Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  2017-07

Kwambamb kurutu ni patok kudi kwa usey

Anch Muntu Ukatina Ukwet Mayej ma Rufu

Anch Muntu Ukatina Ukwet Mayej ma Rufu

DOREEN waziya nakash pamulejau anch nfumwend Wesley, ukweta mivu 54, anch ukwet mayej makata kuyipish wong. * Adokiter amuleja anch ukufa kwend mwa angond akemp. Doreen ulondin anch: “Natwishap kwitiyij yom yanlejau. Naziya nakash kamu mu machuku mavud. Chamekana mudi yimusadikidin muntu mukwau, kadiap etu. Natongap anch yom yiney yikutwish kwinshiken.”

Cha ushon, yom yamushikena Doreen yikat kuyishiken kand antu awonsu. Mayej ma rufu makutwish kumunenganesh muntu mwawonsu ni chisu chawonsu. Cha musangar chidi anch antu avud akat kukwat mupak wa kuyilam anamakwau ayedina mayej ma rufu. Pakwez, kumulam muyej chidi chom chikash. Yom ik yikutwishau kusal antu a mu dijuku mulong wa kumwongoj ni kumulam mwanamakwau uyedina mayej ma rufu? Mutapu ik ukutwishau in kuyilam ayej kurish nich yovil yikutwishau kwikal nich payilaminau ayej? Pasejina rufu piswimp, yom ik yikutwisha kumekan? Chakusambish, el tushinshikinany mulong wak kumulam muntu ukweta mayej ma rufu udi mulong ukash nlel.

MULONG UKASH NLEL

Siyans wa amingang waswimpin kal mutapu wa antu kufa. Mivu chitot yasutina ey, ap mu jingand jiyila kurutu, uvud wa mivu ya antu wiswipin nakash. Antu ading kufa swa ni mayej ma kusamburik ap ku ma akisidan. Antu avud kadingap ni mutapu wa kuya ku mahopital, ni avud alaminang anamakwau ku yikumbu ni afilang kwol kwau.

Nlel, kuya kurutu mu yom ya chimwingang kuyikwashin amingang kurish nich mayej makash mulong wa kusalaku mivu yivud. Mayej mafanyina kumujip muntu kapamp kamwing pakur, nlel muntu umasadin nich mivu yivud. Pakwez, kulepish mwom kwinoku kumekeshinap kwok kwakin. Yisu yivud ayej akat kwikal ni ulim uyikangeshina kwilam ayinau. Kuyilam antu mudi inay kukasiken nakash ni kwitin yom yivud.

Mudi chibudikin, nakash nakash antu akat kufa ikalap nchik ku yikumbu ap ku mahopital. Nlel antu avud kijap mutapu ukatay muntu kufa, ni akemp awiy amena kal mutapu ufilingay muntu. Mulong wa wom wa kulik kwijik yom yiney, chinech chikutwish  kumukasiken ap kuziyish usu usadinay muntu umulamina mwanamakwend uyedina. Yom ik yikutwisha kukwash?

IRIJEKA KURUTU KWA CHISU

Mudi mwarumburilangau piur pa Doreen, antu avud akat kuziy nakash anch mwanamakwau amukwat ni mayej ma rufu. Kuwejinaku kwiyakamish nakash, kwov wom ni ushon, yom ik yikutwisha kukukwash chakwel wirijeka mulong wa yom yiney yezina kurutu? Kashalapol ushinshamena wa Nzamb walembila anch: “Tuleja mwakuchindil machuku metu chakwel tukwikal ni manangu.” (Kuseng 90:12) Mwaning, kumulembil Yehova Nzamb nich mushiku chakwel akuleja mutapu wa ‘kuchind machuku mey’ ni manangu mulong utwisha kusadin machuku mashalaku kal chakwel umulama mwanamakwey nawamp.

Chinech chitin kwirijek nawamp. Anch mwanamakwey uyedina ulondin ni ukat kulejan mutapu wa kusal yom, chidi cha manangu kumwipul nany ukutwisha kumukwatin mipak chisu chikukanganyay kulond. Mambamb ma patok mulong wa kwijik anch ukukat kumufumb, kumutwal ku hopital ap mitapu yikwau ya kumwok, kukutwish kukepish kulik kwovijan ni yovil ya kwifish nich yikutwishau kwikal nich antu a mu dijuku akukwata mipak ya muyej wakad kutwish kulond. Kwambamb kurutu ni patok kukukwash dijuku mulong wa kushinshikin mutapu wa kumulam muntu mu chisu chiyedinay. Bibil ulondin anch: “Kwakad chiyul kutenchik kukat kuwa.”—Jinswir 15:22.

