‘Yivurish yey yidi uswan wam wa chikupu.’​—KUS. 119:111.

1. (a) Ov, mu mitapu ik mukatau antu avud kwakul ku yiyul ni mulong wak? (b) Mutapu ik ukutwisha chibud kwikal nich usu pa mutapu ukutwishay muntu kuman chiyul?

ANTU ateshining chiyul mu mitapu kushalijan. Muntu ukweta ulabu akutwish kwitiy nawamp chiyul chend, pakwez akutwish kulik kutesh chiyul cha mwanikanch ap cha muntu udia mwishin. Yovil ya kwakul ku dipup ni ku chiyul yishalijadining ni yawiy nakash. Kwakul ku chiyul kukutwish kushalijan kukwatijan nich ushon, kunenganan ap kwov usany wa kwikal abachikinau, kuman mar ap kwiyandjik mu milong. Ov, mulong wak muntu ni muntu ukwet mutapu wend wa kwakul? Chom chimwing chisadininga mwamu chidi chibud. Chakin kamu, muchim wa kwitutul ukutwish kuyipish manangu ma muntu, kusal anch alika kutesh chiyul ni kuburen malejan ma usey.​—Jinsw. 16:18.

2. Ov, mulong wak in Kristu akin akat kusanger yiyul yidiokila mu Dizu dia Nzamb?

2 Ku mutambu ukwau, in Kristu akin asangaredining chiyul cha ukwash, pakampwil anch chimedin pa Dizu dia Nzamb. Yivurish ya Yehova yiletining njingunin ya usey, yikat kufundish ni kutukwash twipuka kuwil mu mipit ya rukat ripandakena ra yom ya kumujimbu, masandj ni kuna damb ap kukwachik maar. (Jinsw. 20:1; 2 Kor. 7:1; 1 Tes. 4:3-5; 1 Tim. 6:6-11) Kupwa, tukutwish kusanger mulong wa ‘mwikadil uwamp wa muchim’ udiokila ku kuziyil ku yivurish ya Nzamb.​—Isay 65:14.

3. Ov, mwikadil ik wa nfund a kuseng uwapidina etu kwimburij?

3 Chakwel tulama urund wetu uwamp ni Tatukwetu wa mwiur, tufanyidin kudandamen kusadil malejan ma Yehova ma manangu mu mwom wetu. Chiwapin mudi ik anch mwikadil wetu umekeshin yafunday nfund a kusend anch: ‘Yivurish yey yidi uswan wam wa chikupu, mulong yidi musangar wa muchim wam!’ (Kus. 119:111)  Ov, tuyisangaredining chilik chimwing yijil ya Yehova, bil anch tuyimening chisu chimwing anch yilimin? Ap anch chiyul tutambwila chikutwishap kutusangaresh chisu chimwing, tufanyidinap kushadish ruchingej. Tukutwish kukudish ruchingej rimwing rikash mu manangu ma piur nakash ma Nzamb! Tushinshikinany amboku yom yiney yisatu.

KUKASIKESH RUCHINGEJ KUSUTIL KU MALEMBIL

4. Ov, chom ik chimwing chasala anch David adandamena kushinshaman mu mwom wend?

4 Mwant David wamana kuwap ni kuyip mu mwom wend, pakwez wadandamena kushinshaman—wateka ruchingej rend mudiay Sakatang wend. Ndiy walonda anch: “Kudi Ey [Yehova] nazambula mupim wam! A Nzamb wam, mudi Ey nichingejila.” (Kus. 25:1, 2) Chom ik chamukwasha David kukudish ruchingej riner mudiay Tatukwend wa mwiur?

5, 6. Ov, chom ik chitulejinau mu Dizu dia Nzamb piur pa urund wa David ni Yehova?

