“Nikat kusangar mulong wa yijil ya Nzamb.”—ROM 7:22.

1-3. Ov, yiyukish ik yatambulau antu mu kutang Bibil ni mu kusadil malejan mend?

“NIMUJIKITISHIN Yehova pamanch pawonsu mulong winkwashin kutesh Bibil.” Nambaz mwin Kristu ipal walonda mwamu, wading watangin kal Bibil mwawonsu tupamp 40, ni wading udandamedin kumutang. Changadim umwing wafunda anch kutang Bibil kwamukwasha chakwel amana anch Yehova udiaku chakin kamu. Mudi chibudikin, ndiy waseja piswimp ni Tatukwend wa mwiur. Ndiy walejana anch, “Kandikal nikalap ni musangar mwamu mu mwom wam!”

2 Kambuy Pita wayikasikesha antu awonsu chakwel “ikala nich impu yikash ya yom ya Nzamb.” (1 Pita 2:2) Antu awanyishina impu yiney kusutil ku kwilej Bibil ni akata kusadil malejan ma Bibil akwet kom katok ni rutong mu mwom. Awiy akudishining urund ukata kulab nakash ni antu akwau amukatina niyawiy ni kumusadil Nzamb wakin. Minam mawonsu madi mayingish makin ma “kusangar mulong wa yijil ya Nzamb.” (Rom 7:22) Pakwez kudi kand yiyukish yikwau yivud. Ov, yisu yimwing ya yiyukish yiney?

3 Anch wilej nakash piur pa Yehova ni Mwanend, rukat rey mulong wa awiy ni mulong wa ambay ney antu rikez kukul ni rawiy. Kwikal nich ronganyin rakin piur pa Mukand wa Nzamb kukukwashin chakwel umana mutapu ukezay Nzamb piswimp ap kuyikol antu amuziyidila ku ditenchik dined difila. Ukwet uruu wa dikasikesh wa rusangu ruwamp wa kupan kudi antu mu mudimu wey wa kulejan. Yehova ukez kakuyukish piukata kuyilej antu akwau yom wileja mu kutang Dizu dia Nzamb.

KUTANG NI KUTONGIJOKIN

4. Ov, chom ik chirumburikina kutang Bibil nich ‘kutongijokin ap ni dizu dia pansh’?

4 Yehova kasotinap anch atushalapol atanga piur-piur Dizu diend. Ndiy wamuleja Joshua wa pasak anch: “Mukand  wa yijil yiney uwapidil kwez kwikal mu kan mwey. Ukez kutongijokang muten ni uchuku.” (Jos. 1:8; Kus. 1:2) Ov, malejan minam mamekeshin anch ufanyidin kutang ni dizu dia pansh kusu mazu mawonsu utangina kudiosh ku Disambishil djat ni ku Kujingunik? Bwat. Chinech chirumburikin anch ufanyidin kutang mu mutapu wa kukutwishish kutongijokin. Piutangina Bibil nich ‘kutongijokin ap ni dizu dia pansh,’ chinech chikez kukukwash chakwel ushinshikina manangu mey pa yikunku yidia pakampwil ya usey ni yikasikeshin kudi ey pa chisu chinicha. Piutanina mazu, maverse, ap jinsangu, yitanga pakemp-pakemp, ukutwish pamwing ap kutang mazu nich rudim ni milamu. Manans ma usey ma Bibil makutwish kukushik amwiney mu mutapu umwing ukash. Ov, mulong wak chinech chidi cha usey? Mulong kutesh kurumburik kwa chiyul cha Nzamb kukat kukukasikesh nakash ku kuchisadil.

5-7. Lejan mutapu kukutwisha kukukwash kutang Dizu dia Nzamb nich dizu dia pansh (a) kwikal nich mwikadil wishitwila; (b) kwikal in kushimpish muchim ni kudimuk pantaliken ni antu akwau; (c) kumuchingejin Yehova ap pa chisu cha mar.

