Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 9 , 2016

 MUTU WA MULONG WA PA CHIBUR | KWISU UKUTWISHA KUTAN KWONGOJ?

Kwongoj mu Yisu ya Mar

Kwongoj mu Yisu ya Mar

Mar makat kushiken mu mitapu kushalijan. Tukutwishap kamu kwisambin mitapu yawonsu ya mar makata kutushiken, pakwez el twisambinany yilakej yinying twisambinang mu mitu ya milong yatakelang. Shinshikin mutapu urishinau antu ni milong kushalijan ni mutapu utaninau kwongoj kwakin kudiokila kud Nzamb.

ANCH WABUREN MUDIMU

Seth ulondin anch “mudimu wam ni wa mukajam yapwa mu chisu chimwing. * Mu mivu yaad twasalang midimu yikemp yikemp. Mud chibudikin, mukajam Priscilla, waburena musangar, ni niyova anch nikwetap usey.

Mutapu ik twarisha nich? Priscilla wavurika mazu ma Yesu madia mu Mateu 6:34. Walonda anch tufanyidinap kwiyakamish mulong wa diamashik, mulong dichuku ni dichuku dikwet yakamish yau. Malembil mend madiokila ku muchim mamukasikesha chakwel adandamena kuya kurutu. Ku mutambu wam, Kuseng 55:22 wangongoja. Mudi Nfund a Kuseng, namudjibwila Yehova chisend cham, ni namana anch ukwinkwash. Ap anch katat nid ni mudimu, tudandamedin kwikal ni mwom uswapela kulondwish chiyul chapanay Yesu chidia mu Mateu 6:20-22. Payiney yawonsu, twamusejina Nzamb piswimp ni twikala kand piswimp umwing ni mukwau.”

Jonathan ulondin anch: “Nova wom piur pa machuku ma kurutu chisu twaburena nfalang mulong wa tumidimu tukemp twasalang. Mulong wa kukasikan kwa nfalang, twasala mudimu ukash mu mivu 20 pakad kwikal ni chom. Am ni mukajam twasambisha kutend piur pa nfalang. Mulong twova wom anch kart wa kutambul nich nfalang wa mudimu afanyina kumulik.

Pakwez Dizu dia Nzamb ni spiritu wend yatukwasha kukwat mipak yiwamp. Nileja mutapu wa kwitiy kusal mudimu win wawonsu ukumekana, ni twalika kusadin nfalang mulong wa kuland yom yakad ukwash. Mud Atuman a Yehova, atukwasha kand kud akadivar akaritiy. Atukasikesha mulong twading tutongin anch tukwetap usey, ni adandamenang kutukwash mu yisu ya mar.”

ANCH URUW WAFA

Raquel ulondin anch: “Panlikay nfumwam, niyova nayimp ni nova ujim. Ni nova ushon nakash. Pakwez namusejina Nzamb, ni wangongoja. Pinamulembilang Nzamb dichuku ni dichuku, chisambu chend chalama muchim wam. Chamekana kud am anch muchim wam waurokina.

Nimujikitishin mulong wa Dizu diend Bibil, nawina yovil ya ujim ni ya ushon. Nalama ku muchim mazu ma kambuy Paul madia mu Rom 12:21 malondina anch: ‘Kangal witiy kuyip kukupandakan usu. Pakwez chifanyidin ey kusal yom yiwamp mulong wa kupandakan kuyip.’

Murund muwamp wankwasha mulong wa kushemunik. Wanleja mukand wa Mulej 3:6 ni wanleja mu mutapu uwamp anch kud chisu ukutwisha ‘kushadish.’ Chading chiyul cha manangu nadinga niswirikedina. Nikwet katat chitongijok chisu mu mwom wam.”

Elizabeth ulondin anch “anch uruw wey wafa ukwet kuswir kwa ukwash. Nading ni murund nam wankwashang dichuku ni dichuku. Twadilang pamwing, wangongojang, ni wamekeshinang rukat pa ndond pa kwinlik. Nading ni kashinsh anch Yehova wamusadina chakwel angoka kusansan kwa yitat.”

MU CHIRUNG CHA MAYEJ AP CHA UPAL

Luis, twajimbulanga mu mitu ya milong yiney, wading ni mayej ma rudung, wafa tupamp twaad ni wapizurika. Ukwet kuswir kwa ma saa 16 ma oxygen pa dichuku. Ulondin anch “nading kumulembil Yehova chisu chawonsu. Kupwa kwa kumulembil Nzamb, spiritu wend wangikisha usu. Malembil makat kwinkasikesh nidandamen kumuchingejin ni kwijik anch ukat kwinlam.”