5 Antu avud akat kumulembil Nzamb ching kusu anch mar mayishiken. Ov, chikwikal nchik anch murund ap mwanamakwey umwing ukat kukukimb ching kusu pakwetay kuswir kwa nfalang ap kwa ukwash kanang? Chisu chimwing, ukutwish kusambish kwiyipul mulong wak ukukimbin. Pakwez, David, kadingap mwamu. Urund wend ni Yehova wamekesha ritiy rend ni rukat rend kudiay Nzamb mu mwom wend​—pa yisu yiwamp ni yiyimp.​—Kus. 40:8.

6 Teshany mazu minam ma David ma kumushiman ni kumujikitish Yehova anch: “A [Yehova], Mwant wetu, dijin diey aditumbishil kal pa mangand mawonsu, washichika uyaj wey piur pa diur!” (Kus. 8:1) Ov, umenap anch David wading mu urund wa piswimp ni Tatukwend wa mwiur? Kusanger kwa David kwa uyaj wa Nzamb kwasala anch amushimana Yehova “miten yawonsu.”​—Kus. 35:28.

7. Ov, mutapu ik tukutwisha kutaninamu anch twamusejin Nzamb mu malembil?

7 Mudi David, tufanyidin kwambamb ni Yehova chisu chawonsu chakwel tukasikesha ruchingej retu mudiay ndiy. Bibil ulejen anch: “Sejany piswimp kudi Nzamb, chad niyend ukusej piswimp ni yenen.” (Jak. 4:8) Kusej piswimp ni Nzamb mu malembil udi kamu mutapu umwing ukash utukwashina kutambul mwiku utumbila.​—Tang 1 Yohan 3:22.

8. Mulong wak tufanyidin kwipuk kuchirikin yom yimwing yimwing mu malembil?

8 Piukata kulembil, ov, uchirikidining mazu mamwing ap kusadil mazu minam chisu ni chisu? Anch chidi mwamu, kurutu kwa kulembil, itekina chisu chikemp mulong wa kutongin pa yiusotina kulond. Anch tuchirikidining mazu mamwing kudi murund netu ap mwanamakwetu yisu yawonsu twambambina nend, ov, ukutwish kusanger pa chinech? Ukutwish kusambish kulik kukutesh. Pakwez, Yehova kakezap kulik kutesh malembil madiokila mu muchim wa atushalapol end ashinshamena. Tufanyidin kwipuk kuchirikin yom yimwing yimwing pitwambambina nend.

9, 10. (a) Ov, chom ik tufanyidina kutek mu malembil metu? (b) Chom ik chikutwisha kutukwash kulembil yom yidiokila mu muchim?

9 Chimeken patok anch, malembil metu mafanyidinap kwikal ma piur piur anch tusotin kusej piswimp ni Nzamb. Anch twamulej Yehova yawonsu yidia mu muchim wetu, tukez kwikal piswimp nend ni tukez kand kumuchingejin nakash. Ov, chom ik tufanyidina kutek mu malembil metu? Dizu dia Nzamb dilejen anch: “Kangal wiyakamishany mulong wa chom. Pakwez mu yisu yawonsu mu kulembil kwen, ap pa kuyilembidil antu akwau nich kujikitish, mwijikishany Nzamb yom yawonsu umwitilanya.” (Fil. 4:6) Chawiy lel, yawonsu yitadila urund wetu ni Nzamb ap mwom wetu mudi kashalapol wend yawiy yom yiwanyidina kutek mu malembil.

10 Chidi cha usey kushinshikin pa mazu  ma amakundj ni amband ashinshamena alembila malembil mafundau mu Bibil. (1 Sam. 1:10, 11; Mud. 4:24-31) Mu mukand wa kuseng mudi muruz wa malembil madiokila ku muchim ni miminy yau kudi Yehova. Yovil yawonsu ya muntu, chikalap runeng ap musangar wakin yamekana mu malembil ni mu miminy yiney. Kushinshikin pa mazu minam ma antu ashinshamina kukutwish kutukwash kulembil malembil ma usey kudi Yehova.