5 Kutang nich dizu dia pansh kudi kwa ukwash piutangina mukand wa Bibil wakad kwijik nawamp. Chilakej, tongin bil pa mikadil yiney yisatu. Cha kusambish, tongin pa nsand udia mukadivar mwin Kristu ukweta program wa dilejan dia muntu ipend dia kutang uprofet wa Ozey. Mu shapitre wa 4, wiman kupwa kwa kutang verse wa 11 kushik ku 13 nich dizu dia pansh. (Tang Ozey 4:11-13.) Ov, mulong wak? Maverse mapwitin manangu mend mulong wasala usu mulong wa kurish nich chibachikin cha kusal uyimp ku shikol. Ndiy ukata kutongijokin pa maverse minam ni utongin anch: ‘Yehova umen yom yiyimp yisadinau antu ap mu ujindj. Nisotinap kumusadin uyimp.’ Mukadivar witekina mupak wa kwikal nich mwikadil wishitwila kurutu kwa Nzamb.

6 Mu mwikadil wa kaad, changadim umwing mwin Kristu utangin uprofet wa Joel ni washik pa shapitre wa 2, verse wa 13. (Tang Jowel 2:13.) Patanginay verse winou nich dizu dia pansh, ukat kutongijokin piur pa mutapu wa kumwilikej Yehova, “udimukin, ukwet kand riy. Ushimpishish muchim.” Ndiy wakwat mupak wa kuwapish mazu mend ni kwipuk masaal ni ujim yadingay ni kusadil padingay ni kulond nenday nfumwend ni antu akwau.

7 Cha kasatu, tongin bil tatuku mwin Kristu washadisha mudimu wend ni wakamin piur pa ukash wa mujimbu wa mukajend ni wa anend. Mu mukand wa Nahum 1:7, utangin nich dizu dia pansh anch Yehova “ukat kuyilam awiy akata kwikangil kudi ndiy” ni uyilamin mudi mwin “kuyichidij . . . pa chisu cha mar.” Chitongijok chinech chamukasikesha. Ni uteshin kudimukin kwa rukat kwa Yehova ni walik kwinan mu mutapu upandakenamu. Kupwa watang verse wa 15 nich dizu dia pansh. (Tang Nahum 1:15.) Mukadivar netu umen anch kusutil ku kulejan rusangu ruwamp mu chisu cha mar, umekeshin chakin kamu anch, umumen Yehova mudi dipat diend. Padandamedinay mukadivar kukimb mudimu wa kumujimbu, katat wikal kal ubachikinau kand kwipan mu mudimu wa kulejan wa kwinsudiel kwa rubing.

8. Isambina mu wiswimp piur pa chipau cha mu spiritu watana mu kutang kwey kwa Bibil.

8 Manans mamwing ma ukwash mudi majimbwilau madiokil mu mikand ya Bibil makutwishau antu amwing kuman anch chikasiken kumatesh. Piutangina buku wa Ozey, wa Jowel, ni wa Nahum nich rusot ra kwilej, ukusot kutang kand maverse makwau mu mikand yiney nich dizu dia pansh. Tongin bil manangu ni dikasikesh ukeza kwikal nich anch watang uprofet winou! Ni chidi nchik piur pa mikand yikau ya Bibil? Dizu dia Nzamb didi mudi ndond yikatau kupund diamant. Sal nawamp mwin ndond yiney! Mwaning, tang Bibil mwawonsu nich rutong ra kutan umutakel ni dikasikesh dia Nzamb.

