OV, KWIKEPISH CHOM IK?

Kwikepish kwitin kuburen chibud ap kwibaz. Muntu mwin kwikepish kakatap kuyiman akwau mudi uyipandakenamu. Muntu mwawonsu wakad kuwanyin udia mwin kwikepish ufanyidin kand kwikal mwin kwitudish, wij mipak yend.

OV, MUTAPU IK WAMEKESHAY MOSES KWIKEPISH?

Moses kikalap mwin kwibaz pamwinkishau ulabu. Yisu yivud, anch muntu watambul ulabu kanang ukemp, ukat kumekeshang swa anch udi mwin kwikepish ap mwin kwibaz. Robert G. Ingersoll nfund wa mu chitot cha dikum ni chidivu cha mivu wachifunda chinech mwamu: “Antu avud akutwish kwikal nich yikokujol. Pakwez anch usotil wijika chakin kamu chidiay muntu, mwinkisha ulabu kanang.” Mwi njil yiney, Moses washa chilakej chakin cha kwikepish. Ov, mutapu ik?

Moses watambula ulabu ujim, mulong Yehova wamwinkisha mudimu wa kutakel Isarel. Pakwez, ulabu winou kiwamusalap ap pakemp Moses chakwel ibaza. Shinshikin, chilakej, mutapu wa kwikepish wapwishay mulong ukash piur pa uswan. (Kuchind 27:1-11) Mulong winou wading ukash, ni chading chiyul chikash mulong chelap kusu kuyital an amband inay, pakwez chela kwikal chilakej cha kulondul mu majuku ma kurutu.

Ov, mutapu ik welay Moses kwakul? Ov, wela kutong anch chidiay ntakel wa Isarel, wading uwanyishinau chakwel kukwat mupak pa mulong winou? Ov, wachingejina pa ukaliweny wend wa chivadik, pa yom yijay mu mivu yend yivud, ap pa ronganyin rend ra piswimp ni yitongijok ya Yehova?

Pamwing ap muntu mwin kwibaz wela kusal mwamu. Pakwez Moses bwat. Rusangu ra Bibil ritulejin anch: “Moses watwala mulong wau kurutu kwa [Yehova].” (Kuchind 27:5) Tong bil! Ap kupwa kwa mivu 40 ya kutakel muchid wa Isarel, Moses wachingejina kangal mudiay amwinend, pakwez kudiay Yehova. Tumen patok anch Moses wading chakin kamu mwin kwikepish.

Moses katongap anch ndiy amwinend kusu wadinga ufanyidina kwikal nich ulabu. Wasangara pa chisu chayitwishishay Yehova in Isarel akwau kusal mud aprofet pamwing nend. (Kuchind 11:24-29) Pamuyulau kudi tatuwenend chakwel kutond antu akutwisha kumukwash kusal midimu yimwing, Nich kwikepish Moses wasadila chiyul chinech. (Kubudik 18:13-24) Ni piswimp nich nsudiel ya mwom wend, ap anch wading uchidi mukash ku mujimbu, Moses wamwita Yehova chakwel ateka muntu ukeza kumuswinkan. Pamutonday Yehova Joshua mulong wa mudimu, Moses nich muchim wawonsu wamukasikesha nsangarum, wayikasikesha antu chakwel alondula umutakel wa Joshua mu Mangand ma Kushilamu. (Kuchind 27:15-18; Kuvurik 31:3-6; 34:7) Chakin, Moses watambula nich usey chisend chend cha kuyitakel in Isarel mu difukwil. Pakwez katekap ulabu wend kurutu kwa musangar wa antu akwau.

OV, MALEJAN IK TUKUTWISHA KWILEJ?

Tufanyidinap kusot kwibaz anch mulong tutambwil ulabu kanang ap mulong wa ukaliweny wetu wa chivadik. Vurik anch: chakwel atusadila nakash kudiay Yehova, kwikepish kwetu kufanyidin chisu chawonsu kupandakanamu ukaliweny wetu. (1 Samwel 15:17) Pitudia chakin kamu in kwikepish, tukukasikesh kusadil chiyul cha manangu cha Bibil chilondina anch: “Mukungamena [Yehova] ni muchim wey wawonsu. Kangal wachingej ronganyin rey amwiney.”—Jinswir 3:5, 6.

Chilakej cha Moses chitufundishin kand kulik kutek usey nakash pa ndond yitukweta mu mwom ap pa ulabu.

Ov, tutanidinamu kusutil ku kwimburij chilakej cha kwikepish cha Moses? Pakad mulong! Anch twakudish kwikepish kwa kashinsh, tukat kuswapej mwom wa antu atunyingumukina, kusal chakwel atukatisha. Cha usey nakash, tusadil chakwel atukatisha kudi Yehova Nzamb, ukata amwinend kumekesh ngikadil yipandakena kuwap. (Kuseng 18:35) “Nzamb uyipompatin in kwibaz, pakwez ukat kuyanaken in kwitudish.” (1 Pita 5:5) Didi diyingish diakin mud ik dia kwimburij kwikepish kwa Moses!