TONGIJOKIN PA YIVURISH YA NZAMB

11. Mulong wak tufanyidin kutongijokin pa yiyul ya Nzamb?

11 David walonda anch: ‘Yivurish ya Nzamb yidi yakin, yikat kuyibabesh ayisup.’ (Kus. 19:7) Mwaning, ap anch tukwetap manangu, tukutwish kwikal nich manangu anch twaziyil ku yijil ya Nzamb. Pakwez, yiyul yimwing yidiokila mu Bibil yitin kuyitongijokin anch tusotin kutaninamu nakash. Chitwishikin kulond mwamu piur pa kushinshaman kwetu mu yoziu yikata kutushiken ku shikol ap ku mudimu wetu, kuziyil chijil cha Nzamb piur pa mash, kudandamen kulik kwiyandjik mu milong ya mangand, ni kusadil yany ya Bibil piur pa kudjal ni kwileng. Kwikal nich chitongijok cha Nzamb pa milong yiney kukez kutukwash chakwel tupwisha milong. Chawiy lel, tukutwish kukwat mupak mu muchim wetu pa yom tufanyidina kusal anch milong yatushiken. Kutongijokin pa chinech ni kwirijek kurutu kukutwish kutukwash chakwel twipuka musong wa muchim.​—Jinsw. 15:28.

12. Ov, kutongijokin pa chom ik kukutwisha kutukwash kulam yivurish ya Nzamb?

12 Pituchingedina kuwanyin kwa yom yakanay Nzamb, ov, mwom wetu umekeshin anch tudandamedin kucha ku mes muspiritu? Chilakej, twitiyijin chakin kamu anch Babilon Mujim akez kamujiyish piswimp ap? Yiyukish ya mu machuku ma kurutu, mudi mwom wa chikupu pa divu dikeza kwikal paradis, ov, yidi yakin kamu kudi etu mudi pa chisu twileja yom yiney? Ov, tulamin mushiku wetu mu mudimu wa kulejan pa ndond pa kutek kurutu maswir metwetu ayinetu mu mwom wetu? Chidi nchik piur pa ruchingej ra kuvumbuk, kutumbish dijin dia Yehova, ni kuchidij ukaleng wend? Ov, yom yiney yichidi ya usey kudi etu? Kutongijokin pa yipul yiney kukutwish kutukwash kusal mudi mwalonday nfund a kuseng anch, kulam ‘yivurish yey kudi uswan wam wa chikupu.’​—Kus. 119:111.

13. Ov, mulong wak in Kristu a mu chitot cha kusambish cha mivu kateshap nawamp kurumburik kwa yom yimwing? Let chilakej.

13 Yom yimwing yisambinau mu Bibil tukutwishap kuyitesh nawamp yawonsu katat mulong chisu cha Yehova kuyovikesh kandikal chiwanyina. Yesu wayileja atwimbuy end chisu ni chisu anch chifanyidin amana mar ni afa. (Tang Mateu 12:40; 16:21.) Pakwez atwimbuy end kateshap kurumburik kwa mazu mend. Awiy atesha kurumburik kwinyim kwa rufu ni kuvumbuk kwend padjalay mujimbu wa untu, ni kwimekesh kudi in kwilej avud, ni “wayiburila manangu mau [chakwel atesha kurumburik kwa] Mikand ya Nzamb.” (Luka 24:44-46; Mid.1:3) Chilik chimwing, djat ni payizwishau nich mwiku utumbila pa Pentekot wa muvu wa 33 C.C. In kumulondul Kristu kateshap kwau anch afanyina kutek Want wa Nzamb mwiur.​—Mid. 1:6-8.

