Yang pafundinau anch yidiamu

Yang pafundinau anch sou-meni

Yang pafundinau anch yidiamu

Atuman a Yehova

Uruund

Chinong cha Kalam  |  Ngond wa 9 , 2016

En Anvaj, Yikwashany Anen Chakwel Akasikesha Ritiy Rau

En Anvaj, Yikwashany Anen Chakwel Akasikesha Ritiy Rau

“Ansangarum nau ayangadim . . . Ashimana dijin dia [Yehova].”—KUSENG 148:12, 13.

MIMINY: 41, 48

1, 2. (a) Mulong wak chiyikasikedining anvaj kuyifundish anau chakwel ateka ritiy rau mudiay Yehova, ni mutapu ik ukutwishau anvaj kusal mwamu? (b) Yom ik yinying tukwisambina katat?

MAKU umwing ni tatuku adia mu France alonda anch: “Tumwitiyijining Yehova, pakwez chinech chirumburikinap anch anetu niyawiy akumwitiyij. Mulong ritiy chidiap chom chikatau kuswan. Anetu akat kwikal ni ritiy pakemp pakemp.” Mukadivar udia mu Australie wafunda anch : “Mulong wa kuyikwash aney akasikesha ritiy rau chiding chom chikash ukutwisha kurish nich.” Walonda kand anch: “Ukutwish kuman anch chikasikening kwakul ku chipul chisangareshina cha mwaney. Ukutwish kujingunin anch ukat kuchirikin chipul chimwing tupamp tuvud! Yakul yikutwisha kumusangaresh mwaney nlel yikutwishap kand kumusangaresh dichuku dikwau.” Payilau an ni kupam, anvaj avud amening anch afanyidin kuyirumburil anau yom yawiy yimwing tupamp tuvud. Ni amening anch afanyidin kusadil mitapu kushalijan chakwel ayifundisha anau mulong wa kumukat Yehova.

2 Anch ud nvaj, yisu yimwing ukat kwiyipul mutapu ukutwisha kamu kuyifundish aney chakwel amukata Yehova ni adandamena kumusadin, ap anch apam? Chakin kamu, kwikil muntu ap umwing ukutwisha kuwanyish yom yiney amwinend. (Jeremiy 10: 23) Chawiy komb, tufanyidin kumuchingejin Yehova chakwel atukwasha. Ukat kuyinkish anvaj ukwash uwanyidina. Mutapu ik ukutwisha kuyikwash aney? (1) Yijika nawamp. (2) Yifundisha yom yidiokila mu muchim wey piur pa Yehova. (3) Sadin yilakej. (4) It spiritu utumbila mu malembil ni ikal mwin kushimpish muchim mulong wa aney.

YIJIKA ANEY NAWAMP

3. Mutapu ik ukutwishau anvaj kwimburij mutapu wafundishay Yesu in kwilej end?

3 Yisu yivud Yesu wayipulanga in kwilej end piur pa yom yitiyijau. (Mateu 16:13-15) Ukutwish kwimburij chilakej chend. Piwambabina ni aney ap piusadinanya mudimu pamwing, ukutwish kuyipul yom yitonginau ni yitesha akuleja yom yitonginau kamu. Ov, akat kwidjidjek pamwing ap? Mukadivar umwing ukweta mivu 15 udia mu Australie walonda anch: “Yisu yivud tatuku ukat kwisamb niyam piur pa ritiy ram ni winkwashining nitongijoka. Ukat kwingipul anch: ‘Yom ik yilondinay Bibil?’ ‘Ukat kwitiyij yom yilondinay Bibil?’ ‘Mulong wak ukat kuyitiyij?’ Ukatining anch nakula mu mutapu wam wa kulond ni kakatiningap nichirikin yom yikatay kulond ndiy ap maku. Piniyila mu kupam, nikat kuwapish mutapu wam wa kwakul.”

