Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 9 , 2016

“Kangal Walikumukany mu Makas”

“Kangal Walikumukany mu Makas”

“Kangal walikumukany mu makas.”—SOFONIY 3:16.

MIMINY: 54, 32

1, 2. (a) Milong ya mutapu ik yirishinau nich antu avud nlel, ni yibudikin ik yitaniningau? (b) Ruchingej ik rakin ripaninau mu Isay 41:10,13?

NAMBAZ umwing udia chibol wa rawonsu watinau kud mukurump wa chikumangen ulondin anch: “Chikalap nchik kulam mwikadil uwamp wa muspiritu, narisha nich yakamish mu mivu yivud. Yankangeshang kulal tul, yikala ni yibudikin pa ukash wam wa mujimbu, mutapu wakuyisadin antu akwau waswimpa, ni yisu yimwing nakimba kulik mudimu wa uchibol.”

2 Ukutwish kwiyov mwiyovay nambaz winou? Cha ushon, mulong tud mu mangand mayimp ma Satan, tumen mar nakash. Mud nkal ukangeshining Bak kushemunik, yakamish yikutwish kutuziyish. (Jinswir 12:25) Mulong wak wiyakamishina? Pamwing ap ukwet ushon mulong wa mwanamakwey wafila kal ap ukwet mayej makash ap akuzengodin. Usadin usu wa kulam dijuku diey ap anch kud milong ya kuburen nfalang. Pasutina chisu, yakamish yikutwish yakuziyish ni kushadish musangar wey. Chawiy, ufanyidin kwikal ni kashinsh anch Nzamb ukukukwash.—Tang Isay 41:10, 13.

3, 4. (a) Mutapu ik usadidinay Bibil dizu “chikas”? (b) Yom ik yikutwisha kusal anch makas metu malikumuka?

3 Yisu yivud Bibil ukat kusadin yid ya mujimbu mulong wa kwisambin mikadil kushalijan ni yisal ya muntu. Chilakej, chikas achijimbwil tupamp chitot. Palondinay Bibil anch makas ma muntu makweting usu, chirumburikin anch muntu  amukasikeshin, ukwet usu, ni ukutwish kusal chom kanang. (1 Samwel 23:16; Esidera 1:6) Chikutwish kurumburik kand anch ukwet mwikadil uwamp ap ukwet ruchingej mulong wa machuku ma kurutu.

4 Yisu yikwau, Bibil ukutwish walond mulong wa muntu walikumwisha makas mend. Chinech chirumburikin anch muntu uziyina ap ushadishina ruchingej. (2 Jinsangu 15:7; Hebereu 12:12) Anch ud mu yakamish ap ushon ap umen anch urund wey ni Yehova wasambish kal kuziy, ukutwish kulik kumusadin Yehova. Kwisu ukutwisha kutan kukasikesh? Mutapu ik ukutwisha kwikal ukasikeshinau mulong wa kujijaman ni kwikal ni musangar?

‘CHIKAS CHA YEHOVA CHISWIPINAP MULONG WA KUPANDISH’

5. (a) Mutapu ik twiyoviling anch tukwet milong, pakwez yom ik tufanyidina kuvurik? (b) Yom ik tukwisambina?

5 Tang Sofoniy 3:16, 17. Tufanyidinap kwov wom ni kwiziy ap kulik makas metu malikumuka piturishina nich milong. Tatukwetu mukatish, Yehova, utulejin anch tumuleja yakamish yetu yawonsu. (1 Pita 5:7) Yehova utulamining mud mwalamay muchid wa Isarel. Wayileja anch: ‘Chikas chend chiswipinap mulong wa kupandish.’ Udingaku yisu yawonsu mulong wa kuyipandish atushalapol end ashinshamena. (Isay 59:1) Mu mutu wa mulong winou, tukwisambin yilakej yisatu ya usey ya mu Bibil yimekeshina anch Yehova ukatin ni ukwet usu wa kuyikwash antu end chakwel asala rusot rend ap anch arishin ni milong kushalijan. El tuman mutapu ukutwisha yilakej yiney kukukasikesh.

6, 7. Mutapu wayiwinau in Amalek kud in Isarel kutufundishin ik?