Petra ukweta mivu 80 ulondin anch: “Nikatining kusal yom yivud pakwez nitwishiningap. Usu wam  uyil mukukep. Mwon wawiy ukata kwinkwash. Yisu yivud nitongining mutapu witay Yesu kud Tatukwend chakwel yom yiyimp yisuta anch chitwishikin. Pakwez Yehova wamwinkisha Yesu usu, ni ukat kwingikish kand niyamam. Malembil mad mud mwon wam wa dichuku ni dichuku. Noviling kamu nawamp kupwa kwa kwambamb ni Nzamb.”—Mateu 26:39.

Julian, warishina ni mayej matazukinau anch sclérose multiple mu mivu piswimp ni 30, wiyovil mutapu wawiy umwing. Ulondin anch “naswimpa nkwas ninading kushakamang mulong wa kushakam mwi nking ya ayilim. Pakwez mwom wam wading ukwet usey mulong nipana mu kuyisadin akwetu. Kupan kukutwish kwa kepish mar, ni Yehova udandamedin kuwanyish kushilamu kwend mulong wa kutukasikesh pa chisu tukweta nich kuswir. Mud kambuy Paul, nikutwish kulond anch: ‘Nikutwish kusal yom yawonsu mwi ndiy ukata kwinkasikesh am.’”—Filip 4:13.

ANCH WAFISH

Antonio ulondin anch “chisu chafay tatukwam ku aksidan payay makwend, nitiyijap kapamp ka kusambish. Chamekana kamu nayimp—mulong wading kwend mwin kwendangan wakad mulong. Pakwez kwadingap chom chinafanyina kusal. Washadisha manangu mu machuku matan kurutu kwa kufa. Yisu yimwing, nandamenang kudil kurutu kwa makwam, pakwez nawangang pansh anch nid amwinam. Niyipulang anch ‘mulong wak?mulong wak?’

“Mu machuku minima mayimp, nadandamena kwit ukwash wa Yehova chakwel nikepisha ushon ni nikal ni chisambu. Nasambisha kuninet pakemp pakemp. Navurika anch Bibil ulejen anch ‘chisu cha mar’ chikat kushik kudi antu awonsu. Mulong Nzamb kakudimbanangap, nikwet kashinsh anch nikez kuman kand tatukwam pakezay kuvumbuk.”—Mulej 9:11; Yohan 11:25; Titus 1:2.

“Ap anch mwan wetu wafa ku aksidan wa avion, tudandamedin kwikal ni musangar mu manangu mulong wa chisu tukeza kwikal nend pamwing”—Robert

Robert, twajimbulang mu mutu wa mulong wa kusambish, wading ni yitongijok mud yiney. Ulondin anch: “ Am ni mukajam twikala ni chisambu cha mu manangu mud mulondinau mu mukand wa Filip 4:6, 7. Twikala ni chisambu chinech mu kumulembil Yehova. Chisambu chinech cha mukach chatukwasha mulong wa kwambamb ni atubamb a nsangu mulong wa ruchingej piur pa divumbuk. Ap anch mwan wetu wafa ku aksidan wa avion, tudandamedin kwikal ni musangar mu manangu mulong wa chisu tukeza kwikal nend pamwing. Tusadin usu wa kushinshikin pa ruchingej riner.

Patulejau kud akadivar netu Atuman anch twakumanangany ukat kurumburilany piur pa ritiy ren mu mutapu uwamp ku televizion, twayileja anch tukat kujikish mulong wa malembil mavud masalau piur petu. Twitiyija chakin kamu anch Yehova watukwasha kusutil jinsangu jakukasikesh jatutuminangau.”

Mud yilakej twisambinanga kwisambishin, chimekeshin anch Nzamb ukat kuyongoj antu akata kurish nich milong ni yakamish. Chid nchik padi ey? Ap anch warish nich mulong kanang mu mwom wey, ijik anch kud kwongoj kwakin ukutwisha kutan mu chisu cha mar. * Mulong wak ufanyidinap kumuvurik Yehova chakwel akukwasha? Mulong “Ndiy Nzamb ukata kupan kwongoj kwawonsu.”—2 Korint 1:3.

^ par. 5 Majin mamwing mu mutu wa mulong winou amaswimpa kal.

^ par. 23 Anch ukatin akukwasha wikal piswimp ni Nzamb ni utambula kwongoj kwend, yileja amboku Atuman a Yehova a mu teritwar wey ap fund ku biro wa mutiy udia piswimp ney.