“Ov, ukwikalany antu a mutapu ik? Chifanyidin en kwikalany nich mwom utumbila, wikalany kand in kudandamen kudi Nzamb.”​—2 PITA 3:11.

1, 2. Ov, ‘tufanyidin kwikal nich untu wa mutapu ik’ chakwel tutambula dilau dia Nzamb?

YISU yivud tukatap kubangin pa yom yitonginingau antu akwau piur petwetu. Pakwez, mudi in Kristu, ov, tufanyidinap kushinshikin nakash pa yitonginay Yehova piur petwetu? Chawiy lel, ndiy udi Muntu mujim nakash pa mangand mawonsu ni udi ‘musul wa mwom.’​—Kus. 36:10.

2 Pashinshikidinay piur pa ‘antu a mutapu ik tufanyidina kwikal’ ku mes kwa Yehova, kambuy Pita utukasikeshin kwikal nich ‘mwom utumbila, kwikal kand in kudandamen kudi Nzamb.’ (Tang 2 Pita 3:11.) Chakwel twitapila dilau kudi Nzamb, tufanyidin kwikal nich “mwom utumbila,” kwawiy kulond anch twikala ishitwila​—mu yisal, mu manangu, ni muspiritu. Chikwau kand, tufanyidin kwikal nich yisal ya “kudandamen kudi Nzamb” ni kumwov Nzamb wom ni kushinshaman kudi Ndiy. Chawiy lel, kukimb dilau diend, kwitinap kusu yisal yetu pakwez kwitin kand untu wetu wa mukach. Mulong Yehova “ukat kupak muchim,” ndiy wij anch tudi ishitwila mu yisal ni anch twipanin kamu rawonsu kudi ndiy ap bwat.​—1 Jinsg. 29:17.

3. Piur pa urund wetu ni Nzamb, ov, yipul ik tufanyidina kushinshikin?

3 Satan Djabul kasotiningap anch tukimba dilau dia Nzamb. Chawiy lel, ndiy usadining usu wend wawonsu mulong wa kusal anch tulika urund wetu ni Yehova. Satan kakatap kwidjidjek kusadil makasu ni kutudimb chakwel atuteka kulemp ni Nzamb tukata kwifukwil. (Yoh. 8:44; 2 Kor. 11:13-15) Chawiy lel, tufanyidin kamu kwiyipul ayinetu anch: ‘Ov, mutapu ik lel ukatay Satan kuyidimb antu? Nikutwish kusal ik chakwel nilama urund wam ni Yehova?’

 OV, MUTAPU IK UKATAY SATAN KUYIDIMB ANTU?

4. Chakwel ashesha urund wetu ni Nzamb, ov, Satan ukat kutalikeshin pa chom ik, ni mulong wak?

4 Mwin kwilej Jakobu wafunda anch: “Muntu ni muntu ukat kwiyoz amwinend nich maku mend mayimp, mawiy makata kumubachik, chad mamurumbwish, chad maku mend mayimp makat kwimish, maval chitil, chawiy chitil anch chakul, chikat kuval rufu.” (Jak. 1:14, 15) Chakwel ashesha urund wetu ni Nzamb, Satan ukat kutalikeshin kamu ching pa musul wa maku metu​—muchim wetu.

5, 6. (a) Ov, chom ik chisadidilay Satan mulong wa kutudimb? (b) Ov, yoziu ik yisadidinay Satan chakwel ayipisha maku ma muchim wetu, ni mutapu ik wijay nakash kuyisadin?

5 Ov, chom ik chisadidilay Satan mulong wa kudimb muchim wetu? Bibil ulejen anch: “Ngand ya kabuj yidi mu chikas cha Satan.” (1 Yoh. 5:19, TMK) Pakach pa yom yisadidilay Satan padi “yom yawonsu yidia mu mangand.” (Tang 1 Yohan 2:15, 16.) Mu tunan twa mivu, Djabul washesha nayimp win ndond yitushicha. Mulong tudi mu mangand minam, tufanyidin kubabal pantaliken ni yoziu yend yikash.​—Yoh. 17:15.

6 Satan ukat kusadin milad yimwing mulong wa kuyipish maku ma muchim. Kambuy Yohan ujimbwil yoziu yisatu yikatay Satan kusadinang: (1) “maku mayimp ma mujimbu wa mbij,” (2) “maku ma mes,” ni (3) “kwibaz kwa yom yikwetau ni kwa yom yisadilau.” Satan wayisadila chakwel amudimba Yesu mwimpay. Mulong wayisadina kal yoziu yiney mu mivu yivud, nlel unou Satan ukat kuyisadin nawamp nakash, kukwatijan ni yibachikin ya muntu ni muntu. Kurutu kwa kushinshikin bil mipak tufanyidina kukwat chakwel twilama ku yom yiney, tutalany bil mutapu ukash wasadilay Djabul yoziu kanang kudi Ev pakwez yakanganya kumuwish Mwan a Nzamb.

