31-33.

7. Palikau in Isarel yivurish ya Yehova, ov, kwading yibudikin ik?

7 Pakwez, cha ushon, mulong antu a Nzamb kadandamenap kutek ruchingej rau mu yivurish ya Yehova. Mu yitot ya mivu, ading akat kwidjidjek pakach pa kuziyil ni kubwambwil. Pasambishau kushadish ritiy rau, awiy asala yom mudi mwalonday kambuy Paul anch, “akat kuyipwepol kudi rinkind kuya mutambu ni mutambu, ndiy rinkind wa malejan ma antu in kudimban.” (Efes 4:13, 14) Mudi mwatakelau kulejan, palikau kutek ruchingej rau mu yivurish ya Nzamb, angula mabuj maridila.​—Lev. 26:23-25; Jer. 5:23-25.

8. Mutapu ik tukutwisha kwilejin kusutil ku chilakej cha in Isarel?

 8 Ov, mu mutapu ik tukutwisha kutaninamu mu chilakej cha in Isarel? Mudi mwasalau awiy, atushalapol a Nzamb nlel unou atambwil chiyul ni akat kuyikand. (2 Pita 1:12) Dizu diapepilau dia Nzamb dikutwish kwikal mudi chivurish kudi etu pitutangina chisu chawonsu. Pitukweta want ipau, tukutwish kutond kuziyil ku umutakel wa Yehova ap kusal yitumena anch yitentamin kudi etu. (Jinsw. 14:12) Tushinshikinany amboku mayingish mamwing mamekeshina mulong wak tukutwish kutek ruchingej retu mu yivurish ya Yehova ni mutapu tukutwisha kutaninamu mu kuyitesh.

MUZIYILA NZAMB CHAKWEL WIKALA NI MWOM

9. Padingau in Isarel mwimpay, ov, mutapu ik wayikasikeshay Yehova anch ukez kuyikwash?

9 Padingau in Isarel mu weny wa mivu 40 “mwi mpay yawonsu ya mar,” Yehova kayinkishap kurutu yijikish pa kachom ni kachom piur pa kuyitakel, kuyilam, ni kuwanyish maswir mau. Chikwau kand, ndiy wamekesha chisu ni chisu anch afanyina kumuchingejin ndiy ni kuchingejin mu yany yend. Patekay dinguz dia didj muten ni dia kasu uchuku, Yehova wayivurisha in Isarel anch ndiy wading uyikwashin padingay ni kuyitakel chakwel asuta mu jindond jinej jiyimp. (Kuv. 1:19; Kub. 40:36-38) Ndiy wawanyisha kand maswir mau ma pakampwil. “Yidjal yau kiyapukap, ap yidjatil yau kiyananap.” Chikwau kand, “kwikil chom ap kusu chimwing chaburenau.”​—Neh. 9:19-21.

10. Mutapu ik uyitakedilay Yehova antu end lel?

10 Atushalapol a Nzamb lel adi mwinzezil mwin kamu mwa ngand yisu yitentamina. Ov, tuchingejin anch Yehova ukuwanyish maswir metu chakwel tupanda ku “Mar makash” mezina kurutu? (Mat. 24:21, 22; Kus. 119:40, 41) Chakin kamu, Yehova katwinkishinap kwend lel umutakel kusutil dinguj dia didj ap dia kasu mulong wa kututakel chakwel tushika mwi ngand yisu. Pakwez usadidin dirijek diend mulong wa kutukwash chakwel twikala achila ku mes. Chilakej, ateka usey nakash piur pa kutung mwikadil wetu wa muspiritu kusutil ku kutang Bibil kwa muntu ipend, kwikal ni Difukwil dia Dijuku urel, ni kuya kuyikumangan ni kulejan pakad kujing. Ov, twatenchikin yom chakwel tulondula yany niney? Kusal mwamu kukutu kwash chakwel twikala ni ritiy rikash rikeza kutulam aom ni kwandam mu mangand masu.

Kusadil yivurish ya Yehova kutukwashin kulam Chot chetu cha Want chakwel kangal chileta ubaj ni chikala chiswapela kwandam (Tal paragraf wa 11)

11. Ov, mu mitapu ik yikatay Nzamb kutubangin?

11 Kupwa kwa kutukwash chakwel tucha ku mes muspiritu, yany twatambula yitukwashin kupwish milong ya dichuku ni dichuku. Pakach pa yilakej yiney padi kwikal ni chitongijok chiwamp piur pa yom ya kumujimbu ni kwikal nich dis didia zwang mulong wa kukepish yakamish. Twatana kand ukwash kusutil ku umutakel winou piur pa mutapu wa kudjal ni kwileng, kutond kwipwangesh kuwamp, ni kukwat mupak uwamp piur pa uvud uwanyidina wa mivu ya kwilej ku shikol. Kutongin pa diking dia yivurish twatambula mulong wa yikumbu, mwotak yetu, ni kwirijek mulong wa milong yikutwisha kushiken. Chiyul chinech chilejen anch Nzamb ubangidining pa ukash wetu.

