OV, RUKAT CHOM IK?

Rukat ritin kuyibangin nakash antu akwau. Muntu mwin rukat ukat kumekesh kusutil ku mazu ni kuyisal mutapu wovilay piur pa antu akatinay, ap anch usadil mwamu chinech chitin kwipan kwa muntu amwinend.

OV, MUTAPU IK WAMEKESHAY MOSES RUKAT?

Moses wamekesha rukat mulong wa Nzamb. Ov, mu mutapu ik? Mazu mafundinau mu 1 Yohan 5:3 mavurishin anch: “Rukat ra Nzamb rawiy er, chakwel tukulam yijidik yend; ni yijidik yend kiyikutukasikenip.” Moses washakama kwabatan ni yijidik yiney. Mu yawonsu yamwitay Nzamb kusal—kusambish mudimu wovishena wom wa kumusankan Farao mwin dikand kushik ni ku mudimu umekena uswapela mud kubul mukombu wend pa Karung Musuz—Moses waziyila. Ap anch yamulejau kusal yadinga yiswapela kuwanyish ap yikasikena, Moses waziyila. “Ndiy wasala yom yawonsu yamulejau.”—Kubudik 40:16.

Moses wamekesha rukat mulong wa ambay nend in Isarel. Awiy ajingunina anch Yehova wading umusadidil Moses chakwel kuyitakel antu end, chawiy lel eza kudi Moses kumuletin Milong yau kushalijan. Tutangin anch: “Antu amwimanyina Moses kudiosh pamanch kushik ni urel.” (Kubudik 18:13-16) Tong bil mutapu chafanyina kumuziyish Moses mud ik kupwa kwa kuyitesh in Isarel pamulejinau dichuku diakabuj piur pa milong yau! Pakwez, Moses wadinga ni musangar wa kuyikwash antu adinga akatinay.

Kuwejinaku ku kuyitesh, Moses walembila kand mulong wa antu akatinay. Walembila kand mulong wa antu amusadila nayimp! Chilakej, panyinyitay Miriam mpanyend a Moses, pantaliken ni Moses, Yehova wamwasa musong wa mak. Pa ndond pa kusangar piur pa dipup diend, kapamp kamwing Moses wamulodina, walembila anch: “A! Nzamb, nakwilembil amboku, mwoka ndiy.” (Kuchind 12:13) Ov, rukat ramubachika Moses kulembil malembil ma mutapu winou mulong wa yom ik yikwau?

OV, MALEJAN IK TUKUTWISHA KWILEJ?

Tukutwish kumwimburij Moses kusutil ku kukudish rukat rujim nakash mulong wa Nzamb. Rukat mud riner ritubachikin kuziyil ku yijil yend “nich michim.” (Rom 6:17) Anch twamuziyil Yehova nich muchim wetu, tukat kusangarish muchim wend. (Jinswir 27:11) Tukat kand ayinetu kumenamu. Kupwa kwa yawonsu, anch tukat kumusadil Nzamb nich rukat rakin, tukusalap kusu yom yitentamina pakwez tukusangar kuyisal! —Kuseng 100:2.

Mutapu ukwau tukutwisha kumwimburij Moses kudi kukudish rukat ra kwipan mulong wa antu akwau. Anch arund ap yid ya dijuku yatushejin nich yakamish yau, rukat ritubachikin (1) Tuyitesha nawamp nakash; (2) kwitek pa ndond yau ap kwov mutapu wovilau; ni (3) kuyijikitish anch tuyibangidin.

Mudi Moses, tukutwish kulembil mulong wa akatish netu. Yisu yimwing tukutwish kwiyov anch tukwetap mutapu wa kupan ukwash patulejinau milong yau. Tukutwish ap kunenganan ni kulond anch, “Nlikishina anch yawonsu nikutwisha kusal chidi kulembil mulong weyey.” Pakwez vurik anch: “Kulembil kwa muntu utentamina kukwet usu wa kusal chom.” (Jakobu 5:16, Mukand wa Nzamb) Malembil makutwish chakin kamu kumubachik Yehova asala chom kanang mulong wa muntu chom chalikay kutwish kusal. Chawiy lel, ov, chom ik chipandakena kuwap tukutwisha kuyisadil akatish netu kupandakanamu kulembil mulong wau? *

Ov, witiyijin anch tukutwish kwilej yom yivud kusutil kudiay Moses? Ap anch wading mutu mud etu, washa chilakej chamushena cha ritiy, kwikepish, ni rukat. Anch twimburij piswimp nakash chilakej chend, tukumenamu nakash ayinetu ni antu akwau.—Rom 15:4.

^ par. 8 Chakwel Nzamb atesha malembil metu, tufanyidin kusal usu wa kashinsh chakwel kusal yom yisotinay. Mulong wa jinsangu jivud, tal shapitre 17 wa buku Chom ik Chakin Kamu Chifundishinay Bibil? wapalangeshau kudi Atuman a Yehova.