6 Kupwa kwa kuyikol in Isarel mu usuk mwi ngand ya Idjibit, in Amalek ayirishikisha. Moses wamuleja Joshua, muntu utakamena mulong wa kuyitwal in Isarel kwi njit. Kupwa Moses wamusenda Aron ni Hur aya pa mukandu. Pa mukandu pinipa pawiy pamanau mutapu warishau njit. Ov, antu inay asatu achina njit mulong ova wom? Bwat!

7 Moses walondula yom yatenchikau ni yom yiney yawiy yayikwasha in Isarel chakwel ayiwina in Amalek. Walamang mukombu wa Nzamb wakin mu makas mend ni wauzambulang. Pasalangay Moses mwamu, Yehova wayinkisha in Isarel usu wa kuyirishikish in Amalek. Pakwez, anch chikas cha Moses chasambish kuziy ni kulikumuk in Amalek awinang. Aron ni Hur asalang mau mau mulong wa kumukwash Moses. “Chad makas ma Moses maziya, awiy atamula diyal aditek kwishin, ndiy washakamap; ni Aron nend Hur amulama makas mend piur, umwing mutambu mukwau mutambu ukwau, chawiy makas mend mimana ti, kimanyikekap kushikamu ni kwandam kwa muten.” Mwawiy, mulong wa chikas cha dikand dia Nzamb, in Isarel awina njit. —Kubudik 17:8-13.

8. (a) Yom ik yasalay Asa payisadinau in Yuda nayimp kudi in Etiopi? (b) Mutapu ik tukutwisha kumwimburij Asa?

8 Yehova wadingaku kand mulong wa kusadin chikas chend cha dikand mulong wakukwash antu end mu machuku ma Mwant Asa. Yisak yivud ya amasalay ayijimbwil mu Bibil, pakwez chisak chijim nakash chading cha Zerak mwin Etiopi, chading cha amasalay 1 000 000 ija kurish njit nawamp. Amasalay inay a mwin Etiopi ading avud nakash kusutamu amasalay a Asa. Ov, Asa wakama, wova wom, ap waziya? Ov makas mend malikumuka? Bwat! Asa wita ukwash kud Yehova kapamp kamwing. Kukwatijan ni chitongijok cha amasalay, chading chikasiken kuyiwin njit amasala a mwin Etiopi. “Yom yawonsu kud Nzamb yikasikenap.” (Mateu 19:26,TMK.) Nzamb wasadina usu  wend mulong ‘wa kuyijip in Etiopi kurutu kwa Asa’ mulong “muchim wa Asa wawonsu wading ching kudi [Yehova] mu machuku ma mwom wend wawonsu.”—2 Jinsangu 14:8-13; 1 Ant 15:14.

9. (a) Mulong wak Nehemiy kimikap kutunguril mbumbu ja Yerusalem? (b) Mutapu ik wakulay Nzamb ku malembil ma Nehemiy?

9 Payay Nehemiy ku Yerusalem, yom ik yatanany? Watana akankuny a ngand yidjing asambishin kal kuyisadin in Yuda nayimp, chawiy imika kutung mbumb ja Yerusalem. Musumb wau wadingap mu diking, chawiy chasala anch in Yuda aziya. Mutapu ik mwovay Nehemy? Ov, niyend waziya ap walikumwisha chikash chend? Bwat! Mud Moses, Asa, ni atushalapol akwau ashinshamena a Yehova, Nehemiy wamuchingejina Yehova. Mu yom mud yiney, Nehemiy wamulembila Yehova chakwel amukwasha ni kupwa Yehova wakula malembil mend. Nzamb wasadina “usu” ni ‘chikas cha dikand’ mulong wa kuyikasikesh in Yuda. (Tang Nehemiy 1:10; 2:17-20; 6:9.) Ukat kwitiyij anch Yehova usadidining ‘usu wend ’ ni ‘chikas chend cha dikand’ mulong wa kuyikasikesh atushalapol end nlel?

YEHOVA UKUKASIKESH MAKAS MEY

10, 11. (a) Mutapu ik ukatay Satan kusal chakwel atulikumwisha makas metu? (b) Yom ik yikatay kusadin Yehova mulong wa kutukasikesh ni kutwinkish usu? (c) Mutapu ik ukata kutaninamu mu mafundish ma Yehova?