YIVURISH YA NZAMB YAYIKWASHA IN KRISTU A KUSAMBISH CHAKWEL ASHALA ASHINSHAMENA

12. (a) Yesu wachirikina tupamp tuvud pa mulong ik padingay ni kuyilej in kwilej end? (b) Ov, Chisal ik cha kwikepish chamushimosha nakash Pita, ni mutapu ik chikutwisha kwikal nich usu padi etu?

12 Mu chitot cha kusambish cha mivu, antu a Nzamb atambula yivurish chisu chawonsu. Yesu wayileja in kwilej end tupamp tuvud anch afanyina kwikepish. Ndiy kimedinap kusu pa kuyilej in kwilej end kurumburik kwa kwikepish​—pakwez wayileja mutapu wa kwikepish. Mu machuku mend  mansudiel pa divu, Yesu wayikumangeja atwimbuy mulong wa Pasak. Padingau ni kudia atwimbuy end, Yesu watumbuka ku tebur ni wasambisha kuyowish ku mend mau​—mudimu wadingau ni kusal kudi kashalapol. (Yoh. 13:1-17) Chisal chinech cha kwikepish chayishimwosha nakash. Pasuta mivu 30, kambuy Pita, wadinga ni ndiy ku tebur kwinikwa, wayinkisha ambay akaritiy yiyul piur pa kwikepish. (1 Pita 5:5) Chilakej cha Yesu chifanyidin kutubachik etwawonsu chakwel twikala itudishina umwing ni mukwau.​—Fil. 2:5-8.

13. Ov, Yesu wayivurisha in kwilejend piur pa maswir ma kukudish ngikadil ik ya usey?

13 Kuswir kwa kwikal ni ritiy rikash wadinga mutu wa mulong ukwau wisambinay Yesu chisu ni chisu ni in kwilejend. Kupwa kwa in kwilejend kukangany kumwopat chilembil wading umukwatina ikundj umwing, amwipula Yesu anch: Ov, mulong wak etu twakanganyang kumudiosh chilembil? Yesu wayakula anch: “Wakanganyangany mulong kiukwetanyap ritiy ruwanyidina. Nakulejany chakin, anch ukwetany ritiy rujim mudi karubut ka mutond, upidilau anch mutard, . . . ukutwish kusalany yom yawonsu.” (Mat. 17:14-20) Mu mudimu wawonsu wa kulejan wa Yesu, wayileja in kwilejend anch ritiy ridi ngikadil ya usey nakash. (Tang Mateu 21:18-22.) Ov, tukat kusadil yisu yitukweta chakwel tukasikesha ritiy retu kusutil ku malejan makasikeshina malejenau ku yitentam, ni ku yikumangan ya win Kristu? Yiney yidi yikumangan yiletina musangar uvud nakash,yidi yisu yetwetu kumekesh anch tumuchingejidin Yehovah.

14. Mulong wak chidi cha usey kukudish rukat mudi ra Kristu lel?

14 Mu Mifund ya Grek ya win Kristu mwizwil yivurish yitukwashina kumekesh rukat kudi umwing ni mukwau. Yesu walonda anch chijil chijim cha kaad chidi anch “Mukata mukwen mudi muwikatila ey amwiney.” (Mat. 22:39) Chilik chimwing, Jakobu mwanamakwend a Yesu watazuka rukat anch: “chijil cha mu Want wa Nzamb.” (Jak. 2:8) Chilik chimwing, kambuy Yohan wafunda anch: ‘Arund nam, kinikufundidilanyap chijil chisu, pakwez chidi chijil chikur chiwateshanya kal kudiokal ku disambishil.’ (1 Yoh. 2:7, 8) Ov, chom ik chisambinay Yohan anch “chijil chikur” ni ‘chijil chisu’? Ndiy wisambina piur pa chijil cha kukatijan. Chading “chikur” mulong Yesu wachipana pasutin kal makum ma mivu, ‘kudiosh kwinsambishil.’ Pakwez chikala ‘chisu’ mulong chita kwipan kwa rukat, kwadinga kuswiridinau in kwilej padingau ni kurish nich mikadil yisu. Mudi in kwilej a Yesu, ov, tufanyidinap kwetu kusanger kubabesh kutukwashina kwipuk kukudish chitongijok cha choy cha mangand minam, chikutwisha kushadish rukat retu kudi amutej netu?