“MAKU MAYIMP MA KUMUJIMBU”

Ev wawila mu choziu mulong wa “maku mayimp ma kumujimbu” (Talany paragraf wa 7)

7. Ov, Satan wasadila mutapu ik “maku mayimp ma kumujimbu” chakwel amwoza Ev?

7 Antu akwet maswir ma usey ma kudish mujimbu—maswir ma yakudia. Sakatang watanga divu chakwel dibudisha yakudia yivud nakash. Satan ukutwish kupakish chakwel kutupwitin ku maku ma chivadik mulong wa yakudia ni kusal usu wa kuturumbul chakwel kangal twasal rusot ra Nzamb. Shinshikin amboku mutapu wasalay chinech kudi Ev. (Tang Disambishil 3:1-6.) Satan wamuleja Ev anch ukutwish kwend kudia dibuj dia ‘mutond wa ronganyin ra kuwap ni kuyip’ pakad kufa, ni kumulej anch dichuku dikudiay, ukwikal mudi Nzamb. (Dis. 2:9) Pa chinech Djabul wamekesha anch Ev kadingap nich kuswir kwa kumuziyil Nzamb chakwel ikala nich mwom. Mading makasu mamwing makash mudi ik! Pandama chitongijok chinech mu manangu ma Ev, wadinga nich mitapu yaad ya kutond: wela kudjibwil kulemp chitongijok chinech, ap kulik chishala mu manangu mend, kulikidil chakwel maku mend ma  kudia dibuj mapama. Ap anch amwinkisha mabuj ma mitond yikwau yawonsu yadinga mu chir, ndiy watonda yamulejay Satan piur pa dibuj dia mutond wadinga mukach mwa chir, ni “wapola dibuj diau, wadidia.” Chawiy lel, Satan walangwisha maku mau mulong wa chom chimwing chadinga chijidikinau kudi Sakatang.

Yesu kalikidinap chom ap chimwing chimukangesha kushinshaman (Talany paragraf wa 8)

8. Nich kusadil “maku mayimp ma kumujimbu,” ov, mutapu ik wapakishay Satan kumwoz Yesu ni mulong wak choziu chinech chakanganya?

8 Satan wasadina choziu cha mutapu umwing papakishay kumwoz Yesu mwimpay. Kupwa kwa Yesu kusal machuku 40 uchuku ni muten pakad kudia, Satan wapakisha kumupwitin Yesu ku maku mend ma yakudia. Satan wamuleja anch “Anch ey udi Mwan a Nzamb, dileja diyal ed dikarumuk dibot.” (Luka 4:1-3, TMK) Yesu wadinga ni mitapu yaad ya kutond: Kulik kusadil usu wend wa kusal yilay mulong wa kusangaresh maswir ma yakudia, ap kutond kusadil usu winou. Yesu wading wij nawamp anch kafanyidinap kusadil usu winou mulong wa ntong jend ja choy. Ap anch wadinga ni nzal, kuwanyish kwa maku ma yakudia kwasendap ndond ya kusambish pantaliken ni kulam urund wend ni Yehova. Yesu wamwakula anch, “Mukand wa Nzamb ulondin anch, ‘Muntu kakutwishap kwikal mwom mulong wa yakudia kusu pakwez ukwet kuswir kwa mazu mawonsu makat kulonday Nzamb [Yehova].’”​—Luka 4:4.

“MAKU MA MES”

9. Ov, chom ik chirumburikina dizu “maku ma mes,” ni mutapu ik wasadinay Satan maku minam mulong wa kumudimb Ev?

9 Yohan wajimbula kand “maku ma mes” mudi choziu. Mazu minam mamekeshin anch muntu ukutwish kusambish kusanger chom kanang kusutin ku kuchital. Ku yamushikena Ev, Satan wamudimba kusutil ku maku minam, ni kumulej anch: “Mes men makuburik.” Padandandamenay Ev kudital, dibuj dia mutond diamulikishau diamekana chad diwamp ku mes kwend. Ev wamana anch mutond “wadi kand uwamp pa kuutal ni mes.”