10 Tukutwish kwikal nich kashinsh anch Djabul kakutwishap kulikumwish makas mend. Ukudandamen kuturishikish ni kwimik mudimu wetu wa win Kristu. Usadidin makasu ni usu wa mant minam, antekel a chirelijon ni in kupumbok. Chisu chitongijok chend? Ukimbin anch twimika kulejan rusangu ruwamp ra Want. Pakwez, Yehova ukutwish ni ukatin kutukwash ni ukat kutwinkish spiritu wend utumbila mulong wa kutukasikesh. (1 Jinsangu 29:12) Chawiy komb chid cha usey kwit spiritu wa Nzamb chakwel atukwasha kurish ni Satan ni mangand mend mayimp. (Kuseng 18:39; 1 Korint 10:13) Tujikitishin kand mulong wa ukwash udiokila mu Dizu dia Nzamb. Kutong nakash pa yom tukata kwilej ngond ni ngond mu mikand yetu. Mazu madia mu Zekariy 8:9, 13 (tang) amalonda chisu chasambishau kutungiril tempel wa mu Yerusalem, mazu minam mad ma ukwash ni nlel unou.

11 Yehova ukat kutukasikesh kand kusutil ku mafundish mend tukata kutesh ku yikumangan yetu ya win Kristu, ku yitentam ya munyingumuku ni ku yitentam ya rejon ni kand ku shikol yetu ya uteokras. Mafundish minam makutwish kutukwash chakwel tumusadin Nzamb nich yitongijok yiwamp ni kuwanyish nawamp yisend yetu ya win Kristu. (Kuseng 119:32) Ukat kutaninamu mu mafundish minam matulejiningay Yehova?

12. Chom ik tufanyidina kusal chakwel twikal ni usu?

12 Yehova wayikwasha antu end chakwel ayiwin in Amalek ni in Etiopi ni wamwinkisha Nehemiy ni in Yuda akwau usu wa kutung kamu rubumbu ra Yerusalem. Chilik chimwing kand, Nzamb ukutwinkish usu ukutukwasha tudandamena ni mudimu wetu wa kulejan yikalap nchik yakamish, rupompat ni kulik kusanger kwa antu akwau. (1 Pita 5:10) Yehova kakutwishap kupwish milong yetu mu chilay. Pakwez, tufanyidin kusal chom kanang. Mutapu ik? Tufanyidin kutang Dizu dia Nzamb dichuku diawonsu, kurijek ni kuya ku yikumangan yetu rubing rawonsu, kudandamen kwilej dilejan dia muntu panrend ni kusal difukwil dia mu dijuku ni kumuchingejin Yehova mu malembil. Kangal twalikidil chom ap chimwing chituletina kampuw pa yom yikatay Yehova kutwinkish mulong wa kutukasikesh. Anch wasambish kwiyov  anch makas mey masambish kal kulikumuk mu yom yiney, mwita Nzamb chakwel akukwasha. Kupwa tal mutapu spiritu wa Nzamb “usu wa kusal mudi mudia kutenchik kwend.” (Filip 2:13) Ov, ukutwish kukasikesh makas ma antu akwau?

KASIKESH MAKAS MAKIMBINA KULIKUMUK

13, 14. (a) Mutapu ik wamukasikeshau mukadivar umwing wafisha mukajend? (b) Mutapu ik tukutwisha kuyikasikesh antu akwau?

13 Yehova ukat kusadin akadivar ni anambaz adia mu mangand mawonsu mulong wa kutukasikesh. Kambuy Paul walonda anch: ‘Kasikeshany makas men malikumukina, ni manungun mem mazalizadina, endany salal mudi antu endidila mu jinjil jitentamina.’ (Hebereu 12:12, 13) In Kristu avud a kusambish atambula ukwash wa mutapu winou kud akadivar ni anambaz. Chilik chimwing kand ni nlel. Tushinshikinany chilakej chimwing. Pafishay mukadivar umwing mukajend ni pajijamanay ni yakamish yikash, walonda anch: “Ukutwishap kukat anch yom yiyimp yikushikena, ap kwijik chisu chikushikena yom yiney. Malembil ni dilejan dia muntu panrend yikala mud koch wa ruval udjitay muntu chakwel kangal atalal ku mutu. Ni ukwash wa akadivar ni anambaz a mu spiritu wankwasha nakash. Nashikena ku kwijik usey wa kwikal mu urund uwamp ni Yehova kurutu milong yikash yishikena.”

