“Katat umwijany Nzamb.”—GAL. 4:9.

1. Ov, mulong wak mwin kwendish avion ufanyidin kutang notice wend kurutu kwa kwendish?

IN KWENDISH avion ap anch amusalap nchik nawamp, akweting mikand 30 yitazukingau anch ma notice makatau kutang kurutu kwa kwendish. Anch kalondwilap mikand yiney nawamp kurutu kwa kwendish, akutwish kusal aksident umwing mukash. Ov, wij mwin kwendish avion ukatau kwit chakwel atanga chisu ni chisu notice wend? Winou wij nawamp kwendish avion! Mwin kwendish avion wija mudimu wend ukutwish kusambish kuvuramen ni kuburen kutang kachom pa kachom mu notice wend.

2. Ov, notice ik ufanyidinau in Kristu kutang?

2 Mudi mwin kwendish avion ubabela, ukutwish kusadil notice wa mutapu winou chakwel wikala nich kashinsh anch ritiy rey rikezap kukep piukeza kuswiridin kwikal ni ritiy rikash. Ap anch watambwil katat dibatish ap wamusadina Nzamb mu mivu yivud, chidi cha usey kushinshikin chisu ni chisu ukash wa ritiy rey ni kwipan kwey kudi Yehova. Kuburen kushinshikin ritiy riner pakad kujing ni mu mutapu ukash kukutwish kutwal ku kusheshik kwa muspiritu. Bibil utukasikeshin anch: “Chifanyidin muntu mwawonsu utongila anch: “Niminy dang mu ritiy,” ababal, chamwamu ukuwa.”—1 Kor. 10:12.

3. Ov, chom ik chafanyidinau in Kristu in Galatia kusal?

3 In Kristu adinga ku Galatia ading nich kuswir kwa kushinshikin pa ritiy rau rikurikina ni kusanger want ipau wau wa muspiritu. Kusutil ku yakupesh yend, Yesu wayinkisha antu mutapu wa kumwitiyij ni kumwijik Nzamb mu mutapu umwing wamushena—awiy ikala an a Nzamb! (Gal. 4:9) Pakwikal mu urund umwing uyukishinau nakash, in Galatia afanyidina kulik malejan ma in Yuda, ading akasikeshin anch afanyidin kuziyil ku Chijil cha Moses. Ov, mulong wak Akamichid akad kutwal ku mukand adinga  mu yikumangen kadingap mwishin mwa Chijil! In Yuda ni Akamichid asota niyawiy kukul muspiritu. Chinech chading chitin kwitiyij anch awiy kafanyidinap kutenchik kutentam kwau ayinau kusutil ku ditenchik dia Chijil cha Moses.

JINZAU JA KUSAMBISH MULONG WA KUMWIJIK NZAMB

4, 5. Ov, chiyul ik chapanay Paul kudi in Galatia, ni mulong wak chidi cha usey nakash kud etu?

4 Chiyul cha Paul kudi in Galatia achifunda mulong wa rutong riner: kuyikangesh in Kristu akin chakwel kangal alika mapit ma uyakin wa Bibil ni kuchirikin ku yom yidia kwinyim. Yehova wamwinkisha usu wa kuyikasikesh in Kristu adinga mu yikumangen ya in Galatia ni in kwifukwil end awonsu chakwel adandamena kushinshaman.

5 Chiwapidil anch etwawonsu tuvurik mutapu twadiokala mu uswik wa muspiritu ni kwikal Atuman a Yehova. Chakwel tusala mwamu, shinshikinany pa yipul yiney yaad: Ov, uvurikin jinzau walondula chakwel uwanyisha yom yitinau mulong wa kutambul dibatish? Ov, uvurikin mutapu washikena ku kumwijik Nzamb ni kukwijik kudi ndiy ni kusanger yovil ya want ipau wakin wa muspiritu?

6. Ov, notice wa malejan tufanyidina kushinshikin?

6 Pakwez, etwawonsu twalondula jinzau chidivu. Jinzau jinej jidi mudi notice wa muspiritu, ulejenau mu mushet ulondina anch  “Jinzau Jitwadila ku Dibatish ni ku Kuya Kurutu.” Kuvurik chisu ni chisu pa jinzau jinej chidivu kukez kutukasikesh chakwel twipuka kuchirikin ku yom ya mangand. Mudi mutapu mwin kwendish avion wija nawamp mudimu wend ukata kwendish pakad kusal aksident mulong utangina chisu ni chisu pa notice wend, chawiy nlel ukutwish kutambul ukwash wa kudandamen mu mudimu ushinshamena kusutil ku kutang chisu ni chisu notice wa malejan wa muspiritu.

