Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  2017-07

Kalal Gordon wamana chir chend cha Eden mu muvu wa 1881 mu Praslin, mu Seychelles

Paradis Panap Pansh—Chidi Chilat Anch Chidi Chom Chakin?

Paradis Panap Pansh—Chidi Chilat Anch Chidi Chom Chakin?

Paradis! Kudi mabroshir makweta yipich yiwamp nakash malejena jindond jiwamp tukutwisha kuya jitazukinau anch “paradis” mulong wa kwiswedish ni kuvuramen yakamish ni milong yetu yawonsu. Pakwez mudi mutwija etu awonsu, anch twachirik ku yikumbu yetu, tukutan anch yom yidi kwau mutapu twayisha chisu twadiokala ku chikumbu.

Pakwez, kusanger piur pa paradis kukwet usu nakash. Tukutwish kwiyipul anch: ‘Ov, “paradis” chidi kwau chilat chisangareshina? Anch chidi mwamu, mulong wak kusangar? Ni chikutwish kamu kwikal chom chakin?’

YINSHAKUR YA PARADIS

Mu yitot ya mivu, antu avud ading kusanger ni kukat kwijik paradis. Kudi antu avud, musangar wau wadiokila mu yom yifundinau mu Bibil piur pa ‘chir cha Eden, kwingangel.’ Yom ik yasala anch chir chinech chikal chiwamp nakash? Rusangu ritulejin anch: “[Yehova] Nzamb waminyisha mitond ya pansh ya mitapu yawonsu yiwapila kutal ku mes, ni yiwapila kand kudia.” Chinech chading chisangareshin ni yading ndond yiwamp. Chisangareshina kand nakash chidi anch mwading “mutond wa kupand wading kand mukach mwa chir.”—Disambishil 2:8, 9.

Chikwau kand, rusangu ridia mu Disambishil rilejen piur pa tuwit tunying twading mu chir chinech. Tuwit twaad pakach pa tuwit twinetu twijiken kushik ni nlel unou—Tigre (ap anch Hiddekel) ni Eferat. (Disambishil 2:10-14) Tuwit twinetu twaad tusutidin mu Golfe Persique udia mwi ngand yitazukinau katat anch Iraq, ngand yiney yading mu Peris wa pakur.

Chimeken patok anch, paradis wa pa divu chidi chikunku cha uswan wa in Peris. Chipich chimwing cha Peris cha mu mivu 1600, mu Musée de l’art wa mu Filadelifiy, mu Pennsylvanie, mu États-Unis, chilejen chir chidia mu rupang mudia mitond ni yisalamb. Kulond mu dizu dia in Peris anch “chir chidia mu rupang” kurumburikin kand anch “paradis,” ni yom yading pa chipich chinicha yading yimekeshin kurumburil kwa Bibil piur pa chir cha Eden chiwamp ni chisangareshina.

Pakwez, jinsangu ja paradis akat kujilond mu mazu mavud ni mu yinshakur pa mangand mawonsu. Mulong majuku ma antu mashemunikang jindond kushalijan pa divu, ading kuya ni jinsangu jau jakin, chad mu kusut kwa mivu, jinsangu jinej jabombakanang ni yitiyij ni jingany ja ndond yashakamangau. Ap nlel unou, antu akat kutongin jindond jiwamp nakash anch jidi paradis.

KUKIMB PARADIS

In kukimbijol amwing alonda anch ajingunina paradis washadika. Chilakej, Charles Gordon, kalal wa amasalay a Britannique, pendinay mu Seychelles mu muvu wa 1881, wasangera nakash kuwap kwa ndond yitazukinau anch Vallée de Mai—yidia katat ndond ya uswan wa Mangand—ni walonda anch ndond yiney yidi chir cha Eden. Mu mivu ya 1500, mwin kwendangan mu mem wa mu Italie Christophe Columb wiyipula anch udi piswimp ni kujingunin chir cha Eden chisu chashikay mu ditung dia Hispaniola, didia katat mu République Dominicaine ni mu Haiti.