4. Mulong wak chidia cha usey kushimpish muchim ni kwakul yipul ya aney? Let chilakej.

4 Anch aney kakatap kwitiyij kapamp kamwing yom yimwing yifundishinay Bibil, shimpish muchim. Yikwasha atana yakul ku yipul yau. Tatuku umwing walonda anch: “Ufanyidin kukwat yipul ya aney nich usey. Kangal wayipipej ap kuyiman mud yidiap ya usey ni kangal walik yom yikulejinau yikutwisha kukwovish kuyimp.” Chid cha usey anch aney akat kukwipul, mulong chinech chimekeshin anch akatining kwijik. Yesu niyend padingay mwanikanch wipulang yipul. (Tang Luka 2:46.) Nsand umwing udia mu Danemark walonda anch: “Pinikata kwiyipul anch tud kamu mu relijon wakin, anvaj am ateshining kamu—ap anch akutwish kwiyakamish piur pam. Akat kwakul yipul yam yawonsu mu kusadin Bibil.”

5. Ap anch an amekeshin anch amwitiyijin Yehova, anvaj afanyidin kusal ik?

5 Yijika aney nawamp. Kangal watong anch atekin ritiy rau mudiay Yehova mulong ayiling mu mudimu wa kulejan ni ayiling ku yikumangan. Mutapu ik mwiyovilingau piur pa Yehova ni yom ik yitonginingau piur pa Bibil? Ukujingunin nawamp anch kud chom chimwing chikusala anch chiyikasikena kwikal ashinshamena kud Yehova. Isambang nau aney dichuku diawonsu piusadining nau pamwing chom kanang. Lembil mulong wa aney, anch ud nau pamwing ap anch ud amwiney.

YIFUNDISHA YOM YIDIOKILA MU MUCHIM WEY PIUR PA YEHOVA

6. Anch anvaj adandamen kwilej piur pa Yehova ni kwilej Bibil, mutapu ik ukutwisha yom yiney kuyikwash kufundish anau?

6 Antu asangerang kumutesh Yesu mulong wamukata Yehova ni wading wij nawamp Bibil. Antu inay iyova kand anch Yesu wayikata. Chawiy chasala anch amutesha kamu nawamp. (Luka 24:32; Yohan 7:46) Chilik chimwing kand, anch aney aman anch umukatining Yehova, chawiy chikuyikwasha niyawiy amukata. (Tang Kuvurik Yijil 6:5-8; Luka 6:45.) Chawiy, dandamen kwilej kamu Bibil ni kutang mikand yetu chisu chawonsu. Sal usu wa kwijik yom yivud yatangay Yehova. (Mateu 6:26, 28) Piwijikina yom yivud piur pa Yehova, ukutwish chad kuyifundish kamu aney piur pend.—Luka 6:40.

7, 8. Anch wilej chom chimwing piur pa Yehova, chom ik ufanyidina kusal? Mutapu ik wasalau anvaj amwing mwamu?

7 Anch wilej chom kanang piur pa Yehova, yilejach aney. Ufanyidin kusal mwamu chisu chawonsu, kangal kuchingel ching piurijekinanya yikumangan ap chisu cha kwifukwil mu dijuku. Mwawiy musadiningau tatuku  umwing ni maku adia mu États-Unis. Isambining ni anau piur pa Yehova anch aman chom chiwamp chatangau ap chisu chovilingau musangar padilingau. Alondin anch “Tukat kuyivurish anetu piur pa rukat ni kuyilej yitongijok ya Yehova mulong wa chom chin chawonsu chatusadinay.” Ambay a uruw amwing adia mu Afrique du Sud akatining kwambamb ni ayangadim au piur pa yom yatangau pasadiningau mudimu mu chir chau. Chilakej, akatining kwambambin piur pa mutapu ukata ntit kuminy chakwel jikala mutond. Anvaj inay alonda kand anch: “Tusadining usu wa kuyilej ayangadim etu mutapu wa kwikal ni kalimish mulong wa mwom ni mutapu ukata kusadik mwom winou.”

