“Kujingunin yom yipandakena kuwap.”—FIL. 1:10.

1, 2. Ov, uprofet ik piur pa machuku ma nsudiel wafanyidin kupwit manangu ma in Kwilej ni mulong wak?

PITA, ni Jakobu, ni Yohan, ni Andare ading ayinau pamwing ni Mwant wau. Mazu malonday Yesu kwinsambishil piur pa kusheshik kwa tempel mading makash kudi awiy. (Mar. 13:1-4) Chawiy lel, awiy amwipula anch: “Ov, chisu ik chikeza kushik yom yiney ap chijingidij ik chikeza kulejan chisu cha kushik kwey, ni cha disudiel dia mangand?” (Mat. 24:1-3) Yesu wasambisha kuyilej piur pa yinship, ap mikadil, yela kukarumun yom mu mwom ni kujingunin machuku ma nsudiel ma ditenchik dia yom dia Satan. Chinship chimwing cha pakampwil chafanyidina kupwit manangu ma in kwilej a Yesu. Kupwa kwa kuyilej yom yakamishina yafanyidina kushiken mudi njit, kamungun, ni kuvulijan kwa kuyip, Yesu watakela kulejan piur pa chom chimwing chiwamp nakash chafanyidina kumekesh anch madi machuku ma nsudiel. Ndiy walonda anch: “Chifanyidin Rusangu Ruwamp ra Want wa Nzamb ez arulejan bil ku mangand mawonsu ni kwikal uman kudi antu a michid yawonsu, chad lel disudiel dia mangand dieza.”—Mat. 24:7-14.

2 In Kwilej a Yesu asangera kulejan rusangu ruwamp ra Want pamwing ni Kristu. (Luka 8:1; 9:1, 2) Awiy afanyidina kuvurik yalonday anch: “Yakwangul yidi yivud, pakwez in mudimu wa kwangul adi akemp. Mulembijekany mwin chir chakwel ukutum in mudimu wa kwangul avud.” (Luka 10:2) Pakwez, mutapu ik welau kulejan “ku mangand mawonsu” ni kupan “uman kudi antu a michid yawonsu”? Ov, kwisu kwelau kudiokal in mudimu? Anch ading kwau ni kuchingejin mu machuku ma kurutu ni kushakam kusu ni Yesu pa chisu chinicha! Awiy kelap chakin kamu kushimok pa kuman kuwanyin kwa mazu minam makemp madia mu Mateu 24:14.

3. Ov, Luka 21:34 uwanyindin mutapu ik nlel unou, ni chom ik tufanyidina kushinshikin piur pa ayinetu?

 3 Tudi pa chirung cha kuwanyin kwa uprofet wa Yesu. Ma miliyon ma antu masadil pamwing mulong wa kwizwish divu nich kulejan kwa rusangu ruwamp ra Want. (Isay 60:22) Pakwez, Yesu walejana anch antu avud akez kukangany kulam rutong rau mu machuku minam ma nsudiel. Awiy akez kuwil mu kuzuwol ni ‘kuchinchik mu michim yau.’ (Tang Luka 21:34.) Tumen katat kuwanyin kwa mazu minam. Antu amwing pakach pa antu a Nzamb adi in kuzuwol. Chinech chikutwish kumekan mu mupak ukwatinau piur pa mudimu wa kumujimbu, shikol ya piur, ni kwikal nich yom ya kumujimbu, ni kusutish yisu yivud mu masengan ni mu kwipuwangesh. Antu akwau aziyin mulong wa yipwichik ni yakamish ya dichuku ni dichuku. Iyipula amwiney anch: ‘Ov, mutapu ik nisadila? Ov, mupak ik nikwatina piur pa rutong ram mu mwom?’

4. (a) Ov, chom ik chalembilay Paul piur pa in Kristu a kusambish, ni mutapu ik wakulau antu avud? (b) Ov, chom ik tukeza kushinshikin mu mutu winou ni ulondwilaku ni nich rutong ik?

4 In Kristu a mu chitot cha kusambish cha mivu asala usu wa kulam yom yau ya usey nakash ya muspiritu. Kambuy Paul wamana usey wa kulembil anch antu adinga mu ul wa Filip ashikena ku “kujingunin yom yipandakena kuwap.” (Tang Filip 1:9-11.) Mudi kambuy Paul, antu avud pasak ‘aweja kand kujijaman kwa kurumburil dizu dia Nzamb patok wakad wom.” (Fil. 1:12-14) Chilik chimwing, antu avud pakach petu akat kulejan Dizu dia Nzamb nich mushiku. Ov, kushinshikin yom yisadikina katat mu dirijek dia Yehova kukutwish kutukwash kutek manangu metu nakash pa mudimu winou wawonsu wa usey wa kulejan? Chakin kamu chitwishikin! Mu mutu wa mulong winou, tutonginany amboku pa dirijek dia Yehova diatekay mulong wa kuswapesh kuwanyin kwa Mateu 24:14. Ov, rutong ik rikweta dirijek dined, ni kwijik chinech kukutwish kutukasikesh etu ni dijuku dietu mutapu ik? Mu mutu wa mulong ulondwilaku, tukez kushinshikin chikutwisha kutukwash kujijaman ni kushal dang mu dirijek dia Yehova.