  • Muntu win mwawonsu udia mu chikumangen ufanyidin kuyikasikesh antu akwau (Tal paragraf 14)

14 Aron ni Hur amukwasha Moses kwimik makas mend chisu cha njit jarishau nau in Amalek. Nlel unou kand, tufanyidin niyetu kukimb mitapu ya kuyikwash antu akwau. Akadivar amwing amen mar mulong wa  upal wau, mayej, kuyizengol kud anamakwau, ad an anshon ap afishin kal muntu ukatinau. Tukutwish kand kuyikasikesh ansand arishina yisu yivud mulong wa kusal yom yiyimp ap akimbina kwikal ni katumb ka mangand minam. (1 Tesalonik 3:1-3; 5:11, 14) Sal usu wa kuyisanger antu ku Chot cha Want, mu mudimu wa kulejan, kudia nau pamwing ap kwambamb nau ku telefon.

15. Mazu metu mawamp makutwish kwikal ni usu ik pad akadivar ni anambaz netu?

15 Kupwa kwa Asa kuwin chisak chijim cha amasalay a mwin Etiopi, muprofet Azaria wamukasikesha pamwing ni antu end palonday anch: ‘Pakwez en dandamenany nich usu, ni makas men kangal malikumuka, bwat, mulong akez kakufutany mulong wa yisalijok yen.’ (2 Jinsangu 15:7) Chom chinech chamukasikesha Asa aswimpa yom yivud mulong wa difukwil diakin. Mutapu wawiy umwing, mazu metu mawamp makutwish kuyikasikesh antu akwau chakwel adandamena kumusadin Yehova. (Jinswir 15:23) Kangal niyey kuvuramen mutapu wayikasikesha akadivar ney chisu chiwakula ku yikumangan.

16. Mutapu ik amakurump mukatau kumwimburij Nehemiy? Let yilakej yimekeshina mutapu wakukwashau kud akadivar ni anambaz.

16 Nich ukwash wa Yehova, Nehemiy ni in Yuda akasikesha makas mau. Apwisha kutung rubumbu ra Yerusalem mu machuku 52! (Nehemiy 2:18, 6:15, 16) Nehemiy kayitalangap kwend akwau pasalangau mudimu bwat. Ni ndiy wakwasha mudimu wa kutungiril rubumbu ra Yerusalem. (Nehemiy 5:16) Chilik chimwing kand, amakurump avud akat kumwimburij Nehemiy pakatau kukwash mudimu wa kutung ap kukomb ap kukorop Chot cha Want. Amakundj inay a rukat ayikasikeshining kand akadivar nau anambaz “akweta michim ya wom” pakatau kuyital ni kusal nau mudimu wa kulejan.—Tang Isay 35:3, 4.

“KANGAL WALIKUMUKANY MU MAKAS”

17, 18. Anch tukwet milong ap yakamish, tufanyidin kwikal ni kashinsh ik?

17 Pitukata kusal pamwing ni akadivar ni anambaz netu tukat kukasikesh uumwing wetu. Kutukwashining kand kukasikesh urund ni ruchingej retu mulong wa yiyukish ya mu machuku ma kurutu yikuletau mu Want wa Nzamb. Pitukata kuyikasikesh antu akwau, tuyikwashining chakwel ajijamana mu yisu ya mar ni alama chitongijok chiwamp mulong wa machuku ma kurutu. Chikwau kand, pitukata kuyikwash antu akwau, tukata kukasikesh makas metu ni kutukwashining kutong pa yom ya kurutu.

18 Anch twatong pa mutapu wakwashay Yehova ni walamay atushalapol end ashinshamena pasak, ritiy retu ni ruchingej retu mudiay ndiy rikwikal rikash. Chawiy, anch ukwet milong ni yakamish, “kangal kulikumuk makas mey”! Ukutwish kwikal nich kashinsh anch, ang wamulembil Yehova mulong akukwasha, chikas chend cha usu chikukukasikesh ni chikukuletin yiyukish ya Want ya mu machuku ma kurutu.—Kuseng 73:23, 24.