 KASIKESH CHAKWEL UTESHA

9. Ov, mutapu ik tukutwisha kuwejinaku nteshil yetu ya rusot ra Nzamb?

9 Pichidia cha usey kutang dichuku ni dichuku chikunku cha Bibil, usotin kand kwikal nich nteshil ni chovu. Chawiy lel, sadil nawamp mikand ya dirijek dia Yehova mulong wa kukimb mikadil ya antu, ndond, ni yinship utangina. Ap anch wasambish kwiyipul piur pa mutapu ukutwisha malejan mamwing ma Bibil kwikal nich usu pa mwom wey, ukutwish kumwit mukurump umwing wa chikumangen ap mwin Kristu mukwau uswila muspiritu chakwel akukwasha. Chakwel kumekesh usey wa kuwejinaku kwin nteshil yetu, tushinshikinany chilakej cha mwin Kristu umwing wa mu chitot cha mivu cha kusambish wikasikesha kusal mwamu. Dijin diend diadinga Apolo.

10, 11. (a) Ov, mutapu ik wamukwashau Apolo chakwel aya kurutu mu kulejan rusangu ruwamp? (b) Ov, chom ik tukutwisha kwilejin kusutil ku rusangu ra Apolo? (Tal mushet “Ov, Malejan Mey Madi Masu?”)

10 Apolo wadinga mwin Kristu mwin Yuda wadinga “wija kulond nawamp, wading wij kand Mukand wa Nzamb nakash” ni “warumburilanga mazu ma Nzamb nich mushiku.” Buku wa Midimu wisambidin piur pend anch: “Walejananga kand yom yakin ya Yesu. Pakwez ndiy wading wij ching kusu dibatish dia Yohan.” Pakad kwijik, Apolo wading ulejen yom ya pasak piur pa dibatish. Pateshau malejan mend mu Efes, ambay amwing aad in Kristu, Prisil ni Akila amurumburila mutapu ‘wakin nakash njil ya Nzamb.’ (Mid. 18:24-26) Ov, chinech chamuyukisha mutapu ik Apolo?

11 Kupwa kwa kulejan ku Efes, Apolo waya ku Akey. “Chashikay kwinikwa, ndiy wayikwasha nakash antu ikala in kwitiyij mulong wa ranaken ra Nzamb. Ndiy watadikijana nau in Yuda pakach pa antu, chad mulong wa mazu mend makash ndiy wamekesha kurumbuk kwa in Yuda. Chawiy wayishinshika nich Mukand wa Nzamb anch, Yesu ndiy kamu Kristu Uzizidilau Many.” (Mid. 18:27, 28) Pa chisu chinicha, Apolo watwisha kurumburil katat piur pa kurumburik kwa  dibatish dia in Kristu. Nich kuwejinaku kwa nteshil, “wayikwasha nakash” antu asu chakwel aya kurutu mu difukwil diakin. Ov, chom ik tukutwisha kwilejin mu rusangu riner? Mudi Apolo, tukat kwikasikesh kutesh yitutangina mu Bibil. Pakwez, anch mbay umwing mukaritiy watulej mutapu tukutwisha kulejan nawamp, tukwitiyij ukwash winou nich kwitudish ni kujikitish. Anch twasal mwamu, tukez kuwapish mutapu wetu wa kusal mudimu utumbila.

SADIL YIUWILEJINA CHAKWEL KUYIKWASH ANTU AKWAU

12, 13. Rumburil mutapu ukutwisha kusadil Bibil nawamp kumukwash mwin kwilej Bibil chakwel aya kurutu muspiritu.

12 Mudi Prisil ni Akila nenday Apolo, tukutwish kwikal chiyukish kudi antu akwau. Ov, mutapu ik ukata kwiyov, anch dikasikesh diey diamukwash muntu usangaredina uyakin chakwel apandakana chikangesh cha kuya kwend kurutu mu spiritu? Ap piudia mukurump, ov mutapu ik ukata kwiyov anch mbay ney mukaritiy wa kujikitish mulong wa chiyul chidiokila mu Bibil wamwinkisha ni chamukwasha pa chisu cha mar? Chimeken patok anch, kusadil Dizu dia Nzamb mulong wa kuyikwash antu akwau chakwel ikala ni mwom uwamp kuletining musangar. * Tal mutapu ukutwisha kuwanyish ntong jinej.