8 Tatuku umwing udia mu Australie wamusenda mwanend ikundj ukweta mivu dikum, waya nend mu musée. Tatuku winou wasadina chisu chinech mulong wa kumukwash mwanend akasikesha ritiy rend ni ijika anch Yehova ud Sakatang. Walonda anch: “Twamana yipich ya yitang yimwing yikur yading mu karung yitazukinau anch ammonites ni trilobites. Twamana anch annam inay ading awamp, ashimokishena, ni ajim nakash—kusutamu annam atumena nlel. Chawiy anch kachom kakemp kakweta mwom kakat kukarumuk kwikal chom chijim, mulong wak yitang yiney yading yijim? Dined diading dilejan diwamp diasangaresha ni twambamba ni mwanam.”

SADIN YILAKEJ

9. Mulong wak chid chiwamp kusadin yilakej? Chilakej ik chasadinay maku umwing?

9 Yisu yivud Yesu wasadinang yilakej. Wafundisha malejan ma usey mu kurumburil rusangu ap mu kusadin yilakej. (Mateu 13:34, 35) Anch wasadin yilakej, umukwashin mwaney chakwel asadin yitongijok. Yom yiney yikuyikwash atongin pa yom ukata kuyifundish ap kuyitesh nawamp, ni kuyivurik. Akusanger kand kwilej. Chilakej, maku umwing udia mu Japon wakata anch anend ansand aad ileja mutapu wasalay Yehova rinkind wa pa divu umekeshina anch utukatin. Nsand umwing wading ni mivu chinan mukwau ni mivu dikum. Chawiy wasadina chilakej chijikay anch akutesh kulondulijan ni mivu yau. Wayinka ansand inay mayel, sigir, ni kafe. Kupwa wayileja ansand inay kusal kafe. Urumburil anch “Asala kamu nawamp, chisu chinayipula anch mulong wak wasalany kal nawamp mwamu, awiy akula anch twakatang kamu kafe winou ikala mutapu ukatining. Nayirumburila anch Nzamb wabwomba ma gaz mu rinkind mud muwasalana kal omu —mulong wetwetu.” Ansand itiyija dilejan dined pakad kulab, ni kand kal adivuramenang!

Ukutwish kusadin yilakej yiswapela mulong wa kuyilej aney anch kuding Sakatang (Tal paragraf wa 10)

10, 11. (a) Chilakej ik ukutwisha kusadin mulong wa kuyilej aney anch kud Sakatang? (Tal chipich cha kwinsambishin.) (b) Yilakej ik ufanyidina kusadin?

10 Chilakej ik ukutwisha kusadin mulong wa kuyilej aney anch kuding Sakatang? Ukutwish kwosh mukat pamwing ni mwaney mu kusadin yom yawonsu yoshiningau nich mukat. Murumburila mulong wak chid cha usey kusadin yom yiney nawamp. Mwinkisha mwaney mupach ap dibuj dikwau ni mwipula  anch: “Wij anch mu mupach winou atekamu yom yiutadishina?” Kupwa baril mupach ni mwinkisha mus. Murumburila anch mus winou ud mud chom chilejena mutapu wa kwisuk. Ulejen yom yifanyidina kulondul mulong twikal ni mupach. Pakwez winou ukwet yom yivud yifanyidina kulondul kulik mukat. Ukutwish kumulej anch: “Kud muntu wafunda mutapu wa kusal mukat. Chawiy nany walejena mutapu wa kusal anch kwikal mupach?” Anch an apamin kal, ukutwish kuyirumburil anch mbil mulong wa kwikalaku kwa mutond wa mupach ukutwisha kusongish mipach jivud yidi mu ADN udia mu mus. Ukutwish kuyilej yipich yimwing ni yilakej yidia pa paj wa 10 kushik pa paj wa 20 wa broshir wetu ukweta mutu wa mulong ulondina anch Cinq questions—à se poser sur l’origine de la vie.

