ASTROLOJI

Astroloji udi mutapu wa kubwak wimedina pa kulond anch atutumbu, ngond ni maplanet yikwet yibachikin pa mwom ya antu adia pa divu. A astrolog alondining anch mutapu wiminya yom yiney ya mwiur pa chisu cha kuvadik kwa muntu yimekeshin wuntu wend ni machuku mend ma kurutu.

Ap anch dishin dia astroloji diasambishina mu Babilon wa pakur, malejan minam madandamedin kupalangan. Kukwatijan ni kukimbijol kwasadinau mu muvu wa 2012 mu États-Unis, muntu umwing pa antu asatu walonda anch astroloji wading “mutapu wa siyans,” ni antu 10 pa chitot alonda anch wading “kamu siyans.” Ov, chidi chakin? Bwat. Mayingishin mawiy am.

  • Maplanet ni atutumbu makwetap usu wa kwikal ni yibachikin padi antu mudi mulondinau a astrolog.

  • Yisu yivud yom yibwakiningau yiyitadining antu avud chawiy chikasikena kuyisadin kudi muntu umwing.

  • Nlel tupamp twa mu astroloji twimedin pa chitiyij chikur chilondina anch maplanet manyimburikining ku divu. Pakwez, maplanet makat kunyimburik ku muten.

  • Yom yibwakiningau a astrolog kushalijan padi muntu umwing yikatap kutanijan.

  • Astroloji uyilongin antu mu yikunku 12, yitazukinau anch yijingidij ya zodiak, kukwatijan ni machuku mau ma kuvadik. Mulong wa kuswimp kwa mutapu unyingumukina divu mu rinzwizu mu kusut kwa mivu, machuku ma ngond matekau ku yijingidij ya zodiak makwatijadinap kand nich yisak ya atutumbu yikweta majin mayipilau.

Alondining anch yijingidij ya zodiak yilejen piur pa wuntu wa muntu. Mu uyakin, antu avadika dichuku dimwing kakwetingap mikadil yimwing; dichuku dia kuvadik dilejenap chom ap chimwing piur pa wuntu wa muntu. Pa ndond pa kuyiman antu mudi mudiau kamu, a astrolog akat kurumburish yaku ni wuntu wa muntu kusutin yitongijok yivud yakad kashinsh. Ov, kwinoku kudiap kurumbuk?

 KUPONG

Kudiosh chisu cha pakur, antu ayangang kudi in kupong. In kupong amwing akimbang kurumburik mu yom mudi mil ya annam ap ya antu ap mutapu udjakumwinay nzol ikombu ritit. Akwau alejanang yom ya kurutu kusutin milil yidia pa mayij ma chay ap kafe. Nlel unou, akat kusadin kart wa kubwak nich, dibuj dia cristal, jeton wa Jeu de dés ni yom yikwau mulong wa “kutang” yom ya kurutu piur pa muntu. Ov, kupong udi mutapu wakin wa kwijik yom ya kurutu? Bwat kamu. El tutongijokinany pa mulong winou.

Shinshikin piur pa mulong wa kwovijan kwa yom. Yom yilondiningau in kupong kushalijan yikatap kutanijan. Ap anch asadin mutapu umwing wa kupong, yom yikatau kutan yishalijadining. Chilakej, anch muntu wayipul in kupong aad chipul chimwing piur pa yom ya kurutu chimedina pa “kutang” kart umwing, choviken anch yakul yau yifanyidin kwikal yimwing. Pakwez yisu yivud yidingap mwamu.

Antu avud asambishin kal kwidjidjek piur pa milad ya kupong. Antu alondining anch makalash, miseng ni mem yidi kwau yom ya chamwamu ni anch in kupong akat kwilej yom yisadinay ni yilondinay muntu. Chilakej, mwin kupong ukweta ukaliweny ukwipul yipul ni kushinshikin nawamp yom yilondinay muntu ni yijindjikinay yikutwisha kumekesh chom kampand piur pa muntu wezang kwipuril. Kupwa mwin kupong ukwitumbish anch wij yom piur muntu wend, komb muntu wezang ndiy wamulejang yom yend pakad kutongin. Mulong antu inay akat kuyichingejin, in kupong amwing akat kwikal ni nfalang jivud nakash ja wij kudi antu ezining kuyital.

YOM YITULEJINAY BIBIL

Yom ya astroloji ni ya kupong yimekeshin anch asambedin kal kutenchik machuku metu ma kurutu. Pakwez chidi chakin? Bibil utulejin anch tukwet ukaliweny wa kutond yom twitiyijina ap tusotina kusal ni anch mipak yetu yikwet yibachikin pa machuku metu ma kurutu.—Joshua 24:15.

In kumwifukwil Nzamb akwet diyingishin dikwau dia kulik yom ya astroloji ap ya kupong mulong Nzamb ufishin nich mitapu yawonsu ya kubwak. Mu Bibil tutanin mazu manam: “Kangal ez atan mu en muntu umwing . . . mwin kupong, ap mwin kudimban kwipuril, ap mwin kupandol, ap mwin kubauk. Ap mwin kukayan, ap mwin kubudik akish inay ayilembil, ap mwin kutazuk afu. Mulong mwawonsu ukusala yom yiney udi mwin kutakanan kudi [Yehova].” *Kuvurik Yijil 18:10-12.]

^ par. 17 Diawiy dijin dia Muntu ‘udia Piur Nakash pa mangand mawonsu.’—Kuseng 83:18.