ANTU IJIKEN KUDI NZAMB ADANDAMEN KUYA KURUTU MUSPIRITU

7. Ov, chilik ik tufanyidina kulondul ni mulong wak?

7 Notice wa malejan wa mwin kwendish avion ukat kumuvurish anch ufanyidin kulondul nawamp malejan minam kurutu kwa kwendish. Tukutwish niyetu kwishinshikin chisu ni chisu ni yom twading tulondwil kudiosh twatambula dibatish dietu. Paul wamufundina Timote anch: “Lam dang mazu minakuleja, ikasikesha mu ritiy ni mu rukat yitukweta mu kristu Yesu.” (2 Tim. 1:13) “Mazu [minam] makin” madiokil mu Dizu dia Nzamb. (1 Tim. 6:3) Mudi mukatau kutulej mutapu yom yidia kusutil ku mudimu wa antu asadila yom ku makas, ‘chilik cha uyakin’ chitulejin njil chakwel tumana nawamp ni tulondula yisotinay Nzamb anch tusala. Chawiy lel, shinshikinany katat pa jinzau jasala anch tushikena ku kutambul dibatish chakwel tumana mutapu ik tulondwil chilik cha uyakin.

8, 9. (a) Ov, mulong wak tufanyidin kuya kurutu mu ronganyin ni mu ritiy? (b) Let chilakej cha usey wa kuya kurutu muspiritu ni mulong wak kuya kurutu kukat kudandamen.

8 Cha kusambish pa notice wetu padi kuswir kwa kwikal nich ronganyin. Kupwa tukutwish kukudish ritiy. Pakwez tufanyidin kudandamen kuya kurutu mu milad yiney yaad. (2 Tes. 1:3) Kuya kurutu kwitin kukarumuk mu yom yivud. “Kujimb” kurumburikin kupandakan, kujimbish ap kuya kurutu. Chawiy lel, kupwa kwa kutambul dibatish mwikadil wetu wa muspiritu ufanyidin kudandamen kuya kurutu, kujimb, pakad kukep.

Mutond ukat kujimbang. Mwin Kristu ni ndiy ufanyidin kwikal mwamu

9 Tukutwish kwilikej kukul kwetu muspiritu nich kujimb kwa mutond. Mutond ukutwish kujimb nakash, ni mij ya mutond winou yikutwish kuya kulemp nakash ni kupalangan mu divu. Chilakej, mitond yimwing yijim nakash ya ku mikandu ya Liban yikutwish kulep mudi chikumbu cha ma étage 11 ni kwikal chikash, ni mij yandamina pa divu mu a metre  12. (Mum. 5:15) Anch mutond winou wasambish kujimb, mutond ukat kudandamen kujimb pakad kumekan ku mes. Mutond ukat kujimb muvu ni muvu ni mij yend yidandamedin kujimb ni kusal anch mutond wikala ukash. Chidi chilik chimwing ni kuya kurutu muspiritu kwa mwin Kristu. Tukutwish kuya swa kurutu muspiritu pitusambishina kwilej Bibil ni kutambul dibatish. Antu adia mu chikumangen akat kusanger pamenau mutapu tuyila kurutu. Tukutwish ap kwikal ayibol ni kwikal nich yisend yikwau. Mu mivu yilondwila, kuya kwetu kwa kurutu muspiritu kukutwishap kumekan patok. Pakwez, tuswiridin kuya kurutu mu ritiy ni mu ronganyin ni “kwikal amakurump mu ritiy, kushik ku chilik chiwanyidina cha Kristu.” (Efes 4:13) Chawiy lel, tuyil kurutu, mudi kamutond kakemp kajimbina ni kwikal mwin Kristu uswila muspiritu, ap mutond ukash ni ujimbina nakash.

10. Ov, mulong wak kuya kurutu kudi kwa usey ap kudi in Kristu aswila muspiritu?

10 Pakwez kuya kurutu kukutwishap kwimedin pinipa. Ronganyin retu rifanyidin kujimb ni ritiy retu rifanyidin kwikal rikash. Chawiy lel tukutwish kujijaman rawonsu mu Dizu dia Nzamb. (Jinsw. 12:3) Mu chikumangen cha win Kristu, mudi akadivar ni anambaz avud asala mwamu. Chilakej, mukadivar umwing wadinga mukurump mu mivu makum masatu ni kusut wamana anch udandamedin kuya kurutu muspiritu. Ndiy walonda anch: “Kusanger kwam kwa Bibil kuyil mu kukul nakash. Nidandamedin kutan mitapu yisu ya kusadil yany ya Bibil ni yijil yend mu mitapu kushalijan. Kusanger kwam piur pa mudimu wa kulejan kuyil mu kupandikan.”

