LUZIA UKAT KUBET MWEND WA KAMAKU. Padingay mwanikanch, wayela kalip, musong umwing ukash ukata kusamburik ni kuyipish wong wa muntu ni ma nerf. Padingay ni mivu 16, mband umwing wasadinangay Luzia mudimu wamuleja anch “Nzamb wakupupa nich kalip mulong wading mwan muyimp ni wamubwambwila makwey.” Kupwa kwa mivu, Luzia udandamedin kuvurik mutapu wiyovay nayimp.

PIJIKAY DAMARIS ANCH UKWET KANSER WA WONG, tatukwend wamwipula anch: “Yom ik wasala chakwel mayej minam makukwat? Kudi chom chiyimp nakash wasala. Chawiy chakupupidinau kudi Nzamb.” Damaris wova nayimp nakash mulong wa mazu minam.

Antu avud atongin kal mu tunan twa mivu anch mayej didi dipup dia Nzamb. Buku umwing utazukinau anch Yaku ni Yishankur ya Jingand ja Pasak (mu Inglish) ulondin anch antu avud a pa chirung cha Kristu itiyijang anch “mayej mading madiokil pamwing ap ku chitil cha muntu amwinend, ap cha anvajend ap amatumang mudi dipup mulong wa chitil chinech.” Buku Yipupu ni Chimwingang cha pa Moyen Âge (mu Inglish) ulondin anch pa chisu cha Moyen Âge “antu amwing atonga anch Nzamb ukat kulet yipupu mulong wa kuyipup nich antu mulong wa yitil yau.” Chawiy pafa mamiliyon ma antu Mwimputu mulong wa chipupu chikalaku mu yitot ya mivu 14, ov, Nzamb wading uyirumburishin antu ayimp? Anch mading kwau mayej madiokila kwa atupwapu, mudi mwalejenau mu kukimbijol kwa chimwingang? Antu amwing akutwish kwiyipul anch: Ov, Nzamb ndiy kamu ukata kusadin mayej mulong wa kuyimesh antu mar mulong wa yitil yau? *

TONG BIL: Mulong wak Yesu wayoka antu ading ayedina anch mayej ni mar yidi dipup dia Nzamb? Ov, kusal mwamu kwafanyinap kuyipish kutentam kwa Nzamb? (Mateu 4:23, 24) Yesu kafanyinap kusal chom ap chimwing chakad kukwatijan ni midimu ya Nzamb. Walonda anch: “Yisu yawonsu nikat kusal yom ya kumusangarish ndiy” ni anch “nikat kusal yom yawonsu mudi mwinlejinay [Tatuku].”​—Yohan 8:29; 14:31.

Bibil ulondin patok. Yehova Nzamb “udi mwin kutentam.” (Kuvurik Yijil 32:4) Chilakej, Nzamb kakutwishap kusadikish akisidan wa avion, ukutwisha kujip yitot ya antu akad kwau mulong, mulong wa kumupup kwau muntu umwing udia mu avion winou! Kukwatijan ni kutentam kwa Nzamb, Aburaham, kashalapol wa Nzamb ushinshamena walonda anch Nzamb kakutwishap “[kumushesh] mwin kutentam pamwing ni mwin kupengam.” Walonda anch ‘chakapuk chaya mwa.’ (Disambishil 18:23, 25) Bibil ulondina kand anch “Nzamb kakutwishap kusal kuyip.”​—Job 34:10-12.

YOM YITUFUNDISHINAY BIBIL PIUR PA MAR

Anch twaman mar chidiap anch Nzamb utupupin mulong wa chitil kampand. Yesu amwinend wovikesha patok mulong winou chisu chamanay pamwing nau in kwilejend muntu wading mputames kudiosh ku kuvadik kwend. “In kwilejend end amwipula anch: ‘Mulej, ov, mulong wak muntu winou wavadika mputames? Ov, chidi mulong wa yitil yend amwinend anch ya anvajend?’ Yesu wayakula anch: ‘Bwat, kichidiap mulong wa yitil yend ap ya anvajend. Ndiy udi mputames chakwel midimu ya Nzamb yimekena mwi ndiy.’”​—Yohan 9:1-3.

Mulong wa yitongijok ya makasu yading yivulijadina, in kwilej a Yesu ashimwoka nakash payilejau kudi Yesu anch wimputames winou wezap kwau mulong wa yitil ya muntu winou ap ya anvajend. Yesu wamwoka  mputames winou, pakwez wasala kand mwamu mulong wa kukangesh chitiyij cha makasu cha kwel anch mar mamekeshin kupup kwa Nzamb. (Yohan 9:6, 7) Antu ayedina mayej makash nlel akutwish kutan rongoj pa kwijik anch Nzamb kadiap musul wa mar mau.

Mulong wak Yesu woka ayej anch Nzamb ndiy wading uyipupina antu mulong wa yom yiyimp yasalau?

Mifund yitukasikeshin anch

  • “Mulong Nzamb kakumwozangap nich [yom yiyimp], niyend Nzamb kakumwozangap muntu.” (JAKOBU 1:13) Chawiy, ‘yom yiyimp’ yayimeshina kal antu mar mu yitot ya mivu, kuwejinaku mayej, kusansan ni rufu yikwikalapaku kand.

  • Yesu Kristu “wayoka kand ayej awonsu.” (MATEU 8:16) Mu kuyok antu awonsu ezang kudi ndiy, Mwan a Nzamb wamekesha yom yikusala Want wa Nzamb pa mangand mawonsu.

  • “Ndiy [Nzamb] ukez kayikusol mansoj mawonsu ku mes mau. Kukez kikalap kand rufu, ap madil, ap kwishikokin, ap kusansan, mulong yom yikur kiyamekanap kand.”​—KUJINGUNIK 21:3-5.

NANY UDIA MUSUL WA MAR METU MAWONSU?

Chad mulong wak lel antu amen kal mar nakash mwamu ni kusansan? Antu iyipwil kal chipul chinech mu yitot ya mivu. Anch Nzamb kadiap musul, nany tufanyidina kufish nich? Yakul ku yipul yiney akuyisambin mu mutu wa mulong ulondwilaku ou.

^ par. 4 Ap anch yisu yimwing pasak Nzamb wayipupa antu mulong wa yitil kampand, Bibil kalejenap anch Yehova ukat kusadin nlel yom mudi mayej ap mar mulong wa kuyipup nich antu mulong wa yitil yau.