“Chijingidij ik chikeza kulejan chisu cha kushik kwey, ni cha disudiel dia mangand?”​—MAT. 24:3.

1. Mudi atwimbuy, chom ik tusotina kwijik?

PASHIKA piswimp ni kupwa kwa mudimu wa kulejan wa Yesu pa divu, in kwilej end asota kwijik yom yela kuyishiken mu machuku ma kurutu. Chawiy lel, mu machuku makemp kurutu kwa rufu rend, atwimbuy end anying amwipula anch: “Ov, chisu ik chikeza kushik yom yiney ap chijingidij ik chikeza kulejan chisu cha kushik kwey, ni cha disudiel dia mangand?” (Mat. 24:3; Mar. 13:3) Yesu wayakula kusutil ku uprofet umwing wela kuwanyin pa mangand mawonsu, wafundau mu Mateu shapitre wa 24 ni wa 25. Mu uprofet winou, Yesu watakela kulejan piur pa yinship yivud yishimokishina. Mazu mend makwet kurumburik kujim kudi etu mulong niyetu tusotin nakash kwijik yikeza kushiken mu machuku ma kurutu.

2. (a) Mu mivu yasutina, ov, chom ik twasota chakwel tushikena kutesh nawamp? (b) Ov, yipul ik yisatu tukeza kushinshikin?

2 Mu mivu yasutina, atushalapol a Yehova ileja mu malembil uprofet wa Yesu piur pa machuku mansudiel. Awiy asota kwijik nawamp chisu chikeza kuwanyin mazu ma Yesu. Chakwel tumana mutapu twatesha yom nawamp, tushinshikinany amboku yipul yisatu yisambidina piur pa “chisu ik.” Ov, chisu ik chikeza kusambish ‘mar makash’? Ov, chisu ik chikezay Yesu kuyirumburish “amikoku” ni “ampemb”? Ov, Yesu ukwez chisu ik ap chisu ik chikushikay?​—Mat. 24:21; 25:31-33.

OV, CHISU IK CHIKEZA KUSAMBISH MAR MAKASH?

3. Ov, pasak twatonga chom ik piur pa chisu cha mar makash?

3 Mu mivu kanang, twatonga anch mar makash masambisha mu muvu wa 1914 ni Njit ja 1 ja Mangand Mawonsu ni Yehova ‘wakepisha kuvul kwa machuku minima’ papwa njit mu muvu wa 1918 chakwel atushal a azizidilau many ikala ni mutapu wa kulejan rusangu ruwamp ku michid yawonsu. (Mat. 24:21, 22) Kwinsudiel kwa mudimu wa kulejan, want wa Satan akez kaujiyish. Chawiy lel, atonga anch mar makash makez kusadik mu yikunku yisatu: Kukwikal disambishil (1914-1918),  mar minam akez kumimik (kudiosh muvu wa 1918 ni kurutu), ni makez kushiken ku Armagedon.

4. Ov, ronganyin ik ratukwasha chakwel tutesha nawamp kurumburik kwa uprofet wa Yesu piur pa machuku mansudiel?

4 Pakwez, kupwa kwa kushinshikin nakash pa uprofet wa Yesu, twamana anch chikunku chimwing cha uprofet wend piur pa machuku mansudiel chawanyina mu tupamp twaad. (Mat. 24:4-22) Kuwanyin kwa kusambish kwashikena mu Yudeya mu mivu chitot ya kusambish ya C.C., ni ukez kand kuwanyin pa mangand mawonsu nlel unou. Ronganyin riner ratukwasha chakwel tutesha kurumburik kwa yom yivud. *

5. (a) Ov, chisu ik chikash chasambisha mu muvu wa 1914? (b) Ov, chisu chinech cha mar chikwatijadin nich chisu ik mu mivu chitot ya kusambish C.C.?

5 Twamana kand anch chikunku cha kusambish cha mar makash chasambishap mu 1914 bwat. Mulong wak bwat? Mulong uprofet wa Bibil wamekesha anch mar makash makezap kusambish ni njit pakach pa michid, pakwez makez kusambish ni kusheshik kwa relijon wa makasu. Chawiy lel, yom yashikena mu mu.vu wa 1914 yadingap disambishil dia mar makash bwat, pakwez yading “disambishil dia yakamish.” (Mat. 24:8, TMK) “Yakamish” yiney yidi mudi mar mashikena mu Yerusalem ni mu Yudeya kudiosh mu muvu wa 33 C.C. kushik ni mu muvu wa 66 C.C.