13 Piur pa difukwil diakin ni dia makasu, in Isarel avud pa chirung cha Elija iteka pakach. Chiyul chapanay Elija kudi antu inay chikutwish kumukwash mwin kwilej Bibil wakad kutwish kukwat mupak chakwel asala usu wa kuya kurutu muspiritu. (Tang 1 Ant 18:21.) Shinshikin pa mwikadil ukwau: Anch muntu usangaredina wov wom wa arund ap wa dijuku diend, ukutwish kukasikesh mupak wend wa kumwifukwil Yehova kusutil ku kutongijokin pa Isay 51:12,13.—Tang.

14. Ov, chom ik chikeza kukukwash kuvurik maverse ma Bibil piukwikala nam kuswir chakwel kuyikwash antu akwau?

14 Chimeken patok anch, mu Bibil mudi mazu mavud makutwisha kukasikesh, makin, ni maletina usu kudi antu amatangina. Pakwez ukutwish kwipul anch, ‘Ov, mutapu ik nikutwisha kutan maverse swaa anch nimakimbin?’ Tang Bibil ni tongijokin pa yitongijok ya Nzamb dichuku ni dichuku. Mwamu, ukez kwikal nich mazu mavud ma Nzamb makutwishay spiritu wa Yehova kukukwash chakwel kumavurik piukwikala nam kuswir.—Mar. 13:11; tang Yohan 14:26. *

15. Ov, chom ik chikeza kukukwash chakwel utesha nawamp Dizu dia Nzamb?

15 Mudi Mwant Salomon, mwita Yehova manangu chakwel uwanyisha nawamp yisend ya uteokras. (2 Jsng. 1:7-10) Mudi mwasalau aprofet a pasak, sal usu wa ‘kusurab ni kukimbijol’ mu Dizu dia Nzamb ronganyin rakin ra Yehova ni rusot rend. (1 Pita 1:10-12) Kambuy Paul wamukasikesha Timote chakwel idisha amwinend “nich mazu ma ritiy ni malejan makin.” (1 Tim. 4:6) Mu kusal mwamu, ukutwish kuyikwash nawamp antu akwau muspiritu. Chawiy lel, ukez kutung ritiy rey amwiney.

DIKING DIA KASHINSH DIMEDINA PA DIZU DIA NZAMB

16. (a) Ov, “kwilej pichuku pichuku Mukand wa Nzamb” kwikala kwa usey mutapu ik kudi in Berey? (b) Mulong wak kutang Bibil pichuku pichuku kudi kwa usey nakash nlel unou?

16 In Yuda adinga mu Makedonia musumb wa ku Berey, adinga ni chaku cha “kwilej pichuku pichuku Mukand wa Nzamb.” Palejanay Paul rusangu ruwamp kudi in Yuda inay, awiy asambisha kwilikej mazu mend ni ronganyin rau piur pa Mukand wa Nzamb. Ov, nich chibudikin? Antu avud itiyija anch ndiy wading ulejen uyakin, ni antu avud “itiyija.” (Mid. 17:10-12)  Chinech chimekeshin anch kutang Bibil dichuku ni dichuku kukat kukasikesh ritiy mudiay Yehova. Ritiy riner, rawiy “kushinshik kwa yom ya ruchingej,” ridi ra usey chakwel tupanda mu mangand masu ma Nzamb.—Heb. 11:1.

17, 18. (a) Ov, mutapu ik ukata ritiy rikash ni rukat kuchidij muchim wa chifanikesh wa mwin Kristu? (b) Ov, mutapu ik ukata ruchingej kutuchidij ku ubaj?

