Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 9 , 2016

Mutapu wey wa Kudjal Umutumbishining Nzamb?

Mutapu wey wa Kudjal Umutumbishining Nzamb?

“Salany yawonsu mulong wa kulet uyaj kudi Nzamb.”—1 KORINT 10:31.

MIMINY: 34, 29

1, 2. Mulong wak Atuman a Yehova akwet mbil yiwamp pa mulong wa kudjal? (Tal chipich cha kwisambishin.)

JURNAL umwing wa mwi ngand ya néerlande wisambidin mutapu ukatau kudjal antakel a ma egliz payilingau ku ma koference mau. Jurnal winou ulondin anch: “Ukuman masun ma mitapu kushalijan, pakampwil anch kud marungil.” Pakwez, jurnal winou ulondin kand anch kiwawiyap mutapu ukatau kudjal Atuman a Yehova ku yitentam yau. Jurnal winou ulondin kand anch antu apamin kal ni asand akat kudjal ma koch ni ma kravat, pakwez, amband ni ayangadim akat kudjal ma jip mawamp mayiwanyidina ni ma kalimish. Yisu yivud Atuman a Yehova akat kuyijikitish mulong wa mutapu wau wa kudjal. Kambuy Paul walonda anch masun ma in Kristu mafanyidin kwikal “mawanyidina nawamp wakad kwishimek,” mayiwanyidina atushalapol a Nzamb. (1 Timote 2:9, 10) Ap anch Paul wisambina piur pa amband, pakwez, mbil yiney yiyitadin kand amakundj in Kristu.

2 Mbil yiwamp yitadina pa mulong wa kudjal yid ya usey kud etu pitudia antu a Yehova, ni yid kand ya usey kud Nzamb utwifukwidina. (Disambishil 3:21) Bibil ulondin patok anch Yehova, Mukaleng wa mangand mawonsu, ukwet mbil ja mutapu ufanyidinau atushalapol end kudjal. Chawiy, anch twatond masun ma kudjal tufanyidinap kwisangaresh ayinetu, pakwez chidia cha usey  chid kumusangaresh Yehova Mukaleng Nsalejetu.

3. Yom ik tukutwisha kwilejin pa mutapu wa kudjal wading mu Yijil ya Nzamb yayinkishau in Isarel?

3 Mu Yijil ya Moses, mwading mbil yayikinga in Isarel ku yom yiyimp ku michid yadingau nau pamwing. Yijil yiney yamekesha anch Yehova wova nayimp mulong wa kudjal masun makad kumekesh kushalijan kwading pakach pa kudjal kwa amakundj ni amband. Nlel unou, kudjal kwakad kumekesh kushalijan akutazukin anch kudjal kulangwishining maku ma masandj. (Tang Kuvurik Yijil 22:5.) Kusutil ku Yijil yiney, twilej kal anch Yehova kasangerap mutapu wa kudjal wasala anch ikundj amekena mud mband ap kand mband ni ndiy amekana mud ikundj, chading chikasiken pa kwijik kushalijan kwading pakach pa ikundj ni mband.

4. Yom ik yikutwisha kuyikwash in Kristu akwata mipak yiwamp piur pa kudjal?

4 Mbil ja mu Bibil jikutwish kutukwash tukwata mipak yiwamp piur pa kudjal. Mbil jinej jidiap ja kusadin ching kukwatijan ni ngand ap chirung kanang ap kulondwish ni mashakamin ma antu. Tukwetap kuswir kwa list wa yom yilejena masun mafanyidina kudjal ap bwat. Tufanyidin ching kulondul mbil ja mu Bibil, jawiy jikutukwasha kutond masun tufanyidina kudjal. El twisambinany mbil jimwing jidia mu Bibil jikutukwasha kwijik masun mitiyikina ‘makutwisha kumusangaresh Nzamb,’ pitutondina masun tufanyidina kudjal.—Rom 12:1, 2.

“TUKAT KUMEKESH ANCH TUDI ATUSHALAPOL A NZAMB”

5, 6. Mutapu ik kudjal kwetu mu kukweta usu pad antu akwau?