6. Ov, chom ik chikez kumekesh anch mar makash masambish kal?

 6 Ov, chom ik chikeza kumekesh disambishil dia mar makash? Yesu watakela kulejan anch: “En ukez kumanany Mukish Utakanena wa Kusheshan walonday Daniel, muruu wa Nzamb. Akez kumwimik mwi Ndond Yitumbila.” (Chifanyidin mwin kutang mazu minam atesha yom yiney nawamp!) “Pa chisu chinicha chifanyidin antu awonsu adia mu Yudeya achinyin ku mikandu.” (Mat. 24:15, 16) Mu kuwanyin kwa kusambish, ‘kwiman mwi Ndond Yitumbila” kwashikena mu muvu wa 66 C.C. pasheshau Yerusalem ni tempel wend ap (ndond  yading yitumbila kudi in Yuda) kudi chisak cha amasalay cha in Rom ap (Mukish Utakanena). Kuwanyin kukwau kujim, kwa ‘kwiman’ kukez kushiken pa chisu chikezay Nations unies (Mukish Utakanena wa katat) ukeza kusambish kushesh Kristendom (utumbila kurutu kwa antu akata kwitazuk anch in Kristu) ni chikunku chikwau cha Babilon Mujim. Kushesh kwinoku akulejen mu Kujingunik 17:16-18. Yom yiney yikez kwikal disambishil dia mar makash.

7. (a) Ov, mutapu ik ‘wapandau’ antu mu mivu chitot ya kusambish? (b) Chom ik tukutwisha kuchingejin chikushikena mu machuku ma kurutu?

 7 Yesu watakela kulond anch: “Nzamb watonda kal kukepish kuvul kwa machuku minam.” Kuwanyin kwa kusambish kwa yalonday Yesu kwashikena mu muvu wa 66 C.C. ‘pakepishau kuvul kwa machuku’ kudi amasalay in Rom. Kupwa, in Kristu azizidilau many adinga mu Yerusalem ni mu Yudiya achina, chakwel ‘apanda.’ (Tang Mateu 24:22; Mal. 3:17) Pakwez, chom ik tukutwisha kuchingejin chikushikena mu mar makash mezina? Yehova ukez “kukepish kuvul kwa machuku minam” mu kushesh kwa relijon wa makasu kudi Nations unies, pakad kulikidil anch relijon wakin asheshika pamwing ni wa makasu. Chinech chikez kulet kashinsh anch antu a Nzamb akez kukolik.

8. (a) Ov, yom ik yikeza kushiken kupwa kwa kusut kwa chikunku cha kusambish cha mar makash? (b) Ov, chimeken patok anch difut dia mwiur dia chid cha nsudiel cha antu 144 000 chikuditambul pa chisu ik? (Tal mazu ma kwinsudiel.)

  8 Ov, chom ik chashikena kupwa kwa kusut kwa chikunku cha kusambish cha mar makash? Mazu ma Yesu mamekeshin anch kukwikal chisu chimwing chikeza kusut kurutu kwa Armagedon kushik. Yom ik yikeza kushiken pa chisu chinicha? Chakul chidi mu Ezekiel 38:14-16 ni mu Mateu 24:29-31. (Tang.) * Kupwa, tukez kuman Armagedon ni mes metu, chisu cha nsudiel cha mar makash, chifanikeshinau nich kusheshik kwa Yerusalem mu muvu wa 70 C.C. (Mal. 4:1) Nich njit ja Armagedon mudi chisu chikash, mar minam makash mezina makwikal ma pakampwil​—chinship chimwing ‘chiyimp  kupandakan mar mamanau antu kudiokal ku disambishil dia mangand.’ (Mat. 24:21) Pakezay Armagedon kusut, Mivu Kanan ya kuyikel kwa Kristu yikusambish.