14. Ov, chilakej ik chiwamp chatushilau akadivar ap anch kateshap kurumburik piur pa machuku ma kwisudiel?

14 Chilik chimwing, kwinsambishil kwa yitot ya mivu 20, kwading ruchingej ra makasu pakach pa in Kristu akin piur pa “machuku ma kwisudiel.” (2 Tim. 3:1) Chilakej, mu muvu wa 1914, antu amwing atonga anch ading piswimp ni kuyisend mwiur. Palika kusadik swa yom yachingejinau, dilejan dikash dia mukand wa Nzamb diayishikija ku kuman anch ditenchik dijim dia mudimu ujim wa kulejan diading diyichingedin kurutu. (Mar. 13:10) Chawiy lel, mu muvu wa 1922, J.  F. Rutherford, watakela  mudimu wa kulejan, wayileja antu akumangana ku Chitentam cha mangand chasadika ku Cedar Point, mu Ohio, ku États-Unis anch: “Talany Mwant ukat kuyikel! Udiany antwend. Chawiy lel, lejanany, lejanany, lejanany Mwant ni Want wend!” Kudiosh pinipa, kulejan “Rusangu Ruwamp ra Want” kwikala chijingidij cha atushalapol a Yehova a pa chirung chetu.​—Mat. 4:23; 24:14.

15. Ov, mutapu ik tukutwisha kutaninamu mu mutapu washakamay Nzamb ni antwend?

15 Anch twatongijokin pa mutapu ushimokishina washakamay Yehova ni antwend, pasak ni nlel unou, tukutwish kwikal nich ruchingej rikash mu ukaliweny wend wa kuwanyish rusot ni rutong rend mu machuku ma kurutu. Pa chisu chawiy chimwing, yivurish ya Nzamb yitukwashin kulam mu manangu ni mu muchim uprofet wend ukeza kuwanyin kurutu. Tukutwish kwikal nich kashinsh anch kusal mwamu kukez kutukwash kukasikesh ruchingej retu mu yom yakanay.

KASIKESH RUCHINGEJ KUSUTIL KU YISAL YA KWIFUKWIL

16. Ov, yiyukish ik yidiokila ku kudandamen kusal mu mudimu wa kulejan?

16 Yehova Nzamb wetu, udi Nzamb mukash, Nzamb usadina. Nfund a Kuseng wipula anch: “Ov, nany ukweta usu mudi usu weyey, A Mwant.” Walonda kand anch: “Ey udi ni chikas cha usu nakash, . . . chikas chey cha katatuku chidi cha dikand.” (Kus. 89:8, 13, TMK) Chinech chimekeshin anch, Yehova ukat kusanger ni kuyukish usu tusadina mulong wa kukasikesh yisakin ya Want. Ndiy umening anch atushalapol end​—amakundj ap amband, ansand ap amapal—​kakatap kushakam pakad kusal ni kudia “yakudia ya usweral.” (Jinsw. 31:27) Mu kumwimburij Sakatang wetu, tudandamedin kusal mu mijikit ya uteokras. Kumusadil Nzamb nich muchim wawonsu kutuletidining yiyukish muntu ni muntu, ni kumusangareshining Yehova nakash chakwel ayukisha mudimu wetu wa kulejan.​—Tang Kuseng 62:12.

17, 18. Ov, mulong wak tukutwish kulond anch yisal yishinshamena yitukwashin kukasikesh ritiy mu yiyul ya Yehova? Let chilakej.

 17 Ov, mu mutapu ik utukwashina yisal yishinshamena kukasikesh ruchingej retu mudiay Yehova? Shinshikin pa rusangu ra Bibil ra kwandam kwa in Isarel mwi Ngand ya Kushilamu. Yehova wayileja in kupesh ading asendina mushet wa manswik anch aya akandama kapamp kamwing mu Wit wa Yordan. Pakwez, pasambishau antu kusej piswimp, amana mutapu wadingay wit wizwil mabeb kushik ni pa chikum. Ov, in Isarel ela kusal ik? Ov, ela kusal chibeng ku chau cha wit djat ni pela mem kuum? Bwat, amuchingejina Yehova sens ni alondula umutakel wend. Nich chibudikin ik? Rusangu rilejen anch: “Pashikau antu ading asendila mushet ku Yordan, mend ma in kupesh madjata ku chikumu. Wit wa Yordan wading wizwil mabeb kushik ni pa chirung cha kwangul. Mem mading ni kukurumuk mwiyand kudiokal mwi mpat mimana tunta, . . . in kupesh adinga asendil Mushet wa Manswik wa [Yehova], imana pansh paumina mukach mwa wit wa Yordan, djat ni papwilau antu awonsu kumwauk.” (Jos. 3:12-17) Tong bil, chakasikesha mudi ik michim ya antu amana mutapu wauma mem ma wit! Chikwau kand, ritiy ra in Isarel mudiay Yehova rakasikana mulong achingejina mu umutakel wend.