KUKUL MU URUND NI NZAMB

11. Ov, mutapu ik tukutwisha kushiken ku kumwijik Yehova nawamp?

11 Kukul kwetu kwitin kand kusej piswimp ni Yehova mudi Murund netu ni Tatukwetu. Ndiy usotin anch twiyova anch tukwet dilau diend; usotin kand twijika anch utukatin ni tudi mu diking. Mwawiy mukatay kwiyov mwan pakatay kuyibwikat anvanjend amulamina nawamp ap yitusadila pitudia pamwing ni murund wa kashinsh ni ushinshamena. Mudi mu ukutwisha kusangar, urund winou ni Yehova ukatap kujimb kapamp kamwing bwat. Chisu chifanyidin kusut chakwel tushikena ku kumwijik ni kumukat. Chakwel umwijika Yehova nawamp, sal usu wa kwitekin chisu cha kutang Dizu diend pichuku-pichuku. Ni tang mitu ya mulong wa Chinong cha Kalam ni Réveillez-vous ! ni mikand yikwau yimedina pa Bibil.

12. Ov, chom ik chidia cha usey kudi etu chakwel atwijika kudi Yehova?

12 Arund nend a Nzamb akat kukul mu  spiritu kusutil ku malembil mau ma kashinsh ni arund nau awamp. (Tang Malakiy 3:16.) “Matu [ma Yehova] makat kutesh kulembil kwau.” (1 Pita 3:12) Mudi nvaj ukweta rukat, Yehova uteshining pakatau kudil mulong wa kwit ukwash. Chawiy lel, tufanyidin ‘kulembil yisu yawonsu.’ (Rom 12:12) Tukutwishap kudandamen kwikal in Kristu apamina kal pakad kwikal nich ukwash wa Nzamb. Yipwichik ya ditenchik dined yidi yikash pakwel anch turisha nich ni tuyipandakana ayinetu. Anch twalik kudandamen mu malembil, tukutwishap kand kwikal ni usu wa kudandamen kusal rusot ra Nzamb ap kuyikwash akwau. Ov, usangaredin nich mwikadil wa malembil mey, ap umen anch ufanyidin kuya kurutu mu mulad winou?—Jer. 16:19.

13. Ov, mulong wak kushakam pamwing ni ambay in Kristu kudi kwa usey mulong wa kukul muspiritu?

13 Yehova ukat kuyisanger antu awonsu “akata kwikangil kud ndiy”; chawiy lel, ap kupwa kwa kumwijik Nzamb, tusotin kudandamen kushakam mu chikumangen pamwing ni antu akwau amwija Nzamb. (Nah. 1:7) Mu mangand makata kuziyishan, chidi cha manangu kushakam pamwing ni akadivar ni anambaz netu akata kutukasikesh. Ov, yiyukish ik ukeza kwikal nich? Ukez kutan mu chikumangen antu akeza kukukwash “kumekesh rukat ni kusal yisalijok yiwamp.” (Heb. 10:24, 25) Kukatijan kwafunday Paul kudi in Hebereu kwading kwitin ukadivar, chisak cha in kwifukwil akweta chitongijok chimwing, ap chikumangen. Kumekesh rikat riner kwitin kusal pamwing ni in Kristu akwau. Kukumangan pakad kujing ku yikumangan ni kudandamen kutang pa notice wey.