9. Ov, usu ik ukweta uprofet wa Yesu padi antu a Yehova piur pa mar makash?

9 Uprofet winou piur pa mar makash utukasikeshin. Mulong wak? Mulong utwinkishin kashinsh anch chikalap nchik mar makeza kutushiken, antu a Yehova awonsu, akez kupand ku mar makash. (Kuj. 7:9, 14) Kupwa kwa yawonsu, tusangaredin mulong ku Armagedon, Yehova ukez kuchidij ukaleng wend ni kutumbish dijin diend ditumbila.​—Kus. 83:18; Ezek. 38:23.

OV, CHISU IK CHIKEZAY YESU KUYIRUMBURISH AMIKOKU NI AMPEMB?

10. Ov, chom ik twatonga pasak piur pa chisu cha dirumburish dia amikoku ni ampemb?

10 Shinshikinany katat chisu chikeza kuwanyin chikunku chikwau cha uprofet wa Yesu​—chilakej cha dirumburish dia amikoku ni ampemb. (Mat. 25:31-46) Pasak, twading tutongin anch kuyirumburish antu mudi amikoku ap ampemb kukez kusadik mu machuku mawonsu mansudiel kusambishin pa muvu wa 1914 ni kurutu. Ni twalonda anch antu alika uruw wa Want ni afa kurutu kwa mar makash afa mudi ampemb​—pakad ruchingej ra kuvumbuk.

11. Mulong wak dirumburish dia antu mudi amikoku ni ampemb dielap kusambish mu 1914?

11 Mu muvu wa 1990, Chinong cha Kalam chisambina kand piur pa Mateu 25:31, chalejana anch: “Pakwezay Mwan a Muntu mudi Mwant pamwing nau aruu end awonsu a mwiur, ukez kushakam pa ditand diend dia uyaj.” Chamekana anch Yesu wikala Mwant wa Want wa Nzamb mu 1914, pakwez kashakamap “pa ditand diend dia uyaj” mudi nkalansambu wa “michid yawonsu.” (Mat. 25:32; ilikej nich Daniel 7:13.) Pakwez, chishimu cha amikoku ni ampemb chimumekeshin Yesu chakusambish mudi Nkalansambu. (Tang Mateu 25:31-34, 41, 46.) Mulong Yesu wading kandikal asambisha kusal mudi Nkalansambu wa michid yawonsu mu 1914, dirumburish diend dia antu adia mudi amikoku ap ampemb diasambishap mu muvu winiwa. * Chawiy lel, ov, chisu ik chikusambisha dirumburish dia Yesu?

12. (a) Ov, chisu ik chikezay Yesu kapamp ka kusambish kusal mudi Nkalansambu wa michid yawonsu? (b) Ov, yinship ik yilejenau mu Mateu 24:30, 31 ni Mateu 25:31-33, 46?

  12 Uprofet wa Yesu piur pa machuku mansudiel ulejen anch kapamp ka kusambish ukusal mudi Nkalansambu wa michid yawonsu kupwa kwa kusheshik kwa relijon wa makasu. Mudi muchilejenau mu  paragraf wa 8, yinship yimwing yikushikena pa chisu chinicha ayifunda mu Mateu 24:30, 31. Piushinshikidina ma verse minam, umen anch Yesu wasambela kulejan yinship yifanikena ni yalejanay mu chishimu cha amikoku ni ampemb. Chilakej: Mwan a muntu ukwez nich uyaj ni angel; michid yawonsu akuyikumagej; antu arumburishinau mudi amikoku ‘akuzambul mes [mau]’ mulong “mwom wa chikupu” uyichingedin. * Akurumburishau mudi ampemb akez “kudil,” pakumanau anch “kadimu ka chikupu” kayichingedin.​—Mat. 25:31-33, 46.

13. (a) Ov, chisu ik chikezay Yesu kurumburish antu mudi ampemb ap amikoku? (b) Ov, kutesh kwinoku kukwikal nich usu ik pa mutapu tumena mudimu wetu wa kulejan?

