TONGIN CHOM ECH: Ukat kwendangan mu musée mudia ma monima mavud makur. Mavud mayipin kal, mabarokin kal ni makwatin kal kambukur. Mamwing mabumokin kal kwau. Pakwez kudi umwing udia kamu uwamp ni yikunku yend yimeken kamu nawamp. Chad wamwipul mwin kukutakel anch: “Monima winou udi usu kusutamu makwau?” Ndiy wakul anch: “Bwat, udi ukur nakash kusutamu makwau mavud ni kand kal aurijekangap.” Ey wamwipul kand anch: “Auteka mwi ndond ya kuulamin mulong kangal wayip?” Ntakel wey wakul anch: “Bwat kwau, monima winou warezikin kal ku rinkind mukash ni ruval. Ni ambwambwol avud asadin kal usu wa kuuyipish.” Pamwing ap ukutwish kwiyipul nich kushimwok anch: ‘Monima winou ausala nich ik?’

Chilik chimwing, Bibil udi mudi monima winou ushimwokishena. Udi buku mukur nakash kusutamu mabuku makwau mavud. Chakin kamu, kudi mabuku makwau makur. Pakwez mudi ma monima minam makur mabarokina kal, mikand yivud yikur yafundau ayiyipishin kal nakash mu kusut kwa mivu. Chilakej, yom yalondau piur pa siyans yovijadinap ni ronganyin ra katat, rimedina pa uman wakin. Yiyul yau piur pa yom ya chimwingang yimeken yisu yivud kwikal ya ubaj pa ndond pa kwikal ya ukwash. Ni mikand yivud yafundau pakur yashadin kal kwau yikunku, chad ni yikunku yivud yashadikin kal ap yayipin kal nakash.

Pakwez, Bibil ushalijangen ni mabuku makwau. Asambisha kumufund kwasutin kal yitot ya mivu 35, pakwez Bibil uchidi kal muwamp. Ni ap anch amurishikisha tupamp tuvud mu yitot ya mivu—kumwosh, kumukangesh, kumupipej—yom yilondinay Bibil yidandamedin kwikal yakin. Pa ndond pa kumekan anch kakwetap usey mulong wa ronganyin ra katat, Bibil ulondin yom yivud yishimwokishena ya machuku  ma kurutu.—Tal mushet ulondina anch “Ov, Wikadin kal Mukur Anch Wasambela Kulond Yom Kurutu kwa Chisu?

MBIL JIYIKWASHINA ANTU

Ukutwish kwiyipul anch: ‘Malejan ma Bibil madandamedin kamu kwikal nich usey nlel?’ Mulong wa kwakul chipul chinech, iyipula anch: ‘Milong ik yiyimp yikash yirishinau nich antu nlel? Wisu mulong wovishena wom nakash?’ Pamwing ap utongin anch jidi njit, kuyip kwa rinkind, chisum ap kuburen win kashinsh. Shinshikin katat mbil jimwing jifundishinay Bibil. Paushinshikidina mbil jinej, iyipula anch: ‘Anch antu ashakam kukwatijan ni mbil jinej, ing mangand makimbangap kwikal ndond yiwamp?’

KUKAT CHISAMBU

“Ayuk kwau in kulet chisambu, mulong akez kuyipil anch an a Nzamb.” (Mateu 5:9, TMK) “Salany nich usu wen wawonsu mulong wa kushakam nich chisambu nau antu awonsu.”—Rom 12:18.

RIY NI DILIKISHIN

“Ayuk kwau antu akata kuyovil akwau riy. [Mulong akez] kuyovil niyau riy.” (Mateu 5:7) “Kwashijanany akasikena ni aziyila, anch muntu ukwet mulong ni mukwau chifanyidin kulikishijadin umwing ni mukwau, mudi mwakulikishinanyau en kudi [Yehova] *. Niyen salany kand mwamu .”—Kolosay 3:13.

ANTU A ULOMB WA CHIKIT CHAWONSU ASHICH PAMWING MU CHISAMBU

Nzamb “watanga muntu umwing, chad ku muntu umwing kwawiy kwadiokala michid yawonsu, chawiy Nzamb wayipalangesha mu mangand mawonsu .” (Midimu 17:26) “Nzamb kakwetap kasolikany pakach pa antu, bwat. Ku michid yawonsu, muntu mwawonsu ukata kumulimish ni kusal yom yitentamina, Nzamb ukat kumwitiy.”—Midimu 10:34, 35.

KULIMISH DIVU

“[Yehova] Nzamb wamunona muntu, wamutek mu chir cha Eden mulong wa kuchidim, ni mulong wa kuchilam.” (Disambishil 2:15) Nzamb ukez “kuyishesh awonsu akata kushesh mangand.”—Kujingunik 11:18.