5 Kambuy Paul wapepilau wajimbula mbil ja usey jidia mu 2 Korint 6:4. (Tang.) Mutapu wetu wa kudjal uyilejining antu akwau chom kanang ni antu avud akutwish kwikal ni chitongik kanang piur pa mutapu wetu wa kudjal. (1 Samwel 16:7) Mulong tud atushalapol a Nzamb, tufanyidin kusal usu wa kusal yom yivud pa ndond pa kusanger kudjal ching masun mawamp ap ching mitukatina. Anch twasadin mbil ja mu Bibil, jikutukwash kwipuk kudjal masun matukwatina ku kumujimbu ap makulangwisha maku mayimp ap mamekeshina yid ya mujimbu. Chinech chirumburikin anch tufanyin kwipuk kudjal masun mamekeshina yid yijingamina ya mujimbu wetu. Muntu win mwawonsu kafanyidinap kwov nayimp mulong wa kudjal kwetu ap kumubachik chakwel amana mutapu wetu wa kudjal.

6 Anch tudjadil kamu nawamp, twinangin, kwileng nawamp ni anch masun metu matuwanyidin kamu nawamp, antu akutwish kutulimish nakash akuman anch tud atushalapol a Yehova Mukaleng Nsalejetu. Ni akutwish kwipan nakash mu kumwifukwil Nzamb wetu, akulimish kand nakash dirijek dietu ni akutwish kutesh kand uruu wetu wa kupandish mwom.

7, 8. Chisu ik cha pakampwil tufanyidina kudjal masun mawamp ni makalimish?

7 Tusadining mwamu mulong wa Nzamb wetu utumbila, akadivar ni anambaz netu in Kristu ni mulong wa antu adia mu teritwar wetu mulong wa kumulish Yehova ni kulimish kand mudimu wetu wa kulejan. (Rom 13:8-10) Masun metu tudjiting makweting usey pakampwil chisu tuyilinga ku yikumangan yetu ya win Kristu ap pituyilinga mu mudimu wetu wa kulejan. Tufanyidin kudjal mu mutapu wa kalimish umekeshina anch tud antu akata kumwifukwil Nzamb. (1 Timote 2:10) Chakin kamu, masun mamwing akutwish kumadjal mu jindond kanang pakwez, mu jindond jikwau mawanyidinap kumadjal. Chikalap nchik ndond tushicha, pitudia Atuman a Yehova tufanyidinap kudjal masun makutwisha kuyovish antu akwau nayimp.

Masun mey masadin anch antu akwau amulimisha Nzamb ukata kusadin? (Tal paragraf wa 7, 8)

8 Tang 1 Korint 10:31. Anch twaya ku yintentam ya munyingumuku ap ya rejon, masun metu mafanyidin kwikal mawamp ni ma kalimish. Tufanyidinap kwimburij mutapu  wa kudjal uyimp udjadinau antu avud adia mu mangand. Kurutu ap kupwa kwa program wa chitentam cha rejon ap anch tudi ku hotel, tufanyidin kwikal nich kashinsh anch masun metu mayovishinap antu akwau nayimp ap matukwatina. Anch twadjal masun mawamp ni milimishina tukwovap usany wa kwimekesh anch tud Atuman a Yehova ni tukupan uman chisu chawonsu.

9, 10. Mutapu ik utukwashina Filip 2:4 pa mutapu wetu wa kudjal?

9 Tang Filip 2:4. Mulong wak tufanyidina kutong anch mutapu wetu wa kudjal ukutwish kwikal nich usu pad akadivar ni anambaz etu in Kristu? Diyingishin dimwing did anch antu a Nzamb asadining usu wa kulondul chiyul ech chilondina anch: “Chifanyidin kujip rusot ren ruyimp rikata kulondul yom ya mangand, mudi usund, ni kusotijan, ni upwepu, ni maku mayimp ma mujimbu, ni ris, mulong ris ridi mutapu wa kwifukwil akish.” (Kolosay 3:2, 5) Akadivar ni anambaz amwing alika yisal ya masandj, pakwez, akutwish kudandamen kurish ni maku mayimp. Anch tubabelap, mutapu wetu wa kudjal ukutwish kusal anch chiyikasikena kulondul yiyul ya Bibil ni kurish ni maku minam. (1 Korint 6:9, 10) Tukukatap kusal anch kurish kwau kwikal kukash, kimwawiyap?