 13 Chawiy lel, chom ik tukutwisha kulond? Yesu ukez kurumburish michid yawonsu mudi amikoku ap mudi ampemb pakwezay pa chirung cha mar makash. Kupwa, ku Armagedon, chisu chikupandakana mar makash, antu afanikeshinau ni ampemb akez ‘kuyishesh’ chikupu. Ov, kutesh kwinoku kukwikal ni usu ik pa mutapu tumena mudimu wetu wa kulejan? Kutukwashin kuman anch mudimu wetu wa kulejan udi wa usey. Kushik ni pakusambishina mar makash, antu akez kwikal ni chisu cha kukarumun yitongijok yau ni kwendin mwi njil yiwongina ‘yiyila ku mwom.’ (Mat. 7:13, 14) Mulong wa kwikal nich kashinsh,  nlel unou antu akutwish kumekesh mwikadil wa antu afanikeshinau ni amikoku ap ampemb. Pakwez, tufanyidin kuvurik anch dirumburish dia nsudiel dia amikoku ni ampemb dikusadik pa chirung cha mar makash. Chawiy lel, tukwet diyingish diwamp dia kudandamen kuyikwash antu avud chakwel atesha ni alondula uruu wa Want.

Kushik ni pakusambishina mar makash, antu achikwet chisu cha kukarumun yitongijok yau (Talany  paragraf wa 13)

OV, CHISU IK CHIKUSHIKAY YESU, AP KWEZ?

14, 15. Maverse ik manying minsambidina piur pa kwez kwa Kristu mudi Nkalansambu kurutu oku?

14 Ov, kushinshikin kukwau kwa uprofet wa Yesu kumekeshin anch kutesh kwetu kwa chisu cha kusadik kwa yom yikwau ya usey kufanyidin kuswimp? Uprofet awinau uletin chakul. Tutalany mutapu uwakwila.

15 Mu chikunku chimwing cha uprofet wend udia mu Mateu 24:29–25:46, Yesu washinshikina chakusambish pa yom yikeza kushiken mu machuku minam mansudiel ni pa chirung cha mar makash mezina. Pinap, Yesu wisambidin tupamp chinan piur pa “kwez” kwend, ap kushik. * Piur pa mar makash, ndiy ulondin anch: “Pakez kumumanau Mwan a Muntu ukat kwez mu madj.” “Kiwijanyip dichuku dikez kushikay Nsalejen.” “Mwan a Muntu ukwez pa chisu chiwakadiany en kwijik.” Ni mu chishimu chend cha amikoku ni ampemb, Yesu walonda anch: “Pakez kezay Mwan a muntu mu uyaj wend.” (Mat. 24:30, 42, 44; 25:31) Ma verse minam mawonsu manying misambidin piur pa kwez kudia kurutu kwenday Kristu mudi Nkalansambu. Ov, kwisu tutanina mu uprofet wa Yesu ma verse minam manying?

16. Ov, kwez kwa Yesu akujimbwil kand mu maverse ik?

16 Piur pa kashalapol ushinshamena ni kubabal, Yesu ulondin anch: “Wayuk kwend kashalapol pakuchirikay [ap kwez] mwant wend, anch wamutan ukat kusal mudimu winou.” Mu chishimu cha ayangadim akad kal kwachik, Yesu walonda anch: “Payau ni kuland, ngatan washika.” Mu chishimu cha talent, Yesu walonda anch: “Chipasuta chisu chilemp, mwant wa atushalapol inay wachirika.” Mu chishimu chinech, mwant walonda anch: “Ing pineza kal ap, nelang kutambul.” (Mat. 24:46; 25:10, 19, 27) Tupamp tunying twinetu twa kwez kwa Yesu twisambidin chisu ik?

17. Ov, chom ik twalonda pasak piur pa kwez kulejenau mu Mateu 24:46?

 17 Pasak, twafunda mu mikand yetu anch maverse minam manying misambina piur pa kwez ap kushik kwa Yesu mu muvu wa 1918. Chilakej, tal mazu ma Yesu piur pa “kashalapol ushinshamena ni kubabal.” (Tang Mateu 24:45-47, TMK) Twatesha anch “kushik” kulejenau mu verse wa 46 kulondulijadin ni chisu chezay Yesu kusop mwikadil wa muspiritu wa antu azizidilau many mu muvu wa 1918 ni kumutek kashalapol pa yom yawonsu ya Mwant kwashikena mu muvu wa 1919. (Mal. 3:1) Pakwez, kushinshikin kukwau kwa uprofet wa Yesu kumekeshin anch kwading kuswir kwa kuswimp mu kutesh kwetu kwa yikunku kanang ya uprofet wa Yesu. Ov, mulong wak?