11 Anvaj avud akat kutang mitu ya milong yidia mu Réveillez-vous! yilondina anch: “Hasard ou conception?” pamwing ni anau. Anch anau achidi an akemp, anvaj akutwish kuyirumburil jinsangu mu mutapu uswapela. Chilakej, ambay a uruw amwing adia mu Danemark akat kufanikesh avion ni atujil. Alonda anch: “Avion ukat kutwik mud atujil. Avion ukat kwomb may mulong wa kwikal ni tu ma avion tukemp tukemp? Ov, atujil akwet kuswir kwa ndond ya kushirikin anch atwik? Mutapu ik ukutwisha kufanikesh masok ma avion ni mutapu ukatau kuwang atujil? Muntu wasala avion—ni Sakatang wa atujil, nany ukweta manangu nakash pakach pau?” Anch ukat kutong pamwing ni aney ni ukat kuyipul, ukuyikwash chakwel asadina ‘usu wau wa kutong’ ni ukukasikesh ritiy rau mudiay Yehova.—Jinswir 2:10-12.

12. Mutapu ik ukutwisha kusadin yilakej mulong wa kuyifundish aney anch yom yilondinay Bibil yiding yakin?

12 Ukutwish kusadin yilakej mulong wa kuyifundish aney anch yom yilondinay Bibil yid yakin. Chilakej, ukutwish kuyitangin mukand wa Job 26:7. (Tang.) Kangal wayilej aney ching kusu anch jinsangu jidia mu verse winou jidiokil kudiay Yehova. Pakwez, yikwasha chakwel asadina manangu mau. Ukutwish kulond anch antu a pa chirung cha Job kitiyijap anch divu diading mu rinkind. Ijika anch chom chin chawonsu chading mud ndundu ap diyal chading chishich pa ndond kanang. Pa chisu chinicha, kwikil muntu ap umwing wading wija kamu anch divu diading mu rinkind, mulong kwadingap yom ya kutal nich mud télescopes ap vaisseaux spatiaux. Dilejan did anch ap anch Bibil amufunda kwasutin kal mivu yivud, yisu yawonsu uding ching wakin mulong wadiokala kudiay Yehova.—Nehemiy 9:6.

YIFUNDISHA MULONG WAK CHIWAPIN KWIKAL ATAKENDINAU KUD BIBIL

13, 14. Mutapu ik ukutwishau anvaj kufundish anau chakwel aziyina ku yom yilondinay Bibil?

13 Chid cha usey kand kuyifundish aney anch akwikal ni musangar anch aziyin ku yom yilondinay Bibil. (Tang Kuseng 1:1-3.) Chilakej, ukutwish kuyilej aney chakwel atonga mud ad pa matung. Atonda antu akushakamau nau pinipa. Chad ukutwish kuyipul anch, “Antu a mutapu ik akutwishau kutond chakwel ushakam nau chisu chilemp?” Kupwa, ukutwish kutang Galatia 5:19-23 mulong wijika antu a mutapu ik akatinay Yehova kushakam nau mwingand yisu.

14 Mu mutapu winou, ukuyifundish aney malejan ma usey. Cha kusambish, Yehova ukat kutufundish mutapu wa kwikal ni musangar nlel unou ni mutapu wa kwikal mu chisambu ni antu akwau. Cha kaad, Yehova ukat kutufundish mutapu wa kushakam mwingand yisu. (Isay 54:13; Yohan 17:3) Ukutwish kand kuyilej aney mutapu Bibil wayikwashay akadivar netu. Chilakej, tond rusangu ra mwom ridia mu mikand yetu, pamwing ap mu mitu ya milong yilondina anch “Bibil Ukat Kuswimp Mwom ya Antu” yidinga mu Chinong cha Kalam. Ap mwipula muntu umwing wa mu chikumangen chen akuleja  ey nau aney mutapu Bibil wamukwasha aswimpa chakwel amusangaresha Yehova.—Hebereu 4:12.