CHIKUNKU CHA MWIUR CHA DIRIJEK DIA YEHOVA CHIYIL KURUTU

5, 6. (a) Ov, mulong wak Yehova wapana chishimushimu cha chikunku cha dirijek diend dia mwiur? (b) Ov, chom ik twilejidina kusutil ku chishimushimu cha Ezekiel?

5 Kudi yom yivud yatonday Yehova kulik kutek mu Dizu diend diafundau. Chilakej, ndiy kalejanap kachom pa kachom piur pa mutapu wong ukat kusal ap mutapu usadila diur, ap anch jinsangu mudi jinej jela kwikal jamushena nakash mudi ik! Pakwez, Yehova watuleja jinsangu tuswiridina chakwel tutesha jintong jend ni kushakam kwambatan nich. (2 Tim. 3:16, 17) Chidi chom chisangareshina mud ik, anch Bibil utulejin yom yimwing piur pa yom yakad kumekan ya dirijek dia Yehova! Tusangaredin nakash pa kutang kurumburil piur pa ditenchik dia mwiur dia Yehova kusutil kudiay Isay, Ezekiel, ni Daniel ni mu Kujingunik kwa Yohan. (Isay 6:1-4; Ezek. 1:4-14, 22-24; Dan. 7:9-14; Kuj. 4:1-11) Chidi mudi anch Yehova wadioshin diswin chakwel tumana mwiur. Ov, mulong wak ndiy waleta rusangu riner?

6 Yehova wasota anch kangal twavuramen anch tudi mu dirijek dia mangand mawonsu. Kudi yom yivud nakash yimedina piur pa kupan ukwash kwi ntong ja Yehova mudi mutukutwisha kuman. Chilakej, Ezekiel wamana chikunku chakad kumekan cha dirijek dia Yehova chamekeshau kusutil ku ditemb dimwing dijim dia mwiur. Ditemb dined diading diyila swa ni kukarumuk kapamp kamwing. (Ezek. 1:15-21) Nich kukarumuk kwawonsu kwa jinfumbu jad, ditemb dined dikutwish kuya kulemp nakash.  Mu chishimushimu, Ezekiel watwish kuman chom chifanikena ni muntu pa ditemb dined. Ndiy walonda anch: “Kuns kwa chom chinech kwading kuzutil. Kudiokal mwi mbund kuya ku mutu chading chipayil mudi utad wa bronze . . . Chimunyik chinech chijadishena pa mes chilejen uyaj wa [Yehova].” (Ezek. 1:25-28) Chading chom chamushena mudi ik chamanay Ezekiel mu chishimushimu chinech! Ndiy wamumana Yehova ukat kutakel dirijek diend, ukat kuditakel kusutil ku spiritu wend utumbila. Chidi chifanikesh chimwing chamushena mudi ik cha chikunku cha mwiur cha dirijek dia Yehova diyila kurutu!

7. Ov, chishimushimu chapanau kudi Daniel ditwinkishin ruchingej mutapu ik?

7 Daniel wamana ni ndiy yom yivud mulong wa kutwinkish ruchingej. Amutwishisha kumuman chifanikesh cha Yehova mudi “ukweta mwom kudiokal pakur wakad disambishil” ushakamin pa ditand didioshina kasu. Ditand dined diading adiazukin pa mfumbu. (Dan. 7:9) Yehova wasota anch Daniel amana dirijek Diend mu chifanikesh, dikat kuwanyish rutong Rend. Daniel wamumana kand “Mwan a muntu,” Yesu, amwinkishin want chakwel ayikela chikunku chidia pa divu cha dirijek dia Yehova. Umutakel uwanyidina wa Kristu ukezap kwikalaku mu mivu yikemp bwat. Pakwez, “kuyikel kwend kikukez kupwap, ni want wend ukez kwikal wa mivu ni minang.” (Dan. 7:13, 14) Tufanyidin kuchingejin mudiay Yehova ni mu yom yikatay kusal. Ndiy wapana “usu wa kuyikel ni uyaj, ni want” kudi Mwanend ushinshamena, Yesu. Yehova ukat kumuchingejin Mwanend. Chawiy lel, tukutwish kuchingejin mu umutakel wa Yesu.