18. Kushinshikin kwa mazu mawonsu ma uprofet wa Yesu kutushikijin ku kulond nchik piur pa kwez kwa Yesu?

 18 Mu maverse matwadila ku Mateu 24:46, dizu “kwez” disambidin yisu yivud pa chisu chikezay Yesu kulet dirumburish pa chisu cha mar makash. (Mat. 24:30, 42, 44) Chikwau kand, mudi mutwamanang mu  paragraf wa 12, ‘Kushik’ kwa Yesu kulejenau mu Mateu 25:31 kwisambidin piur pa chisu chinech chimwing cha dirumburish dia kurutu oku. Chawiy lel choviken kulond anch kushik kwa Yesu mulong wa kumutek kashalapol ushinshamena ni kubabal piur pa yom yend yawonsu, kulejenau mu Mateu 24:46, 47, kwisambidin kand piur pa kwez kwend kwa machuku ma kurutu, pa chirung cha mar makash. * Chakin kamu, mazu mawonsu ma uprofet wa Yesu malejen patok anch maverse minam mawonsu chinan piur pa kwez kwend misambidin piur pa dirumburish dia machuku ma kurutu pa chirung cha mar makash.

19. Ov, kutesh ik kwa katat twashinshikinang, ni yipul ik yikwakulau mu mitu ya milong yilondwilaku?

19 Mu wiswimp, ov, chom ik twileja kal? Kwinsambishil kwa mutu wa mulong winou, twalangwishang yipul yisatu yisambishina ni “chisu ik.” Chakusambish twashinshikinang anch mar makash masambishap mu muvu wa 1914 pakwez makusambish pakezay Nations unies kumushesh Babilon Mujim. Chikwau kand, twamanang kand mulong wak dirumburish dia Yesu dia amikoku ni ampemb diasambishap mu 1914 pakwez dikez kushiken pa chirung cha mar makash. Kupwa, twashinshikinang mulong wak kwez kwa Yesu chakwel kumutek kashalapol ushinshamena pa yom yend yawonsu mu muvu wa 1919 pakwez ukez kumutek pa chirung cha mar makash. Chawiy lel, yipul yawonsu yisatu yisambishina ni “chisu ik” yisambidin piur pa chirung chimwing cha kurutu​—mar makash. Ov, mutapu ik kukutwisha kutesh kwinoku kwa katat kwikal nich usu pa kutesh kwetu kwa chishimu cha kashalapol ushinshamena? Chikwau kand, mutapu ik chikweta usu pa kutesh kwetu kwa yishimu yikwau, ya Yesu yiwanyidina pa chirung chinech cha nsudiel? Yipul yiney ya usey tukez kuyishinshikin mu mitu ya milong yilondwilaku.

 

^ par. 4 Paragraf wa 4: Chakwel wijikany yom yivud, talany Chinong cha Kalam, cha Kasan 15, 1994 (Français) pa paj wa 8-21 ni cha Ndol-Mem 1, 1999, (Français) pa paj wa 8-20.

^ par. 8 Paragraf wa 8: Chinship chimwing chilejenau mu maverse minam kudi “kuyikumangej antu atonday.” (Mat. 24:31) Chawiy lel, chimeken anch azizidilau many awonsu achidia pa divu kupwa kusut kwa chikunku cha kusambish cha mar makash akez kuyivumbul chakwel aya mwiur kurutu kwa kusambish kwa njit ja Armagedon. Kutesh kwinoku kwa katat kuswimpin yalejanau mu mutu wa mulong “Yipul ya in Kutang” mu Chinong cha Kalam cha Kafumpul 15, 1990, (Français) pa paj wa 30.

^ par. 11 Paragraf wa 11: Talany Chinong cha Kalam, cha Mwinkind 15, 1995, (Français) pa paj wa 18-28.

^ par. 12 Paragraf wa 12: Talany rusangu ra chilik chimwing mu Luka 21:28.

^ par. 15 Paragraf wa 15: Mazu “kwez” ni “kushik” madiokil ku dizu dimwing dia Grek erʹkho·mai.

^ par. 18 Paragraf wa 18: Mudi mwalejanau, dizu dia Grek dikarumwinau anch “pakuchirikay” mu Mateu 24:46 udi mulad wa dizu diawiy dimwing dia Grek dikarumwinau anch “kwez” mu Mateu 24:30, 42, 44.