15. Yom ik yikukukwasha chakwel uyifundisha aney?

15 Sadin manangu mey mulong wa kusal anch malejan uyifundishina aney mikala masangareshina ni ma chirungul. Tongin pa mitapu kushalijan mulong wa kuyikwash aney chakwel asangera kwilej piur pa Yehova ni amusejina piswimp. Ni dandamen kusal mwamu djat ni pakupamau. Tatuku umwing walonda anch “kangal waziy kusadin mitapu yisu mulong wa kwisamb nau pa ndond pa kusadin mitapu yikur.”

MWITA YEHOVA SPIRITU WEND NI SHIMPISH MUCHIM MULONG WA MWANEY

16. Anch uyifundishin aney, mulong wak chid cha usey kushimpish muchim? Mutapu ik washimpishau anvaj amwing michim?

16 Nich ukwash wa spiritu wa Yehova, aney akwikal ni ritiy rikash. (Galatia 5:22, 23) Pakwez, chitining chisu mulong wa ritiy rau rikal rikash. Chawiy, shimpish muchim mulong wa aney ni dandamen kuyifundish. Tatuku umwing udia mu Japon ukweta an amakundj nau amband walonda anch “Am ni mukajam tukat kuyishinshikin anetu nakash. Kudiosh padingau anikanch nilejang nau mu aminit 15 dichuku diawonsu kudioshaku ching machuku ma yikumangan ya win Kristu. Ma minit dikum ni matan matukasikenap kwisamb nau.” Kalam umwing wa munyingumuku walonda anch: “Pinadinga nsand nading ni yipul yivud ap, nading ni kutadik mu mutapu wam wa kulond. Yisu yimwing, yipul yiney ayisambinanga ku yikumangan, mu dijuku ap mu dilejan dia muntu panrend. Chawiy chidia cha usey kud anvaj kudandamen kuyifundish anau.”

Mulong wa kwikal mulej muwamp, ufanyidin kukat Dizu dia Nzamb (Tal paragraf 17)

17. Mulong wak chid cha usey anch anvaj akasikesha ritiy rau? Mutapu ik maku ni tatuku umwing adia mu Bermudes mwayikwashau anau amband kwikal ni ritiy mudiay Yehova?

17 Chid chakin, aney akutwish kwilej yom yivud anch aman anch ukwet ritiy rikash mudiay Yehova. Amening yom yiusadining. Chawiy dandamen kukasikesh ritiy rey. El amboku aney amana patok mutapu udiay Yehova murund ney wa piswimp. Chilakej, piyakamishay maku umwing ni tatuku adia mu Bermudes, alembila pamwing ni an au ayangadim ni amwita Yehova chakwel ayikwasha. Ayikasikesha kand anau kulembil ayinau. “Twamuleja kand mwanetu mband mukurump anch, ‘muchingejina kamu Yehova, ipana nakash mu kusal mudimu wa Want, ni kangal wiyakamish nakash.’ Pamanay yibudikin, wijika anch Yehova watukwashang. Yom yiney yakasikesha ritiy rend mudiay Nzamb ni mu Bibil.”

18. Anvaj kafanyidinap kuvuramen yom ik?

18 Anvaj, kangal wavuramenany anch ufanyidinanyap kuyishindil anen mulong ikala ni ritiy. En ukuninany ni wichidinany mem, pakwez Yehova amwinend ndiy ukupamisha. (1 Korint 3:6) Chawiy salany usu wa kufundish anen akweta usey piur pend, ni itany spiritu wend chakwel ayikwasha ikala ni ritiy. Ukwikalany ni kashinsh anch Yehova ukuyukish usu wen wawonsu usadinanya.—Efes 6:4.