14. Ov, mutapu ik kukarumuk ni kuchirik kufanyidin kudandamen?

14 Pakwel anch twikala in Kristu twafanyidina kukarumuk ni kuchirik kand, ap kulik yitil yetu. Pakwez, kukarumuk kufanyidin kudandamen. Pitudia akad kuwanyin, tukwet chitil mukach mwetu mud nnak wivungina udia tayad mulong wa kusuman. (Rom 3:9, 10; 6:12-14) Dandamenany amboku kwishinshikin nawamp, pakad kubwik mes pa yitil yetu. Chidi cha musangar mulong, Yehova ushimpishin muchim mulong wetwetu chakwel tusala usu wa kwipuk chitil ni tukarumuna mwom wetu. (Fil. 2:12; 2 Pita 3:9) Chakwel tutwisha kusal mwamu, tufanyidin kushinshikin pa mutapu tukata kusadil chisu ni mapit metu, ni kwipuk kulondul jintong ja choy. Nambaz umwing wafunda anch: “Napamina mu uyakin, chikwau kand nading nimumen Yehova mu mitapu kushalijan. Ndiy wading uletina wom nakash, ni niyova anch nikutwishap kumusangaresh ap dichuku dimwing.” Pasuta machuku, nambaz winou “wawil muspiritu” mulong wa yikokujol yivud yamushikena. Ndiy ulejen kand anch: “Chadingap anch naburena kumukat Yehova, pakwez chidi mulong nadingap nimwija chakin kamu. Pakwez, kupwa kwa malembil makash, nasambisha kukarumuk.” Ndiy ulondin kand anch: “Namana anch Yehova wading ukat kwintakel mudi mwanikanch, ni wankwasha kupandakan yikokujol pa chisu chinicha, ni kwinlej nich rukat chinafanyidina kusal.”

15. Ov, chom ik chimenay Yesu ni Tatukwend?

15 “Uyilejan antu awonsu” rusangu ruwamp. Mwangel wa Nzamb wamuleja Pita mazu minam ni kudi atwimbuy pamanau mutapu wayidioshau mu rukan mu mutapu wamushena. (Mid. 5:19-21) Mwaning, kulejan kwa mudimu wa chingand udi mulad ukwau wa notice wetu. Yesu ni Tatukwend amen ritiy ni mudimu wetu wa kulejan. (Kuj. 2:19) Mudi mwalonday mukurump umwing twisambina mu paragraf wasutina: “Mudimu wa chingand wawiy tufanyidina kusal.”

16. Ov, mulong wak chiwapin kushinshikin pa kwipan kwetu kudi Yehova?

16 Tongijokin pa kwipan kwey. Chom chimwing cha usey nakash tukweta chidi urund wetu wa piswimp ni Yehova. Ndiy wij antu adia ku mutambu wend. (Tang Isay 44:5.) Shishikin  mu malembil piur pa mwikadil ni kujimb kwa urund wey ni ndiy. Pa chinech, vurik usey wa dichuku watambula dibatish. Chinech chikez kukukwash chakwel uvurika anch dibatish diey dimekeshin mupak umwing wa usey nakash wakwata mu mwom wey.

SHAKAM PISWIMP NI YEHOVA MU KUJIJAMAN

17. Ov, mulong wak tufanyidin kujijaman chakwel tushakama piswimp ni Yehova?

17 Payifundinay in Galatia, Paul wakasikesha piur pa usey wa kujijaman. (Gal. 6:9) Chinech chidi cha usey kudi mwin Kristu ni nlel unou. Yoziu yikez kakushiken, pakwez Yehova ukez kukukwash. Mu malembil, dandamen kwit spiritu utumbila. Ukez kutan rongoj, pa ndond pa runeng, ukwikal nich musangar, pa ndond pa mar ukwikal ni chisambu. (Mat. 7:7-11) Tongin bil pa chinech: Anch Yehova uyilamin atujil, ov chikwikal nchik kudi ey umukatina ni wipana amwiney kudi ndiy? (Mat. 10:29-31) Chikalap nchik yikokujol yikutwisha kukushiken, kangal wachirik kwinyim, kangal walik kumusadil Nzamb. Madi mapit mamushena mud ik kudi etu mulong twijiken kudi Yehova!

18. “Umwijany Nzamb,” ov, chom ik usotilanya kusal katat?

18 Chikwau kand, anch wa mwijik kal Nzamb katat kamu ak ni watambula dibatish, ov chom ik ufanyidina kusal? Dandamen kumwijik Yehova nawamp, ni kukul muspiritu. Ap anch watambwil dibatish pasutin kal mivu yivud, ov, chom ik ufanyidina kusal? Ufanyidin kudandamen kukudish ni kupandikesh ronganyin rey ra Yehova. Kangal twakangany kuwapish urund wetu ni ndiy. Chawiy lel, tufanyidin etwawonsu kuchirikin chisu ni chisu pa notice wetu wa muspiritu chakwel twikala nich kashinsh anch tudandamedin kukul mu urund wetu ni Tatukwetu, Murund netu, ni Nzamb wetu mukatish—Yehova.—Tang 2 Korint 13:5, 6.