8. Ov, yishimushimu ya Yehova yadinga nich usu ik padiay Ezekiel ni Isay, ni mutapu ik yikutwisha kwikal nich usu padi etu?

 8 Ov, kumekan kwinoku kwa chikunku chakad kumekan cha dirijek dia Yehova kufanyidina kwikal ni usu padi etu mutapu ik? Mudi Ezekiel, tushimokin ni kwitudish mulong wa yom yikatay Yehova kusal. (Ezek. 1:28) Kutongijokin pa dirijek dia Yehova kukutwish kukubachik chakwel usala mudi mwasalay Isay. Pamanay chisu cha kuyilej antu akwau piur pa yom yisadinau kudi Yehova, ndiy walejana pakad kwidjikek. (Tang Isay 6:5, 8.) Isay wading uchingejin anch nich ukwash wa Yehova, ndiy ukutwish kupandakan yikokujol yawonsu. Chilik chimwing, chishimushimu chinech cha chikunku chakad kumekan cha dirijek dia Yehova chifanyidin kusal anch twikal nich wom ni kutubachik chakwel tusala. Chidi chom chamushena mudi ik pa kuman dirijek dined, didandamedina kuya kurutu, ni dimedina piur pa kuwanyish ntong ja Yehova!

CHIKUNKU CHA PA DIVU CHA DIRIJEK DIA YEHOVA

9, 10. Ov, mulong wak kwading kuswir kwa chikunku chimekena nich mes cha dirijek dia Yehova?

9 Kusutil kudi Mwanend, Yehova wateka dirijek dimwing pa divu disadila mu kwovijan nich chikunku chakad kumekan cha dirijek diend. Ov, mulong wak kwadinga kuswir kwa dirijek dimekena chakwel kuwanyish mudimu walejanau mu Mateu 24:14? Shinshikin mayingish minam masatu.

10 Chakusambish, Yesu walonda anch mudimu winou wa kulejan wafanyina kuyitwal in kwilejend “djat ni kusudiedila mangand.” (Mid. 1:8) Chakaad, dirijek diading dia usey mulong wa kupan yakudia ya muspiritu ni kuyibangin antu ipana mu mudimu winou. (Yoh. 21:15-17) Chakasatu, afanyidina kuwanyish maswir ma antu adinga ni kulejan rusangu ruwamp chakwel akumangana pamwing mulong wa kumwifukwil Yehova ni kwilej mutapu wa kusal mudimu winou. (Heb. 10:24, 25) Kuwanyish ntong jinej kwelap kusadik pakad dirijek. Kudi in kumulondul Kristu mulong wa kutwish, afanyidina kurijek nawamp mudimu wau.

11. Ov, mutapu ik tukata kumekesh anch tupanin ukwash ku yitenchik yasalau kudi dirijek dia Yehova?

11 Ov, mutapu ik tumekeshina anch tupanin ukwash ku yom yitenchikinau kudi dirijek dia Yehova? Mutapu umwing wa usey udi kusutil ku kutek chisu chawonsu ruchingej retu mudiau antu achingejinau kudi Yehova ni Yesu mulong wa kututakel mu mudimu wetu wa kulejan. Kudi mijikit yivud ap midimu mu mangand nlel unou yifanyidinau kushinshikin nakash kudi antu atutakedila. Pakwez, ov, chom ik chadandamenau kushinshikin pa chikunku cha dirijek dia Yehova chimekena ni mes?

ASHINSHIKINA PA “YOM YIPANDAKENA KUWAP”

12, 13. Mutapu ik ukatau amakurump in Kristu kusend yisend yau, ni mulong wak chidi chom chikasikeshina kudi ey?

12 Amakurump in Kristu akweta ronganyin rijim adia pa mangand mawonsu ayiteka chakwel atakela ni kukasikesh mudimu wa kulejan Want mwi ngand musadidinau. Mudi pakwatinau akadivar inay mipak, akat kukimb umutakel udiokila mu Dizu dia Nzamb, kudisal kwikal ‘kutok ku mend mau ni chimunyik mwi njil yau’ ni kulembil nakash chakwel Yehova ayitakela.—Kus. 119:105; Mat. 7:7, 8.