Ov, umekeshin ruchingej ra chilik chimwing ni ra antu a Yehova a pa chirung cha Joshua? (Tal paragraf wa 17, 18)

18 Chakin, Yehova kasadiningap kand yilay mulong wa antwend nlel unou, pakwez ukat kuyiyukish chilik chimwing mulong wa yisal yau ya ritiy. Usu wa kusadil wa Nzamb uyinkishin ukash wa kusal mudimu wayinkishau wa kulejan uruu wa Want pa mangand mawonsu. Yesu Kristu, Kaman mujim wa Yehova, wavumbulau wayikasikesha in kwilej end anch ukez kuyikwash mu mudimu winou wa usey palonday anch: “Yangany kudi antu a michid yawonsu . . . am nikez kwikal ni yenen machuku mawonsu, djat ni kwisudiel kwa mangand.” (Mat. 28:19, 20) Atuman avud adinga ni usany ap abutwalela, atwisha kuman ayinau anch mwiku utumbila wa Nzamb wayinkisha mushiku wa kulond kudi antu akwau mu mudimu wa chingand.​—Tang Kuseng 119:46; 2 Korint 4:7.

19. Chikalap nchik mayej ap kunanap kwetu, ov, dikasikesh ik tufanyidina kwikal nich?

19 Mayej ap kunanap yikutwish kuyikangesh akadivar ni anambaz amwing kusal mudimu. Chawiy lel, akutwish kwikal nich kashinsh anch, “Tatuku wa riy ni Nzamb wa kwongoj kwawonsu” umening yawonsu yikata kumushiken mwin Kristu mwawonsu wakin panrend. (2 Kor. 1:3, TMK) Ndiy ukat kusanger yawonsu tusadina mulong wa kukasikesh yisakin ya Want. Muntu ni muntu pakach petu ufanyidin kulam mu manangu anch cha kusambish ridi bil ritiy retu mu difut diapanau kudi Kristu diawiy dilamina musul wetu ni mwom, chisu chawonsu tusadina yom kukwatijan ni mashakamin metu.​—Heb. 10:39.

20, 21. Ov, mitapu ik yimwing tukata kumekesh ruchingej mudi Yehova?

20 Mu difukwil dietu mudi kusadil chisu, usu, ni mapit metu kukwatijan ni mikadil yetu. Mwaning tusotin ‘kurumburil Rusangu Ruwamp’ ni muchim wetu wawonsu. (2 Tim. 4:5) Chawiy lel, tukwet musangar wa kusal mwamu, pituyikwashina antu akwau “kwijik uyakin.” (1 Tim. 2:4) Chimeken patok anch, kumulimish ni kumushiman Yehova Nzamb mujim, kusadin anch twikala ampich muspiritu. (Jinsw. 10:22) Ni chitukwashin kwikal ni ruchingej rikash mudi Sakatang wetu.​—Rom 8:35-39.

21 Mudi mutwalondanga, kuchingejin mu umutakel wa manangu wa Yehova kukatap kwiyezin akwinaku bwat; tufanyidin kusal usu chakwel anch twikala ni ruchingej riner. Chawiy lel, muchingejina Yehova mu malembil. Tongijokin pa mutapu wawanyishay Yehova rusot rend pasak ni ukezay kusal mwamu mu machuku ma kurutu. Dandamen kand kukasikesh ruchingej rey mudi Yehova kusutil ku yisal ya kwifukwil. Chakin kamu, yivurish ya Yehova yikez kwikalaku chikupu. Ov, ukwikalaku niyey!