15. Ov, mudimu ik wa kusambish wadingay nich Yesu pa divu?

 15 Yesu wayisangera antu akwau. Tumen rukat rend payokay ayej ni ayilim ni payivumbulay afu. Pakwez, mudimu wa kusambish wa Yesu wadingap kwau wa kuyok antu. Mudimu wend wa kulejan ni wa kufundish wading ni wakaruna mwom ya antu. Ov, mutapu ik lel? Chilakej, twij nawamp anch antu awonsu okay Yesu ni avumbulay ku rufu mu chitot chakusambish cha mivu, ananapa ni afa, antu itiya nawamp rusangu rayilejay, kashalap aom chikupu.​—Yoh. 11:25, 26.

16. Ov, mutapu ik usadikina mudimu winou wa kulejan-Want ni kwikadish in kwilej pa mangand mawonsu nlel unou?

16 Mudimu wa kulejan wasambishay Yesu mu chitot cha kusambish cha mivu usadikin nlel unou pa mangand mawonsu. Mwaning, Yesu wayinkisha in kwilejend mudimu payilejay anch: “Yangany kudi antu a michid yawonsu, yikarumunany kwikal in kwilejam.” (Mat. 28:19) Itiya kusal mudimu winou, niyetu tukutwish twalond anch tukuusal! Atuman a Yehova piswimp ni ma miliyon chinan asadina alejen nich mushiku Want wa Nzamb mu jingand 230 ni kusut, ni atakedin malejan ma Bibil chisu chawonsu ni ma miliyon ma antu. Mudimu winou wa kulejan umekeshin patok anch tudi mu machuku mansudiel.

MUCHINGEJINA YEHOVA LEL

17. Ov, chiyul ik chapanay Paul nenday Pita?

17 Chimeken patok anch yivurish yayikwasha in Kristu a kusambish chakwel ikala ni ritiy rikash. Tongin bil pa dikasikesh diatambulay Timote padingay kambuy Paul mu rukan ku Rom, pamuvurishay anch “lam dang mazu minakuleja.” (2 Tim. 1:13) Kupwa kwa kuyikasikesh ambay nend in Kristu chakwel akudisha mikadil mudi kujijaman, rukat ra akadivar, ni kwilam, kambuy Pita walonda anch: “Ap anch wijanyap nchik yom yiney, ap anch wiminyanap nchik dang mu uyakin watambulanya, am nikez kudandamen kukuvurishany.”​—2 Pita 1:5-8, 12.

18. Ov, mutapu ik wamanau yivurish kudi in Kristu a pa chitot cha kusambish?

18 Mwaning, mikand yafundau kudi Paul nenday Pita yalejana “mazu malondau pasak kudi aruu a Nzamb atumbila.” (2 Pita 3:2) Ov, akadivar netu a mu chitot cha kusambish cha mivu alika kutambul umutakel winou? Bwat kwau, mulong mazu minam mamekesha rukat ra Nzamb, rayikwasha ‘kudandamen kuya kurutu mu ranaken ni mu kumwijik kand Nsalejetu, ndiy kamu Mupandish wetu Yesu Kristu.’​—2 Pita 3:18.

19, 20. Mulong wak tufanyidin kuchingejin mu yivurish ya Yehova, ni mutapu ik tukutaninamu anch twasal mwamu?

19 Nlel, tukwet mayingish makash ma kutek ruchingej mu yivurish ya Yehova, yidia mu Bibil, Dizu diend diakin (Tang Joshua 23:14.) Mu mikand ya Bibil, alejenamu yisal ya Nzamb pantaliken ni antu akad kuwanyin mu tunan twa mivu. Rusangu riner arifunda mulong wa kutukwash. (Rom 15:4; 1 Kor. 10:11) Twamen kuwanyin kwa uprofet wa Bibil. Uprofet ukutwish kwikal yivurish yatakelau kulejan. Chilakej, ma miliyon ma antu mandama mu difukwil dishitwila dia Yehova, mudi mwabwakau piur pa yela kushiken ‘pa chirungu cha machuku mansudiel’ (Isay 2:2, 3) Kuyip nakash kwa mashakamin ma mangand kuwanyishin nikwawiy uprofet wa Bibil. Mudi mwalejanau, ditenchik dijim dia mudimu wa kulejan didandamedin kumekesh kuwanyin kwa mazu ma Yesu.​—Mat. 24:14.

20 Sakatang wetu wafunda rusangu tukutwisha kuchingejin. Ov, tukat kutaninamu? Tufanyidin kutek ritiy retu mu yivurish yend. Chawiy chasalay Rosellen. Ulejen anch: “Pinasambisha kutek ritiy ram mudi Yehova, namana patok ukwash wa rukat rend ni kwinkasikesh.” Tukutwish niyetu kutaninamu anch twalam yivurish ya Yehova.