10. Mu mutapu ik wasadinay Satan “maku ma mes” chakwel amudimba Yesu, ni mutapu ik wamwakulay Yesu?

10 Ov, yashikena nchik ku mutambu wa Yesu? Satan “wamuleja [Yesu] mant mawonsu ma pa mangand. Chad wamwela anch: ‘Am nikukwinkish ey ukash wawonsu, ni mapit ma mant ma mangand mawonsu.’” (Luka 4:5, 6) Yesu kamanap mant mawonsu kapamp kamwing nich mes mend, pakwez Satan wamana anch katumb ka mant minima, mudi mwamulejay mu chishimu, kakwez kupwit yitongijok ya Yesu. Ni kuburen kalimish, Satan wamwela anch: “anch ey wangifukwil, yom yiney yawonsu yikez kwikal yeyey.” (Luka 4:7) Yesu kasotap kwikal kapamp ap kamwing mudi mwasotay Satan. Ndiy wamwakula kapamp kamwing. Wamuleja anch: “Mukand wa Nzamb ulondil anch, ‘Chifanyidin kumwifukwil [Yehova] Nzamb wey, ni kumusadil ndiy kusu.’”​—Luka 4:8.

 “KWIBAZ KWA YOM YIKWETAU NI KWA YOM YISADILAU”

11. Ov, mutapu ik wamudimbau Ev kudi Satan?

11 Pajimbwilay yom yidia mu mangand, Yohan ulejen “kwibaz kwa yom yikwetau ni kwa yom yisadilau.” Padingau Adam nenday Ev ayinau kusu pa divu, awiy kafanyinap ‘kwibaz kwa yom yikwetau’ kurutu kwa antu akwau. Pakwez kamekeshap chibud bwat. Pamwozay Ev, Satan walonda anch Nzamb wamukisha chom chimwing chiwamp nakash. Djabul wamuleja anch dichuku dikezay kudia “dibuj dia mutond ou wa ronganyin ra kuwap ni kuyip,” ukez ‘kwikal mudi Nzamb, mwin kwijik kuwap ni kuyip.’ (Dis. 2:17; 3:5) Chawiy lel, Satan wamekesha anch Ev wela kutaninamu mu kwikal nich want ipau pantaliken ni Yehova. Chamekana anch chibud chawiy chasala anch itiyija makasu minam. Ndiy wapola dibuj diamulikishau, ni kutong anch kakezap kwend chakin kamu kufa. Chading chom chiyimp mud ik!

12. Ov, mutapu ik ukwau wapakishay Satan kumudimb Yesu, ni mutapu ik wakulay?

12 Chinyim ni yamushikena Ev, ov, chilakej ik chamushena cha kwikepish chashay Yesu! Satan wapakisha kumudimb mu mutapu ukwau, pakwez Yesu walika chitongijok cha kusal chom chimwing chikash cha kumupak Nzamb. Chinech chela kwikal chisal chimwing cha chibud! Pakwez, Yesu wakula patok ni kapamp kamwing anch: “Mukand wa Nzamb ulondil anch, ‘Kangal wamupak [Yehova] Nzamb wey.’”​—Tang Luka 4:9-12.

OV, MUTAPU IK TUKUTWISHA KULAM URUND WETU NI YEHOVA?

13, 14. Rumburil mutapu ukatay Satan kusadil yoziu yimwing nlel unou.

13 Nlel unou, Satan ukat kusadil yoziu ya chilik chimwing ni yasadinay pantaliken ni Ev nenday Yesu. Mulong wa kuyibachik antu ku “maku mayimp ma kumujimbu,” Djabul ukat kusadil mangand minam mulong wa kukasikesh masandj ni kupandikesh kudia ni kuna. Kusutil ku pornografi, ku Internet, ukutwish kupwit chitongijok cha muntu wakad kubabal ni kumubachik ku “maku ma mes.” Yom ya kumujimbu, uyaj, ni kukimb katumb yidi kamu yoziu yikash kudi antu akweta chibud ni ‘ibazina piur pa yom yikwetau ni pa yom yasadilau’!

Ov, yany ik ya Bibil yiufanyidina kuvurik mu mikadil yiney? (Talany paragraf wa 13, ni wa 14)

14 “Yom yawonsu yidia mu mangand” yidi mudi andambu akatay kusadin mwin kulau ansh. Akat kupwitang ansh, pakwez ndambu ni ndambu ukwet dilau mukach mwend. Satan ukat kusadin yom yimeningau antu mudi maswir mawanyidina ma dichuku ni dichuku mulong wa kuyibachik chakwel asota kusal yom yidia chinyim ni yijil ya Nzamb. Pakwez, yoziu yiney yijingamena,  yidiaku mulong wa kubachik maku metu ni kuyipish muchim wetu. Kudi chakin kamu chibachikin chitwinkishina chitonjok chakwel anch kuwanyish maswir metu ni kukimb yom yiwamp kwikala pa ndond ya kusambish kurutu kwa kusal rusot ra Nzamb. Ov, yibachikin yiney yikez kwikal nich usu padi etu?