13 Mudi antu atakela mu chitot chakusambish cha mivu, amakurump in Kristu atakedila mudimu wa kulejan nlel unou akat kwipan “kurumburil mazu ma Nzamb yisu yawonsu.” (Mid. 6:4) Asangaredin nakash piur pa kuya kurutu kumekena mu kulejan rusangu ruwamp kwol kwau ni pa mangand mawonsu. (Mid. 21:19, 20) Kakatap kutek yijil yivud ni yom yivud ya kusal bwat. Pakwez, akat  kulondul Bibil ni umutakel wa spiritu utumbila wa Nzamb pakatau kutenchik yom ya usey mulong wa kupan ukwash ku mudimu wa kulejan chakwel uya kurutu. (Tang Midimu 15:28.) Mu kusal mwamu, akadivar inay akweta yisend aletin chilakej chiwamp kudi antu awonsu adia mu yikumangen yau.—Efes 4:11, 12.

14, 15. (a) Ov, yitenchik ik yidiaku mulong wa kupan ukwash ku mudimu wa kulejan pa mangand mawonsu? (b) Ov, mutapu ik wiyovila piur pa ukwash wey upanina ku mudimu wa kulejan Wantu?

14 Pakad kuyiman, antu avud adandamedin kusal midimu ya kutenchik yakudia ya muspiritu yidia mu mikand yetu, ku yikumangan, ni ku yitentam. Tunan twa in mudimu wa kwisotil tusadil pakad kuziy mudimu wa kukarumun mu jindim 600 chakwel antu avud atwisha kwilej piur pa “midimu yijim yasalay Nzamb” mu rudim rau. (Mid. 2:7-11) Akadivar ansand ni anambaz ayangadim asadin mudimu wa kuchap mikand yetu nich mashiny majim makat kuchap swa ni ma mashin makwau. Mikand yiney ayangen ku yikumangen ap ku jindond jidia kulemp pa divu.

15 Atenchikin yom yivud chakwel tutwisha kutek manangu pa kulejan rusangu ruwamp mu chikumangen chetu. Chilakej, tunan twa in kwipan tukat kupan ukwash wa kutung Yot ya want, Yot ya yitentam, kuyikwash antu akwachikina nich mar ma chitangil ap asotina kuyok kudi amingang, kutenchik yitentam yetu ni kulejan ku shikol ya uteokras, yawiy yom yikemp pakach pa yom yivud yikata kusadik. Ov, mudimu winou wawonsu ukwet rutong ik? Udiaku mulong wa kuswapej mudimu wa kulejan rusangu ruwamp, kukudish ukash wa muspiritu wa antu asadila mudimu winou, ni kutwal difukwil diakin kurutu. Ov, chikunku chidia pa divu cha dirijek dia Yehova chadandamedin kushinshikin pa yom yipandakena kuwamp? Mwaning chasala mwamu!

LONDUL CHILAKEJ CHA DIRIJEK DIA YEHOVA

16. Ov, wisu ukwikala mulad uwamp wa kwilej Bibil amwiney ap mu dijuku diey?

16 Ov, tukat kwitekin chisu cha kutongijokin pa midimu ya dirijek dia Yehova? Antu amwing atonda kuwejinaku chisu mu difukwil diau dia dijuku ap mu dilejan diau dia muntu ipend chakwel kukimbijol piur pa midimu yiney ni kuyitongijokin. Chishimushimu chapanau kudi Isay, Ezekiel, Daniel, nenday Yohan chiletin dilejan dimwing diamushena. Buku Les Témoins de Jéhovah — Prédicateurs du Royaume de Dieu ni mikand yikwau ap ma DVD madiaku mu rudim rey yiletin chovu chijim piur pa dirijek.

17, 18. (a) Ov, mutapu ik utanina yiyukish mu minsamb yiney? (b) Ov, yipul ik tufanyidina kushinshikin?

17 Kutongijokin pa yom yasalay Yehova kusutil ku dirijek diend kuwapin kudi etu. Pamwing nich dirijek dined diamushena, tusalany amboku usu wa kudandamen kushinshikin pa yom yipandakena kuwap. Kusal mwamu kukez kutukasikesh chakwel tukwata mupak mudi Paul, wafunda anch: “Twatambula mudimu winou ku riy ra Nzamb, chawiy kitukuziyap mu michim yetu.” (2 Kor. 4:1) Ndiy wayikasikesha kand ambay nend a mudimu anch: “Chawiy kangal twaziy kusal yom yiwamp, mulong pa chirung chiwanyidina tukez kwangul yom yiwamp.”—Gal. 6:9.

18 Ov, kudi kutenchik tufanyidina kusal ayinetu ap mu dijiku chakwel kwikala nich kashinsh piur pa yom yipandakena kuwap mu yisal yetu ya dichuku ni dichuku? Ov, tukutwish kuswapej mwom wetu ni kukepish kuzuwol chakwel tushinshikina nakash pa mudimu upandakena usey wa kulejan? Mu mutu wa mulong ulondwilaku, tukez kushinshikin yom yitan yikeza kutukwash chakwel twenda pamwing ni dirijek dia Yehova.