MUTAPU WA KUKWASH

Chisend cha kusambish cha mwin kulam muyej chidi cha kumwongoj. Muntu ukweta mayej ma rufu ukwet kuswir kwa kwikal nich kashinsh anch udi ukatinau ni kadiap amwinend. Mutapu ik ukutwisha kusal mwamu? Mutangina mikand ap muwangina muyej mizik yikasikeshina ni yimusangareshina. Antu avud akat kwikal akasikeshinau anch anamakwau a mu dijuku ayikwat ku makas ni kuyilej kwa matul.

Chiding cha ukwash kujingunin antu ezina kumutal muyej. Rapor umwing ulondin anch: “Alondin anch kutesh ndiy sens wa nsudien ukata kushal pakach pa ma sens matan. Kutesh kukutwish kudandamen kwikal nich usu ap anch muyej umeken anch ulel, chawiy kangal walond yom wija anch ukutwishap kuyilond anch kalelap.”

Anch chiswapel, lembilany pamwing. Bibil ulondin anch chisu chimwing, kambuy Paul nau arund nend ayimesha mar nakash ni amana anch mwom wau udi mu ubaj nakash. Ukwash ik wadingau nich kuswir? Paul wayileja arund nend anch:  “Chifanyidin en kutukwash mu kulembil kwen.” (2 Korint 1:8-11) Malembil madiokila ku muchim madi ma ukwash nakash mu yisu yikash ni ya mayej makash.

ITIYIN UYAKIN

Kutong anch muntu uukatina ukufa kukat kuziyishan nakash. Tukutwishap kushimwok, mulong rufu rinkind. Katutangap mulong wa kwitiy rufu mudi chom chifanyidina kutushiken mu mwom wetu. (Rom 5:12) Dizu dia Nzamb ditazukin rufu anch “mukankuny.” (1 Korint 15:26) Chawiy, kwidjidjek kutongin piur pa rufu ra muntu ukatina chidi chom chovikena ni chikata kusadik.

Pakwez, kwirijek mulong wa yom yikutwisha kushiken kukutwish kuyikwash antu a mu dijuku kukepish wom wau ni kushinshikin pa kusal yom yikutwisha kuyikasikesh. Pakach pa yom yimwing yikata kushiken ayilejen mu mushet ulondina anch “ Machuku ma Nsudiel ma Muntu Kufa.” Chakin kamu, kadiap anch yom yiney yikat kumushikenang muyej win mwawonsu ni yikutwishap kusadik kamu mu mutapu uyilonginau mu mushet winou. Pakwez, kuswimp kwinoku kwayishikedin kal ayej avud.

Kupwa kwa rufu wa muntu ukatina, chikutwish kwikal cha manangu kutazuk arund a piswimp ading itiyidina kal kukwash. In kulam ayej ni antu a mu dijuku akutwish kwikal ni kuswir kwa kuyinkish kashinsh anch mar ma mwanamakwau mapwa kal ni kakez kamanap kand mar. Sakatang wa antu utwinkishin kashinsh nich rukat anch “afu kijap chom.”—Mulej 9:5.

MWIN KUMULAM MUYEJ WA NSUDIEN

Tukutwish kwilej kwitiy ukwash wa muntu win mwawonsu

Kumuchingejin Nzamb kudi kwa usey—kadiap kwau ching mu chisu cha mayej ma rufu ma muntu wa mu dijuku, pakwez kand mu chisu cha ushon ukat kwez kupwa kwa rufu. Ukutwish kukukwash kusutin mazu makasikeshina ni yisal ya antu akwau. Doreen ulondin anch: “Nileja kwitiy ukwash wa muntu mwawonsu. Chawiy, kujimb kwa ukwash twatambula kwading kupandiken nakash. Am ni nfumwam twijika kamu patot anch winou wading Yehova utulejina anch, ‘Am nidiaku mulong wa kukukwashany mu mar minam.’ Nikuvuramenap chom chinech.”

Mwaning, Yehova Nzamb ndiy Mwin kumulam muyej wa nsudiel. Mulong udi Mwin kutuumb, wij nawamp kusansan kwetu ni ushon wetu. Ukutwish ni udiaku mulong wa kutwinkish ukwash tukweta nich kuswir ni kutukasikesh chakwel tujijamana. Chiwamp kupandakan, wakanin kal anch piswimp ap ukudiosh kapamp kamwing rufu ni kuvumbul mamiliyar ma antu adia mu manangu mend. (Yohan 5:28, 29; Kujingunik 21:3, 4) Mwamu, antu awonsu akutesh mazu ma kambuy Paul malondina anch: “A! Rufu, ukash wey wa kupandakan nich udi kwisu? A! Rufu, rumuny rey ra kujipan nich ridi kwisu?”—1 Korint 15:55.

^ par. 2 Majim amaswimpa.