15. Ov, mutapu ik tukutwisha kumwimburij Yesu mu kurish nich yoziu ya Satan?

15 Ap anch Ev wawila mu yoziu ya Satan, pakwez Yesu watwisha kurish nich yoziu yiney. Chisu ni chisu, wapananga chakul chidiokila mu Mukand wa Nzamb, anch: “Mukand wa Nzamb ulondin anch” ap anch, “afunda anch.” Anch tudi in kwilej a Bibil akweta mushiku, tukwijik Bibil nawamp ni kuvurik maverse makutwisha kutukwash chakwel tudandamena kwikal nich yitongijok yiwamp pantaliken ni yoziu. (Kus. 1:1, 2) Kuvurik yilakej yidia mu Bibil ya antu awamp ading ashinshamena kudi Nzamb kukez kutukwash chakwel tuyimburija. (Rom 15:4) Kwikal ni wom wakin wa Yehova, kukatish yikatinay ni kukis yikisinay, kukez kutulam.​—Kus. 97:10.

16, 17. Ov, ‘manangu’ metu makutwish kwikal ni usu ik padi etu?

16 Kambuy Paul utukasikeshin anch tusadila ‘manangu’ metu chakwel twikala antu akarumwinau kudi chitongijok cha Nzamb, kangal kudi chitongijok cha mangand. (Rom 12:1, 2) Pisambinay piur pa kuswir kwa kushimpish muchim pa yom tutongina kusal, Paul walonda anch: “Tukat kushesh kand yom yikat kutekau in kwibaz mulong wa kukangesh antu kumwijik Nzamb. Tukat kukwat yitongijok yawonsu, kuyitek pamwing mudi mu winkwal chakwel yimuyiziyil Kristu.” (2 Kor. 10:5) Yitongijok yetu yikwet usu pa untu wetu, chawiy lel tufanyidin ‘kutongijokin’ pa yom yikasikeshina.—Fil. 4:8.

17 Tukutwishap kuchingejin kwikal antu atumbila anch tukwet yitongijok ni maku mijondila. Tufanyidin kumukat Yehova nich “muchim utok.” (1 Tim. 1:5, TMK) Pakwez muchim ukat kudimban, ni tukutwishap kujingunin mutapu ukwikala ni usu nakash padi etu “yom yawonsu yidia mu mangand.” (Jer. 17:9) Pakwez, tukutwishap kudandamen ‘kwipak ayinetu, ni kwirumburish ayinetu chakwel tutala anch tukwet ritiy’ mu kwishinshikin ayinetu nich kashinsh kusutil ku yom twilejina mu Bibil?​—2 Kor. 13:5.

18, 19. Ov, mulong wak tufanyidin kusal usu chakwel twikala nich untu umusangareshina Yehova?

18 Chom chikwau chikutwisha kutukwash kurish nich “yom . . . yidia mu mangand” chidi kulam mu manangu mazu minam ma Yohan mapepilau kudi Nzamb anch: “Mangand mayil ni kujiy pamwing ni yom yawonsu yikwetau nich antu ris, pakwez muntu mwawonsu ukata kusal rusot ra Nzamb ukez kupand chikupu.” (1 Yoh. 2:17) Ditenchik dia Satan dimeken mudi dikez kudandamen kwikalaku kamu ap anch didi diakin. Pakwez, dikez kusheshik dichuku dimwing. Kwikil chom chipaninau kudi mangand ma Satan chikutwisha kwikalaku chikupu. Kuvurik uyakin winou kukez kutukwash chakwel twipuka kuwil mu yoziu ya Djabul.

19 Kambuy Pita utukasikeshin chakwel twikala antu akweta dilau dia Nzamb ‘pituchingedila Dichuku dikurumburishay Nzamb. Tusala usu chakwel Dichuku dined dishika swa. Dichuku dinidia diawiy dikeza kutem maur, ni yom yawonsu ya mwiur yikweta yimunyik yikez kwengurik nich kasu.’ (2 Pita 3:12) Piswimp ap, dichuku dined dikushik, ni Yehova ukez kajiyish yikunku yawonsu ya mangand ma Satan. Ni katat, Satan udandamedin kusadil “yom . . . yidia mu mangand” mulong wa kutwoz, mudi mwasalay pantaliken ni Ev nenday Yesu. Pakwez, tufanyidinap kwikal mudi Ev wasota kusangaresh maku mend amwinend. Kusal mwamu kudi mudi muntu witiyijina anch Satan udi nzamb wetu. Tufanyidin kwikal mudi Yesu ni kurish nich yoziu yiney ap anch yoziu yiney yikutwish kwikal yiwamp ni yipwitina manangu. Ikasikeshany amboku muntu ni muntu chakwel twikala nich untu umusangareshina Yehova.