KUKIS RIS NI MWIKADIL UYIMP

“Babalany, ichidijany ayinen, likany ris ra mitapu yawonsu, mulong mwom wakin wa muntu kiudiap mu yom yikwetay, ap anch ukwetap nchik mapit mavud.” (Luka 12:15) “En udiany antu a Nzamb, kichifanyidinap en kulond yom ya [masandj], ap ya kwijond [ya mitapu yawonsu], ap ya ris pakach pen.”—Efes 5:3.

WIN KASHINSH NI KUSAL MUDIMU NAKASH

“Tukat kusot kushakam ni kashinsh mu yom yawonsu.” (Hebereu 13:18, TMK) ‘Mwij kangal wiy kand, pakwez asala mudimu nakash.’—Efes 4:28.

USEY WA KUYIKWASH ANTU ADIA MU MASWIR

“Londany mu mutapu wa kuyongoj antu anenganena, yikwashany aziyila, shimpishany michim kudi antu awonsu.” (1 Tesalonik 5:14) “Kuyikwash an anshon ni adiaafu [mu mar mau].”—Jakobu 1:27.

Bibil kalejenap kwend ching kusu mbil jinej. Mulong wa kutukwash, Bibil kalejenap kwend ching yom tufanyidina kusal pakwez utulejin kand mutapu tufanyidina kuyisal. Anch antu avud asadin mbil twajimbula kal ej, umenap kwey anch mu mangand mukutwish kwikal milong yikemp nlel? Chakin kamu, mbil ja Bibil jidi ja usey nakash ni ja pa  chisu chiwanyidina kamu! Mafundish ma Bibil makutwish kusal yom ik katat kudi ey?

MUTAPU UKUTWISHA KUTANINAMU MU MAFUNDISH MA BIBIL KATAT

Muntu umwing ukweta manangu nakash walonda anch: “Manangu . . . makat kumekan anch madi makin ku yisalijok yau.” (Mateu 11:19) Ov, witiyijin mazu minam? Mutapu wakin wa kupak manangu udi wa kwijik mutapu umadia anch wamasadin. Chawiy ukutwish kutong anch: ‘Ang chakin kamu Bibil ukwet usey wa kumusadin, kakutwishap kulet yibudikin mu mwom wam? Mutapu ik ukwetay usey mulong wa milong nirishina nich katat?’ Shinshikin chilakej ech.

Kudiay Delphine, * mwom wading ukwatikena nakash, ni wading ukwet yom yivud ya kusal. Pakwez kapamp kamwing, wamana mar pasambishay kushadish yom yivud. Mwanend mband wafa. Uruw wend wafa. Nfalang jamupwa. Ulondin anch: “Nadingap kand nija anch nidi nany—nading pakad mwan, pakad ikundj, pakad chikumbu. Niyova anch nidi muntu wa chamwamu—pakad kwijik chinidia, pakad usu ni pakad chitongijok mulong wa yom ya kurutu.”

Kurutu kwa yom yiney, Delphine wading kand kal amanap kamu patok uyakin wa mazu manam malondina anch: “Mivu ya mwom yetu yishikin ku makum sambwad, ap anch usu uwanyidin yikushik ku  makum chinan, ni kuvul kwa mivu yetu yin yidi kusu kwau ya mar ni ushon. Mwom yetu yikat kupwa swa, chad tukat [kujimwangan].”—Kuseng 90:10.

Delphine watana ukwash wa Bibil pa chisu chinech chikash. Ukwash winou wading wa usey nakash kudi ndiy. Mudi mulejena mitu ya milong yisatu yilondwilaku, antu akwau avud amen anch Bibil wayisadidin yom yivud chisu chasadidinau yiyul ya Bibil mu milong yau yadiau nich. Ashikena kamu ku kuman anch Bibil ufaniken ni monima twisambinang kwiur oku. Ushalijadin nakash ni mabuku mavud mikadina kal makur ni makad ukwash. Ov, chinech chidi mwamu mulong Bibil amusala nich yom yishalijadina? Chidi anch mulong ukwet yitongijok ya Nzamb—kadiap ya an a antu?—1 Tesalonik 2:13.

Pamwing ap niyey wamen kal anch mwom udi wiswimp ni wizwil too ni milong. Anch milong yakupandaken, kwisu ukuya chakwel utana rongoj, ukwash ni yiyul ya manangu ya kusadin?

El tushinshikinany mitapu yisatu yikutwishay Bibil kwikal nich usey mu mwom wey. Ukutwish kukufundish mutapu wa

  1. kwiyep milong anch chiswapel.

  2. kupwish milong yikutwisha kushiken.

  3. kujijamen nawamp milong yimwing yiwakad kutwish kuswimp.

Mitu ya milong yilondwilaku ey yikwisambin yom yiney yisatu.

^ par. 10 Yehova diawiy dijin dia Nzamb dilejenau mu Bibil.—Kuseng 83:18.

^ par. 24 Mu mutu wa mulong winou ni yikwau yisatu yilondwilaku ey, majim mamwing amaswimpin.