17 Chawiy chafunday Paul anch: “Etu tukat kwendil mu muten, chifanyidin etu kubabal. Chifanyidin kand etu kudjal ritiy ni rukat mudi rukibu rikasinau pa ntul. Tudjala kand ruchingej ra dipandish dietu mudi chiful cha utad.” (1 Tes. 5:8) Isalay ukweting kuswir kwa kuchidij rudung rend pantaliken ni akankuny. Chilik chimwing, rudung ra mwin Kristu ra chifanikesh ritin kurichidij pantaliken nich usu wa chitil. Chom ik chikata kushiken pakatay kashalapol wa Yehova kwikal nich ritiy rikash mu kushilamu kwa Nzamb ni kumukat ni kuyikat ambay nend antu? Kashalapol winou ufanyidin kudjal rikibu ra muspiritu ra piur nakash. Chimeken anch kakutwishap kusal yom mulong wa kushadish dilau dia Nzamb.

18 Paul wisambina kand piur pa chiful cha utad mudi, “ruchingej ra dipandish.” Pakad kuchidij mutu wend, isalay wa pa chirung cha Bibil wela kushadish swaa mwom wend. Pakwez nich chiful cha utad, ndiy ukez kupand ap anch amubul chom chikash. Tukat kukasikesh ruchingej mu yisal ya dipandish ya Yehova kusutil ku kwilej Dizu diend. Ruchingej rikash rikat kutukwash chakwel turisha ni in kubwambwil ni “mazu mau ma usup.” (2 Tim. 2:16-19) Ruchingej retu rikez kutukasikesh kand chakwel tulika kwitiy anch asambish kutubachik ku kusal yom yilikishinau kudi Yehova.

CHIFANYIDIN KUSAL MULONG WA KUPAND

19, 20. Ov, mulong wak tukwatin nich usey nakash Dizu dia Nzamb, ni mutapu ik tumekeshina kusanger kwetu? (Tal mushet “Yehova Winginkin Yinikweta Nich Kuswir.”)

19 Pitushejidina nakash mu machuku ma nsudiel, kuswir kwetu kwa kuchingejin mu Dizu dia Nzamb kukat kupandakan. Chiyul chidiokila mu dizu dined chitukwashin kwipuk kusal uyimp ni kurish nich yibachikin ya kusal chitil. Nich dikasikesh ni usu wa dizu dined, tukez kupandakan yoziu ya Satan ni ya mangand mend. Ni umutakel uletinay Yehova mu Dizu diend, tukez kudandamena mwi njil ya mwom.

20 Vurik anch Nzamb usotin anch “antu awonsu apanda ni kwijik uyakin.” Atushalapol a Yehova adi pakach pa “antu awonsu.” Chawiy lel kudi antu tufanyidina kukwash kusutil ku mudimu wetu wa kulejan ni kufundish. Pakwez antu awonsu asotina kupand afanyidin kwijik “uyakin.” (1 Tim. 2:4) Chawiy lel, kupand mu machuku minam ma nsudiel kuyil pamwing ni kutang Bibil ni kusadil malejan mapepilau kudi Nzamb. Mwaning, pitutangina Bibil pichuku pichuku tumekeshin anch tukwatin nich usey nakash uyakin wa Dizu dia Yehova.—Yohan 17:17.

^ par. 12 Tukutwishap chakin kamu, kusadil chiyul cha Bibil mulong wa kuyishindil ap kuyifish nich antu akwau. Tufanyidin kushimpish muchim ni kwikal awamp pantaliken ni antu twilejina nau Bibil mudi kamu mudingay Yehova pantaliken ni yetwetu.—Kus. 103:8.

^ par. 14 Ov, chidi nchik anch wavurik manans majim madia mu verse pakwez uvuramedin dijin dia mukand, shapitre, ni verse? Anch wakimb mazu minam ku index udia kwinsudiel kwa Bibil, mu Watchtower Library, ap mu concordance wa Traduction du monde nouveau, ukez kutan kamu verse ukimbina.