10 Pitudia pamwing ni akadivar ni anambaz etu, tufanyidin kwikal antu akata kukasikeshin pa yom yiwamp. Mutapu wetu wa kudjal  ukutwish kuwapish ndond tudia, ap anch tud ku yikumangan ap twiswedishin. Ap anch tukwet want ipetu wa kutond masun tufanyidina kudjal, tukwet chisend chijim cha kudjal masun mawamp makutwisha kuyikwash antu akwau adandamena kwikal ni yitongijok, kulond ni kwikal ni yaku yishitwila ku mes kwa Nzamb. (1 Pita 1:15, 16) Rukat rakin “kirukwetap dichim, ap [kwitongin].”—1 Korint 13:4, 5.

KUDJAL KUWAMP KULONDWISH NDOND NI CHISU

11, 12. Mutapu ik utukwashinay Mulej 3:1, 17 kwikal ni chitongijok chiwamp?

11 Pakatau atushalapol a Nzamb kukwat mupak wa masun mafanyidinau kudjal ijing anch “kudi chisu cha yom yawonsu ni cha midimu yawonsu.” (Mulej 3:1, 17) Yisu kushalijan, yirung, mashakamin ma antu ni yom yikutwisha kumushiken muntu, yom yiney yikutwish kwikal ni chibachik pa mutapu wetu wa kudjal. Pakwez, mbil ja Yehova jiswimpiningap kukwatijan ni chisu.—Malakiy 3:6.

12 Mu chisu cha marungul, chikasikening kwijik anch masun metu mawapin bil anch mad makalimish. Akadivar ni anambaz etu asangering anch tudjitap masun matukwatina ap mamekeshina yid ya mujimbu ap madia ma kanying. (Job 31:1) Chikwau kand, anch twowil men ku chau ap twisayin, masun metu ma kwisay nich mafanyidin kwikal ma kalimish. (Jinswir 11:2, 20) Ap anch antu avud akat kudjal masun ma kwisay nich mamekeshin yid ya mujimbu, pakwez etu tufanyidin kwijik anch kutond kwetu kumutumbishin Nzamb wetu utumbila Yehova.

13. Mulong wak chiyul chidia mu 1 Korint 10:32, 33 chid cha ukwash mu kutond kwetu kwa masun?

13 Kud kand mbil yikwau ya usey yikutwisha kutukwash mulong wa mutapu wa kutond masun metu ma kudjal. Tufanyidin kubabal chakwel kangal twayipwakesh antu akwau ap kuyipish kom kau. (Tang 1 Korint 10:32, 33.) Chid chisend chetu cha kwipuk masun makutwisha kuyipwakesh akadivar ni anambaz etu pamwing ni antu akad kumusadin Yehova. Kambuy Paul wafunda anch: “Pakwez etu awonsu tufanyidin muntu ni muntu kumusangaresh mwanamwakwend, mulong wa kumukasikesh kukul mu ritiy.” Paul walonda anch: “Mulong Kristu kisangareshap amwinend.” (Rom 15:2, 3) Mud Yesu, tufanyidin kusal rusot ra Nzamb ni kuyikwash antu akwau yawiy yom ya usey kusutamu kwisangaresh. Chawiy komb, tufanyidinap kudjal masun ching mitukatina anch twij anch masun minam makutwish kuyikangesh antu akwau atesha uruu wetu.

14. Mutapu ik ufanyidinau anvaj kuyifundish anau chakwel amutumbisha Nzamb mu mutapu wau wa kudjal?

14 Anvaj in Kristu akwet chisend cha kuyifundish anau chakwel alondula mbil ja Bibil. Chinech chirumburikin anch anvaj ni anau afanyidin kwikal ni kashinsh anch kudjal kwau ni kwileng kukat kumusangaresh Nzamb. (Jinswir 22:6; 27:11) Mutapu ik ukutwishau anvaj kuyifundish anau kumulimish Nzamb wetu utumbila ni mbil jend? Anvaj afanyidin kwikal chilakej chiwamp kud anau. Afanyidin kuyifundish anau nich rukat ni kuyilej mutapu wa kutond masun mawamp ni makalimish. An kafanyidinap kutond ching masun makatinau, pakwez, chidia cha usey chid kutond masun ma mutumbishina Yehova Nzamb ukatau kusadin.