Kart ulejena Paradis ni mabuku ma katat makwet yipich 190 ni kusut ni makart mavud mamumekeshin Adam ni Ev mu chir cha Eden. Pakach pa makart minam padi chipich chisangareshina cha Beatus wa ku Liébana cha mu mivu 1300. Kwiur kwa chipich chinech kudi kachom kakweta makonk manying mudia paradis pakach ni pakach. Alejenap tuwit tunying, pafundinau “Tigre,” “Eferat,” “Indus,” ni “Yordan,” kawit ni kawit kadi mu dikonk, yom yimekeshina kupalangan kwa win Kristu ku makonk manying ma divu. Yom yiney yimekeshin anch ap anch ndond yading Paradis wa kusambish yijikanap, mu manangu ma antu mwadandamena kushal chitongijok chinech.

 John Milton, mwin kufund wa mu Angleterre wa mu mivu 1700, wijiken nakash mulong wa rusangu rafunday rilondina anch Paradis Washadika (mu Inglish), yom yiney yading yimedin pa rusangu ridia mu Disambishil rilejena chitil cha Adam ni kumwopat mu chir cha Eden. Mu rusangu riner walejena anch antu akuyichirishin kand mwom wa chikupu pa divu, palonday anch: “Kupwa divu diawonsu chad dikwikal paradis.” Kupwa kand Milton wafunda rusangu rikweta mutu wa mulong ulondina anch Paradis Wachirishau.

KUSWIMP KWA YITONGIJOK

Chimeken patok anch, chitongijok cha paradis washadika chidandamedin kwikal mu manangu ma antu pa mangand wawonsu. Chad mulong wak antu avuramedin? Nakash chidi mulong Kart wa Paradis (mu Inglish) ulondin anch “in teoloji . . . alika kwau kukimb kamu ndond yadinga paradis.”

Antu avud ayiling mu egliz ayifundishining anch ndond yau ya nsudiel yikuyau mudi mwiur, kadiap anch akwikal ni mwom panap pansh mu paradis. Pakwez Bibil ulondin mu Kuseng 37:29 anch: “Mwin kutentam . . . ukez kaswan ngand, ukez kashakamamu chikupu.” Mulong chikasiken nlel mangand kwikal paradis, ruchingej ik rimekeshina anch kushilamu kwinoku kukuwanyin kamu? *

UYAKIN WA PARADIS MUJIM PA DIVU

Yehova Nzamb, watanga Paradis wa kusambish, washilamu anch ukuchirish kand paradis washadika. Mutapu ik? Vurik anch Yesu watufundisha kulembil anch: “Want wey weza. Rusot rey arusala pansh mudi mwiur.” (Mateu 6:10) Want winou udi winyikel wa mangand udia mu makas ma Yesu Kristu ukuswinkana winyikel wawonsu wa antu. (Daniel 2:44) Mu winyikel wa Want winou, rusot ra Nzamb mulong wa paradis panap pansh ‘rikuwanyin.’

Kwisambishil, muprofet Isay amupepila kurumburil yom yikusadika mu paradis washilaumu, ni mwinimwa mukwikalap kand matend ni milong yiyimeshina antu mar nlel. (Isay 11:6-9; 35:5-7; 65:21-23). Tukwitin amboku kwitekin chisu mulong wa kutang yom yiney mu Bibil wey. Kusal mwamu kukukwinkish kashinsh mulong wa yom yikusalay Nzamb mulong wa antu aziyidina. Kupwa antu akushakama mwinimwa akusanger paradis ni ranaken ra Nzamb, yom yashadishay Adam.—Kujingunik 21:3.

Mulong wak tukutwisha kwikal nich kashinsh anch ruchingej ra paradis panap pa divu chidiap kwau chilat pakwez udi uyakin? Mulong Bibil utulejin anch: “Diur didi dia [Yehova], pakwez divu wadipana kudi an a antu.” Ruchingej ra Paradis panap pansh kudi kushilamu mulong “Nzamb wakad makasu watushilamu.” (Kuseng 115:16; Titus 1:2) Ruchingej ruwamp mud ik ritwinkishinay Bibil ra kushakam mu Paradis chikupu!

^ par. 15 Chisangareshin kand kwijik anch mu Koran, verse wa 105 mu shapitre 21, Al-Anbiya’ [Aprofet], alondin anch: “Atentamina adia pakach pa atushalapol Am akuswan divu.”