KUVUMBUK kwa Yesu kudiap kusu kwakad kwijikan, yom yashikena pasak yakad usey kudi etu nlel. Kambuy Paul walejana usey wa kuvumbuk kwinoku pafunday anch: “Kristu wavumbuka ku rufu wikal kand mwom, chinech chidi chijingidij cha kushilamu anch, in Kristu afila kal niyau akez kuvumbuk mu rufu kwikal kand aom. Mudi murashika rufu mu mangand mulong wa muntu umwing, chawiy kand chimwing, kuvumbuk kwa afu kwikal kand aom kwashik kal mulong wa muntu umwing. Mudi mukat kufau antu awonsu mulong adiokala kudi Adam, chawiy kand chimwing, in Kristu awonsu akez kuvumbuk kwikal kand aom mulong wa Kristu.”—1 Korint 15:20-22.

Yesu amuvumbula pa Nisan 16, mu muvu wa 33 C.C., pa dichuku diadingau in Yuda ni kupan mulambu wa yom yadingau ni kwangul ya kusambish pa yir yau kudiay Yehova ku tempel mu Yerusalem. Kusutil ku kumutazuk Yesu anch wakusambish, Paul walejana anch kukwikal antu akwau akezau kudiosh ku rufu kuyichirish ku mwom.

Mazu ma Paul madia kurutu marumburil piur pa yom yitwishikina mulong wa kuvumbuk kwa Yesu. Paul walonda anch: “Mudi murashika rufu mu mangand mulong wa muntu umwing, chawiy kand chimwing, kuvumbuk kwa afu kwikal kand aom kwashik kal mulong wa muntu umwing.” Mulong wa chitil ni kulik kuwanyin kwatushilau kudi Adam, tukat kufang etu awonsu. Pakwez, kusutil ku kupan mwom wend uwanyidina mudi difut, Yesu wazurila njil ya antu chakwel kupand ku uswik wa chitil ni rufu kusutil ku divumbuk. Chakwel kulond yom nawamp mu wiswimp, Paul wafunda mu Rom 6:23TMK anch: “Mulong difut dia chitil didi rufu, pakwez kupan kwa Nzamb kudi mwom wa chikupu mu Kristu Yesu Nsalejetu.”

Yesu amwinend walejana kurumburik kwadinga nich rufu rend ni divumbuk kudi etu. Piur pend amwinend, walonda anch: “chiwapidilau kwez kumuzambul Mwan a muntu; chakwel mwawonsu ukwitiyila mwi ndiy ukwikal ni mwom wa chikupu. Mulong Nzamb wakata ngand, ndiy wapana Mwanend wa kuval kwend umwing chakwel mwawonsu ukwitiya kudiay ndiy kakujiyip, pakwez ukwet kal mwom wa chikupu.”—Yohan 3:14-16.

Tong bil—mwom wa chikupu pakad kusansan, mar, ap runeng! (Kujingunik 21:3, 4) ridi ruchingej risangareshina mud ik! Nfund umwing wafunda yom mu mutapu winou anch: “Ap anch nzay yikutwish kumuvurish muntu kwiswip kwa mwom, divumbuk dilejen kashinsh ka kwiswip kwa rufu.” Mwaning, divumbuk dia Yesu dirumburikin mwom!