SADIN WANT IPEY NICH MANANGU

15. Chom ik chifanyidina kutukwash kukwat mipak ya manangu?

15 Bibil ukwet yiyul ya kusadin yikutwisha kutukwash tukwata mipak ya manangu yikumusangaresha Nzamb. Ap mwamu, kudjal kwetu kumekeshining mutapu tudia . Mutapu wetu wa kudjal ni masun metu tulandining makutwish kushalijan ni antu akwau. Pakwez, masun metu mafanyidin kwikal matuwanyidina kamu, minaningina, mawamp ni makalimish kukwatijan ni ndond tudia.

16. Mulong wak chitin kusal usu wa kudjal nawamp?

 16 Yisu yivud chiswapelingap kutond masun mawamp ni makalimish. Magaze mavud makat kulandish ching masun mabudikina katat. Chawiy chitining kusal usu nakash mulong wa kutond koch muwamp, masun mawamp, ma bluz mawamp, yikut yiwamp ni ma patalon yakad kutukwat. Chawiy, akadivar ni anambaz netu anch aman mwamo akutwish kusanger usu wetu tusadina mulong wa kutond masun mawamp ni makalimish. Ni tukwikal ni musangar wa kumutumbish nakash Tatukwetu mukatish wa mwiur pitusadina usu wetu wawonsu mulong wa kudjal masun mamusangareshina.

17. Yom ik yikutwisha kusal anch mukadivar alama wedj ap bwat?

17 Ov, chid cha usey kud akadivar kwikal ni wedj? Yijil ya Moses yayileja amakundj kulam wedj wau. Pakwez, in Kristu kadiap mwinshin mwa Yijil ya Moses, ap kayitinap kulondul yijil yiney. (In Levi 19:27; 21:5; Galatia 3:24, 25) Mu yaku ya antu amwing, chiwapining kukil wedj nawamp ni kuulam mulong ukutwishap kuyikangesh antu kutesh uruu wetu. Chawiy, akadivar amwing akweta yisend akweting wedj. Ap mwamu, akadivar amwing akwatining mupak wa kukil wedj wawonsu. (1 Korint 8:9, 13; 10:32) Mu jindon jikwau, kulam wedj chidiap chaku chau chawiy in Kristu kafanyidina kulam wedj wau. Mu jindond jinej anch mukadivar walam wedj wend ukutwish kumukangesh kumutumbish Nzamb ni ‘akumufish nich.’—1 Timote 3:2, 7; Rom 15:1-3.

18, 19. Mutapu ik utukwashinay Mike 6:8?

18 Musangar mud ik tukweta pa kwijik anch Yehova katwinkishinap list wa yom tufanyidin kudjal ni wa mutapu wa kwileng. Pakwez, watwinkisha want ipetu ukutwisha kutukwash kukwat mipak yiwamp yimedina pa mbil ja mu Bibil. Chawiy, anch twakwat mupak wa kudjal ni wa kwileng, tufanyidin kumekesh anch kudjal kwetu kud kuwamp ni kwa kalimish pitumusadidina Nzamb wetu.—Mike 6:8.

19 Twij nawamp anch Yehova ud wishitwila ni utumbila ni mbil jend jidi jiwamp mulong wa kututakel. Anch tukimbin kwikal muntu wija mimbu yend ni wikepishina, tufanyidin kulondul mbil jend mu mwom wetu. Kwijik mimbu yetu kukutukwash tulimish mutapu wovilangau antu akwau ni mutapu wau wa kutong .

20. Kudjal kwetu ni kwileng kufanyidin kwikal ni chibachik ik pad antu akwau?

20 Mutapu wetu wa kudjal ufanyidin kumekesh patok anch tud kamu atushalapol a Yehova. Mbil ja Yehova jid jitumbila ni tukwet musangar wa kujisadin. Yisu yivud Akadivar nau anambaz akat kuyijikitish mulong wa kudjal ni mulong wa yisal yau yiwamp, akat kuyipwit antu akweta michim yiwamp chakwel atesha uruu wa dipandish wa mu Bibil ni apanining katumb ni kumusangaresh Yehova. Anch twakwat mipak ya manangu piur pa kudjal kwetu, tukudandamen kumutumbish Ndiy amwinend udjita “katumb ni uyaj.”—Kuseng 104:1, 2.