Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 9 , 2016

 MUTU WA MULONG WA PA CHIBUR | KWISU UKUTWISHA KUTAN KWONGOJ?

Mutapu Wongojiningay Nzamb

Mutapu Wongojiningay Nzamb

Kambuy Paul wamumekesha Yehova * mud “Nzamb ukata kupan kwongoj kwawonsu, ndiy ukata kutwongoj mu mar metu mawonsu.” (2 Korint 1:3, 4) Chawiy Bibil utulejin nich kashinsh anch kwikil muntu usutinamu ukwash upaniningay Nzamb ni kwikil mar ap mamwing mapandakena makutwishay Tatukwetu wa mwiur kukangany kutwongoj.

Chakin kamu, tufanyidin kusal chom kanang anch tukimbin anch Nzamb atwongoja. Mutapu ik ukutwishay dokiter kutukwash anch twovijanangap nend anch tukumanijan? Muprofet Amos wipula anch: “Ov, antu aad akutwish kwend pamwing wakad kwovijan?” (Amos 3:3) Chawiy Bibil utukasikeshin anch: “Sejany piswimp kudi Nzamb, chad niyend ukusej piswimp ni yenen.”—Jakobu 4:8.

 Mutapu ik tukutwisha kwikal nich kashinsh anch Nzamb ukusej piswimp ni yetwetu? Cha kusambish, mulong utulejin tupamp tuvud anch ukatining kutukwash. (Tal  mushet ulondwilaku.) Cha Kaad, mulong tukwet uman umekena patok wa antu ongojau kudiay Nzamb—ad antu akin, kusambishin padi antu a katat ni a pakur.

Chilik chimwing kand ni antu akimbina ukwash wa Nzamb nlel, Mwant David niyend warisha ni mar makash. Pamulembilay Yehova anch: “Tesh kulembil kwam pinikata kudil mulong wa kwinkwash. Ov, Nzamb wamwakula? Mwaning. David walonda kand anch: “Ndiy ukat kwinkwash, chawiy muchim wasangar nakash.”—Kuseng 28:2, 7.

CHISEND CHA YESU CHA KUYONGOJ ANTU AWONSU ADIDILA

Nzamb wakata anch Yesu ikala ni chisend chijim cha kuyongoj antu akwau. Yisend yikwau yamwinkishau Yesu kud Nzamb yading ya “kuyok akweta michim ya runeng,” ni “kuyongoj antu awonsu adidila.” (Isay 61:1, 2) Mud mwasambelau kubwak, Yesu wayimekeshina antu musangar pakampwil antu ading “[a]ziyina mulong wa yisend yilimina.”—Mateu 11:28-30.

Yesu wayongoja antu nich yiyul yend ya manangu, mu kuyisadin mu mutapu uwamp ap kand mu yisu yikwau wayokang. Dichuku dimwing muntu wading uyedina mayej ma mak wamwilembina Yesu anch: “Anch ey ukatil, ukutwish kwingok.” Chad Yesu wamwovila riy nakash, wamukwat, wamwel anch: “Nikatil kukok, chawiy katat yerik!” (Marko 1:40, 41)

Nlel unou, Mwan a Nzamb kadiap panap pansh mulong wa kutwongoj. Pakwez, Tatukwend Yehova, “Ndiy Nzamb ukata kupan kwongoj kwawonsu,” udandamedin kukwash antu adia mu maswir ma rongoj. (2 Korint 1:3) Tushinshikina mitapu yinying yikatay kusadin Nzamb mulong wa kuyongoj antu.

  • Bibil. “Yom yawonsu yafundau pakur mu Mukand wa Nzamb ayifunda mulong wa kutulej etu. Afunda mwamu chakwel tukujamish ni kukasikesh mulong wa ruchingej rezila mu Mukand wa Nzamb.”—Rom 15:4.

  • Spiritu Utumbila wa Nzamb. Machuku makemp kupwa kwa rufu ra Yesu, chikumangen chawonsu cha win Kristu chashakama mu chisambu. Mulong wak? Mulong “Chendila mu wom wa [Yehova] ni mu kwongoj kwa spiritu utumbila.” (Midimu 9:31,TMK.) Spiritu utumbila, usu ukatay kusadin Nzamb, ukwet usu nakash. Nzamb ukutwish kusadin usu winou mulong wa kumwongoj muntu win mwawonsu udia mu mwikadil kushalijan.

  • Malembil. Bibil utulejin anch: “Kangal wiyakamishany,” utukasikeshin kand anch, “mwijikishany Nzamb yom yawonsu umwitilanya, chad chisambu cha Nzamb chisutila ronganyin ra antu chikulam michim yen ni yitongijok.”—Filip 4:6, 7.

  • AKADIVAR IN KRISTU akutwish kwikal arund akin tufanyin kuyichingejin mu chisu cha mar mulong wa kutwongoj. Kambuy Paul wisambina piur pa akadivar nend anch ad ‘musul wa kwongoj’ mu yisu ya “mar ni yakamish.”—Kolosay 4:11; 1 Tesalonik 3:7,TMK.

Pakwez ukutwish kusanger mutapu usadikining yom yiney. El tushinshikinany milong yayishikena antu twisambinang mu mutu wa mulong watakelang. Mud awiy, ukutwish kujingunin anch Nzamb udandamedin kuwanyish kushilamu kwend kwakin kulondina anch: “Nikez kakwongonjany. . , mudi mwan ukat kwogonjau kudi makwend.”—Isay 66:13.

^ par. 3 Yehova did dijin dia Nzamb